Escribanan di Antiguedad y e Palabra di Dios

E SCRITURA HEBREO a ser completa na fin di siglo 5 prome cu nos era. Den e siglonan cu a sigui, eruditonan Hudiu, specialmente soferim y despues e masoretanan, a haci un esfuerso cuidadoso pa conserva e exactitud di e texto Hebreo. Ma e bukinan biblico di mas bieu ta data for di tempo di Moises y Josue, mil aña prome cu e tempo di soferim. E material riba cua nan a skirbi e bukinan ei tabata daña; p’esei mester a copia e rolnan varios biaha. Kico nos sa di e profesion di escriba di e tempo ei? Tabatin copista habil den Israel di antiguedad?

E manuscritonan biblico di mas bieu cu ta existi te awe ta partinan di e Rolnan di Lama Morto. Algun di nan ta data for di siglo 3 y 2 prome cu nos era. Profesor Alan R. Millard, experto di idioma y arkeologia di Medio Oriente, ta splica cu no ta existi copianan mas bieu di ningun parti di Bijbel. E ta agrega: “Ta e civilisacionnan di eibanda por mustra con e escribanan di antiguedad tabata traha, y e conocemento ei por yuda nos evalua e texto Hebreo y mira e balor y importancia di su historia.”

E Profesion Antiguo di Escriba

For di cuater mil aña pasa caba nan tabata produci textonan historico, religioso, legal, academico y literario na Mesopotamia. Scolnan di escriba tabata floreciendo y un di e materianan cu nan tabata duna tabata con pa copia manuscritonan existente cu exactitud. Eruditonan di nos tempo ta haya solamente cambionan masha chikito den e textonan Babilonio cu a ser copia varios biaha den un lapso di tempo di mil aña of mas.

No ta na Mesopotamia so tabata existi e profesion di escriba. The Oxford Encyclopedia of Archaeology in the Near East ta declara: “Un escriba Babilonio cu a biba rond di aña 1500 prome cu nos era probablemente lo a sinti su mes na cas den cualkier centro di escriba rond Mesopotamia, Siria, Canaan y asta Egipto.” *

E profesion di escriba tabata hopi prominente na Egipto den tempo di Moises. Constantemente e escribanan tabata copia obranan di literatura. Riba grafnan Egipcio tin pinturanan decorativo di e manera cu nan tabata haci esei. E pinturanan ei tin mas cu cuater mil aña bieu. E enciclopedia menciona anteriormente ta bisa di e escribanan antiguo di  e tempo ei: “Durante e di dos milenio prome cu nos era, nan a crea un canon di literatura cu a describi e gran civilisacionnan di Mesopotamia y Egipto y a establece un codigo di etica pa e escriba profesional.”

E “codigo di etica” aki a inclui uzo di colofon cu tabata ser agrega na e texto principal. E colofonnan tabata contene nomber di e escriba y e doño di e tabla, e fecha, e fuente di e texto original for di cua e tabla a ser copia, e cantidad di liña, etcetera. Hopi biaha e escriba tabata agrega: “Skirbi y controla di acuerdo cu su original.” E detayenan aki ta indica cu e copistanan di antiguedad a duna hopi importancia na exactitud.

Profesor Millard, cita anteriormente, ta bisa: “Bo por mira cu den e proceso di copiamento [e escribanan] tabata check y corigi e texto; e proceso tabata contene metodonan fiho pa evita eror. E masoretanan tambe tabata aplica algun di e metodonan aki, manera contamento di liña of palabra, den nan tradicionnan na cuminsamento di Edad Medio.” Pues den e tempo di Moises y Josue, ya caba hende di Medio Oriente tabata mira e importancia di copia obranan skirbi cu cautela y exactitud.

E Israelitanan tambe tabatin copistanan habil? Kico e contenido di Bijbel ta indica?

Escribanan di Israel di Antiguedad

Moises a lanta como miembro di e famia di farao. (Exodo 2:10; Echonan 7:21, 22) Segun expertonan cu a studia e civilisacion Egipcio, Moises lo mester a siña domina entre otro e arte di lesa y skirbi segun e sistema Egipcio y por lo menos algun di e habilidadnan di e escribanan. Profesor James K. Hoffmeier ta declara den su buki Israel in Egypt (Israel na Egipto): “Tin bon motibo pa kere e tradicion biblico di cu Moises tabatin e capasidad pa registra suceso, describi detayenan di biahe y realisa otro cosnan cu escribanan tabata haci.” *

 Bijbel ta referi na otro personanan den Israel di antiguedad cu tambe tabata escribanan capas. Segun The Cambridge History of the Bible, Moises a “nombra oficialnan bon siña ... pa registra decisionnan y organisa asuntonan.” E conclusion aki ta basa riba Deuteronomio 1:15, cu ta bisa: “Asina mi (Moises) a tuma e cabesantenan di boso tribunan, ... y a nombra nan como cabesante riba boso, lidernan di milnan y di shennan, di cincuentanan y di diesnan, y oficialnan pa boso tribunan.” Ken e oficialnan aki tabata?

E palabra Hebreo pa “oficial” ta aparece varios biaha den textonan di Bijbel cu ta referi na e tempo di Moises y Josue. Diferente erudito ta splica cu e palabra aki ta nifica “un secretario pa registra cosnan”, “uno cu ta ‘skirbi’ of ‘registra’”, y “un funcionario cu tabata yuda un hues como secretario.” E cantidad di biaha cu e palabra Hebreo aki ta aparece ta indica cu den Israel tabatin bastante di e secretarionan ei y cu nan tabatin hopi responsabilidad den organisacion di e nacion den su prome añanan.

E di tres ehempel tin di aber cu e sacerdotenan Israelita. E Encyclopaedia Judaica ta declara cu nan “funcionnan religioso y seglar a exigi pa nan tabata bon siña.” Por ehempel, Moises a instrui e yiunan di Levi: “Na fin di cada shete aña, ... bo mester lesa e lei aki dilanti di henter Israel.” E sacerdotenan mester a warda e copia oficial di e Lei. Nan a autorisa y supervisa skirbimento di e copianan cu a sigui despues.​—Deuteronomio 17:18, 19.

Un otro ehempel tin di aber cu e prome copia di e Lei. Durante e ultimo lunanan di Moises su bida, el a bisa e Israelitanan: ‘Dia boso crusa Jordan pa bai na e tera cu Jehova boso Dios ta duna boso, boso mester lanta pa boso mes piedranan grandi, y hunta nan cu calki y skirbi riba nan tur e palabranan di e lei aki.’ (Deuteronomio 27:1-4) Despues di e destruccion di Jerico y Ai, e Israelitanan a reuni na Sero Ebal, situa den centro di e Tera Priminti. Aya Josue en berdad a skirbi riba e piedranan di un altar “un copia di e lei di Moises.” (Josue 8:30-32) E inscripcionnan ei a rekeri tanto escritor como lector. Esaki ta indica cu e prome Israelitanan tabatin conocemento di e idioma y e capasidad necesario pa conserva nan manuscritonan sagrado cu exactitud.

Exactitud di e Scritura

Despues di e tempo di Moises y Josue, a produci varios otro buki biblico Hebreo, y tabata copia esakinan na man. Segun cu e copianan aki tabata caba na nada of daña pa motibo di humedad, mester a remplasa nan. E proceso aki di copiamento a sigui pa hopi siglo.

A pesar cu e copistanan di Bijbel a traha cu hopi cautela, nan no por a evita di comete algun eror. Pero e fayonan di e copistanan a cambia e texto di Bijbel drasticamente? No. Por lo general, e fayonan aki ta insignificante y no ta kita nada for di e exactitud general di Bijbel, manera un comparacion critico di e manuscritonan di antiguedad ta demostra.

Pa cristiannan, e punto di bista di Hesucristo di e prome bukinan di Bijbel ta confirma cu e texto di e Santo Scritura ta exacto. Expresionnan manera “boso no a lesa den e buki di Moises?” y “no ta Moises a duna boso e Lei?” ta mustra cu Hesus a haya cu e copianan skirbi na man cu tabata existi e tempo ei tabata confiabel. (Marco 12:26; Juan 7:19) Ademas, Hesus a confirma e integridad di henter e Scritura Hebreo ora el a bisa: “Tur cos cu ta para skirbi tocante di mi den e Lei di Moises y e Profetanan y e Salmonan mester wordo cumpli.”​—Lucas 24:44.

P’esei nos por tin e confiansa cu e Santo Scritura a ser transmiti cu exactitud for di antiguedad. Ta net manera e profeta inspira Isaias a bisa: “Yerba ta seca, flor ta marchita, ma e palabra di nos Dios ta permanece pa semper.”​—Isaias 40:8.

[Nota]

[Plachi na pagina 18]

Un escriba Egipcio trahando

[Plachi na pagina 19]

E bukinan biblico di mas bieu ta data for di e tempo di Moises