No Tene Miedo​—Yehova Ta cu Bo!

MAS cu 50 aña pasa, un poco despues cu e prome bomnan nuclear a explota, e cientifico Harold C. Urey, ganado di Premio Nobel, a bisa tocante futuro: “Nos lo come cu miedo, drumi cu miedo, biba cu miedo y muri cu miedo.” Awe, en berdad tin hopi hende cu miedo den e mundo aki, y esei no ta nada straño pasobra tur dia corantnan ta skirbi tocante atakenan horendo di terorismo, crimen violento y enfermedadnan misterioso.

Como cristian, nos sa kico e condicionnan aki ta nifica. Nan ta indica cu nos ta bibando den “e ultimo dianan” di e mal sistema di cosnan aki, cu segun profecia di Bijbel lo ta caracterisa pa “temponan trabahoso.” (2 Timoteo 3:1) Pues esei ta duna nos mas conviccion cu pronto Yehova Dios lo trece un mundo nobo den cua husticia lo biba. (2 Pedro 3:13) Pero nos como cristian ta liber di miedo?

Sirbidonan di Dios y Miedo

Yacob, David y Elias tawata algun sirbido di Yehova cu a haya miedo te na cierto punto ora nan tawata den situacionnan peligroso. (Genesis 32:6, 7; 1 Samuel 21:11, 12; 1 Reinan 19:2, 3) No cu nan no tawatin fe, al contrario, nan tawatin pleno confiansa den Yehova. Pero Yacob, David y Elias tawata hende; pesei nan por a haya miedo. Disipel Santiago a skirbi: “Elias tawata un homber cu un naturalesa mescos cu di nos.”—Santiago 5:17.

Kisas nos tambe ta haya miedo ora nos pensa riba un obstaculo cu nos ta enfrentando awor of uno cu nos por topa den futuro. Esei ta comprendibel. Al fin y al cabo, Bijbel ta bisa cu Satanas e Diabel ta determina pa “haci guera” contra esnan cu ta “warda e mandamentonan di Dios y [cu] tin e testimonio di Hesucristo.” (Revelacion 12:17) Aunke e palabranan ei ta aplica spesificamente na cristiannan ungi, Pablo a skirbi: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Toch, ora nos haya nos confronta cu problema, nos no mester laga miedo domina nos. Pakico no?

‘Un Dios di Liberacion’

E salmista David a skirbi: “Dios ta un Dios di liberacionnan pa nos.” (Salmo 68:20) Bes tras bes Yehova a demostra cu e por libra su pueblo, sea door di scapa nan for di situacionnan peligroso of door di duna nan e forsa pa nan wanta. (Salmo 34:17; Daniel 6:22; 1 Corintionan 10:13) Cuanto di e “liberacionnan” ei bo por corda for di bo estudio di Bijbel?

Cu yudansa di e Index di Publicacionnan Watch Tower, * kisas bo por analisa susesonan di bida real manera e Diluvio mundial di dia di Noe, e liberacion di Lot cu su yiu muhernan for di Sodoma y Gomora, e Exodo di Israel for di Egipto y nan biahe door di Lama Cora of e complot fracasa di Haman pa caba cu e Hudiunan. Ora bo lesa y despues medita riba e relatonan emocionante aki, bo fe cu Yehova ta un Dios di liberacion lo bira mas fuerte. Esaki, na su turno, lo yuda bo enfrenta pruebanan di bo fe sin miedo.

Ehempelnan Djawe

Bo por pensa riba algun ehempel actual di perseverancia den bo mes area, kisas di un cristian cu pa motibo di su fieldad a ser encarsela? Talbes bo conoce un cristian di edad cu ta sirbiendo Yehova apesar cu su salud a bai atras.  Of pensa riba hobennan cu ta mantene nan mes separa for di mundo apesar di e presion enorme cu nan compañeronan di scol ta pone riba nan. Tin tambe mayornan soltero cu ta lantando yiu sin un casa, of personanan soltero cu ta sirbiendo Yehova apesar di nan sintimentonan di soledad. Kico bo ta siña for di e personanan aki? Ora bo medita riba nan fieldad, esei por yuda bo persevera sin miedo bou di cualkier prueba.

No ta ora nos haya nos cu oposicion y persecucion so nos no mester tin miedo, sino tambe ora nos cuminsa duda cu Yehova ta stima nos. Nos tin cu cultiva confiansa cu e rescate di Cristo ta conta pa cada un di nos. (Galationan 2:20) E ora ei nos por acerca Yehova sin miedo. Si nos no ta sinti nos digno di e amor di Yehova, nos por medita riba e palabranan cu Hesus a dirigi na su siguidonan: “Dos mofi no ta wordo bendi pa un cen? Y ni un di nan lo no cai na suela si no ta e boluntad di boso Tata. Y asta e drachinan di cabei riba boso cabes, tur ta conta. Pesei, no tene miedo; boso bal mas cu un cantidad di mofi.”—Mateo 10:29-31.

Hopi bes e revistanan Toren di Vigilancia y Spierta! ta publica experencianan di Testigonan di Yehova di nos tempo cu a enfrenta prueba sin miedo. Esaki no ta nifica cu nan no tawata tristo of precupa pa motibo di situacionnan dificil cu nan a pasa aden. Pero nan no a laga e sintimentonan ei stroba nan di sigui sirbi Yehova. E relatonan publica ei por yuda abo tambe persevera sin miedo. Laga nos considera dos ehempel.

Un Lesion A Cambia Su Bida

E Spierta! di 8 di mei 2003 tawatin e articulo “Un Lesion Cu A Cambia Mi Bida.” Den dje, Stanley Ombeva, un Testigo di Yehova na Kenia, ta papia di e problemanan cu el a confronta ora un auto cu tawata core mucho duro a dal e. Ora su salud a bai atras, el a perde su trabou y tur beneficio. Ruman Ombeva ta admiti den su relato: “Segun cu mi a realisa con serio mi condicion tawata, mi a bira negativo, egoista y crepchi. Tin biaha, mi tawata rabia, cunsumi y piki pieu riba delaster un cos chikito.” Apesar di su pesadiya, e homber cristian aki no a haya miedo. E no a laga desilusion caba cu ne y kita tur su animo den bida. Mas bien, el a confia den Yehova. Ruman Ombeva a bisa: “Semper el a sostene mi den tur loke mi a pasa aden, y el a haci esei asina tanto cu tin biaha mi tawatin berguensa di mi mes. Mi a propone mi mes firmemente pa lesa y medita riba textonan cu mi sa cu lo tawata un consuelo pa mi den mi situacion.”

Ruman Ombeva su comentarionan franco a yuda hopi otro hende persevera sin miedo. Un ruman muher cristian a skirbi: “Ora mi a lesa e articulo aki mi wowo a yena cu awa. Mi a sinti cu pa medio di dje Yehova a consola mi y demostra su interes tierno y amoroso den mi.” Un otro Testigo a skirbi: “E tipo di articulonan aki ta duna nos cu ta pasando den situacionnan similar y cu ta sufri den silencio un gran animacion.”

Tratando cu Angustia Emocional

Un otro experencia conmovedor ta esun di Herbert Jennings, cu a aparece den e articulo “Bo No Sa Con Bo Bida Lo Ta Mañan.” * Ruman Jennings ta sufri di e asina yama  trastorno di beis bipolar. Reflexionando riba e etapa inicial di su enfermedad, el a bisa: “Tawata un berdadero lucha pa djis asisti na e reunionnan cristian. Apesar di esei, mi tawata completamente combenci con importante asociacion spiritual ta. Pa trata cu e situacion, hopi bes mi tawata drenta Salon di Reino despues cu mayoria hende a tuma nan asiento y a bai net prome cu nan a cuminsa move na final di e programa.”

No tawata facil pa predica tampoco. Ruman Jennings a conta: “Tawatin dia, despues cu mi a yega na un cas, cu simplemente mi no tawatin e curashi pa primi e bel. Sinembargo, mi no a entrega pa motibo cu mi tawata sa cu nos ministerio ta nifica salbacion pa nos mes y pa esnan cu ta responde faborablemente. (1 Timoteo 4:16) Despues di un rato, mi por a domina mi emocionnan, bai na e siguiente porta y purba atrobe. Door di sigui predica, mi salud spiritual a keda basta bon y esei a yuda mi trata mihor cu e situacion.”

Ruman Jennings su relato franco a yuda hopi lector enfrenta nan angustianan cu e mesun determinacion, esta, sin miedo. Por ehempel, un ruman muher cristian a skirbi: “Den e 28 añanan cu mi tin ta lesa e revistanan Toren di Vigilancia y Spierta!, nunca mi a yega di sinti mi asina conmovi manera ora mi a lesa e articulo aki. Mi tawatin cu stop cu mi sirbishi di tempo completo y mi a sinti mi hopi culpabel, pensando cu si mi tawatin mas fe, lo mi por a continua. Ora mi a lesa con Ruman Jennings tawatin cu laga su asignacion para pa motibo di su enfermedad, esei a yuda mi mira mi situacion na un manera balansa. E articulo tawata berdaderamente un contesta riba mi oracionnan!”

Mescos tambe, un ruman homber cristian a skirbi: “Despues cu mi a sirbi dies aña largo como anciano di congregacion, mi tawatin cu renuncia mi privilegio pa motibo di un enfermedad mental. E idea cu mi a fracasa a deprimi mi asina tanto cu mi no por a ni lesa e articulonan di storia di bida, cu hopi bes ta papia di e logronan extraordinario di Yehova su pueblo. Pero Ruman Jennings su perseverancia tawata un animacion pa mi. Mi a lesa e articulo varios biaha.”

Sigui Padilanti cu Confiansa

Mescos cu e rumannan Ombeva y Jennings, hopi Testigo di Yehova ta sigui adora Yehova Dios sin miedo apesar di obstaculonan dificil. Si bo ta un di nan, bo ta digno di nos admiracion. Bo por ta sigur cu “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.”—Hebreonan 6:10.

Mescos cu Yehova a yuda su pueblo fiel di antiguedad vence nan enemigonan, e por yuda bo vence cualkier obstaculo cu por presenta. Pesei, tuma na pecho e palabranan cu Yehova a papia pa medio di profeta Isaias: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo, si, lo mi sostene bo cu mi man drechi di husticia.”—Isaias 41:10.

[Nota]

[Plachi na pagina 16]

Mescos cu Stanley Ombeva (ariba) y Herbert Jennings (man drechi), hopi ta esnan cu ta sirbiendo Yehova sin miedo

[Reconocemento pa Potret na pagina 14]

Potret di USAF