“Mantene Boso Huicio Completamente”

“E hende simpel ta kere tur cos, ma e homber prudente ta wak bon unda e ta bai.”—PROVERBIONAN 14:15.

1, 2. (a) Kico Lot su experencia na Sodoma ta siña nos? (b) Kico e expresion “mantene boso huicio” kiermen?

ORA cu Abraham a laga Lot scohe prome ki parti di e tera e tawata kier, Lot su bista a cai riba un region cu tawatin hopi awa y tawata ‘manera e hofi di Yehova.’ Esei lo mester a parce e luga ideal pa Lot establece su famia, ya cu el “a scohe pa su mes henter e vaye di Yordan” y a pone su campamento serca di Sodoma. Sinembargo, aparencia ta engañoso, pasobra eibanda mes tawata biba “e hombernan di Sodoma [kendenan] tawata masha malbado mes y pecadonan contra SEÑOR.” (Genesis 13:7-13) Manera cosnan a desaroya, Lot cu su famia a sufri perdida teribel. Cu tempo, e cu su yiu mohenan a haya nan ta biba den un cueba. (Genesis 19:17, 23-26, 30) Loke na principio a parce asina bon den su bista, a resulta net lo contrario.

² E relato di loke a pasa cu Lot ta contene un les pa sirbidonan di Dios awe. Ora nos tin cu tuma cierto decisionnan, nos mester ta alerta pa posibel peliger y vigila pa no laga e prome impresion di algo engaña nos. Pesei ta na su luga cu e Palabra di Dios ta urgi nos: “Mantene boso huicio completamente.” (1 Pedro 1:13, NW) E palabra Griego traduci aki como “mantene boso huicio”, literalmente ta nifica “sea sobrio.” Segun e erudito biblico R.C.H. Lenski, e estado sobrio ei ta referi na “un estado mental trankil y stabil cu ta evalua y calcula cosnan corectamente y di e manera ei ta haci posibel cu nos por tuma e decision corecto.” Laga nos considera algun situacion cu ta rekeri pa nos mantene nos huicio.

Con pa Evalua un Oportunidad pa Haci Negoshi

3. Dicon ta necesario pa nos ta cauteloso ora un persona ofrece nos un oportunidad pa haci negoshi?

³ Supone cu un persona di bon reputacion ofrece bo un oportunidad pa haci negoshi, kisas e persona tambe ta un adorado di Yehova. E ta masha entusiasma cu e posibilidad pa exito y ta anima bo pa actua lihe ya asina bo no ta perde e chens. Kisas bo ta cuminsa imagina caba con esaki lo trece un mihor bida pa bo y pa bo famia. Podise bo ta asta rasona cu esaki lo duna bo chens pa dedica mas tempo na actividadnan spiritual. Sinembargo, Proverbionan 14:15 ta spierta: “E hende simpel [“sin experencia”, NW] ta kere tur cos, ma e homber prudente ta wak bon unda e ta bai.” Hopi biaha, den e emocion cu ta compaña comienso di un negoshi nobo, hende no ta realisa con grandi e riesgo di perde nan inversion ta. Tambe nan sa pasa por halto di e echo cu cos por bai malo of ta keda sin considera plenamente cu ora bo ta haci negoshi tin hopi factor impredecibel. (Santiago 4:13, 14) Den un situacion asina, ta sumamente importante pa bo mantene bo huicio completamente!

4. Con nos por ‘wak bon unda nos ta bai’ ora di evalua un proposicion di negoshi?

⁴ Un persona prudente ta analisa un proposicion di negoshi cuidadosamente prome cu e tuma un decision. (Proverbionan 21:5) Hopi biaha tal analisis ta revela peligernan scondi. Pensa riba e siguiente senario: Un persona ta buscando placa pa fia en conexion cu su plannan di negoshi y ta ofrece bo un ganashi grandi si bo fi’e e fondonan. E oferta kisas ta zona atractivo, pero kico ta e riesgonan? E persona ta bai di  acuerdo pa paga e placa bek sin importa con lo bai cu e negoshi, of e ta paga bek dependiendo di si e negoshi tin exito? Cu otro palabra, bo por afford pa perde bo placa si e negoshi fracasa? Lo bo por puntra tambe: “Dicon e ta busca manera pa fia placa serca hende priva? Acaso banconan ta considera cu e negoshi ta algo mucho riscante?” Door di tuma tempo pa pensa riba e riesgonan, bo ta haya chens di evalua e proposicion na un manera realistico.—Proverbionan 13:16; 22:3.

5. (a) Ki paso sabi Yeremias a tuma ora el a cumpra un tereno? (b) Dicon ta bon pa documenta tur areglo di negoshi den un acuerdo formal por escrito?

⁵ Ora cu profeta Yeremias a cumpra un tereno serca su primo cu tambe tawata un adorado di Yehova, Yeremias a haci un nota por escrito di e transaccion dilanti di testigonan. (Yeremias 32:9-12) Awe, un persona sabi tambe lo haci sigur cu tur areglo di negoshi cu e sera, incluso esnan cu miembronan di famia y rumannan den fe, ta ser documenta den un acuerdo formal por escrito. * Si nos tin un acuerdo skirbi cu palabranan cla y bon prepara, esei ta yuda evita mal comprondemento y ta proteha e unidad. Di otro banda, hopi biaha ora problema di negoshi surgi entre sirbidonan di Yehova, ta pasobra no tawatin un acuerdo skirbi. Lamentablemente, e tipo di problemanan ei por resulta den dolor di curason, rencor y asta por pone hende perde nan spiritualidad.

6. Dicon nos tin cu vigila contra golosidad?

⁶ Nos mester vigila tambe contra golosidad. (Lucas 12:15) E posibilidad di haya ganashi grandi por ciega un persona pa e riesgonan di un negoshi inconfiabel. Asta algun ruman cu tawatin privilegionan excelente den e sirbishi di Yehova a cai den e trampa aki. E Palabra di Dios ta spierta nos: “Laga boso caracter ta liber di amor pa placa y sea contento cu loke boso tin.” (Hebreonan 13:5) Ora un cristian ta pensa pa acepta pa haci negoshi, e mester puntra su mes: ‘Ta realmente necesario pa mi envolve mi mes den esaki?’ Un bida simpel cu ta consentra riba nos adoracion di Yehova lo proteha nos di “tur sorto di maldad.”—1 Timoteo 6:6-10.

Retonan Cu Cristiannan Soltero Ta Confronta

7. (a) Ki reto hopi cristian soltero ta confronta? (b) Con nos scohemento di un casa ta encera lealtad na Dios?

⁷ Hopi sirbido di Yehova ta anhela pa casa pero nan no a haya un persona apropiado ainda. Den algun pais, tin un presion social fuerte pa casa. Sinembargo, tin kisas masha tiki oportunidad pa topa un posibel casa. (Proverbionan 13:12) Pero cristiannan ta reconoce cu ta un asunto di lealtad na Yehova pa obedece e mandamento biblico pa casa “basta ta den Señor.” (1 Corintionan 7:39) Pa para firme contra e presionnan y tentacionnan cu nan ta confronta, cristiannan soltero tin cu mantene nan huicio completamente.

8. Bou di ki presion un mucha mohe Sulamita a hay’e, y con rumannan mohe cristian awe lo por confronta un reto similar?

⁸ Den e Cantica di Salomon, un humilde mucha mohe di cunucu cu ta ser yama e Sulamita ta atrae e atencion di rei. E rei ta purba seducie cu un despliegue impresionante di rikesa, prestigio y encanto, aunke cu e mucha mohe ta  enamora caba di un yoncuman. (Cantica di Salomon 1:9-11; 3:7-10; 6:8-10, 13) Si abo ta un mucha mohe cristian, kisas bo tambe a atrae un persona su atencion, pero un atencion cu bo no ta desea. Un persona na bo trabou, podise un hende den un posicion di autoridad, ta cuminsa duna bo hopi compliment, ta haci bo fabor, y ta busca tur chens pa e ta hunto cu bo. Tene cuidou cu tal atencion cu ta laga bo sinti bon. Aunke no ta tur biaha un persona asina su intencionnan ta romantico of inmoral, hopi biaha ta asina si. Mescos cu e mucha mohe Sulamita, sea manera “un muraya.” (Cantica di Salomon 8:4, 10) Rechasa acercamento romantico indeseabel na un manera firme. Laga bo coleganan sa for di principio cu bo ta un Testigo di Yehova, y probecha di tur oportunidad pa duna nan testimonio. Esei lo sirbi como un proteccion pa bo.

9. Menciona algun peliger di cuminsa un relacion cu un hende desconoci via Internet. (Wak tambe e cuadro na pagina 25.)

⁹ Un cos cu ta birando hopi popular ta websitenan riba Internet diseña pa yuda personanan soltero haya un casa. Tin hende ta mira esakinan como un manera pa siña conoce hende cu di otro forma nan lo no a topa. Sinembargo, ta un berdadero peliger pa cuminsa ciegamente cu un relacion cu un persona desconoci. Riba Internet por ta dificil pa distingui kico ta berdad y kico ta falso. (Salmo 26:4) No ta tur hende cu ta pretende di ta un sirbido di Yehova, di berdad ta esei. Ademas, buscamento di pareha via Internet, por pone un laso fuerte desaroya masha lihe, y esei por nubla bo huicio. (Proverbionan 28:26) Sea ta via Internet of uzando otro medio, no ta sabi pa cultiva un relacion intimo cu un persona cu nos no sa mucho cos di dje.—1 Corintionan 15:33.

10. Con otro rumannan por anima cristiannan soltero?

¹⁰ Yehova “ta yen di compasion” pa su sirbidonan. (Santiago 5:11) E sa cu cristiannan cu ta soltero debi na circunstancia ta confronta retonan cu tin biaha ta desanima nan, y e tin masha aprecio pa nan lealtad. Con otro rumannan por anima esnan soltero? Nos mester elogia nan cu regularidad pa nan obediencia y spirito di sacrificio propio. (Huesnan 11:39, 40, NW) Tambe nos por inclui nan ora nos ta haci areglonan pa tene asociacion edificante. Bo a haci esei ultimamente? Ademas, nos por haci oracion pa nan, pidiendo Yehova pa yuda nan mantene nan stabilidad spiritual y haya goso den sirbie. Mediante nos interes sinsero, laga nos demostra cu nos ta aprecia e rumannan leal aki mescos cu Yehova ta aprecia nan.—Salmo 37:28.

 Con pa Trata cu Problema cu Salud

11. Ki retonan problema serio cu salud ta causa?

¹¹ Ki un gran angustia nos ta sinti ora cu nos of un ser keri ta confronta problema serio cu salud! (Isaias 38:1-3) Mientras cu nos ta purba haya un tratamento efectivo, ta masha importante pa nos pega na principionan biblico. Por ehempel, cristiannan ta haci sigur di obedece Bijbel su mandamento pa abstene di sanger. Tambe nan ta evita cualkier procedura di diagnostica malesa of cualkier terapia cu tin di aber cu spiritismo. (Echonan 15:28, 29; Galationan 5:19-21) Sinembargo, pa hende cu no tin un entrenamento medico por ta hopi confuso y abrumador pa evalua e opcionnan di tratamento cu tin. Kico por yuda nos mantene nos huicio completamente?

12. Con un cristian por keda balansa ora e ta considera opcionnan di tratamento cu tin?

¹² “E homber prudente ta wak bon unda e ta bai” door di haci investigacion den Bijbel y den publicacionnan cristian. (Proverbionan 14:15) Na partinan di mundo caminda tin masha tiki docter y hospital, kisas e unico tratamento disponibel ta medicina tradicional, cu ta haci uzo di remedi di tera. Si nos tin pensa di sigui tal tratamento, nos por haya informacion util den E Toren di Vigilancia na Spaño di 15 di april 1987, pagina 26-9. E articulo ta spierta nos pa posibel peligernan. Por ehempel, nos lo tin cu busca pa haya sa lo siguiente: Ta conoci cu e homeopat ta practica spiritismo? E tratamento ta basa riba e creencia cu malesa y morto ta ser causa sea door di diosnan (of spiritonan di antepasado) ofendi of door di enemigonan cu ta uza bruheria? Ta uza sacrificio, formulanan magico of otro ritonan spiritista den preparacion of uzo di e remedi? (Deuteronomio 18:10-12) Tal investigacion lo yuda nos haci caso di e conseho inspira: “Samina tur cos; tene duro na loke ta bon.” * (1 Tesalonicensenan 5:21) Esei lo yuda nos keda balansa.

13, 14. (a) Con nos por demostra cu nos ta rasonabel den cuidamento di nos salud fisico? (b) Dicon nos mester ta rasonabel ora nos ta papia tocante asuntonan medico y di salud cu otro hende?

¹³ Den tur area di bida nos mester ta rasonabel, incluso den e cuido di nos salud fisico. (Filipensenan 4:5, NW) E echo cu nos ta duna atencion balansa na nos salud, ta demostra aprecio pa e regalo precioso di bida. Ora nos ta confronta problema cu salud, esakinan corectamente merece nos atencion. Sinembargo, salud perfecto no ta alcansabel awor sino te ora Dios su tempo yega pa “e curamento di e nacionnan.” (Revelacion 22:1, 2) Pesei nos tin cu tene cuidou pa nos no bira asina precupa cu nos salud fisico cu nos ta pusha un banda nos necesidadnan spiritual cu ta hopi mas importante.—Mateo 5:3, NW; Filipensenan 1:10, NW.

¹⁴ Tambe nos mester demostra di ta balansa y rasonabel ora di papia tocante asuntonan medico y di salud cu otro hende. E topiconan aki no mester domina nos combersacion ora nos ta reuni hunto pa asociacion spiritual na reunion- y asambleanan cristian. Ademas, hopi bes decisionnan den asuntonan medico ta encera principionan biblico, e hende su consenshi y su relacion cu Yehova. Pesei lo ta un falta di amor pa impone nos punto di bista riba un ruman den fe of presion’e pa pasa por halto di loke su consenshi ta bis’e. Aunke nos por consulta cu  rumannan maduro den e congregacion pa haya yudansa, cada cristian mester “carga su mes carga” di responsabilidad ora di tuma decision, y “cada un di nos lo duna cuenta di su mes na Dios.”—Galationan 6:5; Romanonan 14:12, 22, 23.

Ora Nos Ta Pasa den Circunstancianan Dificil

15. Con circunstancianan dificil por afecta nos?

¹⁵ Circunstancianan dificil por pone asta sirbidonan leal di Yehova papia of actua na un manera cu no ta sabi. (Eclesiastes 7:7) Ora Job tawata bou di prueba severo, el a bira un poco desbalansa y Dios mester a corigi su manera di pensa. (Job 35:2, 3; 40:6-8) Aunke “Moises tawata masha humilde, mas cu tur homber cu tawatin riba superficie di tera”, na un ocasion el a rabia y papia di un manera descabeya. (Numbernan 12:3; 20:7-12; Salmo 106:32, 33) David a demostra dominio propio na un manera admirabel ora cu e no a mata rei Saul. Pero ora cu Nabal a insult’e y a papia palabranan ofensivo cu su hombernan, David a bira furioso y a perde su bon huicio. El a hera comete un eror calamitoso. Ta ora cu Abigail a interveni el a recobra su huicio.—1 Samuel 24:2-7; 25:9-13, 32, 33.

16. Kico por yuda nos evita di actua di un manera descabeya?

¹⁶ Nos tambe por confronta situacionnan dificil cu kisas ta pone nos actua sin uza bon huicio. Un cos cu por yuda nos evita di actua di un manera descabeya y asina core comete un pica, ta di evalua cuidadosamente e punto di bista di otro hende, manera David a haci. (Proverbionan 19:2) Ademas, e Palabra di Dios ta conseha nos: “Rabia, ma no haci pica; medita den bo curason riba bo cama y keda keto.” (Salmo 4:4) Te asina leu cu ta posibel, ta sabi pa warda te ora nos ta calmo prome cu nos tuma accion of decision. (Proverbionan 14:17, 29) Nos por acudi na Yehova den oracion ferviente, “y e pas di Dios, cu ta surpasa tur comprondemento, lo warda [nos] curason y [nos] mente den Cristo Hesus.” (Filipensenan 4:6, 7) E pas aki cu Dios ta duna lo stabilisa nos y yuda nos mantene nos huicio completamente.

17. Dicon nos mester depende riba Yehova pa mantene nos huicio completamente?

¹⁷ Apesar di cuanto esfuerso nos haci pa evita peliger y actua sabi, nos tur ta comete eror. (Santiago 3:2) Nos por ta a punto di dal un paso robes cu por hiba nos na ruina, anto sin cu nos sa mes. (Salmo 19:12, 13) Ademas, como criatura humano, nos no tin e capasidad ni e derecho di dirigi nos propio pasonan sin Yehova su guia. (Yeremias 10:23) Pesei nos por ta hopi gradicido cu e ta sigura nos: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.” (Salmo 32:8) Si, cu Yehova su yudansa, nos por mantene nos huicio completamente.

[Nota]

Con Lo Bo Contesta?

Con nos por mantene nos huicio

• si nos haya un oferta pa haci negoshi?

• ora nos ta busca un casa?

• ora nos ta confronta problema cu salud?

• ora nos ta den circunstancianan dificil?

[Preguntanan di Estudio]

[Cuadro na pagina 25]

Bo Por Confi’e?

E siguiente spiertamentonan ta aparece riba websitenan pa hende soltero:

“Maske nos a haci tur nos esfuerso, nos no por duna ningun garantia di un persona su berdadero identidad.”

“Nos no ta garantisa cu tur informacion di e servicio aki ta exacto, completo of util.”

“Opinionnan, conseho, declaracionnan, ofertanan of otro informacion of contenido cu ta ser haci disponibel via e servicio [aki] ta di nan respectivo autornan ... y no necesariamente bo mester confia loke nan ta bisa.”

[Plachi na pagina 23]

“E homber prudente ta wak bon unda e ta bai”

[Plachi na pagina 24, 25]

Con hende mohe cristian por imita e mucha mohe Sulamita?

[Plachi na pagina 26]

“Samina tur cos; tene duro na loke ta bon”