“Pakico Nos Ta Aki?”

E GANADO di Premio Nobel y sobreviviente di e Holocausto Nazi, Elie Wiesel, a yega di yam’e “e pregunta di mas importante cu un ser humano ta confronta.” Cua esei ta? E pregunta: “Pakico nos ta aki?”

Abo a yega di pensa riba e pregunta ei? Hopi hende a hacie, pero sin haya contesta. E historiado Britanico Arnold Toynbee, den un intento pa identifica e proposito di bida, a skirbi: “E berdadero meta di hende ta pa glorifica Dios y alegra den Dje pa semper.”

Ta interesante pa nota cu mas cu tres mil aña pasa un otro homber, conoci como un bon observado di bida, ya caba a señala e contesta fundamental. Rei sabi Salomon a bisa: “E conclusion di tur loke cu a wordo tendi, ta: teme Dios y warda su mandamentonan, pasobra esaki ta aplicabel na [of, “ta e deber di”, NW] cada persona.”—Eclesiastes 12:13.

Dios su Yiu, Hesucristo, a apoya e principio basico aki. Tempo cu e tabata riba tera, el a haci tur su esfuerso pa glorifica su Tata celestial. Mediante su sirbishi na su Creador, Hesus a enrikece su bida. Esei a satisfac’e y sosten’e di tal manera cu e por a bisa: “Mi cuminda ta pa haci e boluntad di esun cu a manda mi.”—Juan 4:34.

Pues anto, pakico nos ta aki? Mescos cu Hesus, Salomon y hopi otro sirbidor di Dios, nos por haya berdadero proposito den bida y felicidad duradero ora nos ta haci e boluntad di Dios. Lo bo kier sa mas tocante con pa adora Dios cu “spirito y berdad”? (Juan 4:24) Gustosamente Testigonan di Jehova den bo comunidad lo yuda bo haya contesta riba e pregunta: “Pakico nos ta aki?”