Esposonan, Reconoce Cristo Como Boso Cabes
Esposonan, Reconoce Cristo Como Boso Cabes
“Cristo ta e cabes di tur homber.”—1 CORINTIONAN 11:3.
1, 2. (a) Con lo bo por midi exito di un esposo? (b) Pakico ta sumamente importante pa reconoce cu ta Dios a establece e areglo di matrimonio?
CON lo bo midi exito di un esposo? Na su capasidad mental of fisico? A base di e cantidad di placa cu e por gana? Of esei ta specialmente na e manera amoroso y bondadoso cu e ta trata su casa y yiunan? Si evalua esposonan a base di e ultimo criterio aki, hopi di nan lo no pasa e prueba cu exito pasobra nan ta laga e spirito di e mundo aki y normanan di hende dirigi nan. Pakico? Esei ta principalmente debi cu nan no ta reconoce ni aplica e guia di Esun cu a origina matrimonio—Esun cu “a traha un muher cu e repchi cu el a tuma for di e homber y a hib’e pa e homber.”—Genesis 2:21-24.
2 Hesucristo a confirma e relato biblico aki cu ta mustra cu matrimonio ta di origen divino, ora el a bisa e hendenan di su tempo cu a critic’e: “Boso no a lesa cu esun cu a crea hende for di principio ‘a traha nan homber y muher’, y a bisa: ‘Pa e motibo aki un homber lo bandona su tata y mama y lo uni cu su esposa; y nan dos lo bira un carni’? Asina anto nan no ta dos mas, sino un carni. P’esei loke Dios a uni [den matrimonio], no laga ningun hende separa.” (Mateo 19:4-6) E secreto pa logra un matrimonio exitoso anto ta di reconoce cu ta Dios a establece e areglo di matrimonio y cu ta ora hende aplica e instruccionnan cu nan por haya den su Palabra, Bijbel, nan lo por tin exito.
Un Factor Clave pa Esposo Por Tin Exito
3, 4. (a) Kico a duna Hesus un bon conocemento di matrimonio? (b) Ken ta e esposa figurativo di Hesus, y con esposonan mester trata nan esposa?
3 Pa un esposo por tin exito, e tin cu studia loke Hesus a bisa y imit’e den loke el a haci. Hesus su conocemento riba e materia aki ta profundo pasobra e tabata presente na e creacion di e prome pareha humano y tambe na nan matrimonio. Jehova Dios a bis’e: “Laga nos traha hende segun nos imagen, conforme nos semehansa.” (Genesis 1:26) Si, Dios tabata papiando cu Esun cu El a crea prome cu tur otro persona of cos y cu “tabata na su lado, manera un trahado experto.” (Proverbionan 8:22-30) E persona aki ta “e primogenito di henter creacion.” E ta “e principio di e creacion di Dios”, cu a existi asta prome cu e creacion di e universo.—Colosensenan 1:15; Revelacion 3:14; Lucas 1:26-31.
4 Hesus ta ser yama “e Lamchi di Dios”, y e ta ser describi figurativamente como un esposo. Un angel a yega di bisa: “Bin aki, lo mi mustra bo e bruid, e esposa di e Lamchi.” (Juan 1:29; Revelacion 21:9) Ken anto ta su bruid, of su esposa? “E esposa di e Lamchi” ta consisti di Cristo su fiel siguidonan ungi cu spirito, kendenan lo participa cu ne den su gobernacion celestial. (Revelacion 14:1, 3) P’esei, e manera cu Hesus a trata su discipelnan tempo cu e tabata hunto cu nan riba Tera ta sirbi como un modelo pa esposonan den nan trato cu nan esposa.
5. Pa ken Hesus mester sirbi como un ehempel?
5 Bijbel ta presenta Hesus como un ehempel pa tur su siguidonan, ya cu e ta bisa: “Cristo ... a sufri pa boso, lagando un ehempel pa boso [esta, tur su siguidonan], pa boso sigui den su pasonan.” (1 Pedro 2:21) Ma e ta un ehempel specialmente pa hende homber. Bijbel ta bisa: “Cristo ta e cabes di tur homber, y e homber ta e cabes di e muher, y Dios ta e cabes di Cristo.” (1 Corintionan 11:3) Siendo cu Cristo ta cabes di e homber, esposonan tin cu imita su ehempel. P’esei, pa un famia por tin exito y felicidad, nan mester aplica e principio di hefatura. Cu esaki na mente, esposonan tin cu trata nan esposa na un manera amoroso mescos cu Hesus ta trata su esposa figurativo, esta, su discipelnan.
Con pa Trata cu Problema Matrimonial
6. Con esposonan mester biba cu nan esposa?
6 Den e mundo yen di dificultad aki, specialmente esposonan tin cu imita Hesus su ehempel di pasenshi, amor y firmesa dor di sostene principionan husto. (2 Timoteo 3:1-5) Bijbel ta bisa: “Boso, esposonan, biba cu boso esposanan cu comprension.” (1 Pedro 3:7) Si, ora esposonan ta trata cu problemanan matrimonial, nan tin cu imita Cristo y mustra comprension. Hesus a pasa den pruebanan mas grandi cu cualkier otro hende, pero e tabata conciente cu ta Satanas, su demoñonan y e mundo malbado aki tabata responsabel pa esakinan. (Juan 14:30; Efesionan 6:12) Nunca Hesus no a keda sorprendi ora el a haya su mes cu prueba, pues esposonan tampoco no mester keda sorprendi ora nan ta “sufri tribulacion den e bida aki.” Bijbel ta spierta hende cu ta bai casa cu nan por spera e tribulacion ei.—1 Corintionan 7:28.
7, 8. (a) Kico ta nifica biba cu esposa cu comprension? (b) Pakico esposanan mester wordo trata cu honor?
7 Bijbel ta bisa cu esposonan mester biba cu nan esposa “cu comprension, manera cu un vaso mas delicado, como cu e ta hende muher; y dun’e honor.” (1 Pedro 3:7) En bes di domina su esposa den un forma bruto, manera Bijbel a profetisa cu hende homber generalmente lo haci, un esposo cu tin e aprobacion di Dios lo honra su esposa. (Genesis 3:16) Lo e kier trat’e como un pocesion precioso, y nunca probecha di e echo cu e tin mas forsa fisico pa haci su esposa daño. Mas bien, lo e tene cuenta cu su sintimentonan, y trat’e semper cu respet y dignidad.
8 Pakico ta na su luga pa esposonan duna honor na nan esposa? Bijbel ta contesta: “Siendo cu boso tambe ta heredero cu nan di e fabor inmereci di bida, pa boso oracionnan no ser stroba.” (1 Pedro 3:7, NW) Esposonan tin cu compronde cu Jehova no ta considera un homber cu ta ador’e mas valioso cu un muher cu tambe ta ador’e. Hende muher cu ta ser considera digno di Dios su aprobacion lo haya e mesun recompensa di bida eterno cu hende homber—hopi asta ta haya bida den shelo, caminda “no tin ni homber ni muher.” (Galationan 3:28) Pues esposonan tin cu corda cu loke ta haci un persona precioso pa Dios ta su fieldad, y no e echo cu e ta un homber of un muher, esposo of esposa, of un mucha.—1 Corintionan 4:2.
9. (a) Pa ki motibo esposonan mester honra nan esposa? (b) Con Hesus a mustra honor na hende muher?
9 Loke Pedro a bisa na final, esta, “pa [su] oracionnan no ser stroba”, ta enfatisa cu e esposo mester trata su esposa cu honor. E estorbo cu e apostel ta menciona por ta hopi peligroso! E por asta pone cu e oracionnan di un esposo ta wordo blokia, manera a sosode cu algun sirbidor di Dios den pasado cu a neglisha nan debernan. (Lamentacion 3:43, 44) Ta sabi anto pa hombernan cristian, tanto esnan casa como esnan cu ta pensa di casa—studia con Hesus a trata hende muher cu dignidad. El a acepta nan calurosamente como parti di e grupo cu a compañ’e den su ministerio, y el a trata nan cu bondad y respet. Na un ocasion, Hesus asta a revela un berdad masha asombroso prome na hende muher y a bisa nan pa informa e hende hombernan tocante dje!—Mateo 28:1, 8-10; Lucas 8:1-3.
Ehempel Specialmente pa Esposonan
10, 11. (a) Pakico specialmente esposonan tin cu studia e ehempel di Hesus? (b) Con esposonan mester stima nan esposa?
10 Manera nos a mira anteriormente, Bijbel ta compara e relacion cu un esposo tin cu su esposa cu esun cu Cristo tin cu su “bruid”, esta, su congregacion di siguidonan ungi. E Palabra di Dios ta bisa: “E esposo ta cabes di e esposa, mescos cu Cristo tambe ta cabes di e iglesia.” (Efesionan 5:23) E palabranan ei mester anima esposonan pa analisa ki tipo di lider Hesus tabata pa su siguidonan. Ta solamente dor di haci e analisis aki esposonan lo por sigui e ehempel di Hesus apropiadamente y duna nan esposa guia, amor y cuido, manera Hesus a haci cu su congregacion.
11 Bijbel ta urgi: “Esposonan, stima boso esposa, mescos cu Cristo tambe a stima e iglesia y a entrega su mes p’e.” (Efesionan 5:25) Den e capitulo anterior di Efesionan, “e iglesia”, of congregacion, ta ser yama “e curpa di Cristo.” E curpa simbolico aki tin hopi miembro di ambos sexo, y nan tur ta contribui pa e curpa funciona na un manera eficas. Claro cu Hesus ta “cabes di e curpa”, esta, e congregacion.—Efesionan 4:12; Colosensenan 1:18; 1 Corintionan 12:12, 13, 27.
12. Con Hesus a mustra amor na su curpa figurativo?
12 Hesus a mustra amor na su curpa figurativo, e congregacion, particularmente den e manera amoroso cu el a sirbi e interesnan di esnan cu lo a bira su miembronan. Por ehempel, ora su discipelnan tabata cansa, el a bisa nan: “Ban cu mi . . . na un luga solitario y sosega un rato.” (Marco 6:31) Den e descripcion cu un di e apostelnan a duna di Hesus su actividad apenas algun ora prome cu nan a ehecut’e, el a skirbi: ‘El a stima te na fin esnan di dje [esta, miembronan di su curpa simbolico] cu tabata den mundo.’ (Juan 13:1) Hesus a duna un bunita ehempel di con esposonan mester trata nan esposa.
13. Con Pablo ta conseha esposonan pa stima nan esposa?
13 Apostel Pablo a referi mas aleu na e ehempel cu Hesus a pone pa esposonan, consehando nan: “Esposonan tambe mester stima nan esposa manera nan mes curpa. Esun cu ta stima su esposa ta stima su mes; pasobra nunca ni un hende no a odia su mes carni, ma ta aliment’e y ta cuid’e, mescos cu Cristo tambe ta haci cu e iglesia.” Anto Pablo a agrega: “Laga cada un di boso tambe stima su esposa manera su mes.”—Efesionan 5:28, 29, 33.
14. Con un esposo ta trata su curpa imperfecto, y kico esaki ta indica tocante e manera cu e mester trata su esposa?
14 Pensa riba esei. Un homber bon di cabes ta haci daño na su mes curpa pa malo? Ora un homber dal su dede di pia, e ta sut’e pasobra esaki a pon’e trompica? Claro cu no! Un esposo ta humilia su mes dilanti su amigonan of ta haci redo tocante su mes fayonan? No toch? Pakico anto lo e ‘suta’ su esposa cu su lenga, of cu algo piyo, si e esposa comete un fayo? Esposonan mester tene cuenta no solamente cu nan mes interesnan sino tambe cu esnan di nan esposa.—1 Corintionan 10:24; 13:5.
15. (a) Ki ehempel Hesus a pone ora su discipelnan a manifesta debilidad humano? (b) Ki les esposonan por saca for di e ehempel aki?
15 Pensa riba e manera cu Hesus a mustra interes den su discipelnan ora nan a manifesta debilidad humano, riba e anochi prome cu su morto. Aunke el a bisa nan bes tras bes pa haci oracion, nan a pega soño tres biaha den e hofi di Getsemane. Diripiente hombernan arma a rondona nan. Hesus a puntra e hombernan: “Ta ken boso ta busca?” Ora nan a contesta “Hesus di Nazaret”, el a bisa nan: “Ta Ami t’e.” Sabiendo cu ‘su ora’ di morto a yega, e di: “Si ta ami boso ta busca, laga esakinan bai.” Semper Hesus a tene cuenta cu e bienestar di su discipelnan—parti di su bruid figurativo—y el a busca un manera di scapa nan. Ora esposonan studia con Hesus a trata su discipelnan, nan lo haya hopi principio cu nan por aplica den e manera cu nan tin cu trata nan casa.—Juan 18:1-9; Marco 14:34-37, 41.
Hesus Su Amor No Ta Basa Riba Emocion So
16. Kico Hesus tabata sinti pa Marta, pero con Hesus a corigie?
16 Bijbel ta bisa: “Hesus tabata stima Marta y su ruman muher y Lazaro”, kendenan hopi bes a ricibie como huespet den nan cas. (Juan 11:5) Pero Hesus no a laga di conseha Marta ora Marta a duna demasiado atencion na un cuminda cu e tabata preparando, locual a strob’e di ricibi instruccion spiritual for di Hesus. El a bisa: “Marta, Marta, bo ta precupa y ta molestia bo curpa cu asina hopi cos; ma poco cos ta necesario, en realidad un so.” (Lucas 10:41, 42) Sin duda, debi na e cariño obvio cu Hesus tabatin pa Marta tabata facil pa Marta acepta su conseho. Asina tambe, esposonan mester trata nan esposa na un manera bondadoso, amoroso, uzando palabranan bon scohi. Pero ora nan tin cu corigi nan casa, ta apropia pa nan papia na un manera franco, mescos cu Hesus a haci.
17, 18. (a) Con Pedro a reprende Hesus, y pakico Hesus mester a corigi Pedro? (b) Ki responsabilidad un esposo tin?
17 Na un otro ocasion, Hesus a splica su apostelnan cu e mester a bai Jerusalem, caminda “e ancianonan y sacerdotenan principal y escribanan” lo a persiguie, y cu lo el a “wordo mata, y . . . lanta riba e di tres dia.” Cu esaki Pedro a hala Hesus un banda y a cuminsa reprend’e, bisando: “[“Sea bondadoso cu bo mes”, NW]! Esaki nunca lo no sosode cu bo.” Tabata obvio cu Pedro a laga sentimentalismo strob’e di compronde un punto. Hesus tabatin cu corigie, p’esei el a bisa Pedro: “Kita for di mi dilanti, Satanas! Bo ta un piedra di trompica pa mi; pasobra bo no tin bo pensamento riba e cosnan di Dios, sino riba esnan di hende.”—Mateo 16:21-23.
18 Hesus a caba di declara kico tabata e boluntad di Dios p’e, esta, cu e mester a sufri hopi cos y ser mata. (Salmo 16:10; Isaias 53:12) Pues Pedro no mester a cuminsa reprende Hesus. Si, ta Pedro mester a haya coreccion firme, mescos cu nos tur tin biaha. Como cabes di famia, e esposo tin e autoridad y responsabilidad di corigi miembronan di famia, incluso su casa. Aunke tin biaha e mester ta firme, e coreccion aki mester ser duna na un manera bondadoso y amoroso. Pues mescos cu Hesus a yuda Pedro pone cosnan den e perspectiva corecto, tin biaha esposonan lo tin cu haci mescos cu nan esposa. Por ehempel, si e esposa su forma di bisti of uzo di hoya of cosmetica cuminsa desvia for di e patronchi modesto recomenda den e Scritura, kisas su esposo tin cu mustr’e na un manera bondadoso pakico lo e tin cu haci algun ahuste.—1 Pedro 3:3-5.
Ta Bon pa Esposonan Tin Pasenshi
19, 20. (a) Ki problema a desaroya entre e apostelnan di Hesus, y con Hesus a trata cu e asunto? (b) Cuanto exito e esfuersonan di Hesus tabatin?
19 Si tin algo cu no ta bayendo bon y cu tin mester di atencion, esposonan no necesariamente mester spera cu nan esfuersonan sincero pa corigi e asunto lo logra mesora. Hesus mester a haci hopi esfuerso pa cambia actitud di su apostelnan. Por ehempel, entre nan a desaroya un rivalidad cu casi na fin di Hesus su ministerio a bolbe manifesta su mes. Nan a pleita cu otro tocante cua di nan tabata mas importante. (Marco 9:33-37; 10:35-45) No hopi tempo despues di e di dos ocasion, Hesus a haci areglo pa celebra su ultimo Pasco Hudiu cu nan den priva. Na e ocasion ei, ni un di nan a tuma e iniciativa pa haci e trabou humilde di laba pia di otro. Hesus si a hacie. Anto el a bisa nan: “Mi a duna boso un ehempel.”—Juan 13:2-15.
20 Esposonan cu ta demostra un actitud humilde manera esun di Hesus probablemente lo haya e cooperacion y apoyo di nan esposa. Pero nan mester tin pasenshi. Despues riba e mesun anochi ei di e Pasco Hudiu, e apostelnan a bolbe discuti cu otro tocante cua di nan tabata mas importante. (Lucas 22:24) Cambio di actitud y conducta hopi bes ta tuma tempo y ta sosode gradualmente. Pero ora e resultadonan ta positivo, mescos cu den e caso di e apostelnan, e ta duna hopi satisfaccion.
21. En bista di e problemanan cu matrimonionan ta confronta awe, kico esposonan tin cu corda y haci?
21 Awe, e problemanan cu matrimonionan ta confrontando ta mas grandi cu nunca. Hopi hende no ta tuma nan voto matrimonial na serio mas. P’esei, esposonan, reflexiona riba e origen di matrimonio. Corda cu esun cu a crea y establece e areglo aki ta nos Dios amoroso, Jehova. El a manda su Yiu, Hesus, no solamente como nos Rescatador—nos Salbador—sino tambe como un modelo pa esposonan imita.—Mateo 20:28; Juan 3:29.
Con Lo Bo Contesta?
• Pakico ta importante pa nos reconoce e origen di matrimonio?
• Den ki maneranan esposonan ta ser anima pa stima nan esposa?
• Menciona algun ehempel di e manera cu Hesus a trata cu su discipelnan cu ta mustra con un esposo lo mester eherce su autoridad como cabes na un manera similar.
[Preguntanan di Estudio]
[Plachi na pagina 14]
Pakico esposonan mester studia e ehempelnan di e manera cu Hesus a trata hende muher?
[Plachi na pagina 15]
Ora Hesus su discipelnan tabata cansa, el a mustra consideracion
[Plachi na pagina 16]
Esposonan mester conseha nan esposa cu bondad y palabranan bon scohi