1, 2. (a) Dicon nos mester ta leal na Dios, y kico lealtad tin di haber cu nos posicion neutral? (Wak e prome plachi.) (b) Hopi hende ta leal na kico? (c) Ki problemanan e tipo di lealtad ey sa causa?

DIOS su sirbidornan mester ta leal y neutral, no solamente den tempo di guera, sino tambe den tempo di paz. Dicon? Pasobra ora nos a dedica nos mes na Jehova, nos a primintie cu nos lo keda leal na dje, cu nos lo stim’e y cu nos lo obedec’e. (1 Juan 5:3) Nos kier sigui e normanan husto di Dios sea loke sea nos crianza, nacionalidad of cultura. Lealtad na Jehova y na su Reino mester ta mas importante cu cualkier otro cos. (Mat. 6:33) Pa logra esaki, nos como cristian tin cu keda neutral, es decir, nos no ta mete den e conflicto- y controversianan di e mundo aki.—Isa. 2:4; lesa Juan 17:11, 15, 16.

² Hopi hende cu no ta testigo di Jehova ta hopi leal na nan pais, region, cultura of hasta nan ekipo nacional di deporte. Pero e tipo di lealtad ey a pone hopi hende competi cu otro, odia otro y, den casonan extremo, hasta mata esnan cu ta leal na e banda contrario. Aunke nos no ta tuma parti den e conflictonan aki, nan por afecta nos y nos famia, ya cu nos ta forma parti di e sociedad humano. Tin biaha nos por sinti nos disgusta pa e mal decisionnan  cu gobiernonan ta tuma, ya cu Dios a traha hende cu un sentido di husticia. (Gen. 1:27; Deu. 32:4) Pero con nos ta reacciona den circunstancianan asina? Nos ta keda neutral of nos ta tuma parti pa un of otro banda?

3, 4. (a) Dicon cristiannan ta keda neutral den e conflictonan di mundo? (b) Kico nos lo analisa den e articulo aki?

³ E gobiernonan di awe ta pone presion riba nan ciudadanonan pa apoya nan ora surgi conflicto, pero como cristian, nos no por entrega na e presion ey. Nos ta sigui Hesus. Nos no ta mete den e desacuerdonan politico di e mundo aki ni ta bay guera. (Mat. 26:52) Nos no ta laga hende cu ta pensa cu un parti di e mundo di Satanas ta mas mihor cu otro influencia nos. (2 Cor. 2:11) Como cu nos no ta parti di e mundo aki, nos ta keda neutral den e conflictonan di mundo.—Lesa Juan 15:18, 19.

⁴ Sinembargo, nos ta imperfecto y pesey algun di nos kisas te ainda tin sintimentonan negativo pa cu personanan cu ta diferente for di nos. (Jer. 17:9; Efe. 4:22-24) Pues, e articulo aki lo duna nos algun sugerencia practico pa yuda nos supera e sintimentonan ey cu ta causa division den hende. Tambe nos lo analisa con nos por cambia nos manera di pensa y train nos consenshi pa ta leal na e Reino di Dios.

5, 6. (a) Kico Hesus a pensa di e diferente gruponan di hende den su tempo? (b) Dicon Hesus a evita e mentalidad di e Hudiunan di su tempo?

⁵ Si bo no ta sigur kico bo tin cu haci pa keda neutral den un cierto situacion, puntra bo mes: Kico Hesus lo a haci den un situacion asina? Den e pais caminda Hesus tabata biba tabatin hende di diferente region, manera Judea, Galilea y Samaria. Y Bijbel ta mustra cu tabatin conflicto y desacuerdo entre e hendenan aki. Considera algun ehempel. Hudiu cu Samaritano no tabata papia cu otro. (Juan 4:9) Tabatin hopi desacuerdo entre fariseo y saduceo. (Echo. 23:6-9) Hudiunan cu a studia na e scolnan rabinico tabata pensa cu nan ta mihor cu esnan cu no a studia eynan. (Juan 7:49) Y e pueblo tabatin rabia riba cobrado di belasting y tambe riba e dirigentenan politico, kendenan tabata Romano. (Mat. 9:11) Pero aunke Hesus a defende e berdad y a reconoce cu Israel tabata un nacion special pa Jehova, nunca e no a siña su discipelnan cu nan tabata mihor cu otro hende. (Juan 4:22) Al contrario, el a manda nan stima tur hende y mira nan como nan prohimo.—Luc. 10:27.

⁶ Dicon Hesus a evita e mentalidad di e Hudiunan di su tempo? Pasobra ni Hesus ni su Tata no ta di acuerdo cu e conflictonan cu tin den e mundo aki. Ora Jehova a crea Adam cu Eva, su intencion tabata pa nan yena henter e Tera cu hende. (Gen. 1:27, 28) Dios a traha hende di tal manera cu nan tabatin e capacidad pa produci tur e rasanan cu ta existi awe. Pesey ni Jehova ni Hesus no ta prefera un rasa, nacionalidad of idioma mas cu otro. (Echo. 10:34, 35; Rev. 7:9, 13, 14) Nos mester sigui nan ehempel perfecto.—Mat. 5:43-48.

7, 8. (a) Relaciona cu ki cuestion cristiannan mester mustra bon cla na ki banda nan ta para? (b) Kico cristiannan mester reconoce encuanto e solucion pa e problemanan di humanidad?

⁷ Pero tin un cuestion den cua nos mester mustra bon cla na ki banda nos ta para: e cuestion di Jehova su soberania universal. E cuestion ey a surgi den e Hofi di Eden ora cu Satanas a indica cu Jehova no tin derecho di goberna humanidad y cu e lo por goberna mihor. Awe, tur hende mester dicidi ta cua banda nan ta scoge: e banda di Jehova of e banda di Satanas. Kico di abo? Bo ta scoge e banda di Jehova y ta obedece su normanan? Of bo ta prefera di haci cos na  bo manera? Bo ta convenci cu su Reino ta e unico solucion pa e problemanan di humanidad? Of bo ta kere cu hende por goberna nan mes cu exito sin Dios?—Gen. 3:4, 5.

⁸ Bo contesta riba e preguntanan ey ta determina con lo bo contesta ora un hende pidi bo bo opinion riba un problema social of politico, of riba cualkier otro tema controversial. Tin politico cu pa añanan ta lucha pa haya solucion pa e dificultadnan cu humanidad ta enfrenta, y kisas nan ta sincero y tin bon intencion. Pero como cristian, nos sa cu ta e Reino di Dios ta e unico gobierno cu por resolve e problemanan ey y garantisa husticia pa tur hende. Pesey nos mester laga tur cos den man di Jehova y sigui su direccion. Imagina bo kico lo pasa si cada un di nos cuminsa promove nos propio solucion. Esaki lo causa hopi division den nos congregacionnan, no ta berdad?

9. (a) Ki problema tabatin den e congregacion di Corinto? (b) Kico apostel Pablo a conseha nan pa haci pa soluciona e problema?

⁹ Laga nos wak kico e cristiannan di e prome siglo a haci ora a surgi un problema cu a dividi e congregacion. Algun ruman na Corinto a cuminsa bisa: “Ami ta sigui Pablo.” Otronan a bisa: “Ami ta sigui Apolo”, “Ami ta sigui Cefas”, “Ami ta sigui Cristo.” Nos no sa dicon nan tabata bisa asina, pero Pablo no tabata niun tiki contento cu e efecto cu esaki tabatin. El a bisa nan: “Kiermen cu Cristo ta parti na pida pida anto!” Kico tabata e solucion pa e manera di pensa aki cu a menasa e paz di e congregacion? Wel, Pablo a bisa nan: “Mi ta urgi boso, rumannan, den nomber di nos Señor Hesucristo, pa boso tur ta di acuerdo cu otro den loke boso ta papia, y pa no tin desunion den boso, sino pa boso ta completamente uni den mesun pensamento y mesun opinion.” Awe tampoco no mester tin niun tipo di division entre nos den e congregacion.—1 Cor. 1:10-13; lesa Romanonan 16:17, 18.

10. Ki ehempel apostel Pablo a uza pa splica dicon nos mester keda neutral den asuntonan politico?

¹⁰ Pablo a corda e cristiannan ungi cu nan tabata ciudadano di cielo y cu nan no mester a fiha nan bista riba “cos di mundo.” (Flp. 3:17-20) * Nan tabata embahador cu a representa Dios y Cristo riba Tera. Y ora un embahador ta den un pais stranhero, e no ta mete den e asuntonan interno ni politica di e pais ey. Mescos ta conta pa e unginan; nan ta leal na e Reino di Dios. (2 Cor. 5:20) Pa loke ta e cristiannan cu tin e speransa di biba pa semper riba Tera, nan tambe ta leal na e Reino y pesey nan no ta apoya niun parti di e mundo aki.

11, 12. (a) Ki situacionnan por pone cu ta dificil pa un cristian keda leal na e Reino di Dios? (b) Ki situacion Mirjeta a enfrenta? (c) Con el a logra vence e sintimentonan negativo cu e tabatin?

¹¹ Den mayoria di pais, e hendenan ta sinti un banchi special cu esnan cu ta forma parti di e mesun comunidad. Hopi biaha, nan ta hopi orguyoso di nan historia, nan cultura y nan idioma. Pero nos no mester laga e actitud ey influencia nos. Mas bien, nos tin cu cambia nos manera di pensa y train nos consenshi pa asina nos sa kico pa haci ora surgi cuestionnan cu ta pone nos posicion neutral na prueba. Con nos por haci esaki?

¹² Por ehempel, tuma e caso di Mirjeta. * Mirjeta a nace den un region cu antes tabata parti di Yugoslavia, y for di chikito nan a siñ’e odia hende di nacionalidad Serbio. Sinembargo, Mirjeta a siña cu Jehova no ta haci distincion di persona y cu ta Satanas ta esun cu ta instiga problema entre gruponan  etnico, esta, entre hende di diferente nacionalidad y cultura. Esey a pone cu el a haci hopi esfuerso pa cambia su manera di pensa y deshaci di sintimentonan nacionalista. Lamentablemente, ora cu den su area un guera a cuminsa entre varios grupo etnico, el a bolbe cuminsa sinti e odio cu e tabatin for di chikito, y esey a pone cu e no kier a ni predica na e Serbionan. Mirjeta a realisa cu e sintimentonan ey lo no a kita di nan mes, pues el a roga Jehova pa yud’e stop di sinti asina. Tambe el a pidi Jehova yud’e aumenta su sirbishi pa asina e por a bira pionero. Mirjeta a bisa: “Mi a ripara cu e mihor cos cu mi por haci ta pa tene mi mente ocupa den sirbishi. Ora mi ta predica na e hendenan, mi ta purba di imita e personalidad cariñoso di Jehova, y asina mi a logra ranca e odio for di mi curason.”

13. (a) Ki situacion a laga un ruman muher sinti su mes hopi malo? (b) Con e ruman muher a reacciona riba e situacion? (c) Ki les nos por saca for di e experencia di Zoila?

¹³ Tambe tin e caso di Zoila. E ta originalmente di Mexico, pero awor e ta biba na Europa. Zoila ta corda con algun ruman di su congregacion cu tabata di un otro parti di Latino America tabata papia cu menosprecio di su pais natal, di e custumbernan y hasta di e musica. Con abo lo a reacciona? Ta comprendibel cu nan comentarionan a laga Zoila sinti su mes hopi malo. Wel, e bon ta cu Zoila a pidi Jehova yud’e pa e no sinti su mes ofendi. Algun ruman ainda tin problema pa controla nan emocionnan ora nan tende comentarionan negativo di nan pais di origen. Pues, sea cu nos ta entre nos rumannan of no, nos no mester haci ni bisa nada cu lo por zona discriminatorio of cu ta laga parce cu un cierto grupo ta mihor cu otro. Nos lo no kier causa division ni ofende niun hende.—Rom. 14:19; 2 Cor. 6:3.

14. Kico lo yuda nos mira hende manera Jehova ta mira nan?

¹⁴ Ta posibel cu bo crianza of e ambiente den cua bo a lanta a stimula sintimentonan patriotico den bo? Ainda bo tin algun di e sintimentonan ey den bo curason? Ningun cristian no mester pensa cu su pais, cultura, idioma of rasa ta mihor cu di otro hende. Pero kico si bo realisa cu ainda bo tin e sintimentonan ey? Wel, awor ta un bon momento pa bo medita riba loke Jehova ta pensa di hende cu ta orguyoso di nan pais (patriotismo) of cu ta pensa cu nan ta mihor cu otro hende (prehuicio). Esaki lo ta un bon tema pa bo analisa den bo estudio personal of adoracion como famia. Anto despues, pidi Jehova yuda bo mira otro hende manera e ta mira nan.—Lesa Romanonan 12:2.

15, 16. (a) Con algun hende den mundo lo reacciona pa motibo cu nos ta keda leal na Dios? (b) Con mayornan por yuda nan yiunan keda leal na Jehova?

¹⁵ Tardi of trempan, tur sirbidor di Jehova lo haya nan mes den situacionnan cu, pa motibo di nan consenshi, nan mester demostra cu nan ta diferente for di nan bisiña-, famia- of compañeronan di scol of di trabou. (1 Ped. 2:19) Esaki no mester sorprende nos. Hesus a spierta nos cu mundo lo odia nos pa nos posicion diferente. Corda cu mayoria di hende cu ta opone nos no ta compronde e importancia di e cuestionnan envolvi den nos posicion neutral como cristian, pero pa nos nan ta di sumo importancia.

¹⁶ Si nos kier ta leal na Jehova, nos mester para firme ora nos ta enfrenta prueba. (Dan. 3:16-18) Miedo di hende por domina personanan di cualkier edad, pero specialmente hobennan no gusta di ta diferente for di otronan. Mayornan, si boso yiunan ta enfrenta pruebanan manera saluda bandera of celebracionnan patriotico, yuda nan para firme. Uza e periodonan di Adoracion Como  Famia pa splica boso yiunan dicon ta asina importante pa mantene un posicion neutral y siña nan tambe con pa defende nan creencianan na un manera cla y cu respet. Esey lo duna nan e curashi cu nan mester pa vence cualkier prueba cu presenta. (Rom. 1:16) Ademas, si ta necesario, papia cu nan maestronan di scol. Asina boso yiunan ta mira cu boso ta para nan tras.

17. Ki mentalidad nos mester evita, y dicon?

¹⁷ Ta di compronde cu nos ta gusta e cuminda, e idioma, e paisahe y e custumbernan di e pais caminda nos a lanta. Pero nos tin cu lucha contra e mentalidad di “esun di mi ta mihor.” Tin un gran variedad den tur loke Jehova a crea, y el a haci esey pa nos placer. (Sal. 104:24; Rev. 4:11) Pues, pakico insisti cu nos manera di haci cos ta esun mihor?

18. Kico ta algun bendicion cu nos lo cosecha si nos ta mira otro hende manera Jehova ta mira nan?

¹⁸ Dios kier pa tur sorto di hende yega na un conocemento exacto di e berdad y biba pa semper. (Juan 3:16; 1 Tim. 2:3, 4) Si nos tin un mente habri y ta dispuesto pa scucha e ideanan di otro hende—tanten cu nan ideanan ta aceptabel pa Jehova—esey ta haci nos bida mas interesante y ta yuda nos keda uni cu nos rumannan. Manera nos a mira caba, nos no ta mete den e conflictonan di mundo ni ta tuma parti pa niun banda, ya cu nos ta leal na Jehova y na su Reino. Ademas, nos ta haci nos best pa evita e orguyo y spirito di competencia cu ta domina e mundo aki di Satanas. Nos ta hopi agradecido na Jehova cu el a siña nos promove paz y ser humilde. Nos ta completamente di acuerdo cu e escritor di salmo cu a bisa: “Mira, ki bon y ki dushi ta pa rumannan biba hunto den harmonia!”—Sal. 133:1.