Pregunta di Lector

Dicon Testigonan di Jehova ta evita di participa den un brindis siendo cu Bijbel no ta menciona esei?

Dal un brindis cu un glas di biña (of cualkier otro bebida alcoholico) ta un custumber bieu cu ta ser practica hopi caminda, a pesar cu e metodonan di brinda kisas ta varia di un luga pa otro. Tin biaha hende cu ta brinda of haci un toast ta dal nan glas hunto. E persona cu ta ofrece e brindis por lo general ta desea of pidi pa felicidad, bon salud, bida largo of algo por estilo pa un otro hende. E otro personanan cu ta tumando parti den e brindis kisas ta expresa cu nan ta di acuerdo of nan ta hisa nan glas y bebe poco biña. Pa hopi hende, esaki ta parce un custumber inofensivo of un acto di cortesia, pero tin motibonan valido pakico Testigonan di Jehova no ta participa den un brindis.

Esei no ta pasobra cristiannan no ta desea pa un hende haya felicidad y disfruta di bon salud. Por ehempel, den un carta na e congregacionnan, e cuerpo gobernante di prome siglo a conclui cu un palabra cu por ser traduci como “bon salud pa boso”, “cuida curpa” of “pasa bon.” (Echonan 15:29, NW) Ademas, algun adorado berdadero a bisa reinan humano: “Cu mi señor ... biba pa semper” of: “Cu rei biba pa semper.”​—1 Reinan 1:31; Nehemias 2:3.

Pero for di kico e custumber di brinda a origina? E Toren di Vigilancia na Spaño di 1 di maart 1968 (na Ingles, 1 di januari 1968), a cita The Encyclopædia Britannica (1910), Volumen 13, pagina 121: “E custumber di dal un ‘salud’ na fabor di hende bibo muy probablemente a bin di e rito religioso di antiguedad di bebe algo como ofrenda na e diosnan y na e mortonan. Na ora di come, e Griego- y Romanonan tabata basha un bebida abou como ofrenda na nan diosnan, y na banketenan ceremonial nan a dal un brindis pa e diosnan y pa e mortonan.” E enciclopedia a agrega: “Estrechamente liga cu e custumbernan aki di bebe como un tipo di ofrenda, lo mester tabatin e dalmento di brindis na fabor di e salud di hende bibo.”

Ainda e custumber ei ta valido? E buki International Handbook on Alcohol and Culture (Manual Internacional di Alcohol y Cultura) publica na 1995 ta bisa: “[Brindamento] probablemente ta un aspecto no religioso cu a resta di e ofrendanan di bebida di antiguedad caminda nan a ofrece un likido sagrado na e diosnan: sea sanger of biña a cambio di un deseo, un oracion resumi den e palabranan ‘bida largo!’ of ‘na bo salud!’”

Ta berdad cu no ta tur biaha ta asina cu pasobra un obheto, un diseño of un practica tin raiz of similaridad den religion falso di antiguedad, un adorado berdadero ta prohibi di tin e cos ei of di haci uzo di dje. Tuma por ehempel granatapel. Un enciclopedia biblico renombra ta informa: “Granatapel aparentemente a ser uza tambe como un simbolo sagrado den religionnan pagano.” Sinembargo, Dios a laga borda diseño di granatapel riba zom di paña di e sumo sacerdote, y e pilarnan di koper di e tempel di Salomon tabata dorna cu granatapel. (Exodo 28:33; 2 Reinan 25:17) Asina tambe, renchi di casamento un tempo tabatin nificacion religioso. Sinembargo, mayoria di hende awe no sa esei y ta considera un renchi di casamento simplemente como prueba cu un hende ta casa.

Kico di uza biña en conexion cu actonan religioso? Por ehempel, un biaha e hombernan di Sikem cu tabata adora Baal “a bai den cas di nan dios y a come y bebe, y a maldiciona Abimelek”, yiu homber di Gideon. (Huesnan 9:22-28) Bo ta kere cu un persona leal na Jehova lo a participa den e bebemento ei, podise invocando e poder di un dios contra Abimelek?  Ora Amos tabata describi un periodo cu hopi hende den Israel a rebela contra Jehova, el a bisa: “Nan ta drumi banda di cada altar; y den cas di nan dios nan ta bebe biña di esnan cu a haya but.” (Amos 2:8) Acaso adoradonan berdadero lo a participa den ocasionnan asina, sea cu nan a basha biña abou como ofrenda na e diosnan of a djis beb’e den e circunstancia ei? (Jeremias 7:18) Of un adorado berdadero lo a hisa un glas di biña y pidi un dios influencia of bendiciona e futuro di un hende?

Ta interesante pa nota cu tabatin biaha cu adoradonan di Jehova a hisa nan mannan y pidi pa un bon resultado. Pero nan a hisa nan mannan na e Dios berdadero. Nos ta lesa: “Salomon a bai para dilanti di e altar di SEÑOR ... y a habri su mannan na shelo. Y el a bisa: ‘O Jehova, e Dios di Israel, no tin ningun Dios manera bo ... tende abo den shelo, bo luga di biba; tende y pordona.’” (1 Reinan 8:22, 23, 30) Asina tambe “Esdras a bendiciona [Jehova] ... Y henter e pueblo a contesta: ‘Amen, Amen!’ mientras cu nan tabata hisa nan mannan na laira; despues nan a buig cu nan cara te na suela y a adora SEÑOR.” (Nehemias 8:6; 1 Timoteo 2:8) Pues ta bisto anto cu e personanan ei no a hisa nan mannan na shelo pa pidi bendicion for di un of otro dios di fortuna of suerte.​—Isaias 65:11.

Hopi hende awe cu ta participa den un brindis kisas no ta pensa cu nan ta pidiendo un reaccion of bendicion for di un dios, pero tampoco nan no por splica dicon nan ta hisa nan glas di biña na laira den direccion di shelo. Sinembargo, e echo cu nan no ta analisa e asunto cuidadosamente no ta un motibo pa cristiannan berdadero sinti nan mes obliga na imita nan gestonan.

Ta bon conoci cu den otro asuntonan tambe Testigonan di Jehova ta abstene di haci gestonan cu mayoria di hende ta haci. Por ehempel, hopi hende ta haci cierto gestonan pa cu emblemanan nacional of bandera; nan no ta considera e gestonan ei como acto di adoracion. Cristiannan berdadero no ta interferi cu e gestonan ei, pero nan personalmente no ta participa den nan. Hopi Testigo ora cu nan tabata sa cu lo bai tin un ceremonia asina, a actua discretamente pa asina nan no ofende otro hende. En todo caso, nan ta determina pa no haci gestonan patriotico, ya cu e gestonan ei no ta na harmonia cu Bijbel. (Exodo 20:4, 5; 1 Juan 5:21) Hopi hende awe kisas no ta considera participacion den un brindis como un gesto religioso. Pero tin motibonan valido pakico cristiannan no ta participa den dje, ya cu e tin un background religioso y te awe por ser mira como un peticion na ‘shelo’ pa haya bendicion, como si fuera pidiendo yudansa di un forsa sobrehumano.​—Exodo 23:2.