1. Kico nos ta ansioso pa sa mescos cu e apostelnan?

 HESUS su sirbishi aki riba tera tabata yegando na su fin, y su discipelnan tabata ansioso pa sa kico futuro lo a trece cu ne. Pesey un par di dia prome cu Hesus a muri, cuater di su apostelnan a acerc’e y a puntr’e: “Ki dia e cosnan aki lo sosode, y kico lo ta e señal di bo presencia y di conclusion di e era aki?” (Mat. 24:3; Mar. 13:3) Como contesta, Hesus a duna nan un profecia detaya cu nos ta haya na Mateo capitulo 24 y 25. Den e profecia ey, Hesus a menciona hopi suceso remarcabel cu lo mester a tuma luga den futuro. Y loke Hesus a contesta nan ta di gran balor pa nos pasobra nos tambe ta ansioso pa sa kico futuro ta trece cu ne.

2. (a) Cua profecia nos a trata di haya un comprondemento mas cla di dje a traves di añanan? (b) Cua ta e tres preguntanan cu e articulo aki ta contesta?

² A traves di añanan, Jehova su sirbidornan a studia Hesus su profecia tocante e ultimo dianan cuidadosamente, semper pidiendo Jehova su guia den esaki. Nan tabata kier haya un comprondemento mas cla di e profecia pa nan por a haya sa na ki tempo Hesus su palabranan lo cumpli. E articulo aki lo contesta tres pregunta. Nan ta: Na ki tempo e “tribulacion grandi” lo cuminsa? Na ki tempo Hesus lo husga “e carnenan” y “e cabritonan”? Y ki dia, of na ki tempo, Hesus lo “yega”, bin of bolbe?—Mat. 24:21; 25:31-33.

3. Ki comprondemento nos tabatin den pasado encuanto e tribulacion grandi?

³ Pa varios aña, nos tabata kere cu e tribulacion grandi a cuminsa na 1914 ora cu Prome Guera Mundial a cuminsa. Y nos tabata kere cu ta Jehova a “haci e dianan ey cortico” na 1918 ora e guera a termina pa asina e rumannan ungi cu ainda tabata riba tera por a predica e bon noticia na tur nacion. (Mat. 24:21, 22) Y nos tabata spera cu Satanas su mundo lo a ser destrui despues cu e trabou di predica ey yega na su fin. Pues, nos tabata kere cu e  tribulacion grandi tabata consisti di e tres fasenan aki: un comienso (1914-1918), un interupcion (di 1918 padilanti) y un final cu lo ta na Armagedon.

4. Kico nos a bin compronde encuanto Hesus su profecia tocante e ultimo dianan?

⁴ Pero, despues di a analisa Hesus su profecia tocante e ultimo dianan mas a fondo, nos a bin compronde cu un parti di e profecia aki tin dos cumplimento. (Mat. 24:4-22) El a haya su prome cumplimento na Judea den prome siglo, y su di dos cumplimento lo ta den nos tempo y na un escala mundial. E comprondemento aki a pone cu hopi otro parti di e profecia a bira mas cla. * *

5. (a) Kico e sucesonan cu a cuminsa na 1914 ta indica? (b) Na ki tempo prome siglo a conoce un periodo similar di “calamidad”?

⁵ Nos a bin compronde tambe cu e tribulacion grandi no a cuminsa na 1914. Dicon no? Pasobra profecia biblico ta indica cu e tribulacion grandi lo cuminsa ora religion falso ser ataca y no cu un guera entre e nacionnan. Pues, e sucesonan cu a cuminsa desde 1914 no tabata un indicacion cu e tribulacion grandi a cuminsa sino di “cuminsamento di calamidad, manera dolor di parto.” (Mat. 24:8) Di aña 33 di nos era te cu aña 66, Jerusalem y Judea a experencia un periodo di “calamidad” similar.

6. Kico lo ta e señal cu e tribulacion grandi a cuminsa?

⁶ Awor, kico lo ta e señal cu e tribulacion grandi a cuminsa? Hesus a profetisa: “Ora boso mira e ‘cos repugnante’ cu ta causa destruccion, cu profeta Daniel a papia di dje, para den un luga santo (lector, uza discernimento pa compronde esaki), e ora ey laga esnan cu ta na Judea huy bay den sero.” (Mat. 24:15, 16) E profecia aki a haya su prome cumplimento na aña 66 di nos era ora e ehercito Romano (“e cos repugnante”) a ataca Jerusalem y su tempel (un luga santo den bista di e Hudiunan). E profecia lo haya su mayor cumplimento ora Nacionnan Uni  (e “cos repugnante” den nos tempo) ataca cristiandad (loke ta santo den bista di hende cu ta yama nan mes cristian) y e resto di Babilonia e Grandi. Revelacion 17:16-18 tambe ta describi e atake aki. Ta e atake aki riba Babilonia e Grandi lo ta e señal cu e tribulacion grandi a cuminsa.

7. (a) Con Dios a ‘salba’ su pueblo den prome siglo? (b) Con lo e haci esey den futuro?

⁷ Hesus a profetisa tambe cu Dios lo “haci e dianan ey cortico.” Esaki a sosode primeramente na aña 66 di nos era ora cu e ehercito Romano a stop di ataca Jerusalem. Consecuentemente, e cristiannan ungi na Jerusalem y Judea a haya chens di huy pa ‘salba’ nan bida. (Lesa Mateo 24:22; Mal. 3:17) Awor, con e profecia aki lo haya su di dos cumplimento? Wel, Jehova lo interveni, of haci e atake cu Nacionnan Uni lo lansa riba religion falso “cortico”, pa nan no destrui e religion berdadero hunto cu e religionnan falso. Di e manera aki, e pueblo di Dios lo ser salba.

8. (a) Kico lo tuma luga despues di e prome fase di e tribulacion grandi? (b) Na ki tempo aparentemente e ultimo miembro di e 144.000 rumannan ungi lo ser tuma den cielo? (Wak nota 2.)

 ⁸ Awor, kico lo sosode despues di e prome fase di e tribulacion grandi? Hesus a splica cu lo pasa un tempo prome cu Armagedon cuminsa. Kico lo sosode durante e lapso di tempo ey? Nos ta haya e contesta na Ezekiel 38:14-16 y Mateo 24:29-31. (Les’e.) * Despues di e sucesonan ey, Armagedon lo cuminsa. Si, Armagedon lo ta e culminacion di e binidero tribulacion grandi mescos cu e destruccion di Jerusalem na aña 70 di nos era tabata e culminacion di e prome cumplimento dje profecia. (Mal. 4:1) Anto e tribulacion grandi, cu lo culmina den e guera di Armagedon, lo ta un suceso cu, “for di principio di mundo te awor”, nunca a yega di tuma luga. (Mat. 24:21) Despues di Armagedon, Cristo lo inicia su Reinado di Mil Aña.

9. Ki efecto Hesus su profecia tocante e tribulacion grandi tin riba Jehova su pueblo?

⁹ E profecia aki tocante e tribulacion  grandi sigur ta fortalece nos. Dicon? Pasobra e ta sigura nos cu maske ki situacion dificil Jehova su sirbidornan lo por haya nan cu ne durante e tribulacion grandi, e pueblo di Jehova lo sobrevivi como grupo. (Rev. 7:9, 14) Y mas cu tur cos, nos ta contento cu na Armagedon Jehova lo vindica su soberania y santifica su nomber santo.—Sal. 83:18; Eze. 38:23.

10. Segun nos comprondemento di antes, durante ki tempo Hesus lo tabata husga hende como carne of cabrito?

¹⁰ Un otro aspecto di Hesus su profecia ta e ilustracion tocante carne y cabrito. Na ki tempo Hesus lo husga hende como carne of cabrito? (Mat. 25:31-46) Antes, nos tabata kere cu e husgamento ey ta tuma luga durante henter e periodo cu Bijbel ta yama e ultimo dianan, cu a cuminsa desde 1914. Pesey, nos tabata kere cu hende cu no a acepta e mensahe di Reino y cu a muri prome cu e tribulacion grandi lo a muri como cabrito, pues sin speransa di haya resureccion.

11. Dicon nos por bisa cu Hesus no a cuminsa husga hende como carne of cabrito for di aña 1914?

¹¹ Na aña 1995, E Toren di Vigilancia a bolbe analisa Mateo 25:31, cu ta bisa: “Ora e Yiu di hende yega den su gloria y tur e angelnan hunto cu ne, lo e sinta riba su trono glorioso.” E revista a mustra cu aunke Hesus a bira Rey di e Reino di Dios na 1914, e no a “sinta riba su trono glorioso” como Hues di “tur e nacionnan” e tempo ey. (Mat. 25:32; compara cu Daniel 7:13.) Y corda cu e ilustracion tocante carne y cabrito ta describi Hesus principalmente como Hues. (Lesa Mateo 25:31-34, 41, 46.) Pesey, como cu Hesus no tabata Hues di tur e nacionnan na 1914, e no por a cuminsa husga hende como carne of cabrito desde e tempo ey. * Ta na ki tempo anto Hesus lo cuminsa husga tur e nacionnan?

12. (a) Na ki tempo Hesus lo cuminsa fungi como Hues di tur e nacionnan? (b) Menciona e sucesonan cu Hesus a profetisa di dje tanto na Mateo 24:30 y 31 como na Mateo 25:31-33 y 46.

 ¹² Hesus su profecia tocante e ultimo dianan ta revela cu lo e cuminsa fungi como Hues di tur nacion despues cu tur religion falso ser destrui. Y manera  paragraf 8 ta mustra, algun di e sucesonan cu lo mester tuma luga durante e tempo ey ta registra na Mateo 24:30 y 31. Ora bo analisa e versiculonan ey, lo bo ripara cu Hesus a menciona algun suceso similar na esnan cu el a menciona den e ilustracion di carne y cabrito. Por ehempel, Hesus a bisa cu e Yiu di hende lo bin cu gran gloria hunto cu su angelnan y cu tur tribu y nacion lo ser reuni su dilanti; esnan cu ser husga como carne lo “lanta [nan] cabes” pasobra nan lo ricibi “bida eterno.” * Anto esnan cu ser husga como cabrito lo “bati nan pecho di tristeza” pasobra nan lo realisa cu ta “morto eterno”, of destruccion, ta spera nan.—Mat. 25:31-33, 46.

13. (a) Na ki tempo Hesus lo husga hende como carne of cabrito? (b) Con nos mester mira nos trabou di predica despues di a adkiri e comprondemento aki?

¹³ Pues, na ki conclusion nos por yega? Wel, cu Hesus lo husga hende di tur nacion, sea como carne of cabrito, ora e bin durante e tribulacion grandi. Anto, na Armagedon, e culminacion di e tribulacion grandi, hende semehante na cabrito lo haya “morto eterno.” Awor, con nos mester mira nos trabou di predica despues di a adkiri e comprondemento aki? Wel, e comprondemento aki ta yuda nos mira con importante e trabou di predica ta. Si, tanten cu e tribulacion grandi no cuminsa, hende tin e oportunidad di cambia nan manera di pensa y cuminsa cana riba e caminda “cu ta hiba na bida.” (Mat. 7:13, 14) Ta berdad cu for di aworaki caba hende ta desplega un actitud semehante na carne of cabrito. Pero a pesar di esey, nos mester corda cu ta durante e tribulacion  grandi Hesus lo husga hende y determina ken realmente ta carne of cabrito. Pesey, ta masha importante pa nos sigui predica pa asina mas tanto hende posibel por haya e oportunidad di scucha y acepta e mensahe di Reino.

14, 15. Cua ta e cuater versiculonan cu ta referi na Cristo su futuro binida, of yegada, como Hues?

¹⁴ Awor, kico di otro sucesonan importante cu mester tuma luga? Un analisis mas profundo di Hesus su profecia ta mustra cu nos mester corigi nos comprondemento encuanto e tempo cu esakinan mester tuma luga? E profecia mes lo yuda nos haya contesta pa e pregunta ey. Laga nos wak esey.

¹⁵ Den e parti di e profecia cu ta registra na Mateo 24:29–25:46, Hesus a enfoca principalmente riba sucesonan cu lo tuma luga durante e ultimo dianan aki y durante e binidero tribulacion grandi. Den e versiculonan ey, Hesus ta referi ocho biaha na su ‘binida’, yegada of bolbemento. * Pa loke ta e tribulacion grandi, el a bisa: “Nan lo mira e Yiu di hende bin riba e nubianan.” “Boso no sa ki dia boso Señor ta bin.” “E Yiu di hende ta bin na un ora cu boso no ta pensa.” Y den su ilustracion tocante carne y cabrito, Hesus a bisa: “E Yiu di hende [lo] yega den su gloria.” (Mat. 24:30, 42, 44; 25:31) Tur e cuater versiculonan aki ta referi na Cristo su futuro binida, of yegada, como Hues. Cua ta e otro cuater versiculonan cu ta haci mencion di Hesus su binida, of yegada?

16. Cua ta e otro textonan cu ta haci mencion di Hesus su binida?

¹⁶ Papiando di e esclavo fiel y prudente, Hesus a bisa: “Feliz e esclavo ey ta si ora su Doño yega, e hay’e ta haci esey.” Den e ilustracion tocante e birgennan, Hesus a bisa: “Ora nan a bay cumpra zeta, e bruidegom a yega.” Den e ilustracion tocante e talentonan, Hesus a bisa: “Despues di hopi tempo, doño di e esclavonan ey a bolbe.” Den e mesun ilustracion ey, e doño ta bisa: “Ora mi yega, mi por a haya mi placa.” (Mat. 24:46; 25:10, 19, 27) Awor, ta ki dia of na ki tempo Hesus lo bin, yega of bolbe, manera e textonan aki ta bisa?

17. Kico nos publicacionnan tabata splica encuanto e yegada di Hesus menciona na Mateo 24:46?

¹⁷ Den pasado, nos publicacionnan tabata splica cu e ultimo cuater textonan,  menciona den paragraf 16, ta referi na Hesus su yegada of binida na 1918. Laga nos tuma como ehempel loke Hesus a bisa tocante “e esclavo fiel y prudente.” (Lesa Mateo 24:45-47.) Nos tabata kere cu e ‘yegada’ cu versiculo 46 ta menciona tabata referi na e yegada di Hesus na 1918, e aña cu, segun nos comprondemento di antes, Hesus lo a bin pa inspecciona e condicion spiritual di e unginan. Y nos tabata kere cu ta na 1919 e esclavo a ser nombra riba tur e pertenencianan di e Doño. (Mal. 3:1) Pero, un analisis mas profundo di e profecia aki di Hesus a indica cu nos mester corigi loke nos tabata kere encuanto e tempo cu cierto aspectonan di e profecia lo cumpli. Con asina?

18. Un analisis profundo di henter Hesus su profecia ta yuda nos yega na ki conclusion encuanto su binida?

¹⁸ Tur biaha cu e palabra “bin” a ser uza den Mateo 24, prome cu versiculo 46, e ta referi na e tempo cu Hesus lo bin pa dicta sentencia y ehecuta huicio durante e tribulacion grandi. (Mat. 24:30, 42, 44) Anto manera nos a mira den  paragraf 12, Mateo 25:31 ta papia di e mesun tempo di huicio of husgamento ey cu lo tuma luga den futuro. Pues, ta rasonabel pa conclui cu e tempo cu Mateo 24:46 y 47 ta papia di dje—esta, e tempo cu Hesus lo bin pa nombra e esclavo fiel riba tur su pertenencianan—lo ta den futuro, durante e tribulacion grandi. * Si, un analisis profundo di henter Hesus su profecia ta mustra bon cla cu tur e ocho textonan ey cu ta papia di Hesus su binida, ta referi na e huicio of husgamento cu lo tuma luga den futuro, durante e tribulacion grandi.

19. Kico ta e cosnan nobo cu nos a siña den e articulo aki, y cua preguntanan e siguiente articulonan lo contesta?

¹⁹ Awor, laga nos resumi loke nos a caba di siña den e articulo aki. Nos a haya contesta pa e tres preguntanan cu nos a haci na comienso di e articulo aki. Pa di prome, nos a mira cu e tribulacion grandi no a cuminsa na 1914; mas bien, e lo cuminsa ora Nacionnan Uni ataca Babilonia e Grandi. Di dos, nos a mira cu Hesus no a cuminsa husga e carne- y e cabritonan na 1914 pero cu e lo haci esaki durante e tribulacion grandi. Y por ultimo, nos a mira cu Hesus no a nombra e esclavo fiel y prudente riba tur su pertenencianan na 1919, pero cu e lo haci esaki durante e tribulacion grandi. Pues, tur e tres sucesonan aki lo tuma luga den futuro, durante e tribulacion grandi. Awor, esaki ta nifica cu nos mester corigi nos comprondemento encuanto e ilustracion tocante e esclavo fiel? Y ki efecto e tin riba nos comprondemento encuanto e otro ilustracionnan di Hesus cu ta cumpliendo durante e tempo di fin aki? E siguiente articulonan lo contesta e preguntanan importante aki.