Laga e Palabra di Dios Guia Bo Pasonan

“Bo palabra ta un lampi pa mi pia y un lus pa mi caminda.”​—SALMO 119:105.

1, 2. Pakico mayoria di hende no a logra haya berdadero pas y felicidad?

BO POR corda un ocasion cu bo tabatin cu pidi un hende pa splica bo con pa yega un caminda? Talbes bo tabata hopi cerca di e luga pero bo no tabata sigur ta den cua di e ultimo hanchinan bo mester a drenta. Of kisas bo a perde caminda completamente y mester a bai den henteramente un otro direccion. Sea cual sea e caso, lo no tabata sabi pa sigui e guia di un persona cu conoce e area? Un persona asina lo por a yuda bo alcansa bo destinacion.

² Pa miles di aña, humanidad en general a purba dirigi nan bida sin yudansa di Dios. Pero sin guia di Dios, hende imperfecto ta completamente perdi. Simplemente nan no por haya e caminda cu ta hiba na berdadero pas y felicidad. Pakico nan no por a alcansa e ‘destinacion’ ei? Mas cu 2.500 aña pasa, profeta Jeremias a declara: “No ta keda na hende pa dirigi su pasonan.” (Jeremias 10:23) Ken cu purba dirigi su mes pasonan sin acepta yudansa competente, tardi of tempran ta haya su mes cu frustracion. En berdad, hende mester di guia!

3. Dicon Jehova Dios ta e persona di mas capas pa guia humanidad, y kico e ta priminti?

³ Jehova Dios ta e persona di mas capas pa duna e guia ei. Dicon? Pasobra e sa mihor cu cualkier otro persona con hende a ser forma. Y e ta bon na haltura di e manera cu hende a desvia y ‘perde caminda.’ E sa tambe kico nan tin cu haci pa haya e caminda bek. Ademas, como Creador, Jehova semper sa kico ta mihor pa nos. (Isaias 48:17) Pues, nos por confia plenamente den su promesa skirbi na Salmo 32:8: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.” No tin duda, Jehova ta percura e mihor guia. Pero con exactamente e ta guia nos?

4, 5. Con e declaracionnan di Dios por guia nos?

⁴ Un salmista a bisa den oracion na Jehova: “Bo palabra ta un lampi pa mi pia y un lus pa mi caminda.” (Salmo 119:105) Nos por haya Dios su declaracion- y recordatorionan den Bijbel, y nan por yuda nos vence e obstaculonan cu nos por topa den nos caminda. En berdad, ora nos lesa Bijbel y lag’e guia nos, nos ta experimenta personalmente loke Isaias 30:21 ta bisa: “Bo horea lo tende un palabra tras di bo ta bisa: ‘Esaki ta e caminda, cana den dje.’”

⁵ Pero ripara cu Salmo 119:105 ta mustra riba dos funcion di e Palabra di Dios cu ta relaciona cu otro. Di prome, e ta sirbi como un lampi pa nos pia. Ora nos ta enfrenta e problemanan di tur dia, e principionan cu nos ta haya den Bijbel mester guia nos pasonan pa nos por tuma decisionnan sabi y evita e trampanan di e mundo aki. Di dos, e recordatorionan di Dios ta ilumina nos caminda; nan ta yuda nos haci escohencianan cu ta cuadra cu nos speransa di biba pa semper den e Paradijs cu Dios a priminti. Cu e caminda nos dilanti bon ilumina, nos lo por discerni e consecuencianan​—sea bon of malo​—di un cierto rumbo. (Romanonan 14:21; 1 Timoteo 6:9; Revelacion 22:12) Laga nos wak cu mas detaye con loke Dios a declara den su Palabra por ta un lampi pa nos pia y un lus pa nos caminda.

 “Un Lampi pa Mi Pia”

6. Den ki circunstancianan e palabranan di Dios por ta un lampi pa nos pia?

⁶ Tur dia nos ta tuma decision. Algun decision por parce relativamente insignificante, pero tin biaha nos por haya nos den un situacion cu ta pone nos moralidad, nos honestidad of nos posicion neutral na prueba. Pa por enfrenta e pruebanan ei cu exito, nos mester tin nos “mente entrena pa discerni loke ta bon y loke ta malo.” (Hebreonan 5:14) Segun cu nos ta haya conocemento exacto di e Palabra di Dios y ta desaroya un comprondemento di su principionan, nos ta entrena nos consenshi pa asina nos por tuma decisionnan cu ta agrada Jehova.​—Proverbionan 3:21.

7. Describi un situacion den cua un cristian por haya su mes tenta pa asocia cu colega di trabou cu no ta creyente.

⁷ Pensa riba e siguiente ehempel. Bo ta un adulto cu ta haci esfuerso sincero pa alegra e curason di Jehova? (Proverbionan 27:11) Si ta asina, nos ta elogia bo pa esei. Pero imagina bo cu algun colega di trabou ta ofrece bo un carchi di entrada pa bo bai un evenemento deportivo hunto cu nan. Nan ta gusta bo compania na trabou y nan tin gana di asocia cu bo despues di ora di trabou. Kisas bo tin e impresion fuerte cu e personanan aki no ta mal hende. Podise asta nan tin algun bon principio. Kico lo bo haci? Tin algun peliger den acepta e invitacion? Con e Palabra di Dios por yuda bo tuma un decision sabi den e asunto aki?

8. Ki principionan biblico ta yuda nos rasona riba e asunto di asociacion?

⁸ Laga nos considera algun principio biblico. Kisas e prome cu ta bini na bo mente ta esun na 1 Corintionan 15:33, cu ta bisa: “Mal compania ta daña bon custumber.” E echo cu bo ta sigui e principio aki ta nifica cu bo tin cu evita hende cu no ta creyente completamente? E contesta biblico riba e pregunta ei ta no. Al fin y al cabo, apostel Pablo mes a mustra consideracion amoroso na “tur clase di hende”, incluso hende cu no tabata cristian. (1 Corintionan 9:22, NW) E esencia di cristianismo ta exigi pa nos mustra interes den otro hende​—incluso esnan cu no tin e mesun creencianan cu nos. (Romanonan 10:13-15) En berdad, con nos por sigui e conseho pa “haci bon na tur hende” si nos aparta nos mes for di hende cu lo por tin mester di nos yudansa?​—Galationan 6:10.

9. Ki conseho biblico ta yuda nos keda balansa den nos relacion cu nos coleganan di trabou?

⁹ Sinembargo, tin un diferencia grandi entre ser amigabel cu un colega di trabou y ser un amigo intimo di dje. Aki ta caminda un otro principio biblico ta drenta den wega. Apostel Pablo a spierta cristiannan: “No uni boso mes den yugo desigual cu incredulonan.” (2 Corintionan 6:14) Kico e palabranan “no uni boso mes den yugo desigual” ta nifica? Algun version di Bijbel ta traduci e  palabranan ei como lo siguiente: “no mara boso mes”, “no purba traha hunto como hende igual” of “stop di forma relacionnan inapropia.” Na ki momento un relacion cu un colega di trabou ta bira inapropia? Ki ora e ta pasa limite y bira un yugo desigual? Bijbel, e Palabra di Dios, por dirigi bo pasonan den e situacion aki.

10. (a) Con Hesus a scohe amigo? (b) Ki preguntanan por yuda un persona tuma decisionnan sabi tocante asociacion?

¹⁰ Considera e ehempel di Hesus, kende desde creacion padilanti tabatin amor pa hende. (Proverbionan 8:31) Tempo e tabata riba Tera, el a forma un amistad intimo cu su siguidonan. (Juan 13:1) Asta el a ‘stima’ un homber cu no a haya un bon guia religioso. (Marco 10:17-22) Pero tambe Hesus a fiha limitenan bon cla relaciona cu su escohencia di amigo intimo. E no a forma laso estrecho cu hende cu no tabata realmente interesa den haci e boluntad di su Tata. Na un ocasion, Hesus a declara: “Boso ta mi amigo, si boso haci loke mi ta ordena boso.” (Juan 15:14) Kisas berdad bo ta bai bon cu un cierto colega di trabou. Pero puntra bo mes: ‘E persona aki ta dispuesto pa haci loke Hesus ta manda? E kier siña tocante Jehova, esun cu Hesus a instrui nos pa adora? E tin e mesun normanan moral cu ami como cristian tin?’ (Mateo 4:10) Ora bo ta papia cu bo coleganan di trabou tocante normanan di Bijbel y ta insisti pa aplica nan, e contestanan riba e preguntanan aki lo bira evidente.

11. Duna ehempel di situacionnan den cua e declaracionnan di Dios mester guia nos pasonan.

¹¹ Tin hopi otro situacion den cua e declaracionnan di Dios por ta manera un lampi pa nos pia. Por ehempel, kisas un cristian desemplea cu tin mester di un trabou desesperadamente ta haya un oferta di trabou. Sinembargo, e oranan cu lo e tin cu traha ta bai exigi hopi di dje, y si e acepta e trabou lo e bai falta varios reunion cristian y lo no por participa den otro actividadnan relaciona cu adoracion berdadero. (Salmo 37:25) Un otro cristian por haya e tentacion fuerte pa wak entretenimento cu ta viola principio di Bijbel claramente. (Efesionan 4:17-19) Y un otro ta cla pa sinti su mes ofendi pa e imperfeccionnan  di su rumannan cristian. (Colosensenan 3:13) Den tur e situacionnan ei, nos mester laga e Palabra di Dios ser un lampi pa nos pia. Realmente, ora nos ta sigui principionan di Bijbel, nos por enfrenta cualkier reto den bida cu exito. E Palabra di Dios ta “util pa siñansa, pa reprendemento, pa coreccion, pa educa den husticia.”​—2 Timoteo 3:16.

“Un Lus pa Mi Caminda”

12. Con e palabranan di Dios ta un lus pa nos caminda?

¹² Salmo 119:105 ta bisa tambe cu e palabranan di Dios por ilumina e caminda nos dilanti. Pa loke ta futuro, nos no ta den scuridad pasobra Bijbel ta splica e nificacion di e condicionnan angustioso di mundo y den kico nan lo resulta. Si, nos ta realisa cu nos ta bibando den “e ultimo dianan” di e mal sistema di cosnan aki. (2 Timoteo 3:1-5) E echo cu nos sa kico tin nos dilanti mester tin un efecto profundo riba e manera cu nos ta biba awor. Apostel Pedro a skirbi: “Como cu tur e cosnan aki lo wordo destrui di e manera aki, ki sorto di hende boso mester ta den un conducta santo y devoto, sperando y purando e binida di e dia di Dios!”​—2 Pedro 3:11, 12.

13. Ki efecto e urgencia di nos tempo mester tin riba nos manera di pensa y nos estilo di bida?

¹³ Nos manera di pensa y nos estilo di bida mester refleha nos conviccion firme cu “mundo ta pasa bai y su deseonan tambe.” (1 Juan 2:17) Ora nos aplica e guia di Bijbel, esei lo yuda nos tuma decisionnan sabi relaciona cu nos metanan pa futuro. Por ehempel, Hesus a declara: “Busca prome e reino di Dios y su husticia, y tur e cosnan aki lo wordo añadi na boso.” (Mateo 6:33) E gran cantidad di hobennan cu ta mustra fe den e palabranan di Hesus dor di traha pa alcansa e ministerio di tempo completo ta merece nos elogio! Otronan​—incluso famianan completo​—a muda di buena gana pa paisnan caminda tin un necesidad urgente pa proclamadonan di Reino.

14. Con un famia cristian a amplia nan ministerio?

¹⁴ Tuma por ehempel un famia cristian di cuater miembro cu a muda for di Merca bai Republica Dominicana pa sirbi den un congregacion na un pueblo di 50.000 habitante. E congregacion ta consisti di mas o menos 130 publicador di Reino. Pero dia 12 di april  2006, rond di 1.300 persona a asisti na e Conmemoracion di e morto di Cristo! E cunucu den e area ei ta asina “blanco pa wordo cosecha” cu den apenas cinco luna, e tata, mama, yiu homber y yiu muher aki tabata conduciendo hunto un total di 30 estudio di Bijbel. (Juan 4:35) E tata a splica: “E congregacion tin 30 ruman homber y muher cu a muda bin aki pa yuda. Mas o menos 20 di nan ta di Merca, mientras cu e otronan ta bini di Bahamas, Canada, Italia, Nueva Zelandia y Spaña. Nan ta yega ansioso pa participa den sirbishi y nan ta causa un tremendo impacto riba e entusiasmo di e rumannan local.”

15. Ki bendicion bo a ricibi pa motibo cu bo a pone interesnan di Reino na prome luga den bo bida?

¹⁵ Claro cu hopi ruman no ta den e posicion pa muda bai un otro pais pa sirbi caminda tin mas necesidad. Pero esnan cu si por​—of cu por ahusta nan circunstancianan pa haci nan mes disponibel​—sigur lo ricibi hopi bendicion ora nan ta participa den e aspecto aki di e ministerio. Y sin importa unda abo ta sirbi, no perde chens di experencia e goso cu lo bo por haya ora bo ta sirbi Jehova cu tur bo forsa. Si bo pone interesnan di Reino na prome luga den bo bida, Jehova ta priminti di “basha asina tanto bendicion, cu [lo bo] no tin suficiente luga pa conten’e.”​—Malakias 3:10.

Beneficia di e Guia di Jehova

16. Ki beneficio nos ta haya ora nos laga e declaracionnan di Dios guia nos?

¹⁶ Manera nos a mira, e declaracionnan di Jehova ta guia nos den dos manera cu ta relaciona cu otro. Nan ta sirbi como un lampi pa nos pia, locual ta yuda nos move padilanti den e direccion corecto y guia nos ora nos tin cu tuma decision. Y nan ta ilumina nos caminda, locual ta permiti nos mira bon cla kico tin den futuro. Esei na su turno ta yuda nos sigui e spiertamento di Pedro: “Faha e heupnan di boso mente, sea sobrio, fiha boso speransa completamente riba e gracia cu lo wordo treci na boso na e revelacion di Hesucristo.”​—1 Pedro 1:13.

17. Con un estudio di Bijbel lo yuda bo sigui e guia di Dios?

¹⁷ No tin duda cu Jehova ta duna guia. E pregunta ta: Abo lo somete bo na dje? Pa bo por compronde e guia cu Jehova ta duna, sea determina pa lesa un porcion di Bijbel tur dia. Medita riba loke bo ta lesa, trata na percibi Jehova su boluntad den asuntonan y pensa riba e diferente maneranan cu bo por aplica e informacion den bo bida. (1 Timoteo 4:15) Anto uza bo “facultad di rasona” ora bo ta tuma decision.​—Romanonan 12:1, NW.

18. Ki bendicion nos lo ricibi ora nos laga e Palabra di Dios guia nos?

¹⁸ E principionan cu nos ta haya den e Palabra di Dios por ilumina nos y duna nos e guia cu nos tin mester ora nos ta tuma decision tocante e caminda corecto cu nos tin cu sigui. Nos por tin confiansa cu e declaracionnan di Jehova registra den su Palabra ta haci e “hende simpel bira sabi.” (Salmo 19:7) Ora nos laga Bijbel guia nos, nos lo haya e bendicion di un consenshi limpi y e satisfaccion di ta agrada Jehova. (1 Timoteo 1:18, 19) Si cada dia nos laga e palabranan di Dios guia nos pasonan, Jehova lo recompensa nos finalmente cu e bendicion di bida eterno.​—Juan 17:3.

Bo Ta Corda?

• Pakico ta importante pa laga Jehova Dios guia nos pasonan?

• Den ki manera e declaracionnan di Dios por ta un lampi pa nos pia?

• Con e declaracionnan di Dios por ta un lus pa nos caminda?

• Con estudio di Bijbel lo yuda nos sigui e guia di Dios?

[Preguntanan di Estudio]

[Plachi na pagina 15]

Ki ora lo no ta sabi pa asocia cu un persona cu no ta creyente?

[Plachi na pagina 16]

Hesus su amigonan intimo tabata hende cu a haci e boluntad di Jehova

[Plachi na pagina 17]

Nos estilo di bida ta demostra cu nos ta pone interesnan di Reino na prome luga?