1. Dicon e plan di e reynan di Siria y Israel lo no por tabatin exito?

 DEN siglo 8 prome cu Cristo, entre añanan 762 y 759, rey di Israel y rey di Siria a cuminsa un guera contra e reino di Juda. Kico tabata nan meta? Nan kier a invadi Jerusalem, baha Rey Acaz for di trono y haci un otro hende rey na su luga, kisas un homber cu no a bini di e famia di Rey David. (Isa. 7:5, 6) Pero e rey di Israel mester tabata sa cu e plan ey lo a fracasa. Jehova a priminti cu semper lo tin un descendiente di David riba trono, y nunca Dios ta keda sin cumpli cu su palabra.—Jos. 23:14; 2 Sam. 7:16.

2-4. Splica con Isaias 7:14 y 16 a cumpli (a) den siglo 8 prome cu Cristo y (b) tempo cu Hesus a nace.

² Na prome instante a parce cu Siria cu Israel lo a gana e guera. Den un solo bataya, Acaz a perde 120.000 soldaat. Figura bo! Y hasta nan a mata su yiu homber Maaseias. (2 Cro. 28:6, 7) Pero Jehova tabata observa e situacion. El a corda riba e promesa cu el a haci David, y pesey el a manda profeta Isaias cu un mensahe hopi alentador.

³ Isaias a bisa: “Mira, un birgen lo sali na estado y lo haya un yiu homber, y e lo dun’e e nomber Emanuel ... Prome cu e mucha homber lo sa di nenga maldad y scoge bondad, e tera di e dos reynan [Siria y Israel], di kendenan bo tin miedo, lo ta bandona.” (Isa. 7:14, 16) Ta berdad cu e prome parti di e profecia ey ta aplica na e nacemento di e Mesias. (Mat. 1:23) Pero, como cu “e dos reynan”, esun di Siria y esun di Israel, no tabata un menasa mas pa Juda rond di e tempo cu Hesus a nace, e profecia tocante Emanuel lo mester tabatin un cumplimento den e tempo di Isaias tambe.

 ⁴ Un poco despues cu Isaias a haci e anuncio remarcabel ey, su casa a sali na estado y despues a duna luz na un yiu homber. Nan a yama e yiu Maher-salal-hasbaz, y kisas e yiu aki ta e “Emanuel” cu Isaias a referi na dje. * Den tempo di Bijbel tin biaha un yiu ta haya un nomber ora e nace, kisas pa conmemora un suceso special, pero su mayornan y famianan tabata yam’e na un otro nomber. (2 Sam. 12:24, 25) No tin ningun evidencia cu nan a yega di yama Hesus Emanuel.—Lesa Isaias 7:14; 8:3, 4.

5. Ki decision bobo Rey Acaz a tuma?

⁵ Mientras Israel cu Siria tabata concentra riba Juda, e nacion di Asiria tambe tabata plania pa conkista e region. Asiria tabata birando un potencia mundial cu un ehercito hopi fuerte. Segun Isaias 8:3 y 4, Asiria lo a bay cu “e rikesa di Damasco y e botin di Samaria” prome cu e ataca e reino di Juda. Pero en bes di Rey Acaz di Juda confia den e palabra di Dios cu Isaias a anuncia, el a haci co’i bobo di cera un pacto cu e Asirionan. E resultado tabata desastroso, ya cu despues e Asirionan a cuminsa domina Juda cruelmente. (2 Rey. 16:7-10) Acaz, como un wardador of lider di Juda, lo mester a proteha su pueblo. Pero el a faya barbaramente den esey! Pesey ta bon pa nos puntra nos mes: ‘Ora di tuma decision importante, mi ta confia den Dios of den hende?’—Prov. 3:5, 6.

6. Menciona e diferencia entre e reinado di Acaz y esun di Ezekias.

⁶ Acaz a muri na aña 746 prome cu Cristo, y su yiu Ezekias a bira rey na su luga. E pueblo di Juda tabata pober, y nan a stop di adora Jehova. Kico tabata e prome cos cu e rey hoben a haci ora el a bin na poder? El a purba di drecha e economia di e nacion? No. Ezekias tabata un homber spiritual y un bon wardador pa e nacion. Prome cos cu el a haci tabata reestablece adoracion puro y yuda e nacion drecha nan relacion cu Jehova. Ora Ezekias a compronde kico Dios tabata kier p’e haci, el a actua dicidido. Esta un bon ehempel pa nos!—2 Cro. 29:1-19.

7. Dicon tabata importante pa e levitanan sa cu e rey nobo lo a apoya nan?

⁷ E levitanan lo tabatin un papel hopi importante den restaura adoracion berdadero. Pues, Ezekias a reuni cu e levitanan pa sigura nan cu lo e apoya nan. Purba di imagina bo e levitanan cu tabata presente na e reunion ey. Kisas nan a yora di alegria ora nan a tende e rey bisa: “[Jehova] a scoge boso pa para su dilanti, pa sirbie.” (2 Cro. 29:11) Si, e levitanan a ricibi un mandato bon cla pa yuda e pueblo adora e Dios berdadero.

8. Kico mas Ezekias a haci pa yuda e pueblo drecha nan relacion cu Jehova, y cu ki resultado?

⁸ Ezekias a invita henter e pueblo di Juda y Israel na un gran celebracion di e Pasco Hudiu, sigui pa e Fiesta di Pan sin Zuurdeeg cu a dura shete dia. E pueblo a disfruta asina tanto di e fiesta ey cu nan a rek e shete dia mas. Bijbel ta conta nos: “Tabatin gran goso na Jerusalem, pasobra no tabatin algo manera esaki na Jerusalem desde e dianan di Salomon, yiu homber di David, rey di Israel.” (2 Cro. 30:25, 26) Esta un gran animacion e bankete spiritual ey tabata pa henter e pueblo! Nos ta lesa na 2 Cronicanan 31:1: ‘Ora tur esaki a yega na un fin, tur e Israelitanan cu tabata presente a kibra e pilarnan na pida-pida, a kap e imagennan di Asera basha abou y a basha e luganan halto y e altarnan abou.’ Pues, e  nacion di Juda a bolbe bek cerca Jehova. E limpieza spiritual aki tabata sumamente importante ya cu esey a yuda e pueblo prepara pa e problemanan cu tabata na caminda.

9. (a) Con e plannan di Israel a fracasa? (b) Na prome instante, ki exito Senakerib tabatin na Juda?

⁹ Na harmonia cu e profecia di Isaias, e Asirionan a conkista e reino di Israel y a bay cu henter e pueblo for di e pais. Esaki a daña tur e plan di Israel pa scoge un rey pa Juda cu no a bin for di famia di David. Pero ki plan Asiria tabatin? E Asirionan a bin awor pa conkista Juda. Bijbel ta bisa: “Den e di diescuater aña di rey Ezekias, Senakerib, rey di Asiria, a bin contra tur e stadnan fortifica di Juda y a captura nan.” Aparentemente Senakerib a conkista un total di 46 stad di Juda. Purba di imagina con lo bo a sinti bo si bo tabata biba na Jerusalem e tempo ey. E ehercito Asirio a conkista e stadnan ey un tras di otro y a yega cada bes mas cerca di Jerusalem.—2 Rey. 18:13.

10. Dicon e profecia di Mikeas lo a anima Ezekias?

¹⁰ Ezekias naturalmente tabata consciente di e peliger cu tabata acercando, pero e no a drenta panico ni core bay busca yudansa cerca un nacion pagano, manera su tata infiel, Acaz, a haci. Al contrario, el a confia den Jehova. (2 Cro. 28:20, 21) Kisas e tabata na altura di e palabranan di profeta Mikeas, kende a biba den e tempo ey y a profetisa tocante Asiria: “Ora cu e Asirio invadi nos tera, ... e ora ey nos lo lanta contra dje shete wardador di carne, si, ocho lider di hende. Y nan lo pastorea e tera di Asiria cu spada.” (Mik. 5:5, 6) E palabranan inspira aki siguramente lo a anima Ezekias, pasobra nan a indica cu Jehova lo lanta un ehercito cu no tabata dje comun ey cu lo derota e Asirionan.

11. Na ki tempo e profecia tocante shete wardador y ocho lider lo a haya su cumplimento principal?

¹¹ E cumplimento principal di e profecia tocante shete wardador di carne y ocho lider lo mester a tuma luga hopi tempo despues di e nacemento di Hesus, e ‘gobernante  na Israel, kende su origen ta for di hopi tempo pasa.’ (Lesa Mikeas 5:1, 2.) Esaki lo a cumpli den futuro, ora cu un “Asirio”, of enemigo, ataca e sirbidornan di Jehova y pone nan existencia na peliger. Cua ehercito Jehova lo uza—bou di mando di su Yiu—pa derota e enemigo spantoso aki? Nos lo contesta e pregunta aki mas despues. Pero prome, laga nos wak kico nos por siña for di loke Ezekias a haci ora e Asirionan tabata menasa e nacion.

12. Ki ta algun medida cu Ezekias y e hombernan hunto cu ne a tuma pa proteha e pueblo di Dios?

¹² Jehova semper ta dispuesto pa duna nos un man ora nos no por resolve un problema, pero e ta spera si cu nos ta haci nos best prome pa haya un solucion. Ezekias a haci su best. El a consulta cu “su oficialnan y su guereronan”, y hunto nan a dicidi di “corta e provision di awa for di e fuentenan di awa cu tabata pafo di stad.” Tambe “el a tuma curashi y a bolbe lanta henter e muraya cu a keda basha abou, y a lanta torennan riba dje y a traha un otro muraya parti pafo ... y a traha arma y escudo na gran cantidad.” (2 Cro. 32:3-5) Na e tempo ey Jehova a uza un cantidad di homber yen di curashi pa proteha y cuida Su pueblo, entre nan: Ezekias, su oficialnan y e profetanan fiel.

13. Kico tabata e cos di mas importante cu Ezekias a haci pa prepara e pueblo pa e atake Asirio? Y ki efecto su palabranan tabatin riba e pueblo?

¹³ E siguiente cos cu Ezekias a haci tabata hasta mas importante cu proteha e awanan di e stad of fortifica e murayanan. Como un bon wardador, el a reuni su tou—e pueblo—y a anima nan spiritualmente cu e palabranan: “No tene miedo ni desmaya pa motibo di rey di Asiria, ... pasobra Esun cu ta cu nos ta mas grandi cu esun cu ta cu ne. E tin solamente un brasa di carni cu ne, ma nos tin SEÑOR nos Dios hunto cu nos, pa yuda nos y pa bringa nos batayanan.” Esta un excelente recordatorio! Ta Jehova lo a bringa pa su pueblo! Ora e pueblo a tende esaki, nan “a confia den e palabranan di Ezekias, rey di Juda.” Tuma nota cu ta “e palabranan di Ezekias” a yuda e pueblo haya curashi y tambe fe den Dios. Ezekias, su oficialnan y guereronan, y tambe e profetanan Mikeas y Isaias, a duna prueba di ta bon wardador, manera Jehova a priminti mediante su profeta.—2 Cro. 32:7, 8; lesa Mikeas 5:5, 6.

14. Kico Rabsakes a bisa, y con e pueblo a reacciona?

¹⁴ E rey di Asiria a campa na Lakis, zuidwest di Jerusalem. Djeynan, el a manda tres mensahero Jerusalem pa bisa e habitantenan di e stad pa entrega nan mes. Su vocero, kende su titulo oficial tabata Rabsakes, a papia Hebreo cu e hendenan di e stad y a uza varios tactica. Pa cuminsa, el a purba di convence nan pa no haci caso di Rey Ezekias y somete nan mes na e Asirionan. Despues, el a gaña nan cu lo e hiba nan na un pais caminda nan lo por gosa di un bida comodo. (Lesa 2 Reynan 18:31, 32.) Tambe Rabsakes a bisa nan cu mescos cu e diosnan di e otro nacionnan no por a proteha nan adoradornan, asina Jehova tampoco lo no por a libra e Hudiunan for di e gara di Asiria. Pero e pueblo a actua sabi y no a purba di contesta e mentira- y acusacionnan falso ey. Awe tambe sirbidornan di Jehova hopi biaha ta haci mescos.—Lesa 2 Reynan 18:35, 36.

15. Kico e habitantenan di Jerusalem mester a haci, y con Jehova a salba e stad?

¹⁵ Ta di compronde cu e situacion a preocupa Ezekias, pero en bes di acudi na un nacion stranhero pa yudansa, el a manda busca Isaias, e profeta di Jehova. Isaias  a bisa Ezekias: “[Senakerib] lo no bin na e stad aki, ni tira flecha den dje.” (2 Rey. 19:32) E unico cos cu e habitantenan di Jerusalem mester a haci ta para firme cu curashi, sin entrega. Jehova lo a bringa pa Juda. Y esey ta exactamente loke el a haci tambe! “A sosode cu e anochi ey e angel di [Jehova] a sali mata shentiochenticinco mil hende den e campamento di e Asirionan.” (2 Rey. 19:35) Juda a scapa! Pero no tabata pasobra Ezekias a corta e provision di awa di e stad ni pasobra el a lanta e murayanan, sino pasobra Jehova a interveni.

16. Ken awe ta representa (a) e habitantenan di Jerusalem (b) “e Asirio” (c) e shete wardador y ocho lider?

¹⁶ E cumplimento principal di e profecia tocante shete wardador y ocho lider ta den nos tempo. Den pasado, ta e Asirionan a ataca e pueblo di Jerusalem. Den futuro cercano, un “Asirio” moderno lo ataca e pueblo di Jehova cu ta parce indefenso. Su intencion lo ta pa caba cu nan. Bijbel ta menciona e atake ey, pero tambe e atake di ‘Gog di Magog’, e atake di “e rey di noord” y e atake di “e reynan di tera.” (Eze. 38:2, 10-13; Dan. 11:40, 44, 45; Rev. 17:14; 19:19) Acaso cada un di e atakenan aki ta diferente? No necesariamente. Ta posibel cu Bijbel a uza diferente nomber pa describi e mesun atake. Segun e profecia di Mikeas, ki ‘arma secreto’ Jehova lo a uza contra “e Asirio”, e enemigo implacabel aki? Un ehercito cu no ta dje comun ey cu Bijbel ta bisa ta consisti di “shete wardador di carne, si, ocho lider.” (Mik. 5:5) Ta ken esakinan ta? Nan ta e ancianonan di congregacion. (1 Ped. 5:2) Awe, Jehova definitivamente a percura un cantidad grandi di homber spiritual pa pastorea su carnenan precioso, si, pa fortalece su pueblo contra e binidero atake di “e Asirio” moderno. * E profecia di Mikeas ta bisa cu “nan lo pastorea e tera di Asiria cu spada.” (Mik. 5:6) Si, entre ‘e armanan di nan guera’ nan tin “e spada di spirito”, esta, e Palabra di Dios.—2 Cor. 10:4; Efe. 6:17.

17. Menciona cuater cos cu e ancianonan por siña for di e relato cu nos a considera.

¹⁷ Ancianonan cu ta lesando e articulo aki por saca algun les util for di e relato cu nos a caba di considera: (1) E mihor cos cu nan por haci pa prepara pa e binidero atake di “e Asirio” ta door di fortalece nan fe den Dios y yuda nan rumannan haci mescos. (2) Ora “e Asirio” ataca, nan mester ta completamente convenci cu Jehova lo salba nos. (3) Na e tempo ey, e instruccionnan cu nan ta haya for di e organisacion di Jehova kisas por parce straño of no dje practico ey for di un punto di bista humano. Pero nos tur mester ta cla pa obedece cualkier instruccion cu nos haya, sea cu nos ta di acuerdo cu e instruccionnan ey of no, pasobra nos bida lo depende di nos obediencia. (4) Awor ta ora pa tur esnan cu ta poniendo nan confianza den enseñanza di e mundo aki, den cosnan material of den organisacionnan humano cambia nan manera di pensa. E ancianonan mester ta cla pa yuda esnan cu nan fe ta zwak.

18. Con nos lo beneficia den futuro ora nos corda riba e relato aki?

¹⁸ Lo yega un dia cu e sirbidornan di Dios di awe lo parce mes indefenso cu e pueblo di Jerusalem den tempo di Ezekias. Ora esey sosode, e palabranan di Ezekias por fortalece nos fe. Laga nos corda cu nos enemigonan ‘tin solamente un brasa di carni cu nan, ma nos tin Jehova nos Dios hunto cu nos, pa yuda nos y pa bringa nos batayanan’!—2 Cro. 32:8.