Hobennan​—Boso Tin Efecto Riba Curason di Boso Mayornan

“NO TIN goso mas grandi pa mi cu di tende cu mi yiunan ta cana den e berdad”, e biehito apostel Juan a skirbi. (3 Juan 4) Aunke e yiunan menciona den e texto di Bijbel aki ta referi na discipel cristian, ta facil pa un mayor temeroso di Dios compronde e sintimentonan di Juan. Mescos cu mayornan ta haci un diferencia significativo den bida di nan yiunan, yiunan tambe ta haci un gran diferencia den bida di nan mayornan.

Rei Salomon di Israel a ripara ki efecto profundo yiunan por tin riba nan mayornan. El a skirbi: “Un yiu sabi ta haci su tata contento, ma un yiu bobo ta un tristesa pa su mama.” (Proverbionan 10:1) P’esei, ta bon pa tur yiu​—asta esnan mas grandi​—pensa ki efecto nan accionnan lo tin riba nan mama cu tata. Dicon ta bon pa nan haci esaki?

Djis pensa riba tur e tempo y atencion cu bo mayornan temeroso di Dios a inverti den bo formacion! Nan a cuminsa precupa y haci oracion pa bo hopi tempo prome cu bo a nace. Despues cu bo a nace, tur bo dos mayornan tabatin e placer di forma un laso emocional cu bo y probablemente a gradici Dios pa e privilegio y responsabilidad maraviyoso​—pero serio​—di lanta yiu. Nan a haya e encargo di cuida un baby indefenso, y como adoradonan di Jehova, nan a tuma esaki na serio.

Siendo cu bo mayornan ta cristiannan berdadero, nan a acudi na Bijbel y literatura basa riba Bijbel pa haya un guia confiabel, y a busca conseho cerca personanan cu tin experencia den criamento di yiu. Ademas, semper nan a expresa nan precupacionnan na Dios den nan oracionnan. (Huesnan 13:8) Segun cu bo tabata crece, bo mayornan tabata sa kico tabata bo puntonan fuerte pero no a sera wowo pa bo debilidadnan. (Job 1:5) Bo añanan di adolescencia a trece otro retonan. Podise algun biaha bo tabata rebelde, y bo mayornan a haya nan ta haci mas oracion, lesa mas y pensa mas riba kico nan por haci pa yuda bo sigui adora bo Tata celestial, Jehova.

Semper bo mayornan lo keda mama cu tata. Asta ora bo bira mas grandi nan ta sigui interesa den bo bienestar fisico, mental, emocional y spiritual. Ma durante tur e  temponan ei, bo mayornan ta corda cu bo tin boluntad liber y cu no tin ni un garantia di kico lo resulta di bo bida. Na final di cuenta, ta abo ta esun cu ta dicidi ki rumbo bo ta cohe.

No ta logico anto cu, si “no tin goso mas grandi” pa mayornan di tende cu nan yiunan “ta cana den e berdad”, nan lo sinti nan tristo tambe ora nan yiunan bira lomba pa e berdad? En berdad, yiunan cu ta comete bobedad ta causa dolor di curason pa nan mayornan. Salomon a declara: “Un yiu bobo ta tristesa pa su tata, y amargura pa esun cu a pon’e na mundo.” (Proverbionan 17:25) Ora un yiu stop di adora e Dios berdadero, esaki ta causa un tristesa profundo pa e mayornan!

Ta obvio anto cu bo tin un gran influencia riba bo famia y otro personanan. Bo conducta tin un efecto profundo riba curason di bo mayornan. Si bo bira lomba pa Dios y su principionan, bo mayornan lo sufri. Ma viceversa tambe ta e caso. Si bo keda fiel y obediente na Jehova, bo mayornan lo alegra. Sea determina pa alegra e curason di bo mayornan! Ki regalo mas precioso lo bo por duna esnan cu a lanta bo, proteha bo y stima bo?