Den un cantica di alabanza na e Creador, Rey David di Israel di antiguedad a canta: “Pa haci bo boluntad, o mi Dios, ta un delicia pa mi; bo Ley ta den mi curason.” (Sal. 40:8) A pesar di tur e problemanan y presion cu David a enfrenta, e tabatin berdadero goso haciendo e boluntad di Dios. Ta claro cu David no tabata e unico persona cu tabatin placer den sirbi e Dios berdadero.

Apostel Pablo a aplica e palabranan di Salmo 40:8 na e Mesias, of Cristo. El a skirbi: “Ora Cristo a bin na mundo, el a bisa Dios: ‘“Sacrificio y ofrenda bo no tabata kier, ma bo a prepara un curpa pa mi. Bo no tabatin placer den ofrenda kima ni ofrenda pa pica.” E ora ey mi a bisa: “Wak! Mi a bin (den e rol di e buki ta para skirbi tocante mi) pa haci bo boluntad, o Dios.”’”—Heb. 10:5-7.

Tempo cu Hesus tabata riba Tera, tabata un goso p’e observa e creacion, pasa tempo cu su amigonan y disfruta di un cuminda cu otro hende. (Mat. 6:26-29; Juan 2:1, 2; 12:1, 2) Sinembargo, su interes principal y mayor goso tabata pa haci e boluntad di su Tata celestial. De echo, Hesus a bisa: “Mi cuminda ta pa haci e boluntad di esun cu a manda mi y caba e trabou cu el a duna mi pa haci.” (Juan 4:34; 6:38) Hesus, e Gran Maestro, a siña su discipelnan e secreto pa berdadero felicidad. Pesey, cu goso y entusiasmo nan a predica e mensahe di Reino na otro hende.—Luc. 10:1, 8, 9, 17.

Hesus a bisa su discipelnan: “Bay, y haci hende di tur nacion mi discipel, y batisa nan den nomber di e Tata y di e Yiu y di spirito santo, y siña nan cumpli cu tur loke mi a manda boso. Y wak!, mi ta cu boso tur e dianan, te na conclusion di e era aki.” (Mat. 28:19, 20) Pa nos por cumpli cu e  mandamento aki, nos mester predica na tur hende, rebishita esnan cu a mustra interes y studia Bijbel cu nan. E trabou aki ta un fuente di berdadero goso y satisfaccion.

Sea cu hende mustra interes den nos mensahe of no, nos por tin goso den nos sirbishi basta nos tin un bon actitud. Dicon nos ta sigui predica e bon noticia a pesar di apatia of indiferencia? Pasobra nos ta consciente cu mediante nos trabou di predica y di haci discipel nos ta demostra nos amor pa Jehova y pa nos prohimo. Si, bida di hende ta den wega, tanto di nos como di nos prohimo. (Eze. 3:17-21; 1 Tim. 4:16) Laga nos trata algun punto cu a yuda hopi di nos rumannan cu ta traha den teritorionan dificil renoba of keda cu nan celo pa sirbishi.

Bon uzo di pregunta den nos sirbishi hopi biaha ta duna bon resultado. Un mainta, un ruman muher cu yama Amalia a mira un homber ta lesa corant den un parke. El a acerc’e y puntr’e si tin bon noticia den e corant. Ora cu e homber a bisa “no”, Amalia a bis’e: “Ami si tin bon noticia tocante e Reino di Dios pa meneer.” Esaki a lanta e homber su interes y el a acepta un estudio di Bijbel. Amalia a cuminsa tres estudio di Bijbel den e parke ey.

Janice ta predica na su trabou. Ora un watchman y su colega a mustra interes den un articulo di E Toren di Vigilancia, Janice a ofrece pa trece revista pa nan regularmente. El a haci mescos cu un otro colega, kende a keda encanta cu e variedad di topico cu E Toren di Vigilancia y ¡Despertad! ta trata. Esaki a pone cu un otro colega tambe a pidie revista. Janice a bisa: “Esta un bendicion di Jehova!” Cu tempo, e tabatin 11 persona como ruta di revista na su trabou.

Un superintendente biahero a conseha publicadornan pa na final di un combersacion den sirbishi nan no djis bisa e persona cu nan lo bin otro dia. Mas bien, el a anima nan pa puntra e persona: “Bo ta desea pa mi mustra bo con un estudio di Bijbel ta bay?” of “Ki dia y ki ora bo kier pa mi bolbe pa nos por sigui combersa?” E superintendente biahero a bisa cu e publicadornan di un congregacion cu el a bishita a cuminsa 44 estudio di Bijbel den un siman uzando e metodo aki.

Si nos ta haci rebishita mesora, hasta den un par di dia, nos por haya hopi bon resultado. Dicon? Pasobra ora nos ta haci esey, nos ta mustra cu nos tin berdadero interes pa yuda hende sincero compronde Bijbel. Ora nan a puntra un señora dicon el a acepta pa studia Bijbel cu testigonan di Jehova, el a bisa: “Nan amor y interes sincero a motiva mi pa cuminsa studia Bijbel.”

 Un poco tempo despues cu Madaí a asisti na e Scol di Sirbishi di Pionero, e tabata dirigi 15 estudio di Bijbel y a pasa 5 otro pa otro publicador. Varios di su studiantenan di Bijbel a cuminsa asisti regularmente na nos reunionnan. Kico a yuda Madaí cuminsa asina tanto estudio di Bijbel? Regularmente e tabata rebishita e personanan cu a mustra interes, manera el a siña na e Scol di Pionero. Un otro ruman muher cu a yuda hopi hende conoce e berdad di Bijbel a bisa: “Mi a siña cu e clave pa yuda hende cu kier conoce Jehova ta sigui haci rebishita.”

E trabou di haci rebishita y dirigi estudio di Bijbel ta rekeri esfuerso diligente. Sinembargo, e bendicionnan ta bal tur e esfuerso y mas cu esey. Ora nos ta haci tur loke nos por den e trabou di predica, nos por yuda hende “yega na un conocemento exacto di e berdad”, y esey por hiba na nan salbacion. (1 Tim. 2:3, 4) Y pa nos, esey ta resulta den goso y satisfaccion.