1, 2. (a) Kico por duna nos pleno confianza cu e Reino lo cumpli cu Dios su proposito pa humanidad? (b) Segun Efesionan 2:12, dicon e pactonan ta fortalece nos? (Wak e prome plachi.)

COMO testigonan di Jehova, nos ta proclama cu e Reino di Dios ta e unico solucion pa tur nos problemanan y nos ta cla pa mustra hende con Bijbel ta yuda nos compronde esaki. Y e speransa cu e Reino ta duna ta un gran consuelo pa nos. Pero, nos ta realmente convenci cu e Reino ta existi y cu Dios lo cumpli cu su proposito pa medio di dje? Dicon nos por tin un fe solido den e Reino?—Heb. 11:1.

² Ta Jehova, e Dios Todopoderoso, a establece e Reino Mesianico como e medio pa e cumpli cu su proposito pa humanidad. Y como cu Jehova ta esun cu tin derecho absoluto di goberna, e Reino ey lo dura pa semper. Awor, ken ta e Rey di e Reino aki? Ken lo goberna hunto cu ne? Y riba kico nan lo goberna? Wel, Jehova a regla tur e asuntonan importante aki pa medio di varios pacto. E pactonan aki ta contractnan, of acuerdonan, legal cu Jehova of su Yiu Hesucristo a cera cu algun adorador di Dios. Un analisis di e pactonan aki lo yuda nos compronde mihor con Jehova su proposito lo cumpli y dicon  nos por tin confianza cu e Reino lo logra esaki.—Lesa Efesionan 2:12.

3. Kico nos lo analisa den e articulo aki y den esun siguiente?

³ Bijbel ta papia di seis pacto principal cu tin di haber cu e Reino Mesianico cu Hesucristo como Rey. Nan ta (1) e pacto cu Dios a cera cu Abraham, (2) e pacto di Ley, (3) e pacto cu Dios a cera cu David, (4) e pacto pa un sacerdote manera Melkisedek, (5) e pacto nobo y (6) e pacto di Reino. Laga nos analisa e pactonan aki y wak ki relacion cada un tin cu e Reino di Dios y ki papel nan tin den cumplimento di Dios su proposito pa cu Tera y humanidad.—Wak e cuadro “ E Manera Cu Dios Lo Cumpli cu Su Proposito.”

4. Segun e buki di Genesis, kico Jehova a decreta relaciona cu hende?

⁴ Despues cu Jehova a prepara nos bunita planeta pa hende biba riba dje, el a decreta, of stipula, tres cos relaciona cu hende: (1) Lo el a crea hende segun su imagen. (2) Hende mester a haci henter e Tera aki un paradijs, haya yiu y yena Tera. (3) Hende no tabatin mag di come di e palo di conocemento di bon y malo. (Gen. 1:26, 28; 2:16, 17) Cumplimento di e tres decretonan aki tabata tur loke tabata necesario pa Dios su proposito pa cu hende y Tera cumpli. Awor, si esey so tabata necesario, dicon Jehova mester a cera varios pacto cu hende?

5, 6. (a) Con Satanas a purba di stroba Dios su proposito di cumpli? (b) Con Jehova a trata cu e rebelion cu a tuma luga den Eden?

⁵ Den un intento malicioso pa stroba Dios su proposito di cumpli, Satanas e Diabel a start un rebelion. El a enfoca riba e decreto cu tabata mas facil p’e stroba su cumplimento, esta, esun cu a exigi pa hende ta obediente. Si, Satanas a persuadi e prome hende muher, Eva, pa come di e palo di conocemento di bon y malo. (Gen. 3:1-5; Rev. 12:9) Haciendo esey, Satanas a lanta duda encuanto Dios su derecho di goberna Su creacion. Y mas despues, Satanas a acusa hende di ta adora Dios pa motibonan egoista.—Job 1:9-11; 2:4, 5.

⁶ Con Jehova a trata cu e rebelion cu a tuma luga den Hofi di Eden? E por a djis destrui e rebeldenan mesora. Pero esey lo a nifica cu su proposito pa yena e Tera cu descendientenan di Adam cu Eva lo no a cumpli. Pesey, Jehova no a destrui e rebeldenan mesora; mas bien, el a profetisa algo sumamente importante—e promesa cu el a haci den Hofi di Eden—cu a sirbi como un garantia cu su proposito relaciona cu hende y nos planeta Tera lo cumpli sigur.—Lesa Genesis 3:15.

7. Ki garantia relaciona cu e colebra y su simia e promesa cu Dios a haci den Hofi di Eden ta duna nos?

⁷ Pa medio di e promesa cu Jehova a haci den Hofi di Eden, el a dicta sentencia contra e colebra, Satanas e Diabel, y contra su simia—esta, tur persona cu ta scoge e banda di Satanas den e cuestion tocante Dios su derecho di goberna. E Dios berdadero a duna e simia, of descendiente, di “e muher” autoridad pa destrui Satanas. Pues, e promesa cu Dios a haci den Eden no solamente ta duna garantia cu Dios lo elimina esun cu a start e rebelion den Hofi di Eden sino cu Dios lo elimina tambe tur e consecuencianan cu e rebelion ey a trece cu ne. E promesa ta indica tambe con Dios lo haci esey.

8. Kico nos por bisa di e identidad di e muher y di su simia?

⁸ Ken lo a bira e descendiente di e muher? Wel, siendo cu e descendiente aki mester machica cabes di e colebra, esta, “caba cu” Satanas e Diabel, kende ta  un spirito malbado, e descendiente di e muher aki mester ta un spirito invisibel. (Heb. 2:14) Y esaki, na su turno, ta nifica cu e muher, cu lo duna luz na e descendiente, tambe lo mester ta invisibel. Mientras cu e simia di e colebra tabata multiplica rapidamente, e identidad di e muher y di su simia si a keda un misterio pa casi 4.000 aña desde cu Jehova a haci e promesa ey den Hofi di Eden. Durante e añanan ey, Jehova a cera varios pacto cu a revela identidad di e simia, of descendiente, di e muher y e medio cu Dios lo uza pa elimina tur daño cu Satanas a causa humanidad.

9. Kico e pacto cu Dios a cera cu Abraham ta encera, y na ki tempo el a drenta na vigor?

⁹ Un dos mil aña despues cu Jehova a dicta sentencia contra Satanas, el a duna Abraham e mandato pa bandona su cas na Ur, Mesopotamia, y bay biba na Canaan. (Echo. 7:2, 3) Jehova a bisa Abraham: “Sali for di bo tera, y for di bo famianan y for di cas di bo tata, bay na e tera cu lo mi mustra bo; y lo mi haci bo un nacion grandi, y lo mi bendiciona bo, y haci bo nomber grandi; y lo bo ta un bendicion. Y lo mi bendiciona esnan cu bendiciona bo, y esun cu maldiciona bo lo mi maldiciona. Y den bo tur e famianan di mundo lo ta bendiciona.” (Gen. 12:1-3) E promesa aki cu Jehova a haci na Abraham ta ser yama e pacto cu Abraham. Nos no sa exactamente na ki tempo Jehova a cera e pacto aki cu Abraham. Loke si nos sa ta cu e pacto aki a drenta na vigor na aña 1943 prome cu Cristo, tempo cu Abraham a bandona Haran y crusa Riu Eufrates; e tempo ey, e tabatin 75 aña di edad.

10. (a) Con Abraham a demostra un fe fuerte den Dios su promesanan? (b) Ki detayenan Jehova a revela gradualmente tocante e simia di e muher?

¹⁰ Na varios ocasion, Jehova a ripiti e promesa cu el a haci na Abraham, y cada bes el a agrega mas detaye na dje. (Gen.  13:15-17; 17:1-8, 16) Y ora Abraham tabata dispuesto pa sacrifica su unico yiu homber, demostrando asina un fe fuerte den Dios su promesanan, Jehova a bolbe sigur’e cu e promesa cu el a haci na dje lo cumpli sigur. (Lesa Genesis 22:15-18 *; Hebreonan 11:17, 18.) Despues cu e pacto cu Dios a cera cu Abraham a drenta na vigor, gradualmente Jehova a revela detayenan importante tocante e simia, of descendiente, di e muher. El a revela cu e simia lo ta descendiente di Abraham, cu lo e consisti di hopi hende, cu e simia lo sirbi como rey, cu lo e destrui tur e enemigonan di Dios y cu lo e trece hopi bendicion pa humanidad.

11, 12. Con Bijbel ta mustra cu e pacto cu Dios a cera cu Abraham tin un cumplimento cu lo trece beneficio mas grandi, y kico esey ta nifica pa nos?

¹¹ E promesanan di e pacto cu Abraham a cumpli literalmente ora e descendientenan di Abraham a hereda e Tera Priminti. Pero Bijbel ta mustra cu e promesanan aki tin un cumplimento cu lo trece beneficionan mas grandi tambe. (Gal. 4:22-25) Apostel Pablo a splica cu e parti principal di Abraham su descendiente ta Cristo y cu e parti secundario, of adicional, ta referi na e 144.000 cristiannan ungi. (Gal. 3:16, 29; Rev. 5:9, 10; 14:1, 4) E muher cu ta produci e descendiente aki ta “Jerusalem di ariba”—e parti celestial di Dios su organisacion—cu ta consisti di angel fiel. (Gal. 4:26, 31) Y manera Dios a priminti den e pacto cu el a cera cu Abraham, e descendiente di e muher lo trece hopi bendicion pa humanidad.

¹² E pacto cu Abraham ta un garantia cu e Reino di Dios lo bira realidad y ta habri caminda pa e Rey y su cogobernantenan hereda e Reino celestial. (Heb. 6:13-18) Pa cuanto tempo e pacto aki lo keda na vigor? Wel, Genesis 17:7 ta bisa cu e pacto ta “un alianza eterno.” Esaki lo keda na vigor te ora cu e Reino caba cu tur e enemigonan di Dios y tur famia riba Tera ser bendiciona. (1 Cor. 15:23-26) Pero e bendicionnan cu e pacto aki ta trece cu ne si ta pa semper. E pacto cu Jehova a cera cu Abraham ta duna prueba convencente cu E ta determina pa cumpli cu su proposito pa “yena e Tera” cu hende husto.—Gen. 1:28.

13, 14. Ki garantia encuanto e gobernacion di e Mesias e pacto cu Dios a cera cu David ta duna nos?

¹³ E promesa cu Jehova a haci den Hofi di Eden y e pacto cu el a cera cu Abraham ta mustra cu Jehova su gobernacion semper ta basa riba su normanan husto. Pues, e Reino Mesianico tambe ta basa riba su normanan husto. (Sal. 89:14) Awor, lo yega un dia cu e Reino Mesianico lo bira corupto y cu lo e mester ser reemplasa? Wel, tin un otro pacto cu ta garantisa nos cu esey lo no sosode nunca.

¹⁴ Esaki ta e pacto cu Jehova a cera cu David. (Lesa 2 Samuel 7:12, 16.) El a haci esey durante David su reinado na Jerusalem. El a priminti Rey David cu e Mesias lo a bin di su liña di descendencia. (Luc. 1:30-33) Di e manera ey, Jehova a duna informacion mas specifico encuanto e liña di descendencia di e Mesias y a bisa cu ta un descendiente di David lo tin e “derecho” legal pa sinta riba e trono di e  Reino Mesianico. (Eze. 21:25-27) Ta pa medio di Hesus e reinado di David lo dura “pa semper.” Dicon? Pasobra Hesus, e descendiente di David, y su trono lo permanece pa semper, mescos cu solo. (Sal. 89:34-37) Pues, nos por tin confianza cu e gobernacion di e Mesias nunca lo bira corupto y cu e bendicionnan cu e gobernacion aki lo trece lo dura pa semper.

15-17. Segun e pacto pa un sacerdote manera Melkisedek, ki funcion mas e descendiente di e muher lo eherce, y dicon?

¹⁵ Tanto e pacto cu Dios a cera cu Abraham como esun cu el a cera cu David ta sigura nos cu e descendiente di e muher lo goberna como rey. Pero pa humanidad por beneficia plenamente di e bendicionnan cu e Reino lo trece, e descendiente di e muher no por tin solamente e funcion di rey. E mester sirbi tambe como sacerdote. Dicon? Pasobra pa humanidad por ser libra di pica y bira parti di Jehova su famia universal, nan mester di un sacerdote pa haci sacrificio pa nan. Pesey, nos Creador a cera un otro pacto cu ta garantisa esey, e pacto pa un sacerdote manera Melkisedek.

¹⁶ Mediante Rey David, Jehova a revela cu lo el a cera un pacto personalmente cu Hesus. E pacto aki lo a encera dos cos. E prome: Hesus lo a ‘sinta na man drechi’ di Dios te ora e tempo yega pa e ‘goberna meymey di su enemigonan.’ E di dos: Hesus lo a sirbi como “sacerdote pa semper, segun e ordo di Melkisedek.” (Lesa Salmo 110:1, 2, 4.) Dicon “segun e ordo di Melkisedek”? Wel, hopi tempo prome cu e descendientenan di Abraham a conkista e Tera Priminti, Melkisedek, kende tabata Rey di Salem, tabata sirbi como “sacerdote di e Dios Haltisimo.” (Heb. 7:1-3) Ta Jehova mes a nombr’e como rey y sacerdote y e tabata e unico persona menciona den e Scritura Hebreo cu a sirbi como tal. Y como cu nunca a existi un otro persona cu a sirbi como rey y sacerdote alabes, Bijbel ta yama Melkisedek “sacerdote pa semper.”

¹⁷ Pa medio di e pacto aki, Jehova a nombra Hesus directamente pa sirbi como sacerdote. Y Hesus lo ta “un sacerdote pa semper na e manera di Melkisedek.” (Heb. 5:4-6) Esaki ta mustra claramente cu Jehova a compromete su mes pa uza e Reino Mesianico pa cumpli cu su proposito relaciona cu Tera y humanidad.

  18, 19. (a) Con e pactonan cu nos a analisa den e articulo aki ta relaciona cu e Reino? (b) Kico nos lo trata den e siguiente articulo?

¹⁸ Den e articulo aki, nos a analisa algun pacto y a mira con esakinan ta relaciona cu e Reino Mesianico y con e Reino ta firmemente basa riba acuerdonan legal. Por ehempel, e promesa cu Dios a haci den Hofi di Eden ta garantisa nos cu Jehova lo uza e simia, of descendiente, di e muher pa realisa su proposito pa cu Tera y humanidad. E pacto cu Dios a cera cu Abraham ta splica ken ta e descendiente ey y ki papel e ta hunga.

¹⁹ E pacto cu Dios a cera cu David ta duna mas detaye tocante e liña di descendencia di e simia di e muher. E pacto ey ta mustra tambe cu Hesus tin tur derecho pa goberna mundo pa semper y cu e bendicionnan cu e Reino lo trece lo dura pa semper. E pacto pa un sacerdote manera Melkisedek ta duna nos e garantia cu e simia, of descendiente, lo sirbi tambe como sacerdote. Pero no ta Hesus so lo yuda humanidad alcansa perfeccion. Dios a ungi mas persona pa sirbi como rey y sacerdote. Di unda e personanan aki ta bin? E siguiente articulo lo contesta e pregunta aki.