Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Cua ta algun motibo cu tin asina tanto maldad awe?

Un di e causanan di maldad ta hende su inclinacion pa haci malo. (Genesis 8:21) Un otro motibo ta cu mayoria hende no tin conocemento exacto di e boluntad di Dios. Ademas Satanas, esun cu a origina maldad, ta sigui mete den asuntonan humano.—1/1, pagina 4-6.

• Ki efectonan positivo por resulta di un bon palabra duna na ora? (Proverbionan 12:25)

E por edifica confiansa den e persona cu nos ta papia cu ne, curash’e y motiv’e, y tambe crea den dje un sintimento di logro y aceptacion. Ademas, segun cu nos ta busca oportunidad pa elogia otro hende, esei ta yuda nos mira e bon den nan.—1/1, pagina 16-17.

• Kico tawatin den e arca di aliansa?

E tawatin e dos tablanan di piedra di e Lei y tambe un tiki mana. Despues di e rebelion di Core, a pone e bara di Aron den e Arca pa sirbi como un testimonio contra e generacion di e tempo ei. (Hebreonan 9:4) Kisas nan a saca e bara y e mana for di e Arca prome cu e dedicacion di e tempel di Salomon.—15/1, pagina 31.

• Dicon e Hudiunan den tempo di Nehemias tawatin cu trece palo na e tempel?

E Lei di Moises no a rekeri pa duna ofrenda di palo. Pero den tempo di Nehemias tawatin mester di un suministro continuo di palo pa por a kima sacrificio riba altar.—1/2, pagina 11.

• Kico e Fragmento di Muratori ta?

E ta parti di un manuscrito na Latin. Originalmente e texto a ser redacta na Griego rond di fin di siglo 2 di nos era. E ta e canon, of lista considera como confiabel, di mas bieu cu ta existi di e bukinan di e Scritura Griego Cristian. Tambe e ta duna comentario riba e bukinan ei y nan respectivo escritornan.—15/2, pagina 13-14.

• Dicon reina Vasti a keda nenga di bin serca rei?

Bijbel no ta bisa su motibo. Algun erudito ta pensa cu e reina a nenga di obedece pasobra e no kier a degrada su mes dilanti di e huespetnan burachi di rei. Of por ta cu e reina, cu di aparencia tawata masha bunita, en realidad no tawata sumiso, y asina el a pone un mal ehempel pa e otro esposanan den e Imperio di Persia.—1/3, pagina 9.

• Con e rescate ta percura liberacion?

Hesus su sacrificio por libra nos di pica hereda y tambe di e efectonan mortal di pica. (Romanonan 6:23) E sacrificio aki ta libra cristiannan berdadero di un mal consenshi. Anto door di eherce fe den e rescate, nos por ser libra di miedo relaciona cu nos posicion dilanti Dios. (1 Huan 2:1)—15/3, pagina 8.

• Kico nos por siña for di e prohibicion den e Lei pa no herbe un yiu di cabrito den lechi di su mama? (Exodo 23:19)

E acto aki lo por tawata un rito pagano pa laga awa yobe. (Levitico 20:23) Dios a percura e lechi di un cabrito pa alimenta e yiu y pa yud’e crece. Cushnando e yiu den e lechi ei lo a demostra un menosprecio pa e relacion cu Dios a establece entre mayor y yiu. E lei contra esaki a demostra Dios su compasion y ternura.—1/4, pagina 31.