Bo Por Tin e Placer di Compronde Bijbel

BIJBEL ta contene e berdadnan precioso di Dios. E ta conta nos tocante e proposito di bida, e causa di sufrimento humano y e futuro di humanidad. E ta siña nos tambe con nos por haya felicidad, con nos por sera amistad y con nos por resolve problema. Pero mas importante cu tur esei, e ta siña nos tocante nos Creador y Tata celestial, Yehova. E conocemento ei ta yena nos cu goso y nos bida ta haya sentido.

Bijbel ta compara adkiri conocemento di Dios cu comemento. Hesus a bisa: “Hende lo no biba di pan so, ma di tur palabra cu ta sali for di boca di Dios.” (Mateo 4:4; Hebreonan 5:12-14) Mescos cu nos tin cu alimenta nos mes cu cuminda nutritivo tur dia pa keda na bida, asina nos tin cu lesa e Palabra di Dios regularmente pa nos beneficia di Dios su promesa di bida eterno.

Nos ta gusta come pasobra nos a ser crea pa disfruta di cuminda. Na mes momento, esei ta satisface un necesidad basico. Sinembargo, si nos kier ta felis, nos tin cu satisface un otro necesidad basico. Hesus a bisa: “Felis ta esnan cu ta conciente di nan necesidad spiritual.” (Mateo 5:3, NW) Pues, nos por ta felis pasobra nos por satisface e necesidad ei pa medio di un comprondemento di e Palabra di Dios.

Ta berdad cu algun hende ta haya cu no ta facil pa compronde Bijbel. Por ehempel, kisas bo mester di yudansa pa compronde textonan cu ta referi na custumbernan desconoci of cu ta uza expresionnan simbolico. Ademas, tin profecianan skirbi den un sentido simbolico cu bo por compronde  solamente door di busca otro textonan di Bijbel cu tin di aber cu e mesun topico. (Daniel 7:1-7; Revelacion 13:1, 2) Apesar di tur esei, bo por bin compronde Bijbel. Con bo por ta sigur di esei?

Tur Hende Por Tin e Placer Ei

Bijbel ta e Palabra di Dios. Den dje e ta splica nos kico ta su boluntad. Bo ta kere cu Dios lo percura un buki cu ta imposibel pa compronde of cu ta hende bon siña so por compronde? Claro cu no. Esei lo ta un falta di bondad di su parti. Cristo Hesus a bisa: “Supone cu un tata entre boso, si su yiu pidie un pisca, lo e dun’e un colebra? Of si e pidie un webo, lo e dun’e un scorpion? Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” (Lucas 11:11-13) Pues, bo por ta sigur cu bo tambe por compronde Bijbel y cu si bo pidi Dios sinseramente, lo e percura e yudansa cu bo tin mester pa compronde su Palabra. De echo, asta mucha por compronde e siñansanan basico di Bijbel!—2 Timoteo 3:15.

Aunke nos tin cu haci esfuerso pa compronde Bijbel, ta bale la pena hacie pasobra esei por tin un efecto poderoso y edificante riba nos. Despues di Hesus su resureccion, el a aparece na dos di su disipelnan y a papia cu nan tocante profecianan di Bijbel. E relato di Lucas ta bisa: “Cuminsando cu Moises y cu tur e profetanan el a splica nan e cosnan tocante di su mes den tur e Scrituranan.” Cu ki resultado? E anochi ei, ora e disipelnan tawata pensa riba loke nan a siña, nan a bisa otro: “Nos curason no tawata kima den nos mientras cu e tawata papia cu nos na caminda, mientras cu e tawata splica nos e Scrituranan?” (Lucas 24:13-32) Pa nan, tawata un placer di por a compronde e Palabra di Dios pasobra esei a fortalece nan fe den e promesanan di Dios, y tambe el a duna nan un punto di bista positivo pa cu futuro.

En bes di ta un carga, e proceso di compronde e Palabra di Dios ta algo interesante y beneficioso, mescos cu ora bo ta disfruta di un cuminda nutritivo. Kico bo mester haci pa haya e comprondemento ei? E siguiente articulo ta mustra con bo por haya placer den “e conocemento di Dios.”—Proverbionan 2:1-5.

[Plachi na pagina 4]

Mescos cu un tata amoroso, Yehova ta duna nos spirito santo pa yuda nos compronde Bijbel