NA DADO momento, mi mama a puntra mi: “Anto dicon bo no ta adora bo antepasadonan? Bo no sa cu ta danki na nan bo tin bida? Bo no ta agradecido na nan? Con bo por bira lomba pa custumbernan cu nos famia tin pa hopi generacion caba? Ora bo haci esey, ta comosifuera bo ta bisando cu nos adoracion ta coy kens.” Despues di a bisa esey, mi mama a cuminsa yora.

Un par di luna prome, testigonan di Jehova a ofrece mi mama un estudio di Bijbel. E no tabata kier a studia cu nan, pero pa no rechasa nan completamente el a bisa nan pa studia Bijbel cu mi. Ora mi kier a haci loke Bijbel ta bisa, el a rabia cu mi. Nunca mi a experencia esey pasobra semper mi tabata obedece mi mama. Sinembargo, como cu mi kier a agrada Jehova mi no por a obedece mi mama e biaha aki. Esey no tabata facil, pero Jehova a duna mi e forsa pa haci esey.

Manera mayoria di hende na Japon, nos tabata budista. Pero, despues di a studia solamente dos luna cu e testigonan di Jehova, mi tabata convenci cu loke Bijbel ta bisa ta berdad. Ora mi a haya sa cu mi tin un Tata celestial, mi tabata anhela pa siña mas tocante dje. Na principio, tabata facil pa papia cu mi mama tocante e cosnan cu mi tabata siña. Mi a cuminsa asisti na e reunionnan di diadomingo na e Salon di Reino. Na momento cu mi a haya un mihor comprondemento di Bijbel, mi a bisa mi mama cu mi lo no participa mas den ritonan budista. Diripiente su actitud a cambia. El a bisa: “Ta un berguensa pa tin un hende den nos famia cu no ta stima su antepasadonan.” El a exigi pa mi stop di studia Bijbel y stop di bay reunion. Mi nunca a imagina cu mi mama lo a bisa esaki. Ta comosifuera e tabata un otro persona.

For di Efesionan capitulo 6, mi a siña cu Jehova tabata kier pa mi obedece mi mayornan. Y como cu mi tata a tuma parti pa mi mama, mi a rasona cu ta mihor pa mi obedece nan. Mi a pensa cu di e manera ey nan lo scucha mi y nos lo haya paz atrobe den nos famia. Ademas, mi mester a prepara pa traha examen pa drenta scol secundario. Pues, mi a bay di acuerdo pa haci loke nan a bisa pa tres luna, pero mi a priminti Jehova cu mi lo bay reunion atrobe despues di esey.

E decision cu mi a tuma no tabata sabi pa dos motibo. Prome, mi a pensa cu despues di tres luna ainda mi lo tin e mesun deseo pa sirbi Jehova. Esey no a resulta manera mi a pensa pasobra  mi a cuminsa sinti falta di e cuminda spiritual y mi relacion cu Jehova tabata bay atras. Di dos, en bes di coopera cu mi, mi mayornan a pone hasta mas presion riba mi pa bandona tur cos cu tin di haber cu adoracion berdadero.

Na Salon di Reino, mi a conoce hopi persona cu tambe tabata enfrenta oposicion di famia. Nan a sigura mi cu Jehova lo yuda mi. (Mat. 10:34-37) Nan a splica mi cu si mi keda fiel na Jehova, mi por yuda mi famia conoce Dios. Mi kier a depende mas riba Jehova, pues, mi a cuminsa haci hopi oracion.

Mi famia a opone mi den diferente manera. Mi mama a roga mi y a purba di rasona cu mi pa stop di studia. Mayoria di biaha mi tabata keda keto. Y e poco biahanan cu mi a papia, nos tabata pleita pasobra nos tur dos tabata defende nos mes punto di bista. Despues mi a bin realisa cu si mi tabatin mas respet pa mi mama su sintimento y creencia, e situacion lo tabata mas trankil. Mi mayornan a duna mi mas trabou pa haci pa asina mi no sali for di cas. Tin biaha nan tabata cera mi pafo di cas of nan no tabata laga cuminda pa mi.

Mi mama a pidi ayudo di otro hende pa purba di pone mi cambia di opinion. El a papia cu mi meneer di scol, pero esey no a funciona. Despues el a hiba mi cerca su manager na trabou pa convence mi cu niun religion ta bon. Na cas, mi mama a yama varios miembro di nos famia y na yoramento el a roga nan pa yud’e. Esey a pone mi rabia, pero na e reunionnan e ancianonan a yuda mi mira cu ora mi mama papia cu otronan tocante nos situacion, en realidad e tabata dunando un testimonio.

 Mi mayornan tabata kier pa mi bay universidad pa asina mi por a haya un bon trabou. E situacion tabata asina tenso cu nos no por a papia trankil cu otro, pues, mi a skirbi varios carta pa mi mayornan pa splica nan mi metanan. Mi tata a rabia hopi y a bisa mi: “Si bo ta kere cu bo por haya un trabou, wak pa bo hay’e mañan mes sino bo tin cu bay for di cas.” Mi a papia tocante e asunto cu Jehova. E siguiente dia, ora mi tabata den sirbishi, dos diferente ruman muher a ofrece mi un trabou pa duna nan yiunan bijles. Mi tata no a keda contento cu esaki y a stop di papia cu mi completamente; el a cuminsa ignora mi. Mi mama a bisa cu e ta prefera pa mi ta un delincuente y no un testigo di Jehova.

Tin biaha mi tabata puntra mi mes si Jehova tabata kier pa mi bay asina contra di loke mi mayornan tabata desea. Pero oracion y meditacion riba textonan di Bijbel cu ta papia tocante Jehova su amor a yuda mi mira oposicion for di un otro punto di bista. Mi a realisa cu mi mayornan tabata preocupa pa mi. Jehova a yuda mi corigi mi manera di pensa y haya sa kico pa haci. Tambe, mas mi a traha den sirbishi, mas mi a disfruta di dje. Pesey, e trabou di pionero a bira mi meta.

Algun ruman muher cu tabata sa cu mi kier a traha pionero a conseha mi pa warda te ora mi mayornan calma. Mi a pidi Jehova sabiduria, busca informacion, analisa e motibo pakico mi kier a bira pionero y a papia cu rumannan maduro. A base di esey, mi a dicidi cu mi kier agrada Jehova. Debi cu mi no tabatin ningun siguransa cu mi mayornan lo cambia nan actitud, no tabatin sentido pa mi pospone e meta cu mi tabatin.

Mi a cuminsa traha pionero durante mi ultimo aña di scol secundario. Despues cu mi a traha pionero pa un tempo, mi a pone como meta pa sirbi caminda tin mas necesidad. Pero, mi mayornan no tabata kier pa mi bay for di cas. Pues, mi a warda te ora mi tabatin 20 aña. Despues, pa laga mi mama sinti trankil, mi a puntra sucursal si mi por haya un asignacion den e parti zuid di Japon. Pasobra eynan nos tabatin famia.

Den e asignacion ey, mi a mira hopi hende cu mi a studia cu ne batisa, y esey tabata un bendicion pa mi. Mientrastanto, mi a siña Ingles pa asina mi por haci mas den sirbishi. Tabatin dos ruman homber pionero special cu tabata den e mesun congregacion cu mi. Despues cu mi a wak con balente nan tabata den sirbishi y con nan tabata yuda otronan, mi tambe a haya gana di bira pionero special. Y esey a bira mi meta. Durante e tempo ey, dos biaha mi mama a bira hopi malo. Tur dos biaha mi a bay cas pa cuid’e. Esey a sorprend’e, y su actitud a cambia un tiki.

Despues di shete aña, mi a haya un carta di Atsushi, un di e pioneronan special cu mi a menciona mas prome. El a bisa mi cu e tin gana di casa y el a puntra mi kico ami ta pensa tocante esey. Nunca mi tabatin sintimento romantico pa Atsushi ni tampoco mi a pensa cu e tabatin e sintimentonan ey pa mi. Un luna despues, mi a contest’e cu mi tabata dispuesto pa nos siña conoce otro mihor. Nos a ripara cu nos tabatin hopi cos en comun. Nos tur dos tabata kier sigui cu e trabou di tempo completo y nos tabata dispuesto pa acepta cualkier asignacion. Cu tempo, nos a casa. Mi tabata hopi contento cu mi mayornan y varios miembro di nos famia a bin na nos casamento.

Poco despues, mientras nos tabata sirbi como pionero regular, Atsushi a ser nombra como superintendente di circuito substituto. Despues  nos a haya mas bendicion ainda. Nos a haya asignacion pa traha como pionero special, y despues nos a bay den e trabou di circuito. Ora nos a caba di bishita tur e congregacionnan den e circuito un biaha, nos a ricibi un yamada di sucursal. Nan a puntra si nos lo acepta un asignacion pa bay den e trabou di circuito na Nepal.

Mi tabata pensa con mi mayornan lo sinti si mi bay asina leu. Pues mi a yama nan. Mi tata a contesta e telefon y el a bisa: “Bo ta bay na un luga masha bunita.” Un siman prome, un di su amigonan a dun’e un buki tocante Nepal, y mi tata a hasta pensa cu esey lo ta un bunita luga pa bishita.

Mientras nos tabata sirbi cu goso entre e hendenan amigabel di Nepal, nos asignacion a cambia un tiki. Nos circuito lo a inclui Bangladesh. Aunke e tabata cerca di Nepal toch e tabata hopi diferente. Tabatin hopi variacion den nos sirbishi. Despues di cinco aña, nos a haya asignacion pa bay bek Japon, unda cu awor nos ta disfruta di e trabou di circuito.

Mi a siña conoce Jehova mas mihor tempo cu nos a sirbi na Japon, Nepal y Bangladesh. E hendenan di e paisnan ey tin nan propio cultura y custumbernan. Mi por a mira con Jehova ta interesa den cada persona, y pesey e ta yuda y bendiciona nan.

Jehova a bendiciona mi ricamente: El a yuda mi conoc’e, duna mi trabou pa haci, yuda mi haya un bon esposo y tuma bon decisionnan. Awor mi tin un bon relacion cu ne y cu mi famia. Danki na Jehova, ami y mi mama ta bon amiga atrobe. Mi ta hopi agradecido cu mi a haya paz cu Dios y cu mi mama.