Hopi Mas Importante Cu Pronostica Weer

CASI tur nacion tin dicho tocante weer. Shelo cora anochi, marinero contento; shelo cora mainta, marinero tene cuidou. Awe meteorologonan ta duna splicacion tecnico pakico e weer por desaroya manera e dicho ta bisa.

Den tempo di Hesus tambe hende tabatin e custumber di studia shelo y interpreta su aparencia. Hesus a bisa algun Hudiu: “Ora bira tardi boso ta bisa: ‘Ta bai tin bon tempo, pasobra shelo ta cora.’ Y mainta: ‘Awe ta bai tin mal tempo, pasobra shelo ta cora y tur tapa cu nubia scur.’ Boso sa con pa distingui e aspecto di shelo.” Anto Hesus a sigui bisando algo sorprendente: “Ma boso no por distingui e señalnan di e temponan?”​—Mateo 16:2, 3.

Kico tabata “e señalnan di e temponan”? Nan tabata e tantisimo señalnan cu a indica bon cla cu Hesus tabata e berdadero Mesias cu Dios a manda. Hesus su accionnan tabata masha cla y mes facil pa reconoce cu e color cora di shelo. Sinembargo, mayoria di Hudiu a ignora e señalnan cu a indica cu e Mesias a bin, loke definitivamente tabata hopi mas importante cu pronostica tempo.

Awe tambe tin un señal cu ta hopi mas importante pa compronde cu e nificacion di e color di shelo. Hesus a profetisa cu lo bin un fin na e mundo malbado aki ya asina un mihor mundo por cuminsa. El a menciona varios desaroyo cu hunto lo a indica ki tempo e cambio aki lo tabata cerca di tuma luga. E desaroyonan aki a inclui guera y hamber na tur parti di mundo. Hesus a bisa cu ora hende mira e cosnan aki, e tempo pa Dios interveni ta cerca.​—Mateo 24:3-21.

Abo ta mira “e señalnan di e temponan”?