Jefte A Cumpli cu Su Promesa na Jehova

UN GUERERO victorioso a regresa cas despues di a libra su nacion for di opresion. Su yiu muher a core bin contr’e, baliando yen di alegria y tocando tamborin. Pero ora e guerero a mira su yiu, en bes di alegra, el a scheur su paña. Dicon? Acaso e no tabata mes contento cu su yiu cu el a bolbe cas sano y salvo? Ta cua bataya el a gana? Ken e guerero aki tabata?

E homber tabata Jefte, un di e huesnan di Israel di antiguedad. Pero pa contesta e otro preguntanan y pa mira ki nificacion e relato aki tin pa nos, nos tin cu considera loke a tuma luga prome cu e reencuentro inusual aki.

Un Crisis den Israel

Jefte a biba den un tempo di crisis. Su paisanonan Israelita a bandona adoracion puro y tabata sirbi e diosnan di Sidon, Moab, Amon y Filistea. Como consecuencia, Jehova a laga su pueblo cai den man di e Amonita- y Filisteonan, kendenan a oprimi nan pa 18 aña largo. Specialmente e habitantenan di Galaad, na e banda oost di Riu Jordan, a sufri hopi. * Finalmente, e Israelitanan a realisa cu nan tabata den mal caminda. Nan a arepenti, busca Jehova su yudansa, cuminsa sirbie y deshaci di e diosnan stranhero cu nan tabatin.​—Huesnan 10:6-16.

E Amonitanan a campa na Galaad, y e Israelitanan a reuni pa contra cu nan. Pero Israel tabatin mester di un hefe, un comandante. (Huesnan 10:17, 18) Mientrastanto, Jefte tabatin su propio problemanan. Su mitar rumannan haragan a core cu ne pa nan por a horta su herencia. P’esei Jefte a muda pa Tob, un region na oost di Galaad cu no tabatin proteccion contra e enemigonan di Israel. “Hombernan sin nada di haci” [NW], probablemente hombernan cu a perde trabou debi na e opresornan of cu a nenga di sirbi como catibo pa nan, a uni cu Jefte. Nan “tabata sali cu ne.” Esei podise a nifica cu nan tabata compaña Jefte ora cu e tabata bai invadi nan bisiñanan enemigo. Probablemente debi na Jefte su habilidad y curashi extraordinario den combate, e Scritura ta yam’e “un guerero balente.” (Huesnan 11:1-3) Pues, ta ken lo a dirigi Israel contra e Amonitanan?

“Bin y Sea Nos Hefe”

E ancianonan di Galaad a urgi Jefte: “Bin y sea nos hefe.” Si nan a kere cu lo el a probecha di biaha di e oportunidad pa regresa su pais,  nan tabata kiboca. El a contesta nan: “Boso no tabata odia mi y a core cu mi for di e cas di mi tata? Pakico anto boso a bin cerca mi awor cu boso ta den problema?” Esta inhusto cu na prome instante nan a rechasa Jefte anto despues a acudi na dje mes pa yudansa!​—Huesnan 11:4-7.

Bou di un solo condicion Jefte lo a hiba delantera den Galaad. El a declara: ‘Si Jehova entrega Amon na mi, lo mi bira boso cabesante!’ Victoria lo a duna prueba di Dios su respaldo, pero tambe Jefte kier a haci sigur cu e pueblo lo no a bandona Jehova su guia asina cu e crisis lo a pasa.​—Huesnan 11:8-11.

Trato cu Amon

Jefte a purba negosha cu e Amonitanan. El a manda mensahero na nan rei pa haya sa e motibo di e agresion Amonita. E contesta a inclui un acusacion: Tempo cu e Israelitanan a sali for di Egipto, nan a ocupa teritorio Amonita, y awor nan mester entreg’e bek.​—Huesnan 11:12, 13.

Jefte tabatin bon conocemento di e historia di Israel, y habilmente el a refuta e demandanan Amonita. El a bisa nan cu e Israelitanan no a molestia ni Amon ni Moab ni Edom ora nan a sali for di Egipto; es mas, Amon no tabatin e teritorio en cuestion tempo di e Exodo di Israel. Ta e Amoreonan tabatin e, pero Dios a entrega nan Rei, Sehon, den man di Israel. Ademas, e Israelitanan tabatin 300 aña ta biba den e area ei. Dicon ta awor numa e Amonitanan tabata kier e bek?​—Huesnan 11:14-22, 26.

Jefte a enfoca tambe riba un cuestion cu tabata e motibo principal pa e sufrimento di Israel: Ken ta e Dios berdadero? Ta Jehova of e diosnan di e pais cu Israel a ocupa? Si e dios Kemos tabatin poder, lo e no a uz’e pa yuda e pueblo keda cu e pais? Esaki tabata un bataya entre religion falso, promovi pa e Amonitanan, y adoracion berdadero. P’esei Jefte a conclui logicamente: “Cu [Jehova], e Hues, husga awe entre e yiunan di Israel y e yiu hombernan di Amon.”​—Huesnan 11:23-27.

E Rei di Amon no a haci caso di Jefte su mensahe bon cla. “Awor e spirito di SEÑOR a bin riba Jefte, asina cu el a pasa dor di Galaad y Manases”, probablemente pa recluta hombernan fisicamente fuerte pa un bataya contra Amon.​—Huesnan 11:28, 29.

E Promesa di Jefte

Cu e deseo ferviente di haya guia divino, Jefte a priminti Dios: “Si di berdad bo entrega e yiu hombernan di Amon den mi man, e ora ei kico cu sali for di e portanan di mi cas pa contra mi ora mi bolbe na pas for di e yiu hombernan di Amon, lo ta di SEÑOR, y lo mi ofrece esaki como un ofrenda kima.” Como contesta, Dios a bendiciona Jefte di manera cu el a logra derota 20 stad Amonita den un ‘matansa grandi’, y asina el a domina e enemigonan di Israel.​—Huesnan 11:30-33.

Ora Jefte tabata biniendo bek for di e bataya, ken a sali bin contr’e? Su yiu muher stima, su unico yiu! E relato ta bisa: “Ora cu el a mir’e, el a scheur su pañanan y a bisa: ‘Ai, mi yiu! Bo a kibra mi curason, y bo ta entre esnan cu ta hinca mi den problema [“ta abo ta esun cu a bira obheto di mi maldicion”, NW]; pasobra mi a duna SEÑOR mi palabra, y mi no por hala esaki atras.’”​—Huesnan 11:34, 35.

Jefte lo a echt sacrifica su yiu muher? No. No por ta esei e tabatin na mente. Jehova a odia sacrificio humano literal, un di e practicanan malbado di e Cananeonan. (Levitico 18:21; Deuteronomio 12:31) E spirito di Dios tabata activo riba Jefte ora cu el a haci su promesa, y es mas, Jehova a bendiciona su esfuerso. E Scritura ta papia bon di Jefte debi na su fe y e papel cu el a hunga en conexion cu e proposito divino. (1 Samuel 12:11; Hebreonan 11:32-34) Pues un sacrificio humano​—un asesinato​—ta algo cu lo e no a ni pensa mes di haci. Kico Jefte tabata kiermen anto ora el a priminti di ofrece un persona na Jehova?

 Jefte evidentemente tabata kiermen cu lo el a dedica esun cu a bin contr’e exclusivamente na e sirbishi di Dios. Bou di e Lei di Moises tabata posibel pa priminti di duna alma na Jehova. Por ehempel, hende muher tabata sirbi na e santuario, podise pa hala awa. (Exodo 38:8; 1 Samuel 2:22) Nos no sa masha di e sirbishi ei ni si por lo general e tabata algo permanente. Jefte aparentemente tabatin e devocion special ei na mente ora cu el a haci su promesa, y ta parce cu su promesa a ensera sirbishi permanente.

Tanto Jefte su yiu muher como mas despues e mucha homber Samuel, a coopera plenamente pa cumpli cu e promesanan di nan mayornan temeroso di Dios. (1 Samuel 1:11) Como un adorado leal di Jehova, Jefte su yiu muher tabata mes combenci cu su tata cu mester a cumpli cu e promesa. E sacrificio tabata grandi, pasobra esei a nifica cu e yiu muher lo no a casa nunca. El a yora pa motibo di su birginidad pasobra tur Israelita tabata desea di haya yiu pa nan por a preserva e nomber y herencia di nan famia. Pa Jefte, cumpli cu e promesa a nifica cu lo el a perde e compania di su unico yiu stima.​—Huesnan 11:36-39.

E bida di e mosa fiel aki no a bai perdi. Sirbishi di tempo completo na e cas di Jehova tabata un excelente manera pa e honra Dios. Ademas, esei lo a dun’e satisfaccion y tabata algo digno di elogio. Pues, “tur aña e yiu muhernan di Israel tabata bai pa recorda [of, “duna elogio na e”, NW] yiu muher di Jefte e Galaadita.” (Huesnan 11:40) Y Jefte siguramente a alegra den e sirbishi cu su yiu tabata rindi na Jehova.

Hopi hende den e pueblo di Dios awe ta scohe un bida di sirbishi di tempo completo como pionero, misionero, minister biahero of miembro di e famia di Betel. Esaki lo por nifica cu nan no ta mira nan famianan mes tanto cu nan lo ta desea. Sinembargo, tanto esnan cu ta sirbi asina como nan famianan por alegra den e sirbishi sagrado ei cu ta ser rindi na Jehova.​—Salmo 110:3; Hebreonan 13:15, 16.

Rebelion Contra e Guia di Dios

Mirando bek na e tempo di Jefte, nos ta mira cu hopi Israelita a rechasa e guia di Jehova. A pesar di evidencia cu e bendicion di Dios tabata riba Jefte, e hombernan di Efrain a pleita cu ne. Nan kier a sa dicon e no a manda yama nan pa e bataya. Asta nan kier a kima Jefte su cas ‘cu ne aden’!​—Huesnan 12:1.

Jefte a bisa nan cu el a manda yama nan, pero ta nan no a reacciona. En todo caso, ta Dios a gana e bataya. Acaso nan tabata rabia pasobra e Galaaditanan no a consulta cu nan ora di scohe Jefte como hefe? En realidad, e mal contento di Efrain a indica rebelion contra Jehova, y no tabatin ningun otro alternativa sino di bringa contra nan. Den e bataya cu a sigui, e hombernan di Efrain a sufri un derota aplastante. Como cu esnan cu tabata hui no por a bisa e palabra di prueba “Shibolet” corectamente, tabata facil pa identifica nan. En total, 42.000 homber di Efrain a muri den e conflicto.​—Huesnan 12:2-6.

Esta un periodo tristo den e historia di Israel! Batayanan anterior cu a resulta victorioso pa e huesnan Otoniel, Aod, Barak y Gideon a trece pas. E biaha aki Bijbel no ta menciona pas. E relato ta conclui simplemente bisando: “Jefte a husga Israel seis aña. Anto Jefte e Galaadita a muri y a wordo dera den un di e stadnan di Galaad.”​—Huesnan 3:11, 30; 5:31; 8:28; 12:7.

Kico nos por siña for di tur esaki? Cu maske e bida di Jefte tabata yen di lucha, el a keda fiel na Dios. E homber balente aki a menciona Jehova ora cu el a papia cu e ancianonan di Galaad, cu e Amonitanan, cu su yiu muher, cu e hombernan di Efrain y, naturalmente, ora el a haci su promesa. (Huesnan 11:9, 23, 27, 30, 31, 35; 12:3) Dios a bendiciona Jefte pa su devocion, y a uza e y su yiu muher pa promove adoracion berdadero. Den un tempo cu otro hende a bandona normanan divino, Jefte si a pega na e normanan ei. Abo lo obedece Jehova semper, mescos cu Jefte?

[Nota]