1, 2. Dicon hopi hende no a compronde loke Hesus a bisa?

ORA un persona ta papia cu nos, nos por tende su stem y hasta distingui e tono di su bos. Pero pa nos por compronde realmente loke e persona ta bisa, nos tin cu compronde e nificacion di su palabranan. (1 Cor. 14:9) Laga nos wak por ehempel kico a pasa cu Hesus. El a papia cu miles di hende den un idioma cu nan por a compronde. Pero no ta tur hende cu a tend’e a compronde loke e tabata kiermen. Pesey, el a bisa su oyentenan: “Boso tur scucha mi, y compronde loke mi ta bisa.”—Mar. 7:14.

² Dicon hopi hende no a compronde loke Hesus a bisa? Algun tabatin nan opinion forma caba y otronan no tabatin e motivacion corecto. Relaciona cu e hendenan ey, Hesus a bisa cu nan ‘sa bon con pa pone e mandamento di Dios un banda pa nan keda cu nan tradicion.’ (Mar. 7:9) E hendenan ey no a haci berdadero esfuerso pa compronde loke Hesus a bisa. Nan no kier a cambia nan manera di pensa ni nan custumbernan. Nan horeanan kisas tabata habri pa nan tende, pero nan curason si tabata, na moda di papia, duro cera! (Lesa Mateo 13:13-15.) Awor, con nos por haci sigur cu nos curason si ta keda habri pa asina nos por beneficia di e siñansanan di Hesus?

3. Dicon e discipelnan por a compronde loke Hesus a bisa?

³ Nos tin cu sigui ehempel di e discipelnan di Hesus. Relaciona cu nan, Hesus a bisa: “Boso ta feliz pasobra boso wowo ta mira y boso horea ta tende.” (Mat. 13:16) Dicon nan si por a compronde loke Hesus a bisa mientras cu otro hende no? Di prome, nan tabata dispuesto pa haci pregunta y investigacion pa haya sa loke Hesus realmente tabata kiermen. (Mat. 13:36; Mar. 7:17) Di dos, aunke nan tabatin conocemento di Dios y di su propositonan, nan tabata dispuesto pa sigui siña cosnan nobo y acepta esakinan. (Lesa Mateo 13:11, 12.) Di tres, nan tabata dispuesto pa aplica loke nan a tende y compronde; nan a uza esaki den nan bida personal y tambe pa yuda otro hende.—Mat. 13:51, 52.

4. Ki tres paso nos mester sigui pa nos por compronde e ilustracionnan di Hesus?

⁴ Si nos kier compronde e ilustracionnan di Hesus, nos tambe mester sigui tres paso manera e fiel discipelnan di Hesus a haci. Prome, nos mester ta dispuesto pa tuma tempo pa studia y medita riba loke Hesus a bisa, haci e investigacionnan necesario y haci nos mes e preguntanan apropia. Di e manera ey, nos ta haya conocemento. (Prov. 2:4, 5) Di dos, nos tin cu wak ki relacion e conocemento ey tin cu loke nos sa caba y con e ta beneficia nos personalmente. Asina nos ta haya comprondemento. (Prov. 2:2, 3) Di tres, nos mester uza loke nos a siña, poniendo esaki na practica. Esey ta duna evidencia di sabiduria.—Prov. 2:6, 7.

5. Duna un ehempel cu ta ilustra e diferencia entre conocemento, comprondemento y sabiduria.

⁵ Kico ta e diferencia entre conocemento, comprondemento y sabiduria? Nos por ilustra esaki di e siguiente manera: Imagina cu bo ta para meymey di caminda y un bus ta biniendo den bo direccion. Prome, bo ta reconoce cu ta un bus. Esey ta conocemento. Despues, bo ta realisa cu si bo keda para caminda bo ta, e bus lo dal bo. Esey ta comprondemento. Pues, bo ta kita di biaha for di caminda e bus tin cu pasa. Esey ta sabiduria. Si, sabiduria por salba nos bida. Pesey, ta logico cu Bijbel ta manda nos pa proteha, of ‘retene, sabiduria sano.’—Prov. 3:21, 22; 1 Tim. 4:16.

6. Cua ta e cuater preguntanan cu nos lo contesta segun cu nos ta analisa shete ilustracion di Hesus? (Wak e  cuadro na pagina 8.)

⁶ Den e articulo aki y esun siguiente, nos lo analisa un total di shete ilustracion cu Hesus a uza. Segun cu nos ta haci esey, nos lo contesta e siguiente preguntanan: Kico ta e splicacion di e ilustracion? (Esey lo yuda nos haya conocemento.) Dicon Hesus a uza e ilustracion aki? (Esey ta duna nos comprondemento.) Con nos por uza e informacion aki pa yuda nos mes y otro hende? (Esey ta sabiduria.) Finalmente, kico e ilustracion ta siña nos tocante Jehova y Hesus?

7. Kico ta e splicacion di e ilustracion tocante e simia di mosterd?

⁷ Lesa Mateo 13:31 y 32. Kico ta e splicacion di e ilustracion tocante e simia di mosterd? E simia di mosterd ta representa tanto e mensahe di Reino cu nos ta predica como su resultado, esta, e congregacion cristian. Ora cu e congregacion cristian a cuminsa funciona na aña 33 di prome siglo, e tabata masha chikito, manera un simia di mosterd, “e simia di mas chikito.” Sinembargo, denter di algun decada, e congregacion a crece rapidamente, na un manera cu hopi hende no a spera. (Col. 1:23)  E crecemento aki a trece beneficio pasobra e ilustracion ta bisa cu “e parhanan di cielo” por a “haya luga di biba den [e palo] su takinan.” E parhanan simbolico aki ta representa personanan husto den bista di Dios cu ta haya cuminda, refrescamento y proteccion spiritual den e congregacion cristian.—Compara cu Ezekiel 17:23.

8. Dicon Hesus a uza e ilustracion tocante e simia di mosterd?

⁸ Dicon Hesus a uza e ilustracion aki? El a uza e manera maraviyoso cu un simia di mosterd ta crece bira un palo grandi pa ilustra con e actividadnan di e Reino di Dios ta aumenta, con e Reino aki ta duna proteccion y vence tur obstaculo. Si, desde 1914 padilanti, e parti terenal di e organisacion di Dios a crece na un manera extraordinario. (Isa. 60:22) Tur hende cu ta forma parti di e organisacion aki ta ricibi proteccion y yudansa pa keda cu un bon relacion cu Jehova. (Prov. 2:7; Isa. 32:1, 2) Ademas, no tin ningun obstaculo cu por stop e congregacion cristian di sigui crece.—Isa. 54:17.

9. (a) Kico nos por siña for di e ilustracion tocante e simia di mosterd? (b) Kico e ilustracion aki ta siña nos tocante Jehova y Hesus?

⁹ Kico nos por siña for di e ilustracion tocante e simia di mosterd? Kisas nos ta biba den un area caminda tin masha poco Testigo of caminda nos no ta mira masha resultado di nos trabou di predica. Pero ta bon pa nos corda cu e Reino por vence tur obstaculo. Di e manera ey, nos ta haya e fortaleza pa sigui persevera. Por ehempel, ora Ruman Edwin Skinner a yega India na 1926, ta un man yen di Testigo so tabatin eynan. Na prome instante, no tabatin dje hopi crecemento. Pero el a sigui predica y a mira con e mensahe di Reino a vence obstaculonan grandi. Awor tin mas cu 37.000 Testigo activo na India y mas cu 108.000 hende a asisti na e Memorial di aña 2013. Pensa tambe riba e siguiente ehempel cu ta mustra con e parti terenal di Jehova su organisacion a crece: Den e mesun aña cu Ruman Skinner a yega India, e trabou di predica a cuminsa na Zambia. Awor tin mas cu 170.000 publicador eynan, y 763.915 hende a asisti  na e Memorial di aña 2013. Esaki ta nifica cu 1 di cada 18 persona na Zambia a asisti na Memorial. Un crecemento asombroso, no ta berdad?

10. Kico ta e splicacion di e ilustracion tocante zuurdeeg?

¹⁰ Lesa Mateo 13:33. Kico ta e splicacion di e ilustracion tocante zuurdeeg? E ilustracion aki ta referi na e mensahe di Reino y su efecto. “Henter e mansa” di hariña ta representa tur e nacionnan, y e proceso di fermentacion ta simbolisa e manera cu e mensahe di Reino ta plama mediante e trabou di predica. Den caso di e simia di mosterd bo por mira bon cla con e ta crece, pero e zuurdeeg si bo no ta mira mesora con e ta plama den e mansa. Ta despues bo ta mira su efecto.

11. Dicon Hesus a uza e ilustracion tocante zuurdeeg?

¹¹ Dicon Hesus a uza e ilustracion aki? El a uz’e pa mustra cu e mensahe di Reino tin poder pa yega “te na e parti mas leu di Tera” y pa haci cambio grandi den curason di hende. (Echo. 1:8) Kisas na prome instante nos no ta ripara e cambionan aki. Pero nan ta tuma luga si: Tin un gran cantidad di hende cu ta acepta e mensahe di Reino y cu ta permiti e mensahe poderoso aki cambia nan personalidad.—Rom. 12:2; Efe. 4:22, 23.

12, 13. Duna ehempel cu ta mustra con e mensahe di Reino ta plama manera e ilustracion tocante zuurdeeg ta mustra.

¹² Tin biaha, ta dura hopi aña prome cu nos mira resultado di nos trabou di predica. Tuma por ehempel, Franz cu Margit, kendenan na 1982 tabata sirbi na Betel di Brazil pero cu awor ta sirbi na un otro sucursal. Tempo cu nan tabata na Brazil, nan tabata predica den un pueblito den cunucu. Entre e hendenan cu nan tabata studia cu ne tabatin un mama cu su cuater yiunan. E yiu homber di mas grandi tabatin 12 aña e tempo ey; e tabata masha timido y hopi bes e tabata purba di sconde prome cu e estudio cuminsa. Como cu e pareha su asignacion a cambia, nan no por a sigui cu e estudio. Pero un 25 aña despues, nan a bay haci un bishita na e pueblito aki. Kico nan a topa? Un Salon di Reino nobo y un congregacion di 69 publicador y 13 pionero regular. Kico a para di e mucha homber timido? Awor e ta coordinador di e cuerpo di anciano. Mescos cu e zuurdeeg den e ilustracion di Hesus, e mensahe di Reino a plama y a cambia bida di hopi hende. Esey a haci e pareha hopi contento.

¹³ E poder invisibel cu e mensahe di Reino tin pa cambia bida di hende ta bisto hasta den paisnan caminda e trabou di predica ta legalmente prohibi. Ta dificil pa nos por sa te con leu e mensahe a yega den e paisnan ey. Y hopi bes e resultadonan ta sorprende nos. Por ehempel, na Cuba e  mensahe di Reino a yega eynan na 1910, y Ruman Russell a bishita Cuba na 1913. Na prome instante, no tabatin hopi progreso. Pero kico nos ta mira na Cuba awe? Tin mas cu 96.000 publicador ta proclama e bon noticia, y 229.726 persona a asisti na e Memorial di 2013; esey ta 1 di cada 48 habitante di e isla. Hasta den paisnan caminda e trabou no ta prohibi, e mensahe di Reino por alcansa cierto luganan unda e Testigonan local a pensa cu lo no ta posibel. *—Ecl. 8:7; 11:5.

14, 15. (a) Con cada un di nos por beneficia di loke nos ta siña for di e ilustracion tocante zuurdeeg? (b) Kico e ilustracion aki ta siña nos tocante Jehova y Hesus?

¹⁴ Con nos por beneficia di loke Hesus  a siña nos den e ilustracion tocante zuurdeeg? Ora nos medita riba e nificacion di Hesus su ilustracion, nos ta realisa cu nos no tin nodi preocupa tocante con e miyones di hendenan cu no a tende e mensahe di Reino ainda lo tende esaki. Jehova tin tur cos bou di control. Pero kico ta nos trabou? E Palabra di Dios ta bisa: “Sembra bo simia mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.” (Ecl. 11:6) Claro cu nunca nos mester lubida di pidi Jehova pa bendiciona e trabou di predica, specialmente na paisnan caminda e trabou ta prohibi.—Efe. 6:18-20.

¹⁵ Ademas, nos no mester desanima ora nos no ta mira resultado di nos trabou di biaha. Nunca nos mester desprecia “e dia di cosnan chikito.” (Zac. 4:10) E resultadonan por bira hopi mas tanto y mucho mas maraviyoso cu nos lo por imagina.—Sal. 40:5; Zac. 4:7.

16. Kico ta e splicacion di e ilustracion tocante e comerciante cu tabata biaha y di esun di e tesoro scondi?

¹⁶ Lesa Mateo 13:44-46. Kico ta e splicacion di e ilustracion tocante e comerciante cu tabata biaha y di esun tocante e tesoro scondi? Den tempo di Hesus, tabatin comerciantenan cu tabata biaha bay te Ocean Indico pa busca e perlanan di mas precioso. E comerciante den e ilustracion aki ta representa hende husto cu ta haci hopi esfuerso pa satisface nan necesidad spiritual. Y e “perla di gran balor” ta simbolisa e berdad precioso di e Reino. Ora cu e comerciante a mira ki balor e perla ey tabatin, “mesora” e tabata dispuesto pa bende tur loke e tabatin pa e por a cumpr’e. Hesus a papia tambe di un homber cu tabata traha den cunucu y cu a descubri un tesoro “scondi.” Distinto for di e comerciante, e homber aki no tabata busca tesoro. Pero mescos cu e comerciante, e tabata dispuesto pa bende “tur” loke e tabatin pa por haya e tesoro ey.

17. Dicon Hesus a uza e ilustracion tocante e comerciante cu tabata biaha y esun di e tesoro scondi?

¹⁷ Dicon Hesus a uza e dos ilustracionnan aki? Wel, pa mustra cu tin varios manera cu un hende por haya e berdad. Tin hende ta busca e berdad y ta haci hopi sacrificio pa hay’e. Otronan ta hay’e sin cu nan a busc’e; kisas un persona a duna nan testimonio. Tur dos homber den e ilustracionnan a reconoce e balor di loke nan a haya y tabata dispuesto pa haci hopi sacrificio pa hay’e.

18. (a) Con nos por beneficia di e dos ilustracionnan aki? (b) Kico nan ta siña nos tocante Jehova y Hesus?

¹⁸ Con nos por beneficia di e dos ilustracionnan aki? (Mat. 6:19-21) Puntra bo mes: Mi tin mesun actitud cu e hombernan den e ilustracionnan aki tabatin? E berdad ta manera un tesoro pa mi? Mi ta dispuesto pa haci sacrificio pa hay’e, of mi ta laga otro cosnan manera e preocupacionnan di bida diario desvia mi? (Mat. 6:22-24, 33; Luc. 5:27, 28; Flp. 3:8) Si nos realmente ta stima e berdad, nos lo ta dispuesto pa haci tur loke ta necesario pa e berdad ta semper na prome luga den nos bida.

19. Kico nos lo trata den e siguiente articulo?

¹⁹ Laga nos demostra cu nos ta scucha y realmente compronde e ilustracionnan aki tocante e Reino. Corda cu no ta suficiente pa nos djis compronde loke nos ta siña for di esakinan, pero nos tin cu aplica tambe loke nos ta siña. Den e siguiente articulo, nos lo trata tres ilustracion mas y wak kico nos por siña for di nan.