Nos tin bon motibo pa kere cu e yiu hombernan aki di Dios ta referi na angel. Pero ki evidencia nos tin?

Wel, Genesis 6:2 ta bisa: “E yiu hombernan di Dios a mira cu e yiu muhernan di hende tabata bunita; y nan a tuma esposanan pa nan mes, esun cu nan tabata kier a scoge.”

Den e Scritura Hebreo, e expresion “e yiu hombernan di Dios” ta aparece den e idioma original na Genesis 6:2 y 4; Job 1:6; 2:1; 38:7. Awor, kico e textonan ey ta bisa di “e yiu hombernan di Dios”?

No tin duda cu “e yiu hombernan di Dios” cu Job 1:6 ta papia di dje ta criaturanan celestial kendenan a reuni den presencia di Dios. Satanas, kende tabata “bay-bin riba tera”, tambe tabata entre nan. (Job 1:7; 2:1, 2) Na Job 38:4-7, nos ta lesa cu “e yiu hombernan di Dios” a “grita di alegria” ora Dios a pone ‘e piedra di skina’ pa e planeta Tera. E texto aki mester tabata referi na angel, pasobra e tempo ey Dios no a crea hende ainda.

Ken anto ta “e yiu hombernan di Dios” cu Genesis 6:2 y 4 ta papia di dje? Di acuerdo cu e evidencianan biblico cu nos a caba di considera, ta logico pa conclui cu e versiculonan aki ta referi na criaturanan celestial cu a bin na tera.

Algun hende tin dificultad pa kere cu angel lo por tabatin interes den relacion sexual. E palabranan cu Hesus a expresa na Mateo 22:30 ta mustra bon cla cu no tin casamento ni relacion sexual den cielo. No obstante, tabatin angel cu a yega di tuma curpa humano y a hasta come y bebe cu hende. (Gen. 18:1-8; 19:1-3) Pues, ta logico pa conclui cu angel lo por a tene relacion sexual cu hende muher ora nan a tuma curpa di hende.

Y nos tin prueba biblico cu ta esey algun angel a haci. Judas 6 y 7 ta compara e pica di e hombernan di Sodoma, kendenan a core tras di deseonan carnal innatural, cu esun di “e angelnan cu no a keda na nan puesto original pero cu a bandona nan propio luga di biba.” Tanto e angelnan ey como e habitantenan di Sodoma “a entrega nan mes na inmoralidad sexual desenfrena y a core tras di deseonan carnal innatural.” Na 1 Pedro 3:19 y 20 tin un relato similar cu ta relaciona angelnan desobediente cu “e dianan di Noe.” (2 Ped. 2:4, 5) A base di e textonan aki, nos por conclui cu e conducta di e angelnan desobediente den tempo di Noe por ser compara cu e pica di Sodoma y Gomora.

E conclusion aki tin sentido solamente si nos acepta cu “e yiu hombernan di Dios” cu Genesis 6:2 y 4 ta papia di dje ta referi na e angelnan cu a tuma curpa di hende y comete inmoralidad cu hende muher.

Apostel Pedro a identifica e spiritonan aki como esnan “cu anteriormente tabata desobediente ora Dios tabata warda cu pasenshi den e dianan di Noe.” (1 Ped. 3:20) Pedro tabata referi na e angelnan cu a join Satanas den su rebelion. Judas tambe a papia di e angelnan cu “no a keda na nan puesto original pero cu a bandona nan propio luga di biba”, y el a bisa cu Dios “a mara [nan] cu cadena eterno, y [cu] nan ta den un scuridad profundo pa e huicio di e gran dia.”—Judas 6.

Ki acto di desobediencia e criaturanan celestial ey a comete den tempo di Noe? Pa cuminsa, prome cu e Diluvio, e spiritonan malbado aki a haci algo cu Dios no a autorisa nan pa haci: Nan a tuma curpa di hende. (Gen. 6:2, 4) Despues, nan a tene relacion sexual cu hende muher—loke tabata algo innatural pasobra Dios no a crea angel pa tene relacion sexual. (Gen. 5:2) E angelnan malbado y desobediente aki lo ser destrui na e debido tempo. Pero mientrastanto, manera Judas a bisa, nan ta den “scuridad profundo”—den prizon spiritual.

Pero na ki tempo y con Hesus a predica na e “spiritonan den prizon” aki? Pedro a bisa cu esaki a sosode despues cu Hesus “a haya bida bek den spirito.” (1 Ped. 3:18, 19) Ripara tambe cu Pedro a bisa cu Hesus “a predica.” E echo cu Pedro a uza e forma pasado di e verbo “predica” ta laga nos compronde cu Hesus a predica na e spiritonan ey prome cu Pedro a skirbi su prome carta. Pues, ta parce cu un poco tempo despues cu Hesus a ser resucita, el a anuncia na e spiritonan malbado ki castigo nan lo haya. Hesus su mensahe no tabata un mensahe cu a duna speransa. Mas bien, e tabata un proclamacion di huicio. (Jon. 1:1, 2) Anto Hesus tabatin un base solido pa el a proclama e huicio ey, pasobra el a demostra su fe y lealtad te na morto y a ser resucita—dunando prueba cu en berdad Diabel no tabatin poder riba dje.—Juan 14:30; 16:8-11.

Den futuro, Hesus lo mara y tira tanto Satanas como e angelnan ey den abismo. (Luc. 8:30, 31; Rev. 20:1-3) Pero mientrastanto, e spiritonan desobediente aki ta den un scuridad spiritual profundo, y nan destruccion final lo tuma luga sigur.—Rev. 20:7-10.