“Kico e Triangulo Biña Ta nifica?”

“UN PAR di dia pasa mi a haya un ehemplar di E Toren di Vigilancia serca un Testigo di Yehova”, un ambtenaar cu ta traha na ministerio di husticia na Seul, Republica di Corea, a skirbi. El a sigui bisa den su carta: “Lesando e revista mi a haya sa algun punto tocante e persecucion di Testigonan di Yehova bou di e regimennan nazi y comunista. Pero mi tin un pregunta. E potret riba portada ta mustra Testigonan di Yehova cu un triangulo biña cabes abou na e banda robes di nan jas. Kico e triangulo biña ta nifica?”

Testigonan di Yehova na Alemania bou di e regimen nazi a nenga di bisa e saludo “Heil Hitler”, y nan a mantene un posicion neutral relaciona cu cuestionnan politico y militar. Pues, e nazinan a persigui nan cruelmente, y a encarsela rond di 12.000 Testigo pa diferente periodo di tempo den prizon- y camponan di consentracion. Mas o menos 2.000 di nan a muri, di cua centenares pa medio di ehecucion.

Kico e triangulo biña riba nan uniform di prizon a nifica? E buki Anatomy of the SS State (Structura di e Estado SS) ta splica: “E varios categorianan di preso den e camponan [nazi] tawatin marcanan special pa identifica nan.” “E sistema standarisa di pone marca di identificacion cu a wordo introduci prome cu e guera tawata consisti di un pida tela triangular cosi riba e uniform di cada preso. E color a depende di su categoria: pa presonan politico, cora; pa Testigonan di Yehova, biña; pa antisocialnan, preto; pa criminalnan, berde; pa homosexualnan, ros; pa imigrantenan, blou. Hudiunan mester tawatin fuera di e triangulo di color, un triangulo geel cosi riba e triangulo di color di tal manera cu e ta forma e Streya di David di seis punta.”

Profesor John K. Roth a skirbi den su buki Holocaust Politics (Politica di Holocausto): “Si hende di tur parti corda e les di e triangulo biña, esta, di para firme pa loke ta corecto, esei por proteha nos di causa un desaster den futuro y e por guia nos pa actua den un bon manera cu ta merece e respet profundo di tur hende.” Testigonan di Yehova a produci un documentario cu a wordo premia y cu tin e titulo Testigonan di Yehova Ta Para Firme Contra Atake Nazi. Pakico bo no ta pidi un Testigo di Yehova haci areglo pa bo por wak e video aki?