1, 2. (a) Ken ta e prome creacion di Dios, y con Jehova a uza e persona aki? (b) Kico ta indica cu e angelnan ta bon organisa?

JEHOVA, e Creador di universo, ta haci tur cos na un manera organisa. Su prome creacion tabata su Yiu unigenito, Hesus. Bijbel ta yama Hesus “e Palabra” pasobra e ta Dios su representante principal. Hesus tin hopi siglo ta sirbi Jehova, pesey Bijbel ta bisa cu “na cuminsamento e Palabra tabat’ey, y e Palabra tabata hunto cu Dios.” Bijbel ta bisa tambe cu “tur cos a yega di existi pa medio di e Palabra; nada no a yega di existi sin dje.” Y un poco mas cu 2.000 aña pasa, Dios a manda e Palabra na Tera. Y ora e tabata riba Tera, e homber perfecto aki a cumpli fielmente cu e boluntad di su Tata.—Juan 1:1-3, 14.

² Prome cu Hesus a bin na Tera, el a sirbi Dios lealmente como su “trahador experto.” (Prov. 8:30) Pa medio di dje, Jehova a crea miyones y miyones di angel den cielo. (Col. 1:16) Relaciona cu e angelnan aki, Bijbel ta bisa: “Miles y miles tabata sirbie [esta, Jehova], y dies mil biaha dies mil tabata para su dilanti.” (Dan. 7:10) E numeroso cantidad di criatura celestial ta asina bon organisa cu Bijbel ta referi na nan como “ehercitonan” di Jehova.—Sal. 103:21.

3. Cuanto strea tin, y con e strea- y planetanan ta organisa?

 ³ Awor kico nos por bisa di e cantidad incontabel di strea y planeta cu Jehova a crea? Tocante e streanan, un revista di Houston, Texas, a bisa cu, segun un estudio recien, tin “300 triljard” strea, tres biaha mas tanto cu cientificonan a yega di calcula. Esey ta un 3 cu 23 cero! Awor, e streanan y e planetanan ta organisa? Si, miles di miyones di strea y varios planeta ta forma un galaxia. Mayoria di galaxia ta forma cluster y combinacion di cluster ta forma supercluster.

4. Dicon ta logico pa conclui cu Jehova su sirbidornan riba Tera ta bon organisa?

⁴ Pues, manera nos a mira, e angelnan den cielo, e streanan y e planetanan ta maraviyosamente organisa. (Isa. 40:26) Pesey, ta logico pa conclui cu Jehova lo organisa su sirbidornan riba Tera tambe. Y Jehova kier pa su sirbidornan ta bon organisa, pasobra nan tin cu haci varios trabou importante. E trayectoria di sirbishi fiel di miles di sirbidor di Jehova, tanto esnan den pasado como esnan di awe, ta duna prueba cu Jehova ta cu su pueblo y cu e “no ta un Dios di desordo, sino di paz.”—Lesa 1 Corintionan 14:33, 40.

5. Con bin Dios su proposito relaciona cu Tera no a cumpli mesora?

⁵ Ora Jehova a crea e prome pareha, el a bisa nan: “Sea fructifero y multiplica, y yena e Tera y haci esaki somete na bo; y goberna riba e piscanan di lama y riba e parhanan di cielo, y riba tur ser bibo cu ta move riba Tera.” (Gen. 1:28) Jehova no a crea miyones di hende di biaha. Adam cu Eva mester a haya yiu, nan yiunan mester a haya yiu y esey mester a sigui asina, na un manera organisa, te ora Tera yena. Y Dios su proposito tabata pa hende haci henter e Tera un paradijs. Pero como cu Adam y Eva a desobedece Dios, Dios su proposito relaciona cu Tera no a cumpli mesora. (Gen. 3:1-6) Mayoria di Adam cu Eva su descendientenan no a sirbi Jehova y, cu tempo, ‘maldad di hende tabata grandi riba Tera, y tur intencion di e pensamentonan di nan curason tabata continuamente maldad so.’ Consecuentemente, “Tera tabata corumpi den bista di Dios” y “yen di violencia.” Pesey, Dios a dicidi di trece un diluvio riba henter e Tera y destrui tur malbado.—Gen. 6:5, 11-13, 17.

6, 7. (a) Dicon Noe a haya gracia den bista di Jehova? (Wak e prome plachi.) (b) Kico a pasa cu tur e hendenan cu no a haci caso di Noe su spiertamento?

⁶ Pero Noe ‘a haya gracia den bista di Jehova’ pasobra e “tabata un homber husto”, kende “a resulta di ta sin culpa entre su contemporaneonan.” (NW) ‘Noe a cana cu e Dios berdadero’, pesey Jehova a instruye pa construi un arca inmenso. (Gen. 6:8, 9, 14-16) E arca a ser construi di tal manera cu tanto hende como bestia por a sobrevivi. Noe a haci tur loke Jehova a orden’e y, cu yudansa di su famia, el a caba e arca. Despues cu nan a hinca e bestianan den e arca, Jehova “a cera e porta.”—Gen. 7:5, 16.

⁷ Ora e Diluvio a bin na aña 2370 prome cu Cristo, Jehova “a destrui tur loke tabata existi y cu tabata riba superficie di Tera”, pero el a scapa e homber fiel Noe y su famia, kendenan tabata den e arca. (Gen. 7:23) Tur hende riba Tera awe ta descendiente di Noe y su famia. Pero e personanan cu no a haci caso di e spiertamentonan di Noe, “un predicador di husticia”, no a sobrevivi Diluvio.—2 Ped. 2:5.

8. Ki evidencia tin cu e pueblo di Israel tabata bon organisa ora cu Dios a manda nan drenta e Tera Priminti?

 ⁸ Mas cu ocho siglo despues di Diluvio, Dios a organisa e Israelitanan como un nacion. Tur aspecto di nan bida tabata organisa, specialmente e manera cu nan mester a adora Jehova. Por ehempel, Jehova a nombra algun como sacerdote y levita y a encarga algun hende muher pa “sirbi na entrada di e tent di reunion.” (Exo. 38:8) Ora Jehova a instrui e Israelitanan pa bay Canaan y biba ayanan, mayoria di nan a nenga di haci esey pa motibo di miedo. Pesey Jehova a bisa nan: “Siguramente boso lo no bin den e tera caminda mi a hura di establece boso, cu excepcion di Caleb, yiu homber di Jefone, y Josue, yiu homber di Nun.” Dicon? Pasobra ta Josue y Caleb so a bin bek cu bon informe despues di a spiona e Tera Priminti. (Num. 14:30, 37, 38) Mas despues, Jehova a nombra Josue como sucesor di Moises. (Num. 27:18-23) Ora e Israelitanan tabata a punto di drenta Canaan bou di guia di Josue, Jehova a bisa Josue: “Sea fuerte y tene curashi! No tembla ni desmaya, pasobra SEÑOR bo Dios ta cu bo unda cu bo bay.”—Jos. 1:9.

9. Ki efecto e manera cu Jehova a trata su pueblo tabatin riba Rahab?

⁹ Jehova Dios realmente tabata cu Josue, unda cu el a bay. Tuma por ehempel loke a pasa na aña 1473 prome cu Cristo ora e Israelitanan tabata campa cerca di e stad Cananeo, Jerico. Josue a manda dos homber pa spiona e stad Jerico. Eynan, nan a topa cu un prostituta cu yama Rahab. Rahab a sconde e spionnan aki riba dak di su cas pa e hombernan cu e rey di Jerico a manda no captura nan. Y Rahab a bisa e spionnan Israelita: “Mi sa cu SEÑOR a duna boso e tera ..., pasobra nos a tende con SEÑOR a seca e awa di Lama Cora  boso dilanti ... y kico boso a haci cu e dos reynan di e Amoreonan.” Ademas, el a bisa: ‘Jehova boso Dios ta Dios ariba den cielo y abou na Tera.’ (Jos. 2:9-11) Debi cu Rahab a apoya e organisacion di Jehova di e tempo ey, Jehova a scapa e y su famia ora e Israelitanan a conkista Jerico. (Jos. 6:25) Rahab a pone fe den Jehova. E tabatin respet profundo pa Jehova y pa Su pueblo.

10. Kico Hesus a bisa e lidernan religioso hudiu di su tempo, y dicon el a bisa nan esey?

¹⁰ Bou di guia di Josue, e Israelitanan a conkista un stad tras di otro y asina nan a podera di henter e tera di Canaan. Pero kico a sosode despues? Wel, a traves di siglonan, bes tras bes e Israelitanan a viola e leynan di Dios. Pesey, tempo cu Jehova a manda su Yiu na Tera, nan tabata asina desobediente y desinteresa den Jehova su profetanan cu Hesus a bisa cu Jerusalem tabata “mata e profetanan.” (Lesa Mateo 23:37, 38.) Dios a rechasa e lidernan religioso hudiu pasobra nan tabata infiel na dje. Hesus a bisa nan: “Lo kita e Reino di Dios for di boso y dun’e na un nacion cu ta duna fruta pa e Reino.”—Mat. 21:43.

11, 12. (a) Kico a mustra cu Jehova a rechasa e nacion di Israel y cuminsa bendiciona un organisacion nobo den prome siglo? (b) Ken a forma parti di e organisacion nobo aki?

¹¹ Un poco despues cu Hesus a bin na Tera, Jehova a rechasa e nacion di Israel como su pueblo. Pero esey no a nifica cu Jehova a keda sin un organisacion di sirbidornan fiel aki riba Tera. Al contrario, na Pentecoste di aña 33 di prome siglo, Jehova a establece y a cuminsa bendiciona un organisacion nobo, basa riba Hesucristo y su siñansanan. Riba e dia ey, tabatin alrededor di 120 discipel di Hesus reuni den un cas na Jerusalem ora cu ‘diripiente un zonido for di cielo manera di un biento fuerte a resona den henter e cas.’ Y ‘loke tabata parce lenga di candela a bay para riba cada un di nan, y nan tur a yena cu spirito santo y a cuminsa papia otro idioma.’ (Echo. 2:1-4) E suceso asombroso aki a mustra bon cla cu Jehova tabata sostene e organisacion nobo aki, cu a consisti di discipelnan di Cristo.

¹² Riba e dia emocionante ey, “mas o menos 3.000 alma” a bira discipel di Hesus. Ademas, “tur dia Jehova tabata trece mas hende cu a haya e caminda di salbacion.” (Echo. 2:41, 47) Hesus su discipelnan tabatin asina tanto exito den e trabou di predica cu Bijbel a bisa cu “e palabra di Dios a sigui crece, y e cantidad di discipel na Jerusalem a sigui aumenta masha hopi mes.” Si, hopi hende sincero, hasta “un gran cantidad di sacerdote” a acepta e siñansanan di Cristo. (Echo. 6:7) Mas despues tambe Jehova a duna evidencia cu e tabata sostene e organisacion nobo aki, treciendo “hende di e nacionnan” den e congregacion cristian.—Lesa Echonan 10:44, 45.

13. Ki trabou Dios a duna su organisacion nobo?

¹³ No tabatin ningun duda ta ki trabou Dios a duna e siguidornan di Cristo pa haci. Tempo cu Hesus tabata riba Tera, el a pone un bon ehempel pa nan, pasobra poco despues di su bautismo el a cuminsa predica tocante “e Reino di cielo.” (Mat. 4:17) Ademas, Hesus a siña su discipelnan con pa haci e mesun trabou. El a bisa nan: “Boso lo ta mi testigonan na Jerusalem, den henter Judea y Samaria, y te na e parti mas leu di Tera.” (Echo. 1:8) E discipelnan di Hesus a compronde bon cla kico a ser spera di nan. Pablo y Barnabas, por ehempel, a bisa e opositornan Hudiu na Antiokia, Pisidia: “Boso tabata  e promenan cu mester a tende e palabra di Dios. Ma como cu boso ta rechas’e y no ta considera boso mes digno di bida eterno, nos ta bay cerca e nacionnan. De echo, Jehova a duna nos e mandamento aki: ‘Mi a nombra bo como luz pa e nacionnan, pa bo hiba salbacion te na e parti mas leu di Tera.’” (Echo. 13:14, 45-47) For di prome siglo, e parti terenal di Jehova su organisacion ta laga hende sa kico Jehova ta haciendo pa salba humanidad.

14. Kico a pasa cu Jerusalem den prome siglo, y ken a sobrevivi?

¹⁴ Mayoria di e Hudiunan no a acepta e bon noticia y no a haci caso di e spiertamento di Hesus, kende a bisa su discipelnan: “Ora boso mira Jerusalem rondona pa ehercito, boso por ta sigur e ora ey cu su desolacion a yega cerca. E ora ey laga esnan cu ta na Judea huy bay den sero, laga esnan cu ta den stad sali bay y esnan cu ta den cunucu no mester drenta stad.” (Luc. 21:20, 21) Y a sosode manera Hesus a profetisa. E Hudiunan a lanta contra e Romanonan, y na aña 66 despues di Cristo, Cestio Galo a rondona Jerusalem pa destruye. Pero inespera e ehercito Romano a retira, y esey a duna e siguidornan di Hesus oportunidad pa bandona Jerusalem y Judea. Segun e historiador Eusebio, hopi di nan a crusa Riu Jordan pa huy bay Pela na Perea. Na aña 70, e ehercito Romano, bou di mando di General Tito, a regresa Jerusalem y destruye. Pero e cristiannan fiel si a scapa pasobra nan a haci caso di Hesus su spiertamento.

15. A pesar di kico e congregacion cristian a sigui crece?

¹⁵ A pesar di dificultad, persecucion y otro prueba di fe, Cristo su siguidornan a sigui aumenta den prome siglo. (Echo. 11:19-21; 19:1, 19, 20) E congregacion cristian a sigui prospera den sentido spiritual pasobra nan tabatin Dios su bendicion.—Prov. 10:22.

16. Kico tur cristian mester a haci pa nan por a keda uni y cu un fe fuerte?

¹⁶ Pa e cristiannan por a keda uni y cu un fe fuerte, nan tur mester a haci esfuerso. Nan mester a studia e Scritura diligentemente, asisti regularmente na nan reunionnan y haci e trabou di predica celosamente. E cosnan aki a contribui na e spiritualidad y union di e pueblo di Dios di e tempo ey, manera ta e caso awe tambe. E congregacionnan tabata bon organisa. Tabatin anciano y sirbidor ministerial, kendenan tabata dispuesto pa traha duro na beneficio di e congregacionnan. (Flp. 1:1; 1 Ped. 5:1-4) E rumannan tabata gusta ora superintendentenan biahero, manera Pablo, tabata bishita nan congregacion. (Echo. 15:36, 40, 41) E similaridadnan entre nos adoracion y esun di e cristiannan di prome siglo ta remarcabel. Nos ta hopi agradecido cu semper Jehova a organisa su sirbidornan. *

17. Kico nos lo trata den e siguiente articulo?

¹⁷ Segun cu e mundo di Satanas ta yegando na su fin, e parti terenal di Jehova su organisacion ta moviendo padilanti mas rapido cu nunca. Kico di abo? Bo ta canando pareu cu Jehova su organisacion? Bo ta haciendo progreso den sentido spiritual? E siguiente articulo ta siña nos con nos por progresa, canando pareu cu Jehova su organisacion.