DIA 7 di september 1950, mi a bira parti di e famia di Betel na Brooklyn. E tempo ey, e famia di Betel tabata consisti di 355 ruman homber y muher di varios nacionalidad entre 19 pa 80 aña di edad. Hopi di nan tabata ungi.

E hende cu a siña mi sirbi nos “Dios feliz” tabata mi mama. (1 Tim. 1:11) El a cuminsa sirbi Jehova tempo mi tabata chikito. Dia 1 di juli 1939, mi a batisa cu dies aña di edad na un asamblea di zona (awor asamblea di circuito) na Columbus, Nebraska, Merca. Mas o menos 100 ruman a reuni den un edificio cu nan a huur pa scucha grabacion di un discurso di Ruman Joseph Rutherford, cu e tema “Fascismo of Libertad.” Durante e discurso, un multitud di hende a rondona e sala chikito cu nos tabata reuni aden. Nan a forsa drenta, para nos reunion, anto core cu nos for di stad. Pero nos a reuni na un boerderij di un ruman no masha leu for di stad y a scucha resto di e programa. Bo por compronde anto dicon mi no por lubida e dia cu mi a batisa?

Mi mama a haci hopi esfuerso pa lanta mi den e berdad. Aunke mi tata tabata un bon homber y un bon cabes di famia, e no tabatin mucho interes den religion of den mi bienestar spiritual. Mi mama, hunto cu e otro rumannan di e congregacion di Omaha, a duna mi e animacion cu mi tabatin mester.

Tempo cu mi tabata cerca di caba scol secundario, mi mester a dicidi kico mi ta bay haci cu mi bida. Tur vakantie grandi di scol mi tabata sirbi como pionero di vakantie (awor pionero auxiliar) hunto cu otro hobennan di mi edad.

John Chimiklis y Ted Jaracz, dos ruman homber jong y soltero cu e tempo ey a caba di gradua for di e di shete klas di Galaad, a ser asigna pa sirbi como superintendente biahero den nos area. Ora mi a tende cu nan tabatin apenas 20 y pico aña, mi a keda babuca. Mi mes tabatin 18 aña e tempo ey y tabata cerca di caba scol secundario. Ainda mi ta corda dia cu ruman Chimiklis a puntra mi kico mi ta bay haci cu mi bida. Ora mi a cont’e, el a anima mi: “Si, drenta den e  sirbishi di tempo completo mesora. Bo no sa nunca unda esey por hiba bo.” E conseho ey y tambe e ehempel di e dos rumannan ey a impresiona mi profundamente. Pues, despues cu mi a caba scol, mi a cuminsa traha pionero na 1948.

Na juli 1950, ami cu mi mayornan a bay New York pa asisti na e congreso internacional na Yankee Stadium. Na e congreso, mi a asisti na e reunion pa rumannan interesa pa sirbi na Betel. Mi a manda un aplicacion pa expresa mi deseo pa sirbi eynan.

Aunke mi tata no tabata contra pa mi traha pionero y biba na cas, e tabata kier pa mi paga maske ta algo pa mi alohamento y cuminda. Wel, riba un dia na cuminsamento di augustus, mi tabata saliendo pa bay busca trabou, pero mi a pasa wak den brievenbus prome. Mi a haya un carta for di Brooklyn, firma pa Nathan H. Knorr, cu a bisa: “Nos a ricibi bo aplicacion pa Betel. Mi a compronde cu bo ta dispuesto pa keda na Betel pa resto di bo bida. Pesey mi kier pa bo bin Betel na Columbia Heights 124, na Brooklyn, New York, dia 7 di september 1950.”

Ora mi tata a yega cas for di trabou e dia ey, mi a bis’e cu mi a haya trabou. E di: “Hopi bon. Unda bo a haya trabou?” Mi a contest’e: “Na Betel na Brooklyn. Nan ta paga mi dies dollar pa luna.” Esey si a shock mi tata un tiki, pero el a bisa mi cu si ta esey mi kier haci, e ora ey mi mester dal bay. No mucho tempo despues, na un congreso na Yankee Stadium na 1953, mi tata a batisa!

Mi tabata contento cu mi compañero pionero, Alfred Nussrallah, tambe a haya invitacion pa sirbi na Betel. Pues, nos a bay hunto. Despues el a casa, anto e cu su casa, Joan, a bay Galaad. Mas despues nan a sirbi como misionero na Libano, y djey nan a bin Merca bek pa sirbi como superintendente biahero.

Mi prome asignacion na Betel tabata pa cose buki na otro den e departamento di encuaderna buki. E prome publicacion cu mi a traha ariba tabata e buki Kico Religion A Haci pa Humanidad? Despues di ocho luna den e departamento ey, nan a asigna mi pa traha den e Departamento di Sirbishi, bou di direccion di Ruman Thomas J. Sullivan. Tabata un placer pa traha hunto cu ne y beneficia di e sabiduria y discernimento spiritual cu el a haya a traves di añanan den e organisacion.

Despues cu mi a sirbi den e Departamento di Sirbishi pa casi tres aña, Max Larson, e superintendente di e fabrica, a bisa mi cu Ruman Knorr kier a papia cu mi. Mi a puntra mi mes ta kico mi a haci robes. Pero ora ruman Knorr a bisa mi cu ta gewoon e kier a sa si mi tabatin pensa di bay for di Betel den futuro cercano, mi a haya un alivio. E tabatin mester di un ruman pa traha den su oficina temporalmente, y e kier a wak si mi por a cumpli cu e asignacion ey. Mi a contest’e cu mi no tabatin plan di bay for di Betel. Como resultado, mi tabatin e privilegio di traha den su oficina pa 20 aña largo.

Hopi biaha mi a yega di bisa cu nunca lo mi no por a paga pa e educacion cu mi a haya trahando hunto cu ruman Sullivan y ruman Knorr, y tambe cu otro rumannan na Betel, manera Milton Henschel, Klaus Jensen, Max Larson, Hugo Riemer y Grant Suiter. *

 E rumannan cu mi a traha hunto cu ne tabata bon organisa pa cumpli cu nan trabou den e organisacion. Ruman Knorr tabata un trahador incansabel cu tabata kier pa e actividadnan di Reino progresa mas tanto posibel. E rumannan cu tabata traha den su oficina tabata haya cu nan por a acerc’e facilmente. Hasta si nos tabatin un punto di bista diferente tocante un asunto, nos por a expresa nos mes libremente sin miedo di perde su confianza.

Un biaha, ruman Knorr a papia cu mi tocante e importancia di atende loke nos por yama cosnan insignificante. Por ehempel, el a conta mi cu tempo e tabata superintendente di e fabrica, Ruman Rutherford tabata yam’e na telefon y bis’e: “Ruman Knorr, ora bo sali for di fabrica pa bin come merdia, trece un par di gum pa mi. Pone nan riba mi lessenaar.” Ruman Knorr a conta cu e prome cos cu e tabata haci ta, bay den mangasina, coy e gumnan, anto hinca nan den su saco. Merdia e tabata hiba nan na Ruman Rutherford su oficina. Tabata algo hopi chikito, pero e tabata util pa Ruman Rutherford. Despues Ruman Knorr a bisa mi: “Mi gusta tin potlood cu punta skerpi riba mi lessenaar. Bo por wak pa tur mainta nan ta gesleip?” Pues, pa hopi aña mi tabata percura pa sleip Ruman Knorr su potloodnan.

Hopi biaha ruman Knorr tabata menciona e importancia di scucha bon ora e pidi nos pa cumpli cu un cierto tarea. Un biaha, el a duna mi instruccion detaya con mi mester a trata un asunto, pero mi no a scuch’e bon. Como resultado, su cara a keda na berguensa pa mi motibo. Mi a sinti mi hopi malo, y mi a skirbi un carta pa bis’e cu ta duel mi masha hopi mes loke mi a haci y cu ta mihor nan manda mi un otro departamento. Mas laat riba e mainta ey, Ruman Knorr a bin cerca mi. El a bisa mi: “Robert, mi a haya bo carta. Bo a haci un fout. Mi a papia cu bo tocante dje, y mi tin sigur cu lo bo ta mas cauteloso den futuro. Laga nos sigui cu nos trabou awor.” Mi a keda hopi agradecido pa e manera bondadoso cu el a trata e asunto.

Despues di a sirbi ocho aña na Betel, mi unico meta tabata di sigui sirbi eynan. Pero esey a cambia. Na 1958, mi a asisti na e congreso internacional na Yankee Stadium y na Polo Grounds. Eynan mi a topa Lorraine Brookes. Mi a yega di cera conoci cu ne na 1955 tempo cu e tabata traha pionero na Montreal, Canada. Mi a keda impresiona cu su actitud pa cu sirbishi di tempo completo y su disposicion pa sirbi unda cu Jehova su organisacion mand’e. Lorraine su meta tabata pa bay e Scol di Galaad. Na 1956, cu 22 aña di edad, el a asisti na e di 27 klas. Despues cu el a gradua, nan a mand’e bay sirbi como misionero na Brazil. Ami cu Lorraine a renoba nos amistad na 1958, mi a pidie casa cu mi y el a acepta. Nos a plania pa casa e siguiente aña cu e speransa pa sirbi hunto como misionero.

 Ora mi a conta Ruman Knorr di mi plannan, el a conseha nos pa warda tres aña, casa y despues sirbi na Betel na Brooklyn. E tempo ey, si un pareha kier a keda na Betel despues cu nan casa, un di nan mester a sirbi na Betel pa dies aña of mas y e otro pa por lo menos tres aña. Pues, Lorraine a bay eens pa sirbi dos aña na Betel na Brazil y un aña na Betel na Brooklyn prome cu nos a casa.

Durante e prome dos añanan di nos namoramento, ta carta so nos por a manda pa otro. Tabata mucho caro pa yama na telefon y no tabatin e-mail e tempo ey! Ora nos a casa dia 16 di september 1961, nos tabatin e honor di scucha Ruman Knorr duna nos discurso di casamento. Ta berdad cu e añanan cu nos mester a warda a parce largo. Pero awor, ora nos wak bek yen di goso y satisfaccion despues di mas cu 50 aña casa, tabata bale la pena warda!

Na 1964, mi a haya e privilegio di bishita otro pais como superintendente di zona. E tempo ey e esposanan no tabata compaña nan esposo. Na 1977 nan a cambia esey, y e esposanan a cuminsa biaha hunto cu nan esposo. E aña ey ami cu Lorraine a compaña Grant cu Edith Suiter pa bishita e sucursalnan na Alemania, Austria, Grecia, Chipre, Turkia y Israel. Na tur, mi a bishita un 70 pais rond mundo.

Na 1980, riba un di e biahenan ey, nos a bishita Brazil. Nos mester a pasa e stad di Belém, situa riba equator, caminda Lorraine a sirbi tempo cu e tabata misionero. Tambe nos a bay Manaus pa bishita e rumannan eynan. Na un discurso cu mi a duna den un stadion, nos a ripara cu un grupo di ruman a bay sinta banda di otro sin cu e ruman muhernan a sunchi otro na cara y sin cu e ruman hombernan a duna otro man, manera e rumannan di Brazil tin custumber di haci. Pakico no?

A resulta cu nan tabata rumannan di un colonia di leproso cu ta keda den e selva di Amazona. Pa no contagia otro hende, nan a evita contacto directo cu otro personanan cu a asisti na e reunion. Sin embargo, e rumannan stima aki a conmove nos curason, y hamas nos lo lubida e goso cu tabatin riba nan cara! Ta manera Isaias a skirbi: “Mi sirbidornan lo dal grito di goso cu un curason contento.”—Isa. 65:14.

Semper ami cu Lorraine ta pensa riba e mas cu seis decada cu nos tin ta sirbi Jehova. Nos ta masha contento cu e bendicionnan cu nos a ricibi door cu nos a laga Jehova guia nos pa medio di su organisacion. Aunke awor mi no por biaha rond mundo mas manera antes, mi por traha hunto cu e Comite di Coordinador y e Comite di Sirbishi, y asina sirbi como ayudante pa e Cuerpo Gobernante. Mi ta masha agradecido pa e privilegio cu mi tin di por yuda sostene e hermandad mundial di e manera aki. Nos ta keda asombra ora nos mira e cantidad di hoben, homber y muher, cu ta drenta den sirbishi di tempo completo. Nan tin e mesun actitud cu Isaias, kende a bisa: “At’ami aki! Manda ami!” (Isa. 6:8) E multitud di rumannan ey ta confirma loke e superintendente di circuito a bisa mi hopi aña pasa: “Drenta den e sirbishi di tempo completo mesora. Bo no sa nunca unda esey por hiba bo.”