Na aña 1985, mi tabatin 10 aña ora cu mi scol na Columbus (Ohio, Merca) a cuminsa haya masha hopi mucha for di Cambodia. Un di e muchanan tabata sa un par di palabra na Ingles. Via di dibuho cu el a pinta, el a conta mi di cosnan horibel cu tabata pasa na su pais. Por ehempel, el a conta con nan tabata tortura y mata hende eynan y con hopi hende mester a huy bay pa scapa nan bida. Mi kier a conta e muchanan tocante e speransa di Paradijs y e resureccion, pero nan no tabata compronde mi idioma. Aunke mi tabata un mucha, m’a dicidi di siña e idioma Cambodiano pa mi por a papia cu e muchanan di mi scol tocante Jehova. Mi no a realisa e tempo ey con e decision aki lo a influencia mi futuro.

No tabata facil pa siña Cambodiano. Dos biaha mi kier a stop di siña e idioma, pero Jehova a uza mi mayornan pa anima mi. Cu tempo, e maestronan y muchanan di mi scol a cuminsa pone presion riba mi pa mi sigui un carera cu lo a paga bon. Pero ami kier a traha pionero, pues mi a scoge cursonan na scol cu lo a yuda mi haya trabou part-time pa logra mi meta. Despues di scol, mi tabata bay den sirbishi cu algun pionero. Tambe mi tabata duna bijles na muchanan cu kier a siña Ingles. E decision ey a yuda mi hopi despues.

Ora mi tabatin 16 aña, mi a tende cu na Long Beach, California, tabatin un grupo di idioma Cambodiano. Mi a bay bishita e grupo y a siña lesa Cambodiano. Asina cu mi a caba scol, mi a bira pionero y a sigui predica na e hendenan di Cambodia cu ta biba cerca di mi cas. Pa ora mi tabatin 18 aña, mi a cuminsa pensa pa bay biba na Cambodia. Ainda e tabata un pais peligroso, pero mi tabata sa tambe cu masha poco di e 10 miyon hendenan cu tabata biba eynan a yega di tende e bon noticia di e Reino. E tempo ey tabatin un congregacion so di 13 publicador den henter e pais. Cu 19 aña, mi a bishita Cambodia pa prome biaha. Dos aña despues, mi a dicidi di bay biba eynan. Mi a haya trabou part-time como traductor y mi tabata duna les di Ingles pa mantene mi mes den sirbishi. Cu tempo, mi a casa cu un mucha muher cu tabatin e mesun metanan cu mi. Hunto nos a yuda hopi hende di Cambodia bira testigo di Jehova.

Jehova a duna mi ‘e deseonan di mi curason.’ (Sal. 37:4) E trabou cu ta duna hende e satisfaccion di mas grandi ta e trabou di haci discipel. Durante e 16 añanan cu mi tin na Cambodia, e grupo chikito di 13 sirbidor di Jehova a crece bira 12 congregacion y 4 grupo isola!—Segun e relato di Jason Blackwell.