“Nos Mester Obedece Dios Mas Cu Hende”

Pablo A Duna un Testimonio Cabal cu “Curashi”

UN MULTITUD violento ta cla pa bati un sirbidor obedecido di Dios mata. Net na tempo, soldanan Romano ta ranca e homber for di e atacadonan y ta deten’e. Esaki ta inicio di un serie di suceso cu ta abarca mas o menos cinco aña. Como resultado, hopi funcionario Romano di alto rango ta tende tocante Hesucristo.

E victima ta apostel Pablo. Rond di aña 34 di nos era, Hesus a revela cu Pablo (Saulo) lo a hiba Hesus su nomber dilanti di “reinan.” (Echonan 9:15) Te cu aña 56, esaki no a sosode ainda. Sinembargo, ora cu e apostel ta yegando na final di su di tres biahe como misionero, e situacion ta a punto di cambia.

Ataca Pero No Descurasha

Pablo ta bayendo rumbo pa Jerusalem, y “pa medio di e spirito” algun cristian ta spiert’e cu persecucion intenso ta sper’e den e stad ei. Cu curashi, Pablo ta bisa: “Mi ta cla, no solamente pa wordo mara, ma asta pa muri na Jerusalem pa e nomber di Señor Hesus.” (Echonan 21:4-14) Asina cu Pablo bishita e tempel na Jerusalem, Hudiunan di Asia cu sa di e exito cu e apostel tabatin na Asia, ta instiga un multitud violento pa mat’e. Pero soldanan Romano rapidamente ta ausili’e. (Echonan 21:27-32) Debi na e rescate ei, Pablo ta haya oportunidadnan unico pa declara e berdad tocante Cristo na personanan di alto rango y na auditorionan antipatico.

Pablo Ta Predica na Personanan Dificil pa Alcansa

E soldanan ta scapa Pablo for di peliger subiendo cu ne riba e trapinan di e baluarte conoci como Toren di Antonia. * Para riba e trapi ei, e apostel ta duna un testimonio impactante na e multitud religioso violento. (Echonan 21:33–22:21) Pero asina cu e menciona su encargo di predica na hende no Hudiu, e multitud ta bolbe bira violento. E comandante militar, Lisias, ta duna ordo pa interoga Pablo cu sota pa haya sa dicon e Hudiunan ta acus’e. Sinembargo, Pablo ta scapa e sota ora e informa nan cu e ta un ciudadano Romano. E siguiente dia, Lisias ta hiba Pablo dilanti e Concilio, of Sanedrin, pa haya sa dicon e Hudiunan ta acus’e.—Echonan 22:22-30.

Para dilanti di e corte supremo aki, Pablo ta haya un otro oportunidad excelente pa duna testimonio na su paisanonan Hudiu. E evangelisado intrepido aki ta declara su fe den e resureccion. (Echonan 23:1-8) E odio asesino di e Hudiunan ta mesun intenso, y e soldanan ta hiba Pablo na kazerne. E siguiente anochi, Pablo ta haya e garantia alentador aki di Señor: “Tene curashi, pasobra mescos cu bo a duna testimonio di mi causa na Jerusalem, asina bo tin cu duna testimonio na Roma tambe.”—Echonan 23:9-11.

Den secreto e soldanan ta pura hiba Pablo Cesarea, y asina nan ta preveni un complot pa mata Pablo. (Echonan 23:12-24) Na Cesarea, capital Romano administrativo di Judea, mas oportunidad valioso ta presenta, y Pablo ta duna testimonio na “reinan.” Pero prome e apostel ta mustra Gobernador Felix cu no tin prueba cu ta apoya e acusacionnan contra dje. Mas despues, Pablo ta predica na Felix cu su casa Drusila tocante Hesus, dominio propio, husticia y e huicio cu ta bin. Sinembargo, Pablo ta keda encarsela pa dos aña, ya cu Felix ta spera di haya placa bou di mesa. Pero Pablo no ta dun’e ni un soborno.—Echonan 23:33–24:27.

 Ora cu Festo bin na luga di Felix, e Hudiunan ta bolbe haci un intento pa laga condena Pablo y ehecut’e. Ta bolbe trata e caso na Cesarea, y pa evita cu ta transferi e huicio pa Jerusalem, Pablo ta declara: “Mi ta para dilanti di tribunal di Cesar . . . Mi ta apela na Cesar.” (Echonan 25:1-11, 20, 21) Algun dia despues, ora e apostel presenta su caso dilanti di Rei Herodes Agripa II, e Rei ei ta bisa: “Casi bo ta combence mi pa bira cristian.” (Echonan 26:1-28) Rond di aña 58, nan ta manda Pablo Roma. Siendo preso einan, pa dos aña mas e apostel ingenioso aki ta sigui haya maneranan pa predica tocante Cristo. (Echonan 28:16-31) Parce cu despues di tempo Pablo a presenta dilanti di Emperador Nero, el a ser declara inocente, y finalmente por a reanuda su actividad di misionero como un homber liber. No tin registro di ningun otro apostel cu a haya e oportunidad di alcansa personanan asina prominente cu e bon nobo.

Manera lo anterior ta mustra, apostel Pablo a biba na harmonia cu e principio significativo cu su compañeronan cristian a expresa dilanti di e tribunal Hudiu: “Nos mester obedece Dios mas cu hende.” (Echonan 5:29) Ki un ehempel excelente el a pone pa nos! A pesar di esfuersonan humano persistente pa par’e, e apostel a obedece plenamente e mandamento pa duna un testimonio cabal. Debi na tal obediencia firme na Dios, Pablo a cumpli cu su asignacion como “un instrumento scohi” pa hiba e nomber di Hesus “na e paganonan y reinan y e yiunan di Israel.”—Echonan 9:15.

[Nota]

[Cuadro/​Plachi na pagina 9]

PABLO TABATA UNICAMENTE INTERESA DEN DEFENDE SU MES?

Comentando riba e pregunta aki, autor Ben Witherington III, a skirbi: “For di Pablo . . . su punto di bista, e cos crucial no tabata pa e defende su mes, sino mas bien pa e duna testimonio di e evangelio na autoridadnan, tanto Hudiu como no Hudiu . . . En realidad, loke realmente ta ser husga ta e evangelio.”