Bo Ta Imita Jehova den Cuida Otro Hende?

“TIRA tur precupacion riba [Dios], pasobra e ta cuida boso.” (1 Pedro 5:7, BPK) Ki un invitacion caluroso! Jehova Dios ta personalmente interesa den su pueblo. Nos por sinti nos sigur den su brasa.

Nos mester cultiva y desplega e mesun interes y cuido pa otro hende. Pero como cu nos ta imperfecto, nos tin cu tene cuidou cu cierto peligernan ora nos ta mustra interes personal den otro hende. Prome cu nos trata algun di e peligernan ei, laga nos wak algun manera cu Jehova ta mustra interes y ta cuida su pueblo.

Salmista David a uza un wardado di carne pa ilustra Dios su cuido. El a bisa: “[Jehova] ta mi wardado, lo mi no tin falta di nada. E ta pone mi drumi den luganan di yerba berde; e ta hiba mi canto di awanan keto. E ta restaura mi alma . . . Maske mi cana den e vaye di sombra di morto, mi no tin miedo di maldad, pasobra abo ta cu mi.”​—Salmo 23:1-4.

Siendo cu David mes tabata un wardado di carne, e tabata sa kico cuida un tou a ensera. E wardado ta proteha su carnenan di bestia yagdo, manera leon, lobo y beer. E ta percura pa e tou no plama for di otro, e ta busca carne cu perde, e ta carga lamchinan cu cansa den su brasa, y e ta cuida e bestianan malo y herida. Tur dia e ta duna e tou awa. Pero esaki no ta nifica cu e wardado ta dirigi delaster un stap di e carnenan. E carnenan ta liber pero toch proteha.

Asina Jehova ta cuida su pueblo. Apostel Pedro a splica: ‘Boso ta ser proteha dor di e poder di Dios.’ Aki, ‘ser proteha’ ta nifica literalmente ser manteni bou di vigilancia. (1 Pedro 1:5) Motiva pa berdadero interes y precupacion, Jehova semper ta vigila nos, y e ta semper cla pa duna nos un man asina cu nos pidie. Sinembargo, Jehova a crea nos cu boluntad liber, pues e no ta interveni den tur loke nos ta haci y dicidi. Con nos por imita Jehova den esaki?

Imita Dios den Bo Manera di Cuida Bo Yiunan

“Yiunan ta un herencia di SEÑOR.” Pues, mayornan mester proteha y cuida nan yiunan. (Salmo 127:3) Esaki kisas ta ensera cu nan mester anima nan yiunan pa expresa loke nan ta pensa y sinti, anto tene cuenta cu esei ora nan ta trata cu e yiunan. Si mayornan ta purba dirigi delaster un stap di nan yiunan, ignorando nan deseonan completamente, esei lo ta mescos cu un wardado di carne cu ta purba controla su carnenan dor di mara nan na cabuya. Ningun  wardado ta cuida su tou den e manera ei; y Jehova tampoco no ta haci esei cu nos.

Mariska * ta admiti: “Pa hopi tempo mi tabata blo bisa mi yiunan: ‘Boso mester haci esaki’ y ‘Boso no mag di haci esei.’ Mi a kere cu esaki tabata mi obligacion como mayor. Nunca mi no tabata duna nan un compliment, ni mi no tabata echt comunica cu nan.” Aunke Mariska su yiu muher tabata papia oranan largo na telefon cu su amiganan, combersacionnan cu su mama no tabata dura largo. Mariska a sigui bisa: “Mi a bin realisa kico tabata e diferencia. Ora di papia cu su amiganan, mi yiu muher tabata uza expresionnan cu ta mustra comprension, manera: ‘Si, mi ta di acuerdo’ of ‘Mi tambe.’ Mi a cuminsa uza expresionnan similar pa anima mi yiu pa expresa su mes, y no a dura hopi cu nos combersacionnan a bira mas largo y mas agradabel.” Esaki ta subraya e importancia di bon comunicacion, locual por lo general no ta bin di un banda so sino di tur dos banda.

Mayornan tin cu anima nan yiunan pa expresa nan mes, y yiunan tin cu compronde dicon e echo cu nan mayornan ta precupa pa nan ta sirbi como un proteccion. Bijbel ta conseha yiu pa obedece nan mayornan; caba e ta declara e motibo: “Pa bai bo bon y pa bo tin bida largo riba Tera.” (Efesionan 6:1, 3) Yiunan cu ta bon combenci di e beneficionan di ser sumiso ta ripara cu ta mas facil pa obedece nan mayornan.

Ora di Cuida e Tou di Jehova

Jehova su interes amoroso ta ser refleha den e congregacion cristian. Hesucristo, como Cabes di e congregacion, ta manda ancianonan cuida su tou. (Juan 21:15-17) E palabra Griego pa superintendente ta liga cu un verbo cu ta nifica “vigila cuidadosamente.” Pedro a enfatisa con mester haci esaki, y a instrui ancianonan: “Pastorea e tou di Dios meimei di boso, haciendo e trabou di cuidado, no forsa, ma voluntariamente, segun e boluntad di Dios; y no pa ganashi deshonesto, sino cu hopi afan; no manera hende cu tin dominio riba esnan cu a wordo confia na boso, ma siendo ehempel pa e tou.”​—1 Pedro 5:2, 3.

Si, ancianonan su tarea ta casi mescos cu di wardado di carne. Ancianonan cristian tin cu cuida e rumannan spiritualmente enfermo y reahusta nan di tal manera cu nan bida ta refleha normanan husto. Ancianonan ta esnan  responsabel pa organisa actividadnan spiritual di congregacion, haci areglo pa reunion y mantene ordo den congregacion.​—1 Corintionan 14:33.

Pero e palabranan di Pedro cita anteriormente ta hala nos atencion na un peliger. Esei ta cu ancianonan por cuminsa ‘eherce dominio riba’ e congregacion. Un posibel indicacion di esei ta ora un anciano ta traha reglanan innecesario. Kisas un anciano ta sinti un gran obligacion pa proteha e tou, y esei lo por pon’e bai mucho leu. Den un congregacion na Oriente, ancianonan a traha regla tocante con e rumannan mester cuminda otro den Salon di Reino. Por ehempel, nan a indica ken mester papia prome. Segun nan, e reglanan aki lo a contribui na pas den e congregacion. E ancianonan ei sin duda a haci esaki cu bon intencion, pero nan a imita e manera cu Jehova ta cuida su pueblo? Ta bon pa tuma nota di e actitud mental cu apostel Pablo a refleha den e siguiente palabranan: “No cu nos tin dominio riba boso fe, ma nos ta trahado hunto cu boso pa boso goso; pasobra den boso fe boso ta para firme.” (2 Corintionan 1:24) Jehova ta confia su pueblo.

Fuera di evita di pone regla cu no tin base biblico, ancianonan amoroso ta mustra cu nan ta berdaderamente interesa den nan rumannan dor di no revela informacion confidencial. Nan ta tene na mente e spiertamento divino: “No revela secreto di un otro.”​—Proverbionan 25:9.

Apostel Pablo a compara e congregacion di cristiannan ungi cu e curpa humano, bisando: “Dios a compone e curpa di tal manera . . . pa no tin division den e curpa, ma pa e miembronan tin e mesun percuracion un pa otro.” (1 Corintionan 12:12, 24-26) E expresion Griego “tin e mesun percuracion un pa otro” ta nifica literalmente ‘mester ta precupa pa otro.’ E miembronan di e congregacion cristian lo mester ta profundamente interesa den otro.​—Filipensenan 2:4.

Con cristiannan berdadero por demostra cu nan ta ‘precupa pa otro’? Nan lo por demostra nan precupacion pa otro miembronan di e congregacion mediante nan oracionnan y dor di ofrece yudansa practico na esnan den necesidad. Esaki ta yuda saca e bon cu tin den otro hende. Considera con Tadataka a haya yudansa dor di tal interes amoroso. Ora el a batisa na edad di 17 aña, e tabata e unico persona den su famia cu tabata sirbi Jehova. El a conta: “Tabatin un famia den congregacion cu hopi biaha tabata invita mi pa bin cerca nan pa come y pa reunionnan social. Casi tur mainta riba caminda pa scol mi tabata pasa na nan cas pa considera e texto di Bijbel di e dia ei hunto cu nan. Nan a duna mi conseho con pa trata cu problema na scol, y nos tabata haci oracion hunto tocante esei. Mi a siña cultiva e spirito di duna for di e famia aki.” Awor Tadataka ta poniendo na practica loke el a siña dor di sirbi na un di e sucursalnan di Testigonan di Jehova.

Apostel Pablo a spierta pa un peliger specifico den e asunto di mustra interes den otro hende. El a menciona cierto hende muher cu tabata cana “haci redo y mete den asunto di otro hende, papiando cosnan cu no ta cumbini.” (1 Timoteo 5:13) Aunke ta apropia pa nos ta interesa den otro hende, nos tin cu tene cuidou pa nos no bai asina leu cu nos ta mete den nan asuntonan personal. Demasiado interes den otro hende por manifesta su mes den ‘papia cosnan cu no ta cumbini’, por ehempel dor di haci remarcanan critico.

Ta bon pa nos corda cu kisas cristiannan ta diferencia den e manera cu nan ta atende nan asuntonan personal, den loke nan ta scohe pa come y ki forma di recreo sano nan ta scohe. Denter di e limitenan cu principionan di Bijbel ta indica, cada persona ta liber pa dicidi kico e ta haci. Pablo a spierta e cristiannan Romano: “No laga nos husga otro mas . . . Laga nos busca e cosnan cu ta trece pas y edificacion di otro.” (Romanonan 14:13, 19) Ta bon pa den congregacion nos demostra nos interes sincero pa otro dor di ta cla pa duna un man, y no dor di mete den asunto di otro hende. Ora nos ta mustra interes y ta cuida otro den e manera aki, amor y union lo florece den famia y den congregacion.

[Nota]

[Plachi na pagina 19]

Anima bo yiunan pa expresa nan mes dor di elogia nan y mustra comprension