1. Dicon nos mester tin pleno confianza den e Palabra di Dios?

 PROME cu un studiante di Bijbel por bay den sirbishi di veld, ancianonan ta combersa cu ne pa wak si e ta cualifica. A base di su expresionnan nan ta wak si e ta kere cu Bijbel ta e Palabra inspira di Dios. * Tur persona cu kier bira un publicador di Reino—eigenlijk, nos tur cu ta sirbidor di Dios—mester kere esey. Dicon? Pasobra ta ora nos tin confianza den e Palabra di Dios y por uz’e bon den sirbishi, nos por yuda otro hende siña conoce Jehova y haya salbacion.

2. Dicon nos tin cu ‘sigui den e cosnan cu nos a siña’?

² Apostel Pablo a enfatisa e importancia di e Palabra di Dios den su carta na Timoteo. El a bisa: “Sigui den e cosnan cu bo a siña y a keda convenci di dje.” “E cosnan” cu Pablo a referi na dje ta berdadnan biblico cu a motiva Timoteo pa pone fe den e bon noticia. E berdadnan aki tabatin e mesun efecto riba nos y ainda nan ta haci nos “sabi pa salbacion.” (2 Tim. 3:​14, 15) Hopi bes, nos ta uza Pablo su palabranan na 2 Timoteo 3:16 (Les’e.) pa mustra hende cu Bijbel ta e Palabra di Dios. Pero tin mas cos cu nos por siña for di e palabranan ey. Pesey, laga nos analisa e texto aki mas a fondo. Esey lo fortalece nos confianza cu tur Jehova su siñansanan ta “recto.”​—Sal. 119:128.

3-5. (a) Con un multitud a reacciona despues cu Pedro a duna un discurso na Pentecoste, y dicon? (b) Dicon hopi hende na Tesalonica a acepta e berdad? (c) Kico ta impresiona hende awe di nos trabou di predica?

³ Hesus a bisa e nacion di Israel: “Mi ta bay manda profeta, homber sabi y maestro cerca boso.” (Mat. 23:34) Aki Hesus tabata papia di su discipelnan; el a  siña nan uza e Scritura den nan sirbishi na Dios. Na Pentecoste di aña 33 di nos era, un di e ‘maestronan’ aki, apostel Pedro, a cita varios parti for di e Scritura Hebreo den un discurso cu el a duna na un multitud grandi na Jerusalem. Ora e hendenan a tende con Pedro a splica e textonan aki, hopi di nan “a sinti un remordimento profundo.” Nan a sinti duele di loke nan a haci den pasado. Y alrededor di tres mil persona a pidi Dios pordon y a bira cristian.​—Echo. 2:​37-41.

⁴ Un otro maestro, apostel Pablo, a predica e bon noticia pafo di Jerusalem. Por ehempel, na Tesalonica, un stad na Macedonia, el a papia cu hudiunan cu tabata adora den sinagoga. Durante tres sabbat, el a “uza e Scritura pa rasona cu nan, y e tabata splica nan y mustra nan for di loke tabatin skirbi den e Scritura cu Cristo mester a sufri y lanta for di morto.” Kico tabata e resultado? ‘Algun di e hudiunan y un grupo grandi di Griego a bira creyente.’​—Echo. 17:​1-4.

⁵ Awe tambe hopi hende ta keda impresiona cu e manera cu sirbidornan di Dios ta uza Bijbel. Despues cu un doño di cas na Suisa a scucha un ruman muher lesa un texto di Bijbel, el a puntr’e: “Ki religion boso ta?” Nos ruman a contesta: “Nos ta Testigo di Jehova.” E homber a bisa: “Mi por a rey e cos ey. Ta Testigo di Jehova so ta bay na cas di hende pa lesa Bijbel.”

6, 7. (a) Con rumannan por haci bon uzo di Bijbel pa siña e congregacion? (b) Con nos por haci bon uzo di e Scritura ora nos ta dirigi estudio di Bijbel?

⁶ Con nos por haci mihor uzo di Bijbel ora nos ta siña otronan? Si bo tin e privilegio di por siña e congregacion for di plataforma, uza textonan di Bijbel specifico. En bes di parafrasea textonan clave of lesa nan for di un printout of for di un aparato electronico manera tablet, habri bo ­Bijbel y lesa for di dje y anima esnan presente pa haci mescos. Ademas, tuma tempo pa aplica e versiculonan na un manera cu ta yuda esnan presente pa hala mas cerca Jehova. En bes di uza experencianan djis pa pone hende hari of ilustracionnan complica, uza bo tempo pa splica e Palabra di Dios.

⁷ Awor, kico nos mester tene na mente ora nos ta dirigi un estudio di Bijbel? Nos tin cu haci bon uzo di Bijbel. Nos mester anima e studiante pa lesa e textonan cita y nos mester yud’e capta nan nificacion. Con nos por haci esey? Nos no mester papia demasiado ni duna splicacion largo. Mas bien, nos mester anima e studiante pa expresa su mes. En bes di bis’e kico e tin cu kere of haci, nos mester hacie pregunta bon pensa pa yud’e yega na conclusionnan corecto. *

8. Ki lucha interno Pablo tabatin?

⁸ Hopi bes nos ta pensa cu ta ancianonan tin e tarea di “reprende” esnan cu ta haci malo. Y esey ta berdad. (1 Tim. 5:20; Tito 1:13) Pero ta importante tambe pa nos reprende nos mes. Pablo tabata un cristian ehemplar y tabatin un consenshi limpi. (2 Tim. 1:3) No obstante, el a skirbi: “Mi ta mira den mi curpa un otro ley cu ta bringa contra e ley di mi mente. Y e ley di pica aki tin mi preso.” Ora nos analisa e contexto di e palabranan aki, nos ta compronde mihor ki lucha Pablo tabatin pa vence su debilidadnan.​—Lesa Romanonan 7:​21-25.

9, 10. (a) Kico por tabata algun debilidad di Pablo? (b) Kico el a haci probablemente pa lucha contra su debilidadnan?

⁹ Contra ki debilidadnan Pablo tabatin cu lucha? Aunke e no a menciona su  debilidadnan specificamente, el a bisa Timoteo cu e tabata “un homber arogante y onbeschoft.” (1 Tim. 1:13) Prome cu Pablo a comberti, e tabata trata e cristiannan masha malo. El a bisa cu e tabata “furioso” riba nan. (Echo. 26:11) Maske Pablo a siña domina su rabia, tabatin momentonan cu lo e tabatin un lucha pa controla su sintimento- y palabranan. (Echo. 15:​36-39) Kico a yud’e?

¹⁰ Den su prome carta na e cristiannan na Corinto, Pablo a describi e manera cu e tabata reprende su mes. (Lesa 1 Corintionan 9:​26, 27.) El a tuma medidanan drastico pa lucha contra su debilidadnan. Muy probablemente, el a busca conseho den e Scritura, a suplica Jehova pa yudansa pa aplica nan y a traha duro pa mehora. * Nos por siña for di su ehempel, pasobra nos tambe tin cu lucha contra nos debilidadnan.

11. Con nos por “sigui samina” nos mes pa wak si nos ta canando den e berdad?

¹¹ Nunca nos mester keda satisfecho cu nos mes y stop di lucha contra nos debilidadnan. Mas bien, nos tin cu “sigui samina” nos mes pa haci sigur cu nos realmente ta canando den e berdad. (2 Cor. 13:5) Ora nos ta lesa textonan manera Colosensenan 3:​5-10, nos por puntra nos mes: ‘Mi ta haciendo esfuerso pa lucha contra mi debilidadnan? Of mi a cuminsa gusta cosnan cu den bista di Jehova ta malo? Por ehempel, si mi haya mi cu un site inmoral riba Internet, mi ta ser’e di biaha? Of mi mes ta busca websitenan asina pa wak?’ Si nos ta samina nos mes di e forma ey y ta aplica e Palabra di Dios, nos lo por “keda lanta y mantene nos sano huicio.”​—1 Tes. 5:​6-8.

12, 13. (a) Kico kiermen “corigi” cosnan? (b) Con nos por imita e ehempel di Hesus den esaki? (c) Kico nos mester evita ora nos kier drecha un asunto cu un otro persona?

¹² E palabra Griego traduci como “corigi” ta nifica drecha of rectifica cosnan. Tin biaha, nos tin cu tuma medida pa corigi un asunto cu un persona cu a malinterpreta loke nos a bisa of haci. E lidernan religioso hudiu, por ehempel, a keha cu Hesus tabata trata “cobrado di belasting y pecador” na un manera bondadoso. Hesus a corigi nan, bisando: “Hende bon di salud no tin mester di dokter, ma hende malo si. Bay anto, y siña loke esaki ta nifica: ‘Mi kier misericordia y no sacrificio.’ ” (Mat. 9:​11-13) Si, cu pasenshi y na un manera bondadoso, el a splica e Palabra di Dios na tur hende. Pesey, hende humilde a siña conoce Jehova como un Dios “yen di compasion y gracia, kende no ta rabia lihe y kende ta abunda den misericordia y berdad.” (Exo. 34:6) Como resultado, hopi hende a cuminsa pone fe den e bon noticia.

¹³ E ehempel di Hesus ta siña nos con nos mester yuda otro hende. Un hende cu ta rabia por bisa un otro cu un tono skerpi: ‘Mi tin un asunto di regla cu bo.’ Pero no ta esey 2 Timoteo 3:16 ta anima nos pa haci. Ningun caminda Bijbel no ta anima nos pa papia bruto cu hende. Dicon no? Pasobra si nos ta papia na un manera bruto, nos palabranan por ta manera “hinca di spada” cu ta haci hende dolor y cu no ta beneficia ningun hende.​—Prov. 12:18.

14-16. (a) Con ancianonan por “corigi” cosnan na un manera cu ta yuda otronan resolve nan problemanan? (b) Dicon ta importante pa mayornan uza e Scritura pa rectifica cosnan den famia?

¹⁴ Awor, con nos por demostra pasenshi y bondad ora di “corigi” un asunto? Supone cu un pareha casa cu ta pleita  constantemente pidi un anciano yudansa. Kico e anciano por haci? Wel, e no ta tuma parti pa ningun di nan. Mas bien, e ta uza principionan biblico pa rasona cu nan. Kisas e ta uza capitulo 3 di e buki E Secreto pa Felicidad den Famia. Segun cu e anciano ta rasona cu nan, tanto e esposo como e esposa mester discerni ki principio nan personalmente mester aplica mihor. Mas despues, e anciano lo por puntra nan con a sigui y, si ta necesario, duna nan mas yudansa.

 ¹⁵ Awor, con mayornan por “corigi” asuntonan na un manera cu ta yuda nan yiunan spiritualmente? Imagina cu bo yiu muher teenager tin un mal amigo. Con bo por yud’e? Na prome luga, busca pa sa mas detaye di e amiga of amigo ey. Anto si tin motibo pa preocupa, papia cu bo yiu muher tocante e asunto. Kisas bo por uza e buki Hobennan Sa Puntra​—Contesta Practico, Volumen 2 (na Spaño). Despues di esey, ta bon pa pasa mas tempo cu ne. Ademas, wak con e ta comporta su mes den sirbishi di veld of ora boso ta recrea como famia. Si bo tin pasenshi y ta trat’e na un manera bondadoso, bo yiu lo ripara cu bo ta stim’e y ta interesa den dje. Esey lo motiv’e pa sigui bo conseho y evita di tuma decisionnan cu por perhudic’e.

¹⁶ Na un manera bondadoso y cu pasenshi, nos por anima tambe esnan cu ta preocupa cu nan salud, cu ta desanima pasobra nan a perde trabou of cu tin dificultad pa acepta cierto siñansa biblico. Si, ora nos ta uza e Palabra di Dios pa corigi, of rectifica cosnan, nos por saca hopi beneficio.

17. Dicon nos mester acepta disciplina?

¹⁷ Bijbel ta bisa cu “ningun disciplina  ta algo dushi na momento cu e ta ser duna, sino algo doloroso; ma despues e ta duna e fruta di paz, esta, un bida husto, na esnan cu a ser entrena p’e.” (Heb. 12:11) Mayoria di ruman adulto cu a lanta den e berdad ta reconoce cu e disciplina cu nan a ricibi di nan mayornan a yuda nan. Di mes manera, si nos ta acepta e disciplina cu Jehova ta duna nos mediante e ancianonan, nos por keda riba e caminda pa bida.​—Prov. 4:13.

18, 19. (a) Dicon e conseho cu nos ta haya na Proverbionan 18:13 ta importante ora di “disciplina den husticia”? (b) Kico hopi bes ta e resultado si ancianonan mustra suavidad y amor ora nan ta disciplina un persona cu a comete un mal echo?

¹⁸ Con anciano- y mayornan por duna disciplina cu ta duna bon resultado? Jehova a bisa cu nan mester haci esaki “den husticia.” (2 Tim. 3:16) Pesey, e disciplina cu nos ta duna mester ta basa riba principionan biblico. Nos ta haya un di e principionan ey na Proverbionan 18:13 cu ta bisa: “Esun cu responde prome cu e scucha, esey ta bobedad y berguensa p’e.” Pues, prome cu ancianonan duna disciplina na un persona cu ta ser acusa di pica serio, nan tin cu investiga e asunto profundamente pa sa kico precies a pasa. (Deu. 13:14) Ta asina so nan por disciplina “den husticia.”

¹⁹ Ademas, e Palabra di Dios ta instrui ancianonan pa duna disciplina “cu suavidad.” (Lesa 2 Timoteo 2:​24-26.) Ta berdad cu un persona por trece reproche riba Jehova su nomber of haci daño na otro hende. Pero, si e anciano ta rabia na momento cu e ta duna e persona aki conseho, e lo no por yud’e. Di otro banda, ora ancianonan ta imita Dios “su bondad”, nan por motiva e persona cu a faya pa arepenti.​—Rom. 2:4.

20. Ki principionan mayornan mester aplica ora di disciplina nan yiunan?

²⁰ Pa lanta yiunan “den e disciplina di Jehova y inculca su manera di pensa den nan”, mayornan mester uza principionan biblico. (Efe. 6:4) Por ehempel, si un tata a tende cu su yiu a haci algo malo, e no mester bay tras di loke hende ta bisa, sino e mes mester busca pa sa kico precies a pasa, anto e ora ey e por disciplina su yiu si ta necesario. Ademas, den un famia cristian violencia ta inaceptabel. Dicon? Pasobra “Jehova tin masha cariño, compasion y misericordia”, y mayornan tin cu imit’e ora di disciplina nan yiunan.​—Sant. 5:11.

21, 22. Cua palabranan na Salmo 119:​97-104 ta describi loke abo ta sinti pa e Palabra di Jehova?

²¹ Un sirbidor di Dios a yega di revela dicon e ta stima e ley di Jehova. (Lesa Salmo 119:​97-104.) El a indica cu studiando e Scritura, el a bira sabi y a haya mas comprondemento. Ademas, principionan biblico a yud’e evita di comete fayonan cu otronan tabata comete. P’e, estudio di e Scritura tabata un experencia placentero cu a dun’e goso y hopi otro beneficio. Y e tabata determina pa sigui e instruccionnan di Dios.

²² Kico di abo? Bo tambe ta balora “henter e Scritura”? Ta conocemento di e Scritura ta yuda nos fortifica nos fe y duna nos pleno confianza cu Dios lo cumpli cu su proposito. Ademas, conseho di e Scritura ta yuda nos evita di comete pica cu ta hiba na morto. Y ora bo por splica e Scritura corectamente na otro hende, bo por yuda nan haya e caminda cu ta hiba na bida y keda riba dje. Pesey, laga nos haci bon uzo di “henter e Scritura” segun cu nos ta sirbi nos Dios sabi y amoroso, Jehova.