Pregunta di Lector

Kico ta pone “e cosnan deseabel di tur e nacionnan” drenta den e “cas” di adoracion berdadero?—Hageo 2:7, NW.

Mediante profeta Hageo, Yehova a profetisa: “Lo mi sagudi tur e nacionnan, y e cosnan deseabel di tur e nacionnan tin cu drenta paden; y lo mi yena e cas aki cu gloria.” (Hageo 2:7, NW) Ta e sagudimento di “tur e nacionnan” ta pone “e cosnan deseabel” di e nacionnan, esta, personanan di curason honrado, acepta adoracion berdadero? E contesta ta no.

Considera un rato ta kico ta sagudi e nacionnan y na kico e sagudimento aki ta hiba. Bijbel ta bisa cu “e nacionnan ta reboltia . . . y e pueblonan ta plania un cos vano.” (Salmo 2:1) E “cos vano” cu nan ta “plania”, of medita riba dje, ta con pa sigura continuacion di nan propio soberania. Loke mas ta sagudi nan ta cualkier cos cu ta menasa nan gobernacion.

E predicacion mundial cu Testigonan di Yehova ta haci tocante Dios su Reino estableci, a bira precis e tipo di menasa ei pa e nacionnan. De echo, e Reino Mesianico di Dios den man di Hesucristo ta bai “garna y pone un fin na tur e reinonan aki [crea pa hende].” (Daniel 2:44) E mensahe di huicio cu ta forma parti di nos trabou di predica ta causando un sagudimento den e nacionnan. (Isaias 61:2) Y e sagudimento ta bira mas pisa segun cu e trabou di predica ta bira mas y mas intenso y extenso. E sagudimento profetisa na Hageo 2:7 ta un señal di kico?

Na Hageo 2:6 nos ta lesa: “Pasobra asina e SEÑOR di ehersitonan ta bisa: ‘Den poco tempo mi ta bai sagudi un biaha mas e shelonan y e tera, e lama y e tera seco.’” Apostel Pablo, citando for di e versiculo aki, a skirbi: “El a priminti, bisando: ‘Un biaha mas lo mi sagudi no tera so, sino shelo tambe.’ Y e expresion aki: ‘Un biaha mas’, ta indica e kitamento di e cosnan ei cu por wordo sagudi, esta, cosnan cu a wordo crea, pa e cosnan cu no por wordo sagudi [esta, e Reino] por keda.” (Hebreonan 12:26, 27) Si, henter e sistema actual di cosnan lo ser destrui pa habri caminda pa Dios su mundo nobo.

Personanan di curason honrado ta ser atrai na adoracion berdadero, pero no pasobra e nacionnan ta ser sagudi. E loke cu ta atrae nan na Yehova y su adoracion ta e mesun accion cu ta pone e nacionnan sagudi, esta, e predicacion mundial tocante Dios su Reino estableci. Proclamacion di e bon noticia di e “evangelio eterno” ta atrae personanan cu tin e disposicion corecto na e adoracion di e Dios berdadero.—Revelacion 14:6, 7.

E mensahe di Reino ta un mensahe di huicio y di salbacion. (Isaias 61:1, 2) E predicacion mundial di e mensahe ei tin dos resultado: e ta sagudi e nacionnan y e ta pone cu e cosnan deseabel di e nacionnan ta drenta paden pa e gloria di Yehova.