Ken Ta e Cristiannan Berdadero?

“CRISTIANISMO ta existi solamente caminda e recuerdo di Hesucristo ta bibo den teoria y practica.” (On Being a Christian) Cu e palabranan ei, e teologo Suiso Hans Küng a establece un berdad cu ta papia pa su mes: Berdadero cristianismo ta existi solamente caminda hende sinsero ta practica e siñansanan di Hesus.

Awor kico nos por bisa di hende of institucionnan cu ta pretende di ta siguido di Cristo pero cu en realidad no ta practica su siñansanan? Hesus mes a bisa cu hopi lo pretende di ta cristian. Nan lo referi na varios cos cu nan a haci pa mustra cu nan a sirbie, bisando: “Nos no a profetisa den bo nomber, y den bo nomber a saca demoño, y den bo nomber a  haci hopi milager?” Pero con Hesus lo reacciona? Su contesta ta mustra kico e ta pensa di nan: “Nunca mi no a conoce boso; bai for di mi, boso cu ta haci inikidad.”—Mateo 7:22, 23.

Esaki ta un spiertamento serio pa ‘hacidonan di inikidad’ cu ta pretende di ta siguido di Hesus! Laga nos considera dos condicion fundamental cu hende tin cu cumpli cu ne pa Hesus por reconoce nan como cristian berdadero, y no rechasa nan como hacido di inikidad.

“Si Boso Tin Amor Un pa Otro”

Un di e condicionnan di Hesus ta esaki: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.”—Huan 13:34, 35.

Hesus ta rekeri pa su siguidonan tin berdadero amor pa otro y pa e resto di humanidad. Hopi cristian a cumpli cu e rekisito ei durante e siglonan despues cu Hesus a biba riba tera. Pero kico di mayoria religion cu a pretende di representa Cristo? Nan historia ta caracterisa pa amor? Sigur cu no. Mas bien, nan tawata na cabes di numeroso bataya- y conflictonan den cua sanger di hende inocente a ser drama.—Revelacion 18:24.

Te ainda esei ta e caso. Nacionnan cu ta pretende di ta cristian a hiba delantera den e matansanan cu a caracterisa e dos gueranan mundial di siglo 20. Mas resien, miembronan di e asina yama iglesianan cristian tawata na cabes di e atrocidadnan y intento di genocidio cu a tuma luga na Ruanda na 1994. E exarsobispo anglicano Desmond Tutu a skirbi: “Esnan cu a lanta contra otro y comete e barbaridadnan sangriento aki tawata hende di e mesun religion. Mayoria tawata cristian.”

“Si Boso Keda den Mi Palabra”

Hesus a duna un di dos rekisito fundamental pa cristianismo berdadero, ora el a bisa: “Si boso keda den mi palabra, boso ta berdaderamente disipelnan di mi, y boso lo conoce e berdad, y e berdad lo haci boso liber.”—Huan 8:31, 32.

Hesus ta spera di su siguidonan pa nan keda den su palabra, esta, pa nan pega na su siñansanan. Na luga di esei, maestronan religioso cu a pretende di sigui Cristo “pocopoco pero sigur a adopta conceptonan Griego”, segun e teologo Küng. Nan a remplasa e siñansanan di Hesus cu entre otro ideanan manera inmortalidad di alma, creencia den purgatorio, adoracion di Maria y un clase di clero—ideanan cu nan a fia for di religion- y filosofonan pagano.—1 Corintionan 1:19-21; 3:18-20.

Maestronan religioso a introduci tambe e doctrina inexplicabel di Trinidad, elevando Hesus na un posicion cu nunca el a pretende di tin. Cu e doctrina ei, nan a stroba hende di adora esun na ken Hesus semper a dirigi atencion, esta, su Tata, Yehova. (Mateo 5:16;  6:9; Huan 14:28; 20:17) Hans Küng a skirbi: “Ora Hesus ta papia di Dios, e kiermen e Dios antiguo di e patriarcanan Abraham, Isaak y Yacob, cu ta Yahweh ... Pa [Hesus], e ta e unico y e solo Dios.” Cuanto hende awe ta relaciona e Dios y Tata di Hesus mesora cu Yahweh, of Yehova, manera su nomber ta ser skirbi na Papiamento?

Lidernan religioso a desvia completamente for di Hesus su mandamento pa keda neutral den asuntonan politico. Den tempo di Hesus, Galilea “tawata e centro di nacionalismo etnico”, segun e escritor Trevor Morrow. Hopi Hudiu patriotico a uza arma pa lucha pa libertad politico y religioso. Hesus a manda su disipelnan pa bai mete den e luchanan ei? No. Al contrario, el a bisa nan: “Boso no ta di mundo.” (Huan 15:19; 17:14) Sinembargo, en bes di keda neutral, lidernan di iglesia a desaroya loke e escritor Irlandes Hubert Butler a describi como “siñansanan di iglesia cu tin un toke militante y politico.” E ta bisa mas aleu: “Cristianismo politico ta casi semper tambe cristianismo militarisa. Y ora hefenan di estado y lidernan religioso yega na un acuerdo, semper ta sosode cu Iglesia ta bendiciona e ehersitonan militar di estado a cambio di cierto privilegionan.”

Maestronan Falso Ta Nenga Hesus

Apostel Pablo a spierta tocante un alehamento for di berdadero cristianismo. El a bisa cu despues di su morto, “lobo brabo” for di entre hende cu a yama nan mes cristian lo a “papia cosnan perverso, pa desvia e disipelnan y haci nan bai nan tras.” (Echonan 20:29, 30) Publicamente nan lo a “profesa cu nan conoce Dios, ma cu nan echonan nan [lo a] neng’e.” (Tito 1:16) Apostel Pedro tambe a spierta cu maestronan falso lo a “introduci na scondi herehianan [of sectanan] destructivo, asta nengando e shon cu a cumpra nan.” El a bisa cu nan mal conducta lo a pone hende ‘blasfema e caminda di e berdad.’ (2 Pedro 2:1, 2) Hende cu ta nenga Cristo den e forma aki, segun e erudito Griego W. E. Vine, ta “nenga e Tata y e Yiu door di bai contra nan fe y door di plama siñansa malicioso.”

Con Hesus lo reacciona si hende cu ta pretende di ta su disipel deliberadamente no “keda den [su] palabra” ni cumpli cu otro rekisitonan cu el a trece dilanti? El a spierta: “Ken cu nenga mi dilanti di hende, esei mi tambe lo nenga dilanti di mi Tata cu ta den shelo.” (Mateo 10:33) Claro cu Hesus no ta nenga un persona cu ta faya maske cu e tin deseo sinsero di keda fiel na dje. Por ehempel, aunke apostel Pedro a nenga Hesus tres biaha, el a repenti y a ser pordona. (Mateo 26:69-75) Sinembargo, Hesus ta nenga persona- of institucionnan cu ta resulta di ta manera lobo bisti na carne—cu ta pretende di sigui Cristo pero cu deliberadamente y persistentemente ta rechasa su siñansanan. Relaciona cu e maestronan falso ei, Hesus a bisa: “Na nan fruta boso lo conoce nan.”—Mateo 7:15-20.

Apostelnan Ta Muri y Apostasia Ta Lanta Cabes

Na ki tempo cristiannan falso a cuminsa nenga Cristo? Esei tawata un poco despues di su morto. E mes a spierta cu rapidamente Satanas e Diabel lo a sembra “yerba shimaron”, of cristiannan falso, den e “trigo”, of cristiannan berdadero, cu Hesus a planta durante su ministerio. (Mateo 13:24, 25, 37-39) Apostel Pablo a spierta cu maestronan engañoso tawata activo caba den su tempo. El a bisa cu e motibo fundamental pakico nan a desvia for di e siñansanan di Hesucristo tawata nan falta di berdadero “amor pa e berdad.”—2 Tesalonicensenan 2:10.

Tanten cu e apostelnan di Hesucristo tawata na bida, e apostasia aki no a haya chens di desaroya. Sinembargo, despues di nan morto, lidernan religioso cu tawata uza “tur poder y señalnan y maraviyanan falso y ... tur e  engaño di inikidad” pa engaña hopi, a aleha mas y mas hende for di e berdadnan cu Hesus y su apostelnan a siña. (2 Tesalonicensenan 2:3, 6-12) E filosofo Ingles Bertrand Russell ta skirbi cu den poco tempo e congregacion cristian original a ser cambia den un organisacion religioso cu “lo a laga Hesus y asta Pablo keda babuca.”

Berdadero Cristianismo Restaura

E echonan ta papia pa nan mes. Desde e morto di e apostelnan, hopi cos cu a tuma luga den nomber di cristianismo no a refleha e siñansanan di Cristo. Pero esei no kiermen cu Hesus a faya cu su promesa di ta cu su siguidonan “te na fin di mundo.” (Mateo 28:20) Nos por ta sigur cu for di dia el a bisa e palabranan ei, tawatin personanan fiel entre ken “e recuerdo di Hesucristo [tawata] bibo den teoria y practica.” Hesucristo a cumpli cu su palabra di apoya e personanan ei segun cu nan a haci esfuerso pa demostra e amor cu ta identifica cristiannan berdadero y pa keda leal na e berdadnan cu el a siña.

Ademas, Hesus a priminti cu den e ultimo dianan di e sistema di cosnan aki, e lo a reuni su disipelnan fiel den un congregacion cristian facil pa identifica y cu e lo a uza pa cumpli cu su boluntad. (Mateo 24:14, 45-47) Actualmente mes e ta uzando e congregacion ei pa recohe “un multitud grandi” di homber, mohe y mucha “di tur nacion y tur tribu y pueblo y lenga”, y ta uni nan bou di su liderato den “un tou” bou di “un wardado.”—Revelacion 7:9, 14-17; Huan 10:16; Efesionan 4:11-16.

Pesei, sali for di cualkier institucion of organisacion cu a deshonra e nomber di Cristo y difama cristianismo durante e ultimo dos mil añanan. Sino, manera Hesucristo a bisa apostel Huan, lo bo por “ricibi di [nan] plaganan” ora Dios ehecuta su huicio contra nan den futuro cercano. (Revelacion 1:1; 18:4, 5) Sea determina pa ta entre esnan tocante ken profeta Mikeas a papia ora el a bisa cu “den e ultimo dianan” adoradonan berdadero—personanan cu ta pega na berdadero cristianismo—lo scucha e instruccionnan di Dios y “cana den su bereanan” di adoracion puro restaura. (Mikeas 4:1-4) Gustosamente e editornan di e revista aki lo yuda bo identifica e adoradonan berdadero ei.

[Plachi na pagina 5]

Pakico cristiannan berdadero no ta bai guera?

[Reconocemento]

Soldanan, na banda robes: U.S. National Archives photo; vlammenwerper, banda drechi: U.S. Army Photo

[Plachi na pagina 7]

E condicionnan fundamental cu Hesus a pone pa cristiannan berdadero ta “[mustra] amor un pa otro” y “keda den mi palabra”