Pueblonan Isola di Bolivia Ta Tende Bon Nobo

NOS tawata un grupo di mas o menos 20 persona cu a bini hunto na oriya di un riu, anticipando ansiosamente un biahe di un dia durante cua nos ta subi bai cu boto den e riu pa bishita pueblitonan mas ariba. Nos ta na pia di Andes, caminda e riu Beni ta yega na e yanuranan inmenso di e cuenca (vaye) di Amazona. E luga ta un preciosidad.

Pero nos no ta turista. Algun di nos ta hendenan local; varios di nos a bini for di stadnan leu pa biba aki na Rurrenabaque, un pueblito bunita cu hopi palo tur na flor, cas cu dak di yerba y cayanan riba cua de bes en cuando ta pasa un motocicleta cu ta sirbi como taxi. Pakico nos ta haciendo e biahe aki?

Loke ta sosodiendo aki ta tipico di loke ta tumando luga den hopi otro parti di Bolivia. Testigonan di Yehova cu ta bini di stad y otro paisnan ta hibando e bon nobo di e Reino di Dios na e pueblitonan.—Mateo 24:14.

Bolivia ta situa den curason di Sur America. Na teritorio, e pais ta dos biaha mas grandi cu Francia, pero e tin poco mas cu un decimo parti di su poblacion. Mayoria habitante di Bolivia ta biba sea den e stadnan y pueblonan minero na halturanan impresionante of den e centronan di agricultura di e vayenan. Sinembargo, den e areanan tropical mas abou, mondinan inmenso ta pone cu hopi pueblo ta keda isola.

Den añanan ’50 y ’60 di siglo pasa, misioneronan yen di curashi  manera Betty Jackson, Elsie Meynberg, Pamela Moseley y Charlotte Tomaschafsky a encabesa e obra den hopi pueblo isola. Nan a siña hende sinsero e berdad di Bijbel y a yuda establece congregacionnan chikito. Durante añanan ’80 y ’90, tawatin un aumento di seis biaha mas tanto Testigo di Yehova, principalmente den e stadnan. Awor tin congregacion den cada bicindario. Bo por haya nan den e districtonan prospero, caminda hende ta traha den complehonan di oficina di varios piso, ta biba den mansionnan elegante y haci compra den supermercado. Pero tambe tin congregacionnan den e barionan mas pafo, caminda hende ta biba den hutnan di bloki klei, ta haci compra den plasanan den aire liber y ta bisti nan trahenan tradicional colorido. Pero kico por ser haci pa yuda mas hende den areanan isola yega na conoce Yehova?

Nan A Sacrifica e Comodidad di Bida di Stad

Durante e ultimo dos decadanan, hopi Boliviano a muda for di e pueblonan minero y di interior di e pais bai e stadnan. No ta usual cu un hende ta dicidi di muda den e direccion contrario, esta, di stad pa pueblo. Hopi pueblo tin solamente un telefon y nan tin coriente pa un par di ora so pa dia. E Testigonan cu ta biba den e pueblonan chikito aki kisas ta mira nan rumannan spiritual solamente na congresonan anual, y biahamento pa congreso por ta caro, peligroso y agotador. Scolnan den e pueblonan aki ta ofrece solamente enseñansa basico. Kico anto ta motiva un cantidad di Testigo di Yehova pa muda di stad pa bai biba den pueblo?

No hopi tempo pasa Luis a bisa: “Mi tawatin e oportunidad pa sigui un carera den e stad di La Paz. Pero semper mi mayornan a papia di e trabou di haci disipel como e carera di mas deseabel. Pesei mi a sigui un curso cortico den metodonan di construccion. Durante un vakantie na Rurrenabaque, mi a ripara cu e hendenan ta ansioso pa scucha e bon nobo. Ora mi a mira con tiki ruman homber tawatin einan, mi a sinti un obligacion pa bin yuda. Awor mi ta conduciendo 12 estudio di Bijbel. Por ehempel, mi ta studia cu un yoncuman y su casa cu tin cuater yiu. E yoncuman tawata bebe pisa y hunga placa, pero el a stop cu tur esei y el a cuminsa papia cu su amigonan di loke e ta siñando tocante Yehova. Semper e ta prepara su les. Ora e mester bai kap palo den mondi pa tres of cuater dia largo, e ta sinti su mes malo pasobra e no kier perde nada. Ora mi mira nan tur na reunionnan cristian, mi ta sinti cu e sacrificio pa a bini aki tawata bale la pena.”

 Juana ta un mayor soltero. E ta bisa: “Mi tawata traha como cria di cas na La Paz. Ora mi yiu homber tawata chikito, mi a drenta e sirbishi di tempo completo den stad. Dia mi a bishita Rurrenabaque un biaha, mi a realisa cuanto mas lo mi por a haci door di muda bin aki. Pues nos a bini, y mi a haya un trabou como cria. Na principio tawata dificil pa soporta e calor y e insectonan. Pero ya nos tin shete aña aki caba. Mi por conduci hopi estudio di Bijbel pa siman y hopi studiante ta demostra nan aprecio door di asisti na e reunionnan.” Juana cu su yiu homber ta den e grupo cu ta subi bai ariba cu boto den e riu. Bo ta bonbini pa compaña e grupo.

Subiendo cu Boto den e Riu

Segun cu nos ta subiendo, rumbo pa e pasada smal entre e seronan, e motor di e boto ta haci bastante bochincha. Un grupo di lora ta grita, como si fuera pa protesta contra nos presencia. E awanan trubel procedente di e seronan ta bini abou cu hopi forsa, pero esun cu ta na timon sa bon con pa dirigi e boto pa e bai contra coriente. Parti mainta mes nos ta desembarca na un pueblito. Ei nos ta topa un superintendente di e Congregacion di Rurrenabaque, y e ta mustra nos unda pa predica.

E hendenan ta ricibi nos hospitalariamente, sea bou di e sombra di un palo of paden di un cas traha di bambu cubri cu rama di palma. Despues di un rato nos ta mira un pareha jong ta primi caña den un artefacto di palo traha localmente. Juice ta basha den un conchi di coper. Mas laat nan lo herbe e juice te ora e bira un stropi maron cu nan por bende den e pueblo. Nan ta invita nos pa drenta den nan cas y nan ta haci hopi pregunta tocante Bijbel.

Nos ta sigui subi cu boto den e riu, predicando di un pueblito pa otro. Hopi hende ta keda masha contento ora nan tende loke Bijbel ta bisa tocante fin na enfermedad y morto. (Isaias 25:8; 33:24) Aki, caminda no tin mucho cuido medico, mayoria famia a pasa den e experencia amargo di perde un yiu. E bida di depende solamente di loke nan planta y pisca ta duro y insigur. Pues, hopi ta haya e promesa di Dios registra na Salmo 72 tocante un gobierno cu lo elimina pobresa masha interesante. Pero, bo ta kere cu personanan interesa cu ta biba na luganan isola asina lo haci e esfuerso pa asisti na reunionnan cristian? Eric cu Vicky, dos sirbido di tempo completo na Santa Rosa, un careda di  tres ora mas aleu den e cuenca di Amazona, tambe a haci nan mes e pregunta ei.

E Personanan Interesa Lo Bini?

Eric cu Vicky ta di California, Merca, y 12 aña pasa nan a bini Bolivia. Un superintendente biahero a sugeri nan pa muda bai Santa Rosa. Vicky ta bisa: “Tin apenas dos telefon den e pueblo y no tin acceso na Internet. E luga tin un naturalesa rico. Hopi bes ora nos bishita areanan aleha riba nos motocicleta nos ta mira caiman, abestrus y colebra grandi. Pero mas interesante cu bestia ta e hendenan. Nos ta studia Bijbel cu famia Vaca, un pareha jong cu tin cuater yiu chikito. Nan ta biba den careda di 26 kilometer pafo di e pueblo. E tata tawata un burache, pero awor el a cambia. Tur siman e ta bai Salon di Reino cu henter su famia y su ruman mohe mas jong. E ta transporta su casa y baby riba e luga di ekipahe di su bais grandi. Su yiu di nuebe aña ta bai cu su ruman mohe chikito riba un otro bais, y esun di ocho aña ta bai riba su mes bais. Ta tuma nan tres ora pa yega reunion.” E famia ta echt stima Yehova y ta haci tur esfuerso pa asocia cu e congregacion.

Den apenas 18 luna, 3 persona a cualifica pa bautismo, y rond di 25 ta bai e Salon di Reino nobo na Santa Rosa. Aunke tin bastante hende cu kier studia Bijbel, hopi tin cu supera obstaculonan formal pa por sirbi Yehova.

E Desafio di Legalisa Matrimonio

Marina cu Osni, misioneronan cu ta sirbiendo den un pueblo isola pega cu e frontera entre Bolivia cu Brazil, ta splica cu aki hopi hende no ta mira matrimonio como un laso permanente. Nan tin varios partner. Osni ta bisa: “Esaki ta un problema cu ta stroba progreso spiritual. Ora hende kier bira cristian berdadero, nan tin cu pasa den un proceso complica y costoso. Algun tin cu regla asuntonan relaciona cu nan partnernan anterior y despues casa pa lei. No obstante, reconociendo cu Bijbel ta manda pa registra matrimonio debidamente, algun a traha realmente duro pa gana e placa necesario pa paga e gastonan di gobierno.”—Romanonan 13:1, 2; Hebreonan 13:4.

Marina ta conta e experencia di Norberto. “Norberto tawata biba cu varios hende mohe prome cu el a bai biba serca un mohe cu tawata panadero. E señora tawata un 35 aña asina mas jong cu ne y tawatin un yiu homber cu Norberto a cria. Segun cu e mucha tawata crece, Norberto kier tawata un mihor ehempel p’e. Pues ora un Testigo a bishita e panaderia y a ofrece un estudio di Bijbel, Norberto a acepta, aunke e no por a lesa y ya tawatin mas cu 70 aña di edad. Ora Norberto cu su partner a siña tocante e rekisitonan di Yehova, nan a casa pa lei y despues a batisa. E mucha homber a bira un hoben cristian responsabel—exactamente loke su tata di criansa a spera cu lo a sosode. Norberto a siña lesa, y asta el a duna discurso na reunionnan di congregacion. Apesar cu e ta bastante debil pa motibo di su edad, e ta un predicado entusiasma di e bon nobo.”

Cu Poder di Yehova Su Spirito

Hesus a bisa su prome siguidonan: “Boso lo ricibi poder ora spirito santo bin riba boso, y boso lo ta mi testigonan . . . te na e parti mas aleha di mundo.” (Echonan 1:8) Ta un animacion pa mira con e spirito di Dios ta motiva homber- y mohenan cristian pa muda bai luganan leu! Por ehempel, na 2004 mas o menos 30 cristian celoso a acepta asignacionnan temporal pa bai teritorionan isola como pionero special. Nan ta masha gradicido pa e ehempel  di rond di 180 stranhero cu a bini Bolivia pa sirbi como pionero, superintendente di sircuito, boluntario di Betel of misionero. E 17.000 publicadonan di Reino na Bolivia ta conduci rond di 22.000 estudio di Bijbel den casnan di hende interesa.

E echo cu tur e rumannan aki ta conciente cu ta Yehova su spirito ta guia nan, ta yena nan cu hopi goso. Por ehempel, Robert cu Kathy a acepta un asignacion como misionero na Camiri. Situa entre seritonan berde pega cu un riu, semper Camiri tawata un pueblo isola. Robert ta bisa: “Ta parce cu nos a yega net na tempo. Den dos aña, rond di 40 persona a bira publicado di e bon nobo.”

Un Burache Bicia na Wega di Placa Ta Scucha

Hopi hende di e pueblonan aki ta keda impresiona cu e cambionan cu esnan cu ta studia Bijbel a haci. Por ehempel, riba un dia, mas o menos cuater aña pasa, un burache cu yama Ariel tawata drumi riba cama pa saca su wayaba. Aunke su hungamento di placa a hacie popular, constantemente e tawata precupa cu su debenan enorme, problema di matrimonio y yiu mohenan neglisha. Un Testigo di Yehova cu tawata predica di cas pa cas a interumpi su pensamentonan. Ariel a scucha atentamente segun cu e ruman tawata splica e Scritura. Pronto Ariel a bai riba cama atrobe, pero e biaha aki, pa lesa tocante felicidad den bida di famia, Paradijs y sirbishi na Dios. Despues el a bai di acuerdo pa studia Bijbel.

Pa e tempo cu e misioneronan a yega Camiri, e esposa di Ariel cu yama Arminda, tambe tawata studia—pero sin mucho smak. Arminda a bisa: “Mi ta dispuesto pa purba tur cos pa e stop di bebe. Pero mi ta duda cu esei ta yuda. E ta un caso perdi.” Sinembargo, e estudio di Bijbel tawata mas interesante cu Arminda a verwacht. Den un aña, el a batisa y tawata predica na su famia. No a dura masha cu varios di su famianan a dedica nan bida na Yehova.

Pa loke ta Ariel, e tawatin un lucha pa stop di bebe, huma y hunga placa. E punto crucial a bini ora el a invita tur su amigonan pa e Memorial di e morto di Hesus. Anto el a bisa den forma dicidido: “Esun cu no bin, no ta mi amigo mas. Anto esun cu bin lo mi studia Bijbel cu ne.” Den e manera ei el a cuminsa tres estudio di Bijbel. Asta prome cu Ariel a bira miembro di e congregacion, el a studia Bijbel cu un famia di dje cu a progresa y batisa riba e mesun dia cu ne. Arminda ta bisa: “Ta como si fuera e Ariel di antes no ta existi mas.”

Robert ta informa: “Segun e ultimo conteo, 24 miembro di e famia aki tawata asisti na e reunionnan regularmente. Dies ta batisa, y ocho ta publicado no batisa. Algun hende cu a observa e cambio den nan conducta tambe a cuminsa studia Bijbel y ta asistiendo na e reunionnan di congregacion. E asistencia a aumenta for di 100 pa 190. Ami cu Kathy ta conduciendo mas o menos 30 estudio di Bijbel, y nan tur ta asisti na reunion. Nos ta hopi contento di por ta aki.”

Loke ta sosodiendo den e pueblonan isola di Bolivia ta djis un parti chikito di un recohemento mundial cu a ser profetisa den Revelacion capitulo 7, den cua nos ta lesa con hende cu lo sobrevivi e tribulacion grandi lo ser recohi durante “e dia di Señor.” (Revelacion 1:10; 7:9-14) Nunca prome den historia humano miyones di hende di tur nacion a ser uni den adoracion di e unico Dios berdadero. Ki un evidencia emocionante cu e promesanan di Dios ta asina serca di cumpli!

[Plachi na pagina 9]

Betty Jackson

[Plachi na pagina 9]

Elsie Meynberg

[Plachi na pagina 9]

Pamela Moseley

[Plachi na pagina 9]

Charlotte Tomaschafsky, full na man drechi

[Plachi na pagina 10]

Tur siman famia Vaca ta biaha tres ora riba bais pa bai Salon di Reino

[Plachi na pagina 10]

Eric cu Vicky a bini pa sirbi caminda tin necesidad pa mas publicado di Reino

[Plachi na pagina 11]

E hendenan di pueblo cu ta biba banda di riu Beni ta scucha atentamente na e bon nobo

[Plachi na pagina 12]

Robert cu Kathy ta sirbi como misionero na Camiri