Recreo Sano Cu Ta Refresca

“Sea cu boso ta come of bebe of kico cu boso ta haci, haci tur pa e gloria di Dios.”—1 CORINTIONAN 10:31.

1, 2. Dicon nos por mira actividadnan placentero como un “regalo di Dios”, pero ki spiertamento franco Bijbel ta duna?

TA NATURAL cu nos kier participa den actividadnan cu ta duna nos placer. Yehova, nos Dios felis, kier pa nos gosa di bida, y e ta provee cosnan na abundancia pa haci esei posibel. (1 Timoteo 1:11, NW; 6:17) Rei sabi Salomon a skirbi: “Mi sa cu no tin nada mihor ... cu regociha ... y tambe cu tur hende por come y bebe y mira e bon cu tin den tur su trabou—esaki ta e regalo di Dios.”—Eclesiastes 3:12, 13.

² En berdad bo ta sinti bo refresca ora cu bo tuma un pausa pa reflexiona riba bon trabou cu bo a logra, specialmente si bo haci esei den e dushi compania di famia y amigonan. E alegria ei cu bo ta sinti, apropiadamente por ser mira como un “regalo di Dios.” Ta mas cu claro cu e regalo abundante aki di e Creador no kiermen cu nos mag di diberti di un manera desenfrena. Bijbel ta condena buracheria, golosidad y inmoralidad, y ta spierta cu e hendenan cu ta practica e cosnan ei “lo no hereda e reino di Dios.”—1 Corintionan 6:9, 10; Proverbionan 23:20, 21; 1 Pedro 4:1-4.

3. Kico lo yuda nos keda spiritualmente alerta y tene e gran dia di Yehova na mente?

³ Den e ultimo dianan trabahoso aki, mas cu nunca prome, cristiannan ta confronta e reto di biba na un manera prudente den un mundo corupto, sin adopta su practicanan. (Huan 17:15, 16) Manera Bijbel a profetisa, e hendenan di e generacion djawe a bira ‘stimado di placer mas bien cu stimado di Dios’, te na e grado cu nan no ta “haci caso” di e evidencia cu e “tribulacion grandi” ta dilanti porta. (2 Timoteo 3:4, 5; Mateo 24:21, 37-39, NW) Hesus a spierta su siguidonan: “Tene cuidou pa boso curason no ta carga pa causa di paranda y buracheria y e precupacionnan di bida, y e dia ei no bin diripiente riba boso manera un trampa.” (Lucas 21:34, 35) Como sirbido di Dios, nos ta determina pa haci caso di Hesus su spiertamento. Distinto for di e hendenan den e mundo malbado rond di nos, nos ta haci esfuerso pa keda spiritualmente alerta y pa tene e gran dia di Yehova na mente.—Sofonias 3:8; Lucas 21:36.

4. (a) Dicon ta dificil pa haya recreo cu ta aceptabel? (b) Ki conseho nos ta haya na Efesionan 5:15 y 16 cu nos kier aplica?

 ⁴ No ta facil pa keda liber di e practicanan corupto di mundo, ya cu Diabel ta haci nan masha deseabel y accesibel. Ta specialmente dificil ora nos ta busca entretenimento of recreo. Mayoria cos cu mundo ta ofrece ta diseña pa atrae deseo- of “pasionnan carnal.” (1 Pedro 2:11) Entretenimento perhudicial ta disponibel na luganan publico, pero e por penetra tambe den e privasidad di nos cas pa medio di literatura, television, Internet y video. Pesei e Palabra di Dios ta duna e conseho sabi aki na cristiannan: “Mira bon con boso ta cana, no manera hende bobo, ma manera hende sabi, haciendo bon uzo di boso tempo, pasobra e dianan ta malo.” (Efesionan 5:15, 16) Ta solamente si nos sigui e conseho ei cuidadosamente nos por haci sigur cu entretenimento perhudicial lo no hinca nos den tentacion, absorba tur nos tempo y atencion, of te asta destrui nos relacion cu Yehova, y hiba nos asina na destruccion.—Santiago 1:14, 15.

5. Kico ta loke mas ta refresca nos?

⁵ Cristiannan ta hiba un bida hopi ocupa, pesei ta di compronde cu de bes en cuando nan ta sinti e necesidad di gosa di un poco recreo. De echo, Eclesiastes 3:4 ta bisa cu tin “un tempo pa hari” y “un tempo pa balia.” Pues anto, Bijbel no ta considera recreo como malgastamento di tempo. Pero recreo mester refresca nos, e no mester pone nos spiritualidad na peliger ni interferi cu actividadnan spiritual. Cristiannan maduro sa di experencia cu tin mas felicidad den duna. Nan ta pone e hacimento di Yehova su boluntad na prome luga den nan bida y nan ta haya berdadero ‘sosiego pa nan alma’ door di acepta Hesus su yugo suave.—Mateo 11:29, 30; Echonan 20:35.

Con pa Scohe Recreo Cu Ta Aceptabel

6, 7. Kico por yuda bo dicidi ki ora un recreo ta aceptabel of inaceptabel?

⁶ Con nos por ta sigur cu un cierto forma di recreo ta apropiado of aceptabel pa un cristian? Mayornan ta percura guia pa nan yiunan, y ancianonan ta yuda nos ora cu ta necesario. Pero en realidad, lo no mester ta necesario pa otro hende bisa nos cu un cierto buki, pelicula, wega, baile of cantica ta inaceptabel. Pablo a bisa cu “hende madura ... pa motibo di practica, tin nan mente entrena pa discerni loke ta bon y loke ta malo.” (Hebreonan 5:14; 1 Corintionan 14:20) Bijbel ta duna principionan cu por guia bo. Bo consenshi, entrena pa e Palabra di Dios, lo yuda bo si bo scuch’e.—1 Timoteo 1:19.

⁷ Hesus a bisa cu “na su fruta bo ta conoce e palo.” (Mateo 12:33) Si un actividad di recreo ta produci fruta putri, nos mester rechas’e. E fruta ei por ta un atraccion na violencia, inmoralidad of spiritismo. Tambe e ta inaceptabel si e ta pone bo bida of salud na peliger, si e ta causa dificultad economico of desanimacion, of si e ta pone otro hende trompica. Apostel Pablo a spierta nos cu si nos herida e consenshi  di nos ruman, nos ta cometiendo un pica. Pablo a skirbi: “Door di peca contra e rumannan y door di herida nan consenshi debil, boso ta peca contra Cristo. Pesei, si cuminda ta haci mi ruman trompica, lo mi no come carni nunca mas, pa mi no haci mi ruman trompica.”—1 Corintionan 8:12, 13.

8. Ki peligernan ta existi ora di uza weganan electronico y ora di wak pelicula?

⁸ Negoshinan ta patapata di weganan electronico y pelicula riba video of DVD. Tin di nan kisas ta un pasatempo inocente y ta relaha bo, pero mas y mas bo ta haya entretenimento cu ta contene loke Bijbel ta condena. Un wega cu ta exigi pa su hungadonan manca y mata hende of actua den un manera sumamente inmoral, sigur no ta djis un pasatempo inocente! Yehova ta odia hende “cu ta gusta violencia.” (Salmo 11:5; Proverbionan 3:31; Colosensenan 3:5, 6) Y si un wega cu bo ta hunga ta haci bo agresivo of golos pa cos, ta agota bo emocionalmente of ta malgasta tempo balioso, e ora ei reconoce e daño spiritual cu e ta causa y haci ahuste rapidamente.—Mateo 18:8, 9.

Con pa Satisface Nos Necesidad di Recreo den Maneranan Sano

9, 10. Kico cristiannan cu discernimento por haci pa satisface nan necesidad di recreo?

⁹ Tin biaha, cristiannan ta puntra: “Kico ta recreo aceptabel? Mayoria cos cu mundo ta ofrece ta bai contra di normanan biblico.” Bo por tin sigur cu ta posibel pa haya recreo cu ta satisface bo, pero bo tin cu haci esfuerso. E ta rekeri pa bo plania bon di antemano, specialmente como mayor. Hopi cristian ta recrea masha dushi den circulo di famia y entre e rumannan den congregacion. Un cos placentero y edificante ta por ehempel un comemento relaha caminda por papia di loke a sosode durante dia of di un topico biblico. Por organisa picknick, weganan apropiado, campamento of caminatanan. Cu tal recreo sano bo por pasa pret y sinti bo refresca.

¹⁰ Un anciano cu su casa kendenan a lanta tres yiu, a informa: “For di chikito, nos yiunan tawata envolvi den scohe unda nos ta bai cu vakantie. Tawatin biaha cu nos a permiti cada yiu invita un bon amigo of amiga, locual a haci e vakantie mas dushi ainda. Tambe nos a para keto na cierto eventonan importante den bida di nos yiunan. Tempo tempo nos tawata invita famia y amigonan den congregacion na nos cas. Nos a haci barbecue y a hunga wega. Tambe nos tawata bai keiro den seronan, sea cu auto of na pia, uzando ocasionnan asina pa siña tocante e creacion di Yehova.”

11, 12. (a) Kico bo por haci pa inclui otro hende ora cu de bes en cuando bo ta traha plan pa recreo? (b) Ki clase di get-together a resulta inolvidabel pa hopi ruman?

¹¹ Sea individualmente of como famia, ta posibel pa bo haci areglo pa inclui otro hende ora cu de bes en cuando bo ta traha plan pa recreo? Tin rumannan, manera un biuda, un persona soltero of un famia di un solo mayor, cu kisas tin mester di animacion. (Lucas 14:12-14) Kisas tambe lo bo por inclui algun  persona cu resientemente a cuminsa asocia cu e congregacion, pero claro teniendo cuidou pa bo no expone otro rumannan na ningun mal influencia. (2 Timoteo 2:20, 21) Si ta dificil pa rumannan enfermo sali fo’i cas, kisas por haci areglo pa bin cu un cuminda pa come serca nan na nan cas.—Hebreonan 13:1, 2.

¹² Hopi ruman tin recuerdonan inolvidabel di cierto get-together caminda invitadonan a come un cuminda simpel, tende experencianan tocante con otro rumannan den e grupo a bira cristian y a haya sa kico a yuda nan keda fiel na Dios. Lo por bin cu topiconan biblico pa papia riba dje, anto ta invita tur esnan presente, incluso e muchanan, pa participa. Combersacionnan asina por ta un intercambio di estimulo hopi probechoso, sin cu ningun hende tin cu sinti nan mes incomodo of inadecuado.

13. Con Hesus y Pablo tawata un ehempel den mustra y acepta hospitalidad?

¹³ Hesus a pone un bon ehempel den mustra y acepta hospitalidad. Semper el a uza e ocasionnan ei pa comparti beneficionan spiritual. (Lucas 5:27-39; 10:42; 19:1-10; 24:28-32) Su prome disipelnan a imita su ehempel. (Echonan 2:46, 47) Apostel Pablo a skirbi: “Mi ta anhela di mira boso, pa mi por comparti algun don spiritual cu boso, pa boso por keda estableci—esta, pa mi por wordo curasha hunto cu boso, mientras cu mi ta serca boso, cada un di nos door di fe di e otro, tanto e fe di boso como e fe di mi.” (Romanonan 1:11, 12) Di igual manera, ora nos tin get-together nos mester crea un ambiente caminda por tin un intercambio di estimulo.—Romanonan 12:13; 15:1, 2.

Algun Recordatorio y Spiertamento

14. Dicon no ta consehabel pa tene reunionnan social grandi?

¹⁴ No ta consehabel pa nos tene reunionnan social grandi, ya cu hopi bes ta dificil pa supervisa nan. Na un ocasion cu no ta interferi cu actividadnan spiritual, algun famia por dicidi di gosa hunto door di pone un picknick of hunga un wega cu no ta mucho competitivo. Ora tin algun anciano, sirbido ministerial of otro rumannan maduro presente na un reunion social, nan por ta un bon influencia y e ocasion por refresca nos mas ainda.

15. Dicon ora bo invita hende na un evento bo mester percura pa tin bon supervision?

¹⁵ Rumannan cu ta organisa reunionnan social no mester pasa por halto di e necesidad di tin bon supervision. Maske bo ta gusta mustra hospitalidad, con lo bo sinti bo si bo haya sa cu debi na negligencia di bo parti, un invitado a trompica door di loke a pasa den bo cas? Lo bo sinti bo hopi malo toch? Considera e principio cu Deuteronomio 22:8 ta trata. Hopi biaha e Israelitanan a entretene invitado riba nan dak di cas cu tawata plat. Pesei e Israelita cu a construi un cas nobo mester a traha un rand rond di e dak plat ei. Dicon? “Pa bo no trece culpa di sanger riba bo cas, si un hende cai for di dje.” Asina tambe, loke bo ta haci pa proteha e hendenan cu bo invita na un reunion social—sin impone restriccionnan irasonabel—mester ta cu nan bienestar fisico y spiritual na pecho.

16. Ki precaucion nos mester tuma si nos ta sirbi alcohol na un reunion social?

¹⁶ Si ta sirbi alcohol na un reunion social,  mester haci esaki cu hopi cuidou. Hopi anfitrion cristian ta dicidi di sirbi bebida alcoholico solamente si nan mes por supervisa kico ta sirbi e invitadonan of cuanto nan ta bebe. No mester permiti nada cu lo por trompica otro hende of tenta un hende pa bebe di mas. (Efesionan 5:18, 19) Pa varios motibo, algun invitado mes por dicidi di abstene di alcohol. Hopi pais tin un edad legal minimo cu ta permiti pa bebe, y cristiannan lo obedece e leinan di Cesar asta ora e reglanan aki ta parce demasiado stricto.—Romanonan 13:5.

17. (a) Si ta bai toca muziek na un evento social, dicon ta importante pa e anfitrion ta masha selectivo? (b) Si tin baliamento na un reunion social, con nos mester refleha modestia?

¹⁷ E anfitrion mester haci sigur cu cualkier muziek, baliamento y otro entretenimento cu lo tin ta na harmonia cu principionan cristian. Gusto musical ta varia, y tin un variedad grandi di muziek disponibel. Sinembargo, gran parti di e muziek djawe ta fomenta un spirito di rebelion, inmoralidad y violencia. Pesei nos mester ta selectivo. Muziek decente no necesariamente mester ta muziek suave, pero tampoco e mester ta sensual of vulgar ni demasiado duro. Tene cuidou pa bo no laga e scohemento di muziek na encargo di un persona cu no ta mira cu ta necesario pa tene e volumen na un nivel modera. Ta mas cu claro tambe cu un baile cu ta encera comportacion inmodesto, enfatisando movementonan erotico di heup y pecho, lo no ta apropiado pa un cristian.—1 Timoteo 2:8-10.

18. Con mayornan por proteha nan yiunan door di supervisa nan actividad social?

¹⁸ Mayornan cristian mester busca pa haya sa ta kico tin plania pa cualkier reunion social na cua nan yiunan a ser invita, y lo ta sabi pa den mayoria caso nan compaña nan yiunan. Lamentablemente, algun mayor a permiti nan yiunan bai fiestanan caminda no tawatin supervision y caminda varios di esnan presente a ser seduci pa comete inmoralidad of participa den otro comportacion inapropiado. (Efesionan 6:1-4) Asta si hobennan ta den e ultimo añanan di nan adolecencia y nan a demostra cu nan por comporta nan mes na un manera responsabel, toch ta necesario pa yuda nan “hui pa e pasionnan di hubentud.”—2 Timoteo 2:22.

19. Ki realidad por yuda nos enfoca riba loke nos mester “busca prome”?

¹⁹ Participa de bes en cuando den recreo y entretenimento cu ta sano y cu ta refresca bo, por haci bida mas dushi. Yehova no ta nenga nos e placer aki, pero siendo realista nos sa cu e actividadnan aki riba nan mes no ta yuda nos montona ningun tesoro spiritual den shelo. (Mateo 6:19-21) Hesus a yuda su disipelnan compronde cu e cos importante den bida ta pa “busca prome e reino di Dios y Su husticia”, no kico nos ta bai come of bebe of bisti, ‘cosnan cu e paganonan ta busca.’—Mateo 6:31-34.

20. Fiel sirbidonan di Yehova por spera ansiosamente riba ki cosnan bon for di Esun Magnifico?

²⁰ Si, sea cu nos ta ‘come of bebe of kico cu nos ta haci’, nos por haci “tur pa e gloria di Dios”, y gradici Esun Magnifico cu a duna nos cosnan bon cu nos por disfruta di dje cu moderacion. (1 Corintionan 10:31) Den su tera transforma den Paradijs cu ta dilanti porta, lo tin masha hopi ocasion mes pa gosa plenamente di Yehova su generosidad, hunto cu e asociacion sano di tur otro hende cu ta cumpli cu su rekisitonan husto.—Salmo 145:16; Isaias 25:6; 2 Corintionan 7:1.

Bo Ta Corda?

• Dicon ta dificil pa cristiannan djawe haya recreo sano?

• Cua ta algun forma di recreo cu a duna famianan cristian satisfaccion?

• Ora bo ta disfruta di recreo sano, ki recordatorio y spiertamento bo mester tene na mente?

[Preguntanan di Estudio]

[Plachi na pagina 18]

Scohe recreo cu ta produci bon fruta

[Plachi na pagina 19]

Ki formanan di recreo cristiannan ta rechasa?