1. Dicon sirbidornan di Dios no ta keda sorprendi cu nan tin cu pasa den dificultad?

TA SORPRENDE bo cu sirbidornan di Dios tin cu pasa “hopi tribulacion” prome cu nan ricibi e premio di bida eterno? Probablemente no. Sea cu bo ta nobo den e berdad of bo tin hopi tempo ta sirbi Jehova, bo sa cu tribulacion, of dificultad, ta parti di bida den e mundo di Satanas.—Rev. 12:12.

2. (a) Fuera di e problemanan cu ta afecta tur hende imperfecto, ki tipo di prueba cristiannan ta confronta? (Wak e prome plachi.) (b) Ken ta tras di e persecucion cu nos ta pasa aden, y con nos por sa esey?

² Fuera di e dificultadnan cu ta “comun pa hende”, esta, problemanan cu ta afecta tur hende imperfecto, tin un tipo di prueba mas cu cristiannan ta confronta. (1 Cor. 10:13) Kico esey ta? Persecucion severo cu nos ta pasa aden pa motibo cu nos ta obedece e leynan di Dios fielmente. Hesus a bisa su siguidornan: “Un esclavo no ta mas cu su doño. Si nan a persigui mi, nan lo persigui boso tambe.” (Juan 15:20) Ken ta tras di e persecucion ey? Satanas. Bijbel ta describie como “un leon cu ta [brul], buscando ken e por habraca” di e pueblo di Dios. (1 Ped. 5:8) Satanas lo purba di tur manera pa kibra e integridad  di e discipelnan di Hesus. Wak, por ehempel, kico a pasa cu apostel Pablo.

3-5. (a) Ki tribulacion Pablo a pasa aden na Listra? (b) Ta con Pablo a logra fortalece e rumannan cu e mensahe cu nan lo confronta mas dificultad?

³ Pablo a ser persigui hopi biaha pa motibo di su fe. (2 Cor. 11:23-27) Un di e biahanan ey, esey a sosode na Listra, caminda Pablo a cura un homber cu a nace lam. E milager ey a pone e pueblo pensa cu Pablo y Barnabas tabata dios. Nan dos mester a roga e multitud pa no adora nan. Pero un poco despues algun Hudiu a yega eynan kendenan a uza calumnia pa pone e hendenan lanta contra nan. Bo a wak con lihe e situacion a cambia? E multitud a piedra Pablo y a bay lag’e, pensando cu e tabata morto.—Echo. 14:8-19.

⁴ Despues cu Pablo y Barnabas a bishita Derbe, nan “a bolbe bay Listra, Iconio y Antiokia. Nan a fortalece e discipelnan eynan y a anima nan pa keda firme den fe. Nan a bisa nan: ‘Nos tin cu pasa hopi tribulacion pa drenta e Reino di Dios.’” (Echo. 14:21, 22) Na prome instante, esey por parce straño, ya cu e idea di pasa den “hopi tribulacion” no ta dje animante ey. Pues, ta con Pablo y Barnabas por a “fortalece e discipelnan” door di bisa nan cu nan lo confronta mas dificultad?

⁵ Pa nos por compronde esey, laga nos analisa e palabranan di Pablo. E no a djis bisa: “Nos tin cu soporta hopi tribulacion.” Mas bien, e di: “Nos tin cu pasa hopi tribulacion pa drenta e Reino di Dios.” Pues, Pablo a fortalece e discipelnan door di enfatisa e resultado di nan fieldad. E recompensa maraviyoso cu nan tabata bay haya no tabata djis un ilusion. En realidad, Hesus a bisa: “Esun cu persevera te na fin lo ser salba.”—Mat. 10:22.

6. Ki recompensa cristiannan cu persevera te na fin lo ricibi?

⁶ Si nos persevera a pesar di tribulacion, nos lo ricibi un recompensa. Pa cristiannan ungi, e recompensa ey lo ta bida inmortal den cielo como rey hunto cu Hesus. Pa e ‘otro carnenan’, esey lo ta bida eterno riba Tera, caminda “husticia lo biba.” (Juan 10:16; 2 Ped. 3:13) Pero manera Pablo a bisa, mientrastanto nos lo pasa den hopi tribulacion. Laga nos considera dos tipo di prueba cu nos por haya.

7. Ki tipo di tribulacion nos por considera como atake directo?

⁷ Hesus a profetisa: “Hende lo entrega boso na cortenan local, bati boso den [sinagoga] y hiba boso dilanti di gobernador y rey.” (Mar. 13:9) Manera e palabranan ey ta indica, algun cristian lo ser persigui fisicamente, kisas riba orden of bou di instigacion di lidernan religioso of politico. (Echo. 5:27, 28) Pensa atrobe riba e ehempel di Pablo. Acaso el a cobardia ora el a pensa cu lo e por a ser persigui di e manera ey? Absolutamente cu no!—Lesa Echonan 20:22, 23.

8, 9. Con Pablo a demostra cu e tabata determina pa wanta persecucion, y con algun ruman den nos tempo a demostra e mesun firmeza?

⁸ Cu curashi Pablo a enfrenta e atakenan directo di Satanas. El a bisa: “Mi alma no ta di ningun importancia pa mi, basta mi por core e careda aki te na final y termina e sirbishi cu mi a ricibi di Señor Hesus, esta, di predica cabalmente e bon noticia tocante e bondad inmereci di Dios.” (Echo. 20:24) Ta bisto cu Pablo no tabatin miedo di ser persigui. Al contrario, e tabata determina pa wanta persecucion, pase loke pase. Su preocupacion principal tabata pa “predica cabalmente”, a pesar di cualkier tribulacion.

 ⁹ Awe, hopi di nos rumannan ta demostra e mesun firmeza. Por ehempel, tin un pais caminda pa casi 20 aña algun Testigo ta cera den prizon pa motibo di nan posicion neutral den asuntonan politico. Nan caso nunca no a bay corte pasobra e leynan di e pais ey no ta duna espacio pa un hende nenga di cumpli cu servicio militar pa motibo di consenshi. Nan no tin mag di haya bishita, ni sikiera di nan famia, y algun di nan a ser bati y someti na varios forma di tortura.

10. Dicon nos no mester tin miedo di pasa den tribulacion cu por cuminsa diripiente?

¹⁰ Na otro luganan, nos rumannan ta wanta tribulacion cu ta cuminsa diripiente. Si esey mester sosode cu bo, no tene miedo. Corda riba Jozef. Di un dia pa otro nan a bend’e como catibo, pero Jehova “a libr’e for di tur su tribulacionnan.” (Echo. 7:9, 10) Jehova por haci mescos pa bo. No lubida nunca cu “Jehova sa con pa libra hende devoto na dje for di prueba.” (2 Ped. 2:9) Nos tin tur motibo pa sigui confia den Jehova y enfrenta persecucion cu curashi. Nos sa cu e por libra nos for di e mundo malbado aki y laga nos biba pa semper bou di e gobernacion di su Reino.—1 Ped. 5:8, 9.

11. Kico ta e diferencia entre Satanas su atakenan indirecto y su atakenan directo?

¹¹ Un otro tipo di tribulacion cu nos por confronta ta atake indirecto, of sutil. Ki diferencia tin entre atake directo y indirecto? Atake directo ta manera un warwaru cu ta cuminsa diripiente y destrui bo cas den un frega di wowo. En cambio, atake indirecto ta manera comehein cu ta drenta bo cas y come e palonan pocopoco te ora bo cas basha abou. Den caso di comehein, kisas bo no sa mes di e peliger sino te ora ta mucho laat.

12. (a) Kico ta un di e tacticanan sutil di Satanas, y dicon e tin asina tanto exito cu ne? (b) Dicon Pablo a sinti su mes desanima?

¹² Satanas kier kibra bo amistad cu Jehova. E por uza sea atake directo, den forma di persecucion, of atake indirecto, cu ta caba pocopoco cu bo fe. Un di e tacticanan sutil cu Satanas tin mas exito cu ne ta desanimacion. Hasta apostel Pablo a admiti cu tabatin biaha e tabata sinti su mes desanima. (Lesa Romanonan 7:21-24.) Pablo tabatin un bon relacion cu Dios y probablemente e tabata un miembro di e cuerpo gobernante di prome siglo. Dicon anto el a bisa “pober di mi”? Pablo a bisa cu e tabata sinti asina pa motibo di su imperfeccionnan. E kier a haci loke ta corecto, pero el a sinti cu tabatin un otro forsa ta bringa contra dje. Si de bes en cuando abo ta lucha cu e sintimentonan ey, no ta un consuelo pa sa cu Pablo tambe tabatin e mesun lucha?

13, 14. (a) Dicon algun sirbidor di Dios ta bira desanima? (b) Ken ta esun cu kier pa nos perde fe, y dicon?

¹³ Hopi ruman sa sinti nan desanima, preocupa of hasta cu nan no ta bal nada. Por ehempel, un pionero fiel cu nos lo yama Debora a bisa: “Tur ora mi ta keda pensa riba un fayo cu mi a comete, y cada biaha mi ta sinti mi mes mas malo. Ora mi pensa riba tur e cosnan robes cu mi a haci, mi ta keda cu e sintimento cu niun hende lo no por stima mi, ni sikiera Jehova.”

¹⁴ Dicon algun sirbidor fiel di Jehova, manera Debora, ta bira desanima? Por tin varios motibo. Algun ruman gewoon ta inclina na pensa malo di nan mes y di nan circunstancianan den bida. (Prov. 15:15) Otro rumannan kisas tin sintimentonan negativo debi na un problema di salud cu ta afecta nan emocionnan. Sea loke sea e motibo pakico nos ta sinti nos desanima,  corda ken ta esun cu kier probecha di e sintimentonan ey. Pensa un rato. Ken kier pa nos bira asina desanima cu nos ta stop di sirbi Jehova? Claro cu ta Satanas. El a ser condena na morto, y awor e kier pa abo tambe sinti cu bo ta sin speransa. (Rev. 20:10) Sea cu Satanas uza atakenan directo of indirecto, su unico meta ta pa pone nos preocupa, bira desanima y stop di sirbi Dios. No lubida: Jehova su sirbidornan ta den un guera spiritual y nan tin cu lucha pa defende nan integridad na dje.

15. Kico nos mester ta determina pa haci?

¹⁵ No entrega! Sigui lucha! Keda cu bo bista fiha riba e recompensa. Pablo a skirbi e cristiannan na Corinto: “Nos no ta entrega; pasobra maske e hende cu nos ta di pafo ta caba na nada, siguramente e hende cu nos ta di paden ta renoba su mes dia tras dia. Pues, aunke e tribulacion cu nos ta confronta ta leve y pa un tempo cortico, e ta resulta pa nos den un gloria cu ta bira mas y mas grandi y ta eterno.”—2 Cor. 4:16, 17.

16. Dicon ta importante pa prepara awor pa tribulacion?

¹⁶ Manera nos a mira, Satanas tin un cantidad di ‘trampa’ cu e por uza pa gara nos. (Efe. 6:11) Ta pesey cada un di nos mester sigui e conseho cu nos ta haya na 1 Pedro 5:9: “Tuma boso posicion contra dje, firme den fe.” Pa nos por ta firme, nos tin cu prepara nos mente y curason awor, si, entrena nos mes pa haci loke ta corecto. Por ehempel: Soldaatnan sa haya entrenamento militar intenso hopi tempo prome cu surgi e posibilidad cu nan lo tin cu bay bringa den un guera. Mescos ta conta pa nos cu ta forma parti di Jehova su ehercito spiritual. Nos no sa ki bataya nos lo tin cu bringa den futuro.  Pues, lo no ta sabi pa nos train nos mes bon awor cu tempo ta basta trankil ainda? Pablo a conseha e Corintionan: “Sigui samina boso mes pa sa si boso ta den e fe, sigui pone boso mes na prueba pa demostra ki tipo di hende boso ta.”—2 Cor. 13:5.

17-19. (a) Con nos por samina nos mes? (b) Con hobennan por ta prepara pa defende nan fe na scol?

¹⁷ Un manera cu nos por sigui e conseho di Pablo pa samina nos mes ta door di puntra nos mes francamente: Mi ta haci oracion regularmente? Ora hende ta pone presion riba mi pa haci malo, mi ta obedece Dios na prome luga, y no hende? Mi ta asisti regularmente na reunion? Mi ta defende mi creencianan cu curashi? Mi ta tene pasenshi cu e defectonan di mi rumannan, mescos cu nan ta tene pasenshi cu esnan di mi? Mi ta sigui e guia di e ancianonan di mi congregacion y tambe di e rumannan cu ta dirigi e congregacion mundial?

¹⁸ Tuma nota cu dos di e preguntanan tin di haber cu defende nos creencianan cu curashi y no entrega na presion di otro hende. Hopi di nos hobennan tin cu haci esey na scol. Nan a siña pa nan no ta timido ni tene berguensa di loke nan ta kere; pesey nan ta predica cu curashi. Kico a yuda nan haci esey? Wel, den nos revistanan a sali sugerencianan util. Por ehempel, E Toren di Vigilancia di 15 di mei 2013, pagina 6, ta duna sugerencia practico encuanto con bo por papia cu mas confianza tocante bo creencianan. E revista ta mustra cu un manera pa rasona cu bo compañeronan di klas ta door di haci pregunta. Mayornan, prepara boso yiunan pa asina nan por sa kico pa haci of pa contesta ora nan compañeronan di scol pone presion riba nan.

¹⁹ Claro cu no ta facil semper pa defende e berdad of pa haci e otro cosnan cu Jehova kier pa nos haci. Por ehempel, despues di un dia largo di trabou, kisas nos tin cu obliga nos mes pa bay reunion. Of kisas mainta ta duro pa lanta for di cama pa bay sirbishi di veld. Pero corda: Si bo tin un bon rutina spiritual for di awor, lo bo ta mihor prepara pa vence pruebanan mas grandi den futuro.

20, 21. (a) Ora nos ta medita riba e rescate, con esey por yuda nos vence sintimentonan negativo? (b) Kico mester ta nos determinacion relaciona cu tribulacion?

²⁰ Kico di e atakenan indirecto? Por ehempel, con nos por vence desanimacion? Un di e mihor maneranan pa haci esey ta door di medita riba e sacrificio di rescate di Hesus. Esey ta loke apostel Pablo a haci. Tabatin biaha cu el a sinti su mes hopi desanima pa motibo cu e tabata un pecador. Pero e tabata sa cu Cristo no a muri pa salba hende perfecto, sino hende pecador manera ele. Ta pesey el a skirbi: “Mi ta [biba] pa medio di fe den e Yiu di Dios, kende a stima mi y a entrega su mes pa mi.” (Gal. 2:20) Si, Pablo a acepta e rescate y a reconoce cu e rescate a aplica na dje personalmente.

²¹ Bo tambe por beneficia hopi si bo acepta e rescate como un regalo personal di Jehova. Claro cu esaki no ta nifica cu bo desanimacion lo disparce di biaha. Algun di nos kisas lo tin cu sigui lucha contra e atake indirecto aki te ora e mundo nobo yega. Pero corda cu ta esnan cu persevera te na fin ta ricibi e premio. Cada dia cu pasa, nos ta mas cerca di e tempo cu e Reino di Dios lo trece paz y yuda tur hende fiel alcansa perfeccion. Sea determina pa drenta e Reino ey, a pesar cu bo tin cu pasa den hopi tribulacion pa logra esey.