“Siguramente bo Dios ta e Dios di diosnan y e Señor di reynan y Esun cu ta revela misterio [of, secreto].”​—DAN. 2:47.

1, 2. Kico Jehova a revela na nos, y dicon el a haci esey?

CUA poder mundial lo ta dominando e tera ora cu e Reino di Dios pone fin na tur gobierno humano? Nos sa e contesta pasobra Jehova Dios ta Esun cu ta revela secreto. Mediante e bukinan di profeta Daniel y apostel Juan, el a revela identidad di e poder mundial ey na nos.

² Jehova a duna e dos hombernan ey varios vision tocante bestianan cu lo a presenta un tras di otro. Ademas, el a splica Daniel e nificacion di un soño profetico tocante un imagen inmenso di metal. Jehova a conserva e relatonan aki den Bijbel pa nos beneficio, si, pa fortalece nos speransa cu su Reino pronto lo aplasta tur gobierno humano.​—Dan. 2:44; Rom. 15:4.

3. Pa nos por compronde e profecianan den Bijbel cu exactitud, kico nos mester compronde prome, y dicon?

³ E relatonan di Daniel y Juan no solamente ta identifica ocho rey, of gobierno humano, sino ta indica tambe den ki secuencia e potencianan ey lo a aparece. Un cos si, pa nos por compronde e profecianan ey cu exactitud, nos mester compronde e prome profecia cu ta para skirbi den Bijbel. Dicon? Pasobra e cumplimento di e profecia ey ta e tema central di henter Bijbel. Den un sentido, tur otro profecia ta depende di e prome profecia ey.

E SIMIA DI E COLEBRA Y E BESTIA SALBAHE

4. Cua ta e dos partinan di e simia di e muher, y kico e simia ey lo haci?

⁴ Un poco despues di e rebelion den Eden, Jehova a priminti cu un “muher” lo a produci un “simia” of descendiente. * (Lesa Genesis 3:15.) Cu tempo, e simia ey lo “herida” e colebra, Satanas, na su cabes. Despues Jehova a revela cu e simia ey lo a bin for di Abraham, for di e nacion di Israel, for di e tribu di Juda y for di e famia di Rey David. (Gen. 22:15-18; 49:10; Sal. 89:3, 4; Luc. 1:30-33) Cristo Hesus ta e parti principal di e simia ey. (Gal. 3:16) Y e miembronan ungi di e congregacion cristian ta forma e parti secundario di e simia. (Gal. 3:26-29) Hesus hunto cu e unginan aki ta forma e Reino di Dios, e medio cu Dios lo uza pa aplasta Satanas.​—Luc. 12:32; Rom. 16:20.

5, 6. (a) Cuanto potencia e visionnan di Daniel y di Juan ta menciona? (b) Kico e cabesnan di e bestia salbahe di Revelacion capitulo 13 ta representa?

⁵ Den e prome profecia cu Jehova a duna den Eden, el a bisa tambe cu Satanas lo a produci un “simia.” Su simia lo a expresa odio contra e simia di e muher of odi’e. Ta ken ta forma e simia di e colebra? Esey ta tur persona cu, mescos cu Satanas, ta odia Dios y bringa contra su pueblo. A traves di historia, Satanas a organisa su simia den varios movemento politico, of reino. (Luc. 4:5, 6) Pero ta algun di e gobiernonan aki so a bringa directamente contra e pueblo di Dios, sea contra e nacion di Israel of contra e congregacion di cristian ungi. Esaki ta yuda nos compronde dicon e visionnan di Daniel y di Juan ta describi solamente ocho poder mundial.

⁶ Na final di e prome siglo di e era cristian, Hesus resucita a duna apostel Juan un serie di vision masha impresionante. (Rev. 1:1) Den un di nan, Juan a mira un dragon​—cu a representa Diabel​—para canto di un lama inmenso. (Lesa Revelacion 13:1, 2.) Tambe Juan a mira Diabel duna gran autoridad na un bestia straño cu a sali for di e lama ey. Mas despues, Juan a mira un bestia color cora bibo cu tabata un imagen di e bestia di Revelacion 13:1. Un angel a bisa Juan cu e shete cabesnan di e bestia color cora bibo ta representa “shete rey”, of gobierno. (Rev. 13:14, 15; 17:3, 9, 10) Tempo cu Juan a skirbi Revelacion, cinco di e reynan ey a cay caba, uno tabata na poder, y uno “no a yega ainda.” Ta cua reino, of poder mundial, eseynan tabata? Laga nos analisa cada un di e cabesnan di e bestia salbahe di Revelacion capitulo 13. Nos lo mira tambe con e buki di Daniel a duna nos mas detaye di algun di e gobiernonan aki, hasta siglonan prome cu nan a existi.

E PROME DOS CABESNAN: EGIPTO Y ASIRIA

7. Kico e prome cabes a representa, y dicon?

⁷ E prome cabes di e bestia a representa Egipto. Dicon ta Egipto? Pasobra e tabata e prome potencia grandi cu a odia e pueblo di Dios y bringa contra dje. Dios a priminti Abraham cu e simia di e muher lo a bin di su famia. Wel, e Israelitanan tabata su descendiente y a bira masha hopi den Egipto, y Egipto a cuminsa oprimi nan. Satanas kier a caba cu e pueblo di Dios prome cu e simia yega. Con? El a uza Farao pa purba di mata tur yiu homber Israelita. Pero Jehova no a permiti esey sosode y a libra su pueblo for di Egipto. (Exo. 1:15-20; 14:13) Mas despues el a duna nan e Tera Priminti.

8. Kico e di dos cabes a representa, y kico el a purba di haci?

⁸ E di dos cabes di e bestia a representa Asiria. E reino poderoso aki tambe a purba di caba cu e pueblo di Dios. Na prome instante, Jehova a uza Asiria pa castiga e reino di dies tribu di Israel pasobra nan tabata adora dios falso y a desobedece Jehova. Pero despues, Asiria a ataca Jerusalem. Kisas Satanas tabata kier a destrui e famia real na Jerusalem, ya cu Hesus mester a bin di e famia ey. E atake ey no tabata parti di e proposito di Dios, pesey el a destrui e ehercito Asirio y milagrosamente a libra su pueblo fiel.​—2 Rey. 19:32-35; Isa. 10:5, 6, 12-15.

E DI TRES CABES: BABILONIA

9, 10. (a) Kico Jehova a permiti Babilonia haci? (b) Pa profecia por a cumpli, kico mester a sosode prome?

⁹ E di tres cabes di e bestia cu Juan a mira a representa e reino cu tabatin Babilonia como su capital. Jehova a permiti e soldanan di Babilonia destrui Jerusalem y hiba su pueblo preso. Ma prome cu Jehova a permiti e humiliacion aki, el a spierta e Israelitanan rebelde cu nan lo a pasa den e tragedia ey. (2 Rey. 20:16-18) Ademas, el a profetisa cu lo e no a laga e reynan di Israel sinta mas riba su “trono” na Jerusalem. (1 Cro. 29:23) Pero tambe Jehova a priminti cu un descendiente di Rey David, kende lo tabatin “derecho” riba e trono ey, lo a bin y ricibi e autoridad aki bek.​—Eze. 21:25-27.

¹⁰ Un otro profecia a indica cu e Hudiunan lo tabata rindi adoracion ainda na e tempel na Jerusalem ora cu e Mesias priminti, esta e Ungi, yega. (Dan. 9:24-27) Y prome cu e Israelitanan a bay den exilio na Babilonia, un otro profecia a bisa cu e Mesias lo a nace na Betlehem. (Mik. 5:2) Pa e profecianan ey por a cumpli, e Hudiunan lo mester a bandona Babilonia, bolbe nan pais y reconstrui e tempel. Pero Babilonia normalmente no tabata laga su presonan bay. Pues, con e pueblo di Dios lo a logra bay nan pais bek? Jehova a revela e contesta na su profetanan.​—Amos 3:7.

11. Menciona algun simbolo cu e profecianan a uza pa representa e Imperio di Babilonia. (Wak e nota na pia di pagina.)

¹¹ Profeta Daniel tabata un di e Israelitanan cu nan a hiba Babilonia. (Dan. 1:1-6) Jehova a uz’e pa revela e serie di poder mundial cu lo a bin despues di Babilonia. Jehova a uza diferente simbolo pa revela e secretonan ey. Por ehempel, el a laga Rey Nabucodonosor di Babilonia soña tocante un imagen inmenso traha di varios metal. (Lesa Daniel 2:1, 19, 31-38.) Via Daniel, Jehova a revela cu e cabes di oro di e imagen a simbolisa e Imperio di Babilonia. * E pecho y e brasanan di plata a representa e poder mundial cu lo a bin despues di Babilonia. Cua potencia esey lo tabata, y con lo el a trata e pueblo di Dios?

E DI CUATER CABES: MEDOPERSIA

12, 13. (a) Kico Jehova a revela tocante e conkista di Babilonia? (b) Dicon e di cuater cabes di e bestia salbahe aptamente a representa Medopersia?

¹² Mas cu un siglo prome cu e tempo di Daniel, Jehova a revela via profeta Isaias cierto detaye tocante e poder mundial cu lo a conkista Babilonia. Jehova a revela no solamente e manera cu lo a derota e stad di Babilonia, sino tambe e nomber di e conkistado. E lider ey tabata Ciro di Persia. (Isa. 44:28–45:2) Jehova a duna Daniel dos vision mas tocante e Poder Mundial di Medopersia. Den uno, el a mira e reino manera un beer cu lo a “devora hopi carni.” (Dan. 7:5) Den e otro, el a mira e poder mundial combina aki como un chubato di carne cu dos cacho.​—Dan. 8:3, 20.

¹³ Jehova a uza e Imperio di Medopersia pa conkista Babilonia y pa laga e Israelitanan regresa nan pais, precies manera el a profetisa. (2 Cro. 36:22, 23) Pero despues e mesun poder mundial aki a hera caba cu e pueblo di Dios. Den e buki biblico di Ester, nos ta lesa tocante un complot di e prome minister di Persia, un homber cu tabata yama Haman. El a duna instruccion pa extermina tur Hudiu cu tabata biba den e inmenso Imperio di Persia, y el a fiha un fecha specifico pa e matanza aki tuma luga. Como cu Jehova a interveni den e asunto, Su pueblo un biaha mas a ser proteha contra di e odio di e simia di Satanas. (Est. 1:1-3; 3:8, 9; 8:3, 9-14) Pesey, e di cuater cabes di e bestia di Revelacion aptamente a representa Medopersia.

E DI CINCO CABES: GRECIA

14, 15. Ki detayenan tocante e antiguo Imperio di Grecia Jehova a revela?

¹⁴ E di cinco cabes di e bestia salbahe di Revelacion a representa Grecia. Manera Daniel a revela mas prome ora el a interpreta e soño di Nabucodonosor, e bariga y bilnan di brons (of koper) di e imagen tambe a simbolisa e poder mundial ey. Ademas, Daniel a haya dos otro vision cu a duna detaye remarcabel tocante e tipo di imperio cu Grecia lo tabata y tocante su gobernante mas prominente.

¹⁵ Den un di e visionnan, Daniel a mira Grecia manera un leopardo cu cuater hala. Esey a indica cu e imperio aki lo a conkista otro nacionnan rapidamente. (Dan. 7:6) Den e otro vision, Daniel a mira con un cabrito cu un cacho masha grandi a core bin dal un chubato di carne cu dos cacho mata. Jehova a bisa Daniel cu e cabrito a simbolisa Grecia y cu e cacho grandi a simbolisa un di su reynan. E chubato di carne a representa Medopersia. Daniel a skirbi tambe cu e cacho grandi lo a kibra y cu cuater cacho chikito lo a sali na su luga. Tur detaye di e profecia aki a cumpli, aunke e tabata skirbi un dos siglo prome cu Grecia a bira un poder mundial. Alehandro e Grandi, e rey mas prominente di Grecia di antiguedad, a encabesa e ehercito Griego contra Medopersia. Pero e cacho aki no a dura hopi tempo. E gran rey a muri cu 32 aña so, ora e tabata masha poderoso. Y su reino cu tempo a keda parti entre cuater di su generalnan.​—Lesa Daniel 8:20-22.

16. Kico Antioco IV a haci?

¹⁶ Despues di conkista Persia, Grecia a goberna e pais di e pueblo di Dios. Pa e tempo ey e Hudiunan ya tabata bek na e Tera Priminti y a reconstrui e tempel na Jerusalem. Ainda nan tabata e pueblo di Dios, y e tempel cu nan a reconstrui ainda tabata e centro di adoracion berdadero. Ma den siglo 2 prome cu e era cristian, Grecia, e di cinco cabes di e bestia salbahe, a ataca e pueblo di Dios. Antioco IV, un di e generalnan cu a hereda un parti di e Imperio di Alehandro, a traha un altar pagano riba tereno di e tempel na Jerusalem y a decreta cu ken cu a practica e religion hudiu lo a haya castigo di morto. Un biaha mas, e simia di Satanas a demostra su odio contra e pueblo di Dios! Pero poco despues, un otro potencia a reemplasa Grecia. Cua reino lo tabata e di seis cabes di e bestia salbahe?

E DI SEIS CABES, “SPANTOSO Y TERIBEL”: ROMA

17. E di seis cabes a cumpli cu ki parti clave di e profecia di Genesis 3:15?

¹⁷ Roma tabata e potencia dominante ora cu Juan a haya e vision di e bestia salbahe. (Rev. 17:10) E di seis cabes a cumpli cu un parti clave di e profecia di Genesis 3:15. Satanas a uza oficialnan Romano pa herida e “hilchi” di e simia, loke a paralis’e temporalmente. Con asina? Wel, nan a husga Hesus a base di e acusacion falso di ta instiga hende contra gobierno y a laga mat’e. (Mat. 27:26) Pero e herida ey a cura masha lihe, ya cu Jehova a resucita Hesus.

18. (a) Cua nacion nobo Jehova a scoge, y dicon? (b) Con e simia di e colebra a sigui demostra su odio contra e simia di e muher?

¹⁸ E lidernan religioso di Israel hunto cu representantenan di Roma a uni contra Hesus, y mayoria di hende di e nacion di Israel a rechas’e. Consecuentemente, Jehova a rechasa Israel como su pueblo. (Mat. 23:38; Echo. 2:22, 23) El a scoge e ora ey un nacion nobo, “e Israel di Dios.” (Gal. 3:26-29; 6:16) E nacion ey tabata e congregacion di cristian ungi cu a consisti di tanto hende Hudiu como no Hudiu. (Efe. 2:11-18) Despues cu Hesus a muri y resucita, e simia di e colebra a sigui demostra su odio contra e simia di e muher. Na mas cu un ocasion, Roma a trata di elimina e congregacion di cristian ungi cu ta forma e parti secundario di e simia. *

19. (a) Con Daniel a describi e di seis poder mundial? (b) Kico un otro articulo lo analisa?

¹⁹ Den e soño cu Daniel a splica na Rey Nabucodonosor, e pianan di hero a representa Roma. (Dan. 2:33) Ademas, Daniel a mira un otro vision cu a duna un bon descripcion di e Imperio Romano y tambe di e siguiente poder mundial cu lo a sali for di Roma. (Lesa Daniel 7:7, 8.) Pa siglonan, Roma tabata manera un bestia “spantoso y teribel y sumamente fuerte” den bista di su enemigonan. Ma e profecia a bisa cu “dies cacho” lo a sali for di e imperio aki y cu un “otro cacho, uno chikito”, lo a sali meymey di nan y bira mas prominente. Kico e dies cachonan aki ta, y kico ta e cacho chikito? Cua parti di e imagen inmenso cu Nabucodonosor a mira ta cuadra cu e cacho chikito? E articulo na pagina 16 lo contesta e preguntanan aki.

[Nota]

[Preguntanan di Estudio]