1, 2. Dicon Pablo por a compronde pa e rumannan cu a parce debil?

DE BES en cuando, nos tur sa sinti nos debil. Tin biaha, un alergia of griep por agota nos asina tanto cu nos no tin energia pa cumpli cu nos actividadnan di tur dia. Awor, imagina bo cu bo ta sintiendo bo mes debil, no un of dos siman, sino lunanan largo. Den un situacion asina, lo bo no keda contento si otronan ta purba di compronde bo y ta trata bo cu compasion?

² Apostel Pablo tambe a yega di sinti su mes debil debi na presion cu el a hay’e cu ne tanto paden como pafo di e congregacion cristian. Na mas cu un ocasion el a pensa cu lo e no tabatin forsa mas pa sigui. (2 Cor. 1:8; 7:5) Pesey, reflexionando riba su bida y tur e dificultadnan cu el a hay’e cu ne como un cristian fiel, el a bisa: “Ken ta debil sin cu mi tambe ta sinti mi debil?” (2 Cor. 11:29) Y ora el a compara e miembronan di e congregacion cristian cu e partinan di curpa di hende, el a bisa cu ta net esnan cu “ta parce mas debil ta esnan necesario.” (1 Cor. 12:22) Kico Pablo tabata kiermen cu e palabranan ey? Dicon nos mester mira nos rumannan cu ta parce debil manera Jehova ta mira nan? Y con esaki ta beneficia nos?

3. Kico por influencia e manera cu nos ta pensa di nos rumannan cu tin mester di yudansa?

³ Nos ta bibando den un mundo competitivo caminda hende ta pensa cu pa bo tin exito bo mester ta hoben y fuerte. Y hopi hende ta haci loke sea pa nan logra loke nan kier; tin biaha nan ta hasta probecha di esnan mas debil. Aunke nos no ta aproba e actitud ey, sin cu nos sa, e por influencia nos y nos por cuminsa pensa malo di algun di nos rumannan den fe cu regularmente tin mester di yudansa. Pero, kico por yuda nos mira nos rumannan manera Jehova ta mira nan?

4, 5. (a) Segun e ilustracion na 1 Corintionan 12:21-23, con Jehova ta mira tur su sirbidornan? (b) Con nos ta beneficia ora nos ta yuda nos rumannan cu ta parce debil?

⁴ Un ilustracion cu Pablo a uza den su prome carta na e Corintionan por yuda nos compronde con Jehova ta mira su sirbidornan cu ta debil. Den capitulo 12, Pablo ta corda nos cu hasta e parti di curpa cu ta parce mas debil of innecesario tin su funcion. (Lesa 1 Corintionan 12:12, 18, 21-23.) Di otro banda, tin cierto evolucionistanan cu ta contradeci esaki. No obstante, resultado di estudionan di anatomia ta mustra cu algun parti di curpa, cu antes hende tabata pensa cu nan no ta necesario, tin funcion masha importante. * Por ehempel, tin hende tabata duda cu nos dede di pia chikito tin un funcion; sinembargo, cientificonan a descubri cu e dede aki ta yuda tene henter nos curpa den balansa.

⁵ Pablo su ilustracion ta mustra bon cla cu tur miembro di e congregacion cristian ta “necesario,” of valioso. Ta Satanas kier pa nos kere cu nos no ta sirbi pa nada y cu Jehova no ta interesa den nos. (Job 4:18, 19) Pero pa Jehova, tur su sirbidornan, incluso esnan cu ta parce debil, ta “necesario.” E pensamento ey ta laga nos sinti nos bon cu nos ta parti di un congregacion y di un hermandad mundial. Pensa por ehempel riba un ocasion cu bo a duna un ruman di edad un man pa yud’e cana. Probablemente bo a ahusta bo pasonan na esnan di dje. Bo no a sinti bo bon cu bo por a yuda e ruman? Si, ora nos ta yuda otro hende, nos ta haya goso, mas pasenshi, nos amor pa nos rumannan ta aumenta y nos ta bira mihor cristian. (Efe. 4:15, 16) Nos Tata amoroso kier pa nos balora tur nos rumannan sin importa nan limitacionnan. Ora nos ta haci esey, nos lo tin un punto di bista balansa di nos rumannan y nos lo trata otro cu mas amor.

6. Con Pablo a uza e palabranan “debil” y “fuerte”?

⁶ Ta berdad cu den Pablo su carta na e Corintionan, el a uza e palabra “debil” pa referi na algun persona den congregacion. Pero, el a haci esaki pa indica con algun hende cu no tabata cristian tabata pensa di e cristiannan di prome siglo. El a uza e palabra “debil” pa indica tambe con e mes a yega di sintie. (1 Cor. 1:26, 27; 2:3) Pesey, ora el a bisa cu algun cristian tabata “fuerte”, e no tabata kiermen cu e cristiannan ey tabata mihor cu e otronan. (Rom. 15:1) Mas bien, e tabata kiermen cu e cristiannan cu tabatin mas experencia, mester tabatin pasenshi cu esnan cu no tabata fuertemente hancra ainda den e berdad.

7. Kico por stroba nos di yuda nos rumannan cu tin mester di yudansa?

⁷ Ora nos ta yuda “e pobernan” of e debilnan, nos ta imita Jehova, y e ta keda contento  cu nos. (Sal. 41:1; Efe. 5:1) Pero, no ta tur biaha ta facil pa yuda nos rumannan cu tin mester di yudansa. Dicon? Tin biaha pensamentonan negativo por stroba nos. Por ehempel, nos por cuminsa pensa cu ta e ruman mes tin cu resolve su asuntonan. Of kisas nos ta evita di acerca un ruman cu ta den un situacion dificil pasobra nos no sa kico pa bis’e. Cynthia * por ehempel, un ruman kende su esposo a bandon’e, a bisa: “Si bo ruman ta evita bo of ta comporta su mes na un manera cu bo no ta spera di un bon amigo, e ta duel bo. Ora bo ta pasando den tempo dificil, bo tin mester di amigonan cu ta stima bo.” Rey David tambe a sintie hopi malo ora su amigonan a evit’e.—Sal. 31:12.

8. Kico por yuda nos mustra mas empatia y compasion na nos rumannan?

⁸ Awor, kico por yuda nos mustra empatia y compasion na nos rumannan cu tin mester di yudansa? Nos mester corda cu algun di nos rumannan stima ta “debil”, of tin mester di yudansa, debi na situacionnan dificil manera maleza y depresion of debi cu nan ta biba den un cas caminda no ta tur hende ta Testigo. Nos tambe por haya nos den un situacion asina, y nos lo kier pa otronan trata nos cu compasion. Pensa riba e Israelitanan. Tempo cu nan tabata na Egipto, nan tabata pober y debil. Y ora nan tabata bay drenta e Tera Priminti, Jehova a corda nan pa nan ‘no haci nan curason duro’ pa cu nan rumannan cu tabata sufri. Jehova tabata kier pa nan yuda nan rumannan pober cu tabatin mester di yudansa.—Deu. 15:7, 11; Lev. 25:35-38.

9. Kico nos mester haci ora un di nos rumannan bira debil? Ilustra esaki.

⁹ En bes di husga of duda den nos rumannan cu ta pasando den un situacion dificil, nos mester yuda nan y anima nan. (Job 33:6, 7; Mat. 7:1) Con asina? Wel, imagina bo cu un motociclista a haya un accidente y nan ta core hib’e EHBO. Kico e dokter- y verpleegsternan lo haci? Nan lo purba di saca afo si ta e motociclista mes a causa e accidente? No, mesora nan lo dun’e asistencia medico. Den e congregacion cristian ta mescos. Ora un di nos rumannan bira debil debi na problemanan personal, loke nos mester haci ta dun’e yudansa spiritual.—Lesa 1 Tesalonicensenan 5:14.

10. Den ki sentido algun ruman cu ta parce debil, en realidad ta “rico den fe”?

¹⁰ Tin ruman cu por parce debil. Pero si bo para keto y pensa riba nan situacion, lo bo ripara cu realmente nan no ta debil! Pensa por ehempel riba nos ruman muhernan cu tin varios aña ta soporta oposicion di parti di nan famia. Algun di nan kisas ta parce debil of fragil. Pero nan tin un fortaleza y un fe sobresaliente! Awor, kico di un mama soltero cu regularmente ta asisti na e reunionnan hunto cu su yiu of yiunan? Su fe y determinacion no ta impresiona bo? Anto kico di nos teenagernan cu ta pega na e berdad a pesar di mal influencia na scol? Cu tur modestia, nos tin cu admiti cu e rumannan ey, cu ta parce debil, por ta mesun “rico den fe” cu esnan cu ta den un situacion mas faborabel.—Sant. 2:5.

11, 12. (a) Kico por yuda nos mira nos rumannan manera Jehova ta mira nan? (b) Kico nos por siña for di e manera cu Jehova a trata Aaron?

¹¹ Pa nos por mira nos rumannan manera Jehova ta mira nan, ta bon pa nos wak con el a yega di trata algun di su sirbidornan den pasado ora nan a comete eror. (Lesa Salmo 130:3.) Tuma por ehempel e ocasion cu Aaron a traha e bishe di oro. Si bo tabata hunto cu Moises, kico lo bo a pensa di e excuusnan flauw cu Aaron a bin cu ne? (Exo. 32:21-24) Of kico lo bo a pensa  di Aaron su actitud, ora cu bou di influencia di su ruman Miriam, el a critica Moises pasobra el a casa cu un muher stranhero? (Num. 12:1, 2) Y con lo bo a reacciona ora cu Aaron y Moises a keda sin duna gloria na Jehova na momento cu Jehova a percura milagrosamente pa awa na Meriba?—Num. 20:10-13.

¹² Na tur e ocasionnan aki, Jehova por a castiga Aaron mesora. Pero Jehova tabata sa cu Aaron no tabata un mal hende. Ta parce cu Aaron a laga situacionnan dificil y mal influencia di otronan desvi’e. Sinembargo, semper cu a confront’e cu su fayonan, e tabata cla pa admiti esakinan y a acepta e decisionnan cu Jehova a tuma. (Exo. 32:26; Num. 12:11; 20:23-27) Jehova a enfoca riba Aaron su fe y e echo cu el a arepenti di su erornan. Pesey, siglonan despues, ainda hende tabata corda riba Aaron y su descendientenan como fiel sirbidornan di Jehova.—Sal. 115:10-12; 135:19, 20.

13. Ki analisis nos tin cu haci pa nos por imita Jehova?

¹³ Pa nos por pensa manera Jehova ta pensa, nos tin cu analisa e manera cu nos ta pensa di nos rumannan cu ta parce debil. (1 Sam. 16:7) Por ehempel, imagina bo cu un teenager no ta uza discernimento ora di scoge entretenimento of cu e tin un actitud indiferente. Kico lo bo haci? Lo bo husg’e? En bes di haci esey, pakico no pensa con pa yud’e? Dedica tempo na e hoben pa yud’e madura, asina e por tuma bon decision den futuro. Ora nos ta tuma iniciativa pa yuda nos rumannan den e manera ey, nos lo ta mas comprensivo y amoroso.

14, 15. (a) Con Jehova a reacciona na momento cu Elias a perde curashi? (b) Kico nos por siña for di e experencia di Elias?

¹⁴ Awor, kico Jehova ta pensa di su sirbidornan cu ta deprimi? Laga nos wak con el a yuda un di su sirbidornan cu tabata sinti su mes asina: profeta Elias. Aunke e tabatin  e curashi pa desafia 450 profeta di Baal, Elias a huy ora el a haya sa cu Reina Jezabel kier a laga mat’e. Despues cu el a cana 150 kilometer bay Beerseba, el a sigui bay te den desierto. Agota di su biahe den higra di solo, e profeta a bay sinta bou di un palo y “a pidi pa e muri.”—1 Rey. 18:19; 19:1-4.

¹⁵ Kico Jehova a haci ora el a mira con desespera y deprimi su profeta fiel tabata? El a rechasa Elias pasobra el a perde curashi? No. Al contrario, Jehova a tene cuenta cu Elias su limitacionnan y a manda un angel pa yud’e. Dos biaha e angel a anima Elias pa come pa asina e por tabatin forsa pa sigui cu su biahe. (Lesa 1 Reynan 19:5-8.) Manera nos a mira, prome cu Jehova a duna Elias instruccion, el a scucha e profeta y a tuma medidanan practico pa yud’e.

16, 17. Con nos por yuda nos rumannan manera Jehova a yuda Elias?

¹⁶ Awor, con nos por yuda nos rumannan manera Jehova a yuda Elias? Nos no mester ta mucho lihe pa duna conseho. (Prov. 18:13) Ta mihor pa nos tuma tempo pa scucha y mustra empatia na un ruman cu kisas ta pensa cu e ta “menos honorabel” debi na su circunstancianan personal. (1 Cor. 12:23). Di e manera ey, nos lo ta den mihor posicion pa dun’e e yudansa cu e tin mester.

¹⁷ Pensa atrobe riba e experencia di Cynthia. Ora cu su esposo a bandona e y su yiunan, nan a keda desampara. Con algun di nan compañeronan Testigo a reacciona? Cynthia a conta: “Despues cu mi a bisa nan via telefon kico a pasa, denter di 45 minuut nan tabata na nos cas. Nan tabata awa na wowo. Durante e prome dos of tres dianan siguiente, nan no a laga nos nos so. Como cu nos no tabata come bon y tabata emocionalmente kibra, pa un tempo nan a laga nos keda na nan cas.” Probablemente e experencia aki ta pone nos corda loke e carta di Santiago ta bisa: “Si un ruman homber of un ruman muher no tin paña ni suficiente cuminda pa dia, anto un di boso bis’e: ‘Bay na paz, tene bo curpa cayente y bon alimenta’, pero boso no ta dun’e loke su curpa mester, di ki probecho esey ta? Asina tambe, fe riba su so, si e no tin obra, ta morto.” (Sant. 2:15-17) E yudansa oportuno cu Cynthia y su yiu muhernan a ricibi di e rumannan tabata net loke nan tabatin mester. Despues di apenas seis luna, nan tabatin e forsa pa por a traha pionero auxiliar.—2 Cor. 12:10.

18, 19. (a) Con nos por yuda nos rumannan cu ta debil? (b) Ken ta beneficia ora nos ta yuda nos rumannan cu ta debil?

¹⁸ Probablemente bo sa di experencia cu tin biaha ta tuma tempo pa un persona recupera di un maleza grave. Di mes manera, un cristian cu a bira debil spiritualmente debi na problemanan personal of situacionnan dificil kisas tin mester di tempo pa bira fuerte atrobe. Ta berdad cu e mester studia Bijbel, haci oracion y participa den otro actividadnan cristian pa e fortalece su fe. Pero e tin mester di nos yudansa tambe. Nos lo tene pasenshi cu ne durante e tempo cu e ta haci esfuerso pa recupera? Nos lo sigui mustr’e cu nos ta stim’e? Laga nos haci tur loke ta posibel pa e sinti cu nos ta apreci’e y cu e ta un persona valioso den congregacion.—2 Cor. 8:8.

¹⁹ Nunca lubida cu ora nos ta yuda nos rumannan, nos ta sinti e goso, of felicidad, cu dunamento ta trece cu ne. Ademas, nos ta siña mustra empatia y pasenshi. Pero no ta nos so ta beneficia, sino henter e congregacion ya cu lo tin mas cariño y amor den congregacion. Y mas importante ainda, ora nos ta yuda nos rumannan, nos ta imita Jehova, kende ta balora cada un di su sirbidornan. Si, nos tur tin bon motibo pa sigui e conseho biblico cu ta anima nos pa “yuda esnan cu ta zwak.”—Echo. 20:35.