Un tata na Brazil a bisa: ‘Nos Adoracion Como Famia ta asina interesante cu mayoria di biaha, si mi no stop mi famia, nos ta sigui papia te anochi laat.’ Un cabes di famia na Japon a bisa cu ta parce cu su yiu homber di dies aña no ta ripara cu tempo ta pasa ora nan ta studia; semper e kier sigui studia. Dicon? E tata a bisa cu su yiu ta gusta e estudio, pesey e yiu ta disfruta di dje.

Ta claro cu no ta tur mucha ta asina entusiasma cu estudio di famia y, pa nos ta franco, algun kisas no ta gust’e mes. Dicon? Un tata na Togo cu experencia a bisa: “Adoracion na Jehova no mester ta laf.” Si esey ta e caso, kisas e tin di haber cu e manera cu e Adoracion Como Famia ta ser dirigi. Hopi famia a ripara cu Adoracion Como Famia por ta dushi, “un delicia”, manera Isaias a bisa encuanto sabbat.—Isa. 58:13, 14.

Tatanan cristian a realisa cu pa nan famia disfruta di nan Adoracion Como Famia, e ambiente mester ta relaha. Ralf, kende tin tres yiu muher y un yiu homber, a bisa cu nan Adoracion Como Famia ta mas un combersacion informal cu un estudio; tur hende ta participa. Nos tin cu bisa si cu tin biaha por ta dificil pa tene tur hende atento y entusiasma durante e estudio. Un mama a admiti: “No ta tur ora mi tin e energia pa haci nos Adoracion Como Famia placentero manera mi ta desea.” Awor, kico di abo? Bo por haci boso Adoracion Como Famia mas placentero?

Un tata na Alemania cu tin dos yiu a bisa: “Nos mester ta flexibel.” Natalia, un mama cu tin dos yiu muher, a bisa: “Loke ta funciona mihor pa nos famia ta variacion, variacion y mas variacion.” Hopi famia ta parti nan Adoracion Como Famia den varios sesion. Cleiton, un tata na Brazil cu tin dos yiu teenager a bisa: “Esey ta haci e estudio di famia mas bibo y ta anima henter e famia pa participa. Ora mayornan ta parti e tempo  di nan Adoracion Como Famia den sesion, nan por dedica atencion na e necesidadnan di cada yiu, specialmente si entre e yiunan tin un diferencia grandi di edad. Ademas, mayornan por ta flexibel ora di scoge informacion cu nan lo studia y e manera cu nan lo haci e estudio.

Pero kico algun famia sa haci pa varia nan estudio di famia? Wel, algun ta cuminsa nan adoracion di famia cu cantica di Reino. Un ruman homber na Mexico cu yama Juan a bisa: “Esey ta crea un bon ambiente y ta prepara nos mentalmente pa e estudio.” Su famia ta scoge cantica cu tin di haber cu e informacion cu nan ta bay studia e anochi ey.

Hopi famia ta lesa Bijbel hunto. Y pa variacion, cada miembro di famia ta lesa e porcion di Bijbel cu ta coresponde cu un personahe biblico. Un tata na Japon a admiti cu na prome instante e “tabata haya un poco straño pa lesa Bijbel di e forma ey.” Pero su dos yiu hombernan tabata contento di mira nan mayornan disfruta di e estudio di Bijbel hunto cu nan. Algun famia sa hasta hunga papel di personahenan biblico. Roger, un tata na Sur Africa cu tin dos yiu homber, a comenta: “Hopi biaha, mucha ta mira cierto puntonan den un relato biblico cu nos mes no a ripara.”

Un otro manera pa varia nos Adoracion Como Famia ta di traha hunto riba un proyecto. Por ehempel, un famia por opta pa traha un replica di e arca di Noe of e tempel di Salomon. Pa traha riba un proyecto asina mester haci investigacion prome, y esaki por ta hopi interesante. Na Asia, un mucha muher di cinco aña hunto cu su mayornan y su wela a purba di haci algo similar. Nan a uza nan sala pa traha un wega di borchi basa riba e biahenan cu Pablo a haci como misionero. Algun otro famia a traha weganan di borchi basa riba e relatonan den e buki di Exodo. Donald di 19 aña di edad, kende ta biba na Togo, a bisa cu variacion ‘ta haci nan Adoracion Como Famia mas dushi y ta duna nan famia mas bida.’ Abo por pensa riba un proyecto cu por haci boso Adoracion Como Famia mas placentero?

Aunke variacion y flexibilidad ta haci nos Adoracion Como Famia interesante, mas ta necesario. Tur hende mester prepara. Y como cu mucha sa tin dificultad pa sinta studia pa hopi rato, tatanan mester scoge informacion cu ta interesante pa mucha y prepara bon. Un tata a bisa: “Ora mi prepara bon, henter e famia ta beneficia di e estudio.” Un tata na Alemania ta informa su famia di antemano kico nan lo studia durante henter un luna. Un famia na Benin cu tin seis yiu, entre 2 pa 12 aña, sa wak DVD di e organisacion durante nan Adoracion Como Famia. Ora esey ta e caso, di antemano e tata ta duna e famia un lista di pregunta basa riba e DVD pa nan prepara. No tin duda, bon preparacion ta mehora e calidad di nos estudio di famia.

Si un famia sa di antemano kico nan lo trata durante nan Adoracion Como Famia, nan lo por papia tocante e topico ey durante henter e siman ey; haciendo esey, nan lo ta entusiasma pa e dia di e estudio yega. Anto si henter e famia tin un tarea pa cumpli cu ne, cada miembro lo sinti cu e tambe ta forma parti di nan Adoracion Como Famia.

Hopi famia tin dificultad pa tene nan Adoracion Como Famia riba un base regular.

Hopi cabes di famia mester traha oranan largo pa percura pa e necesidadnan basico di nan famia. Un tata na Mexico, por ehempel, ta sali cas seis or di mainta p’e bay traha y ta yega cas bek te ocho or di anochi. Sa sosode tambe cu nos mester cambia e dia di nos Adoracion Como Famia debi na un otro evenemento spiritual, manera bishita di circuito of congreso di districto.

No obstante, nos mester haci esfuerso pa tene nos Adoracion Como Famia riba un base regular. Loïs, un hobencita di diesun aña di edad cu ta biba na Togo, ta splica con importante nan estudio di famia ta pa su famia. El a bisa: ‘Maske nos tin cu cuminsa mas laat cu nos Adoracion Como Famia debi na algo cu a pasa durante dia, nunca nos ta keda sin studia.’ Ta di compronde cu algun famia ta tene nan Adoracion Como Famia na comienso di siman; si algo inespera sosode, nan por programa nan estudio di famia riba un otro dia den e siman ey.

Manera e nomber mes ta indica, boso “Adoracion Como Famia” ta parti di boso adoracion na Jehova. Pues, haci boso best pa como famia, tur siman boso ofrece Jehova ‘e fruta di boso lipnan.’ (Ose. 14:2) Y laga e ocasion ey ta un ocasion gososo pa henter e famia “pasobra e goso di SEÑOR [Jehova] ta boso fortaleza.”—Neh. 8:9, 10.