Dicon Evita Extremo?

JEHOVA ta e mihor ehempel cu tin di ekilibrio of balansa. “Su obra ta perfecto”, y su husticia nunca ta severo, ya cu semper e ta combina cu misericordia. (Deuteronomio 32:4) Su amor nunca ta sin escrupulo, pasobra e ta actua na harmonia cu leinan perfecto. (Salmo 89:14; 103:13, 14) Nos prome mayornan a ser crea balansa den tur sentido. Nan no tabata inclina na ningun extremo. Sinembargo, introduccion di pica a trece un “defecto”​—imperfeccion​—locual a pone nan perde e balansa ei.​—Deuteronomio 32:5.

Pa ilustra esaki: Bo a yega di core den un auto of riba un bais cu tin un tire cu un bobel grandi? E defecto ei sin duda a haci e coremento dificil y tambe peligroso. Bo mester drecha un tire asina prome cu e bira piyo of e baha. Di igual manera, nos personalidad imperfecto ta inclina na cosnan cu ta fuera di lo normal. Si nos permiti e “bobelnan” aki crece, nos trayecto atrabes di bida lo por ta dificil y asta peligroso.

Tin biaha nos bon cualidadnan, nos puntonan fuerte, por bai mucho den extremo. Por ehempel, e Lei di Moises a rekeri di e Israelitanan pa nan pone fraña na rand di nan pañanan, sinembargo como cu e farizeonan den tempo di Hesus kier a sobresali riba e multitud, nan a “haci e cuashinan [of, fraña] di nan pañanan mas largo”, te na un grado extremo. Nan motivacion tabata pa parce mas santo cu tur otro hende.​—Mateo 23:5; Numbernan 15:38-40.

Awendia tin hende ta purba tur manera posibel pa haya atencion, tin biaha asta dor di shock otronan. En realidad, esaki por ta un grito desespera di: “Wak mi! Mi tambe t’ei!” Sinembargo, bisti, actitud y accionnan extremo lo no satisface e berdadero necesidadnan di un cristian.

Un Actitud Balansa Relaciona cu Trabou

Ken cu nos ta y unda cu nos ta biba, trabou sano ta un cos cu ta yuda duna nos bida un proposito. Dios a crea nos pa haya satisfaccion den trabou asina. (Genesis 2:15) P’esei Bijbel ta condena flohera. Apostel Pablo a bisa bon cla: “Si un hende no kier traha, no lag’e come tampoco.” (2 Tesalonicensenan 3:10) Si, un actitud floho relaciona cu trabou lo por causa no solamente pobresa y mal contento sino tambe e desaprobacion di Dios.

Hopi hende ta bai na e otro extremo y ta bira adicto na nan trabou, es decir, voluntariamente nan ta catibo di nan trabou. Nan ta sali cas mainta tempran y ta yega bek anochi lat, anto kisas nan ta rasona cu nan trabou ta pa bienestar di nan famia. Sinembargo, nan famia kisas ta en realidad victima di tal dedicacion extremo na trabou. Un ama di cas, kende su casa hopi biaha ta traha overtime, a bisa: “Gustosamente lo mi duna tur e cosnan den e cas luhoso aki a cambio di e oportunidad di tin mi casa aki hunto cu mi y cu nos yiunan.” E personanan cu ta scohe pa traha di mas mester pensa seriamente riba e experencia personal di Rei Salomon: “Mi a considera tur mi actividadnan cu mi mannan a haci y e trabou cu mi a tuma pa haci nan; y mira, tur tabata banidad y coremento tras di biento.”​—Eclesiastes 2:11.

 Si, den asunto di trabou, nos tin cu evita ambos extremo. Nos por ta trahado diligente, pero cordando a la bes cu si nos bira catibo di trabou esei lo horta nos di felicidad y podise di hopi cos mas.​—Eclesiastes 4:5, 6.

Evita Puntonan di Bista Extremo di Placer

Bijbel a profetisa relaciona cu nos tempo: ‘Hende lo ta stimado di placer mas bien cu stimado di Dios.’ (2 Timoteo 3:2, 4) Coremento tras di placer a bira un di e hermentnan mas efectivo di Satanas pa kita hende for di Dios. Participacion den recreo y entretenimento, manera por ehempel den deportenan extremo cu ta subi “adrenalina”, ta floreciendo. E lista di e tipo di actividadnan ei ta birando constantemente mas largo, y e cantidad di hende cu ta participando den nan ta bira mas grandi. Con bin e deportenan ei ta gosa di tanto popularidad? E cos ta cu hopi hende no ta satisfecho cu nan bida diario, y p’esei nan ta bai en busca di mas y mas excitacion. Pero pa nan mantene e excitacion ei, nan tin cu aumenta e nivel di riesgo. Cristiannan cu kier agrada Dios ta evita deportenan peligroso como muestra di respet pa e regalo di bida y pa e Dunador di Bida.​—Salmo 36:9.

Ora cu Dios a crea e prome pareha humano, unda el a pone nan? Den e hofi di Eden, cu na e idioma original ta nifica “Placer” of “Delicia.” (Genesis 2:8) Pues ta bisto cu un bida agradabel y placentero tabata parti di e proposito di Jehova pa hende.

Hesus a laga un ehempel perfecto pa nos di un punto di bista balansa di placer. E tabata completamente dedica na cumpli cu e boluntad di Jehova, y ni pa un rato e no a stop di biba na harmonia cu e leinan y principionan di Dios. El a saca tempo pa hende den necesidad, asta ora cu e tabata cansa. (Mateo 14:13, 14) Anto si, Hesus a acepta invitacionnan pa bai come y a traha tempo den su bida pa sosega y refresca su mes. Claro cu e tabata sa cu algun enemigo a critic’e pasobra el a haci e cosnan aki. Nan a bisa tocante dje: “Ata un homber golos y un burache.” (Lucas 7:34; 10:38; 11:37) Pero Hesus no a kere cu berdadero devocion ta exclui tur placer for di bida.

Ta bisto anto cu ta sabi di nos parti pa evita cualkier extremo den asunto di recreo. Si nos haci placer y entretenimento e cos principal den bida, nunca nos lo haya berdadero felicidad. Esei por pone nos neglisha cosnan mas importante, incluso nos relacion cu Dios. Di otro banda, nos no mester nenga nos mes tur placer ni critica hende cu ta disfruta di bida den un manera balansa.​—Eclesiastes 2:24; 3:1-4.

Haya Felicidad den un Bida Balansa

Discipel Santiago a skirbi: “Nos tur ta trompica na hopi manera.” (Santiago 3:2) Kisas nos ta constata cu esaki ta berdad den nos caso segun cu nos ta haci esfuerso pa evita extremo. Kico por yuda nos keda balansa? Wel, nos tin cu reconoce nos propio puntonan fuerte y puntonan debil. Pero no ta facil pa haci esei. Nos lo por ta bayendo den un direccion extremo sin cu nos ta conciente di esei. Ta sabi anto pa nos keda cerca di otro cristiannan maduro y scucha conseho balansa. (Galationan 6:1, NW) Nos lo por pidi un amigo di confiansa of un anciano den congregacion cu tin experencia pa duna nos tal conseho balansa. Hunto cu e Scritura mes, tal conseho basa riba Bijbel por sirbi como un “spil” pa nos controla con balansa nos realmente ta for di e punto di bista di Jehova.​—Santiago 1:22-25.

Felismente, nos no tin cu hiba un bida di extremonan inevitabel. Si nos haci berdadero esfuerso y cu e bendicion di Jehova, nos por bira personanan balansa, y pues felis. Asina nos relacion cu nos rumannan cristian lo por mehora, y nos por bira asta mihor ehempel pa e hendenan cu nos ta predica na dje. Riba tur cos, asina nos lo imita mas mihor ainda nos Dios amoroso y balansa, Jehova.​—Efesionan 5:1.

[Reconocemento pa Potret na pagina 28]

©Greg Epperson/age fotostock