“Nos Mester Obedece Dios Mas Cu Hende”

Libra pa Medio di “Sanger Precioso”

YEHOVA su muestra mas grandi di amor tawata di manda su Yiu unigenito pa ofrece su bida humano perfecto como un rescate. Como hende pecado, nos tin gran necesidad di e rescate ei pa libra nos for di pica, ya cu ningun hende imperfecto “por redimi su ruman, ni paga Dios placa di rescate p’e . . . pa e por a sigui biba pa semper.” (Salmo 49:6-9) Nos ta masha gradicido mes cu Dios “a duna su Yiu unigenito, pa ken cu kere den dje no bai perdi, ma tin bida eterno”!—Huan 3:16.

Con e rescate ta libra nos? Laga nos considera cuater manera cu nos ta alcansa libertad debi na e muestra sobresaliente aki di amor di parti di Yehova Dios.

Liberacion via e Rescate

Na prome luga, Hesus su sacrificio por libra nos di pica hereda. Nos tur a nace den pica. Si, nos ta pecado asta prome cu nos por a viola e lei di Yehova. Con asina? Romanonan 5:12 ta bisa: “Door di un hende [Adam] pica a drenta den mundo, y morto door di pica.” Como yiunan di e pecado Adam, nos a hereda su condicion imperfecto. Sinembargo, pago di e rescate ta haci posibel cu nos por ser libra for di e gara di pica hereda. (Romanonan 5:16) Hesus a “experencia morto pa tur hende”, door di carga e consecuencianan di pica pa e desendientenan di Adam.—Hebreonan 2:9; 2 Corintionan 5:21; 1 Pedro 2:24.

Na di dos luga, e rescate por libra nos for di e efectonan mortal di pica. “E pago di pica ta morto.” (Romanonan 6:23) E castigo pa pica ta morto. Door di entrega su bida como un sacrificio, e Yiu di Dios a haci posibel cu humanidad obediente por haya bida eterno. De echo, “esun cu kere den e Yiu tin bida eterno; ma esun cu no obedece e Yiu lo no mira bida.”—Huan 3:36.

Tuma nota cu nos por ser libra for di e efectonan di pica solamente si nos kere of eherce fe den e Yiu di Dios. Esaki ta encera haci cambionan den nos bida y pone nos bida na harmonia cu e boluntad di Dios. Nos tin cu rechasa cualkier mal caminda cu kisas nos tawata sigui y dal paso pa haci loke ta agrada Dios. Apostel Pedro a bisa cu nos tin cu ‘repenti y comberti, pa nos picanan wordo kita.’—Echonan 3:19.

Na di tres luga, e sacrificio cu Hesus a ofrece ta libra nos di un mal consenshi. Tur persona cu haci un dedicacion na Yehova y bira disipelnan batisa di su Yiu ta haya un alivio. (Mateo 11:28-30) Apesar di nos imperfeccion, nos ta sinti un goso profundo den sirbi Dios cu un consenshi limpi. (1 Timoteo 3:9; 1 Pedro 3:21) Ora nos confesa nos picanan y stop cu nos practicanan pecaminoso, Dios ta mustra misericordia na nos y nos ta haya alivio di un consenshi cu tawata molestia nos.—Proverbionan 28:13.

E Rescate Ta Duna Yudansa y Speransa

Por ultimo, door di eherce fe den e rescate, nos ta ser libra di miedo relaciona cu nos posicion dilanti di Dios. Apostel Huan a skirbi: “Si un hende haci pica, nos tin un abogado serca e Tata, Hesucristo.” (1 Huan 2:1) Relaciona cu Hesus su papel como abogado of ayudante, apostel Pablo a skirbi: “Tambe e por salba pa semper esnan cu ta hala serca Dios  pa medio di dje, como cu semper e ta biba pa intercede pa nan.” (Hebreonan 7:25) Tanten cu nos tin cualkier rastro di pica, nos lo tin mester di e servicionan di e sumo sacerdote Hesucristo pa yuda nos haya un posicion recto serca Dios. Con Hesus a fungi como un sumo sacerdote pa nos?

Cuarenta dia despues cu Hesus a resusita na aña 33 di nos era, el a subi na shelo, caminda el a presenta e balor di su “sanger precioso” na Dios. Como resultado, Hesus pronto lo libra humanidad obediente for di pica y morto. * (1 Pedro 1:18, 19) Pues anto, bo no ta haya cu Hesucristo merece nos amor y obediencia?

Ademas, Yehova Dios tambe merece nos amor y obediencia. Amorosamente el a haci posibel cu nos por haya redencion of “liberacion via rescate.” (1 Corintionan 1:30; NW) Nos debe Yehova no solamente e bida cu nos tin awor sino tambe cualkier speransa cu nos tin di disfruta di bida eterno. Pues, nos tin tur motibo pa “obedece Dios mas cu hende.”—Echonan 5:29.

[Nota]

[Cuadro/​Plachi na pagina]

BO TAWATA SA?

• Hesus a subi na shelo for di Sero di Oleifi.—Echonan 1:9, 12.

• Ta Hesus su fiel apostelnan so tawata testigo di su asuncion.—Echonan 1:2, 11-13.