1-3. (a) Ki situacionnan ta yuda nos compronde e les di e dos ilustracionnan di Hesus? (b) Ki preguntanan e articulo aki lo yuda nos contesta?

SUPONE cu un funcionario importante den gobierno pidi bo pa hib’e na un afspraak importante cu e tin. Pero un par di minuut prome cu bo bay busc’e, bo ta ripara cu bo no tin suficiente combustibel den bo auto. Bo ta core bay gasolin stacion. Pero net ora bo a bay, e funcionario ta yega. E ta wak rond, pero e no ta mira bo. Y como cu e no por warda, e ta pidi un otro hende pa hib’e. Ora bo bin bek, bo ta realisa cu e funcionario a bay caba. Con lo bo sinti bo?

² Awor imagina cu abo ta e funcionario y cu bo a scoge tres homber capaz pa atende algun asunto di negoshi importante pa bo. Bo ta splica nan kico nan tin cu haci y tur tres ta acepta e trabou. Pero ora bo bin bek despues, bo ta haya sa cu ta dos di nan so a cumpli cu nan tarea. Anto esun cu no a cumpli cu su trabou ta bin cu excuus siendo cu e no a ni haci esfuerso pa cumpli cu e trabou cu bo a dun’e. Con lo bo sinti bo?

³ E situacionnan cu nos a caba di considera ta similar na dos ilustracion di Hesus: esun di e birgennan y esun di e talentonan. El a uza e comparacionnan aki pa ilustra cu, durante e tempo di fin, algun cristian ungi lo a demostra cu nan ta fiel y prudente mientras cu otronan no. * (Mat. 25:1-30) Hesus a enfatisa e les di su ilustracionnan cu e siguiente conseho: “Keda vigila, pasobra boso no sa ni e dia ni e ora”, esta, e tempo cu Hesus lo ehecuta e huicio di Dios riba e mundo di Satanas. (Mat. 25:13) E conseho ey ta conta pa nos tambe. Awor, kico ta e beneficionan di keda vigila, manera Hesus a conseha? Ken a demostra cu nan ta prepara? Y kico nos tin cu haci pa keda vigila?

4. Dicon nos no tin nodo di sa exactamente ki dia e fin lo bin pa nos por “keda vigila”?

⁴ Tin biaha ta masha importante pa bo sa precies cuant’or tin pa bo no cay laat. Esey ta e caso, por ehempel, ora bo ta traha den un fabrica, ora bo tin cu bay dokter of haci uzo di transporte publico. Di otro banda, un persona cu ta paga candela of rescata hende despues di un desaster natural no por keda wak holoshi. Esey por ta un distraccion of hasta un peliger. Pesey, den situacionnan asina ta mas importante pa enfoca riba e trabou y no riba ora. Awe, e trabou di predica y di siña hende tocante Jehova su provisionnan pa salba hende ta mas importante cu nunca, specialmente mirando cu e fin di e era aki ta cerca. Pesey, pa keda vigila y haci loke Jehova ta spera di nos, nos no tin nodo di sa exactamente ki ora e fin lo bin. En realidad, e echo cu nos no sa e dia ni e ora exacto ta beneficia nos den por lo menos cinco manera.

5. Dicon e echo cu nos no sa e dia ni e ora ta duna nos oportunidad di revela kico tin den nos curason?

⁵ Pa di prome, e echo cu nos no sa e dia ni e ora ta duna nos oportunidad di revela kico tin den nos curason. Si, e echo cu nos no sa ki dia e fin lo yega ta un manera cu Jehova ta mustra nos respet ya cu e ta permiti nos uza nos boluntad liber pa demostra nos lealtad na dje. Aunke nos tin e deseo di sobrevivi e fin di e mundo aki, nos ta sirbi Jehova pasobra nos ta stim’e y no djis pa haya bida eterno. (Lesa Salmo 37:4.) Ademas, nos tin goso den haci Jehova su boluntad, y nos sa cu e ta siña nos pa nos mes beneficio. (Isa. 48:17) Y su mandamentonan no ta pisa.​—1 Juan 5:3.

6. Con Dios ta sinti ora nos ta sirbie pasobra nos ta stim’e, y dicon?

⁶ E di dos beneficio di no sa e dia ni e ora ta e oportunidad cu nos tin di haci Jehova su curason contento. Ora nos ta sirbi Jehova pasobra nos ta stim’e y no cu un fecha of recompensa na mente, nos ta yuda Jehova prueba cu su adversario, Satanas, ta un mentiroso. (Job 2:4, 5; lesa Proverbionan 27:11.) Ora nos pensa riba tur e dolor y sufrimento cu Diabel ta causa, nos ta contento cu nos por apoya Jehova su soberania y rechasa Satanas su gobernacion malbado.

7. Segun bo, dicon ta bon pa hiba un bida di sacrificio propio?

⁷ Di tres, ora nos ta sirbi Dios sin un fecha specifico na mente, ta mas facil pa hiba un bida di sacrificio propio. Algun hende cu no conoce Dios tambe ta kere cu mundo lo no sigui asin’aki pa hopi tempo. Y como cu nan tin miedo di un of otro desaster cu cualkier ora por caba cu mundo, nan ta adopta e actitud di: “Laga nos come y bebe, pasobra mañan nos ta muri.” (1 Cor. 15:32) Ma nos si no tin miedo ni no ta wak pa nos mes so. (Prov. 18:1) Mas bien, nos ta nenga nos mes y ta uza nos tempo, energia y recursonan generosamente pa comparti e bon noticia di e Reino di Dios cu otro hende. (Lesa Mateo 16:24.) Ta un goso pa nos sirbi Dios, y specialmente ora nos ta yuda otro hende conoc’e.

8. Ki ehempel biblico ta mustra cu nos mester depende completamente riba Jehova y confia den su Palabra?

⁸ E di cuater beneficio: E echo cu nos no sa e dia ni e ora ta yuda nos depende completamente riba Jehova y haci nos maximo esfuerso pa obedece su Palabra. Como hende imperfecto, nos tin e tendencia di confia riba nos mes. Pero Pablo a spierta tur cristian: “Laga esun cu ta kere cu e ta para, tene cuidou pa e no cay.” Un total di 23.000 Israelita a perde nan bida net prome cu nan por a drenta e Tera Priminti pasobra nan a desobedece Jehova. Apostel Pablo a bisa: “E cosnan aki a sosode cu nan como ehempel, y nan a ser skirbi como spiertamento  pa nos cu ta biba na final di e tempo aki.”​—1 Cor. 10:8, 11, 12.

9. Con prueba por refina nos y yuda nos hala mas cerca Jehova, esta, tin un mihor relacion cu ne?

⁹ Di cinco, e echo cu nos no sa e dia ni e ora ta permiti e pruebanan cu nos ta pasa aden refina nos. (Lesa 1 Pedro 1:6.) E ultimo dianan di e era aki di berdad ta “temponan critico, dificil pa trata cu ne.” (2 Tim. 3:1-5) Hopi hende den e mundo di Satanas ta odia nos, pues nos por haya nos cu persecucion pa motibo di nos fe. (Juan 15:19; 16:2) Pero si nos ta humilde y ta busca Dios su guia durante prueba, nos lo ser refina manera candela ta refina metal y nos fe lo bira mas fuerte. Nos lo no entrega. Mas bien, nos relacion cu Jehova lo bira mas fuerte cu nos por imagina.​—Sant. 1:2-4; 4:8.

10. Ki ora por parce cu tempo ta pasa lihe?

¹⁰ Por parce cu tempo ta pasa masha lihe of pocopoco. Por ehempel, ora nos ta masha ocupa, y no ta sinta wak holoshi constantemente, ta parce cu tempo ta bula. Di mes manera, si nos ta ocupa cu e trabou cu Jehova a duna nos, e dia y e ora lo por yega mas lihe cu nos ta pensa. Hopi ruman ungi ta un excelente ehempel pa nos den esaki. Laga nos wak brevemente kico a pasa despues cu Hesus a bira Rey na 1914 y mira con algun di e rumannan aki a demostra cu nan tabata prepara mientras cu otronan no.

11. Despues di 1914, dicon algun ruman ungi a pensa cu Señor a tarda?

¹¹ Pensa atrobe riba Hesus su ilustracion tocante e birgennan y esun di e talentonan. Si e birgennan of e esclavonan den e ilustracionnan aki tabata sa ki ora nan bruidegom of doño lo a yega, nan lo no tabatin nodo di keda vigila. Pero nan no tabata sa, pesey nan mester tabata prepara. Aunke e unginan pa decadanan a anticipa cu 1914 lo tabata un aña importante, nan no tabata sa exactamente kico lo a bay sosode. Ora cosnan no a bay manera nan a spera, algun di nan a pensa cu e Bruidegom a tarda. Un ruman homber a bisa despues: “Algun di nos a kere sigur cu nos lo a bay cielo durante e prome siman di october [1914].”

12. Con e rumannan ungi a demostra cu nan tabata fiel y prudente?

¹² Bo por imagina bo con desanima nan lo a bira ora e fin cu nan tabata spera no a yega? Pio ainda, e rumannan a haya nan cu oposicion durante e Prome Guera Mundial. E trabou di predica casi a para completamente. Tabata comosifuera e unginan tabata drumi. Pero na 1919, nan a lanta for di soño. Hesus a bin inspecciona Dios su tempel spiritual. Pero algun di e rumannan ungi a ser descualifica y asina a perde e privilegio di por a sigui haci “negoshi” pa e Rey. (Mat. 25:16) Dicon? Pasobra nan no tabata diligente. Nan a actua mescos cu e birgennan bobo: Na moda di papia, nan zeta spiritual a caba y nan no a percura pa nan tabatin zeta extra. Y mescos cu e esclavo floho, nan no tabata dispuesto pa haci sacrificio na bienestar di e Reino. Di otro banda, mayoria di e unginan si a demostra un lealtad inkebrantabel y un deseo fuerte pa sirbi nan Doño hasta durante e añanan dificil di guera.

13. Ki actitud e esclavo fiel y prudente a desplega despues di 1914, y ki actitud nan tin awe?

¹³ E Toren di Vigilancia di 1 di februari 1916 a haci e declaracion importante aki: ‘Rumannan, esnan entre nos cu tin e actitud corecto pa cu Dios no ta keda desapunta cu nada cu e ta haci. Nos no tabata desea pa nos boluntad cumpli. Pues, ora nos a compronde cu loke nos tabata spera na october 1914 tabata incorecto, nos  a alegra cu Señor no a cambia Su Plan pa acomoda nos. Nos no a desea esey tampoco. Nos unico deseo ta pa compronde Su plannan y proposito.’ Awe tambe e unginan tin e mesun actitud humilde y devoto aki. Nan no ta pretende di ta inspira, pero nan ta dicidido pa sigui atende Señor su asuntonan di “negoshi” riba tera. Y “un multitud grandi” di “otro carne”, esta, e cristiannan cu tin e speransa di biba pa semper riba tera, ta imita e rumannan ungi su celo y ta keda vigila mescos cu nan.​—Rev. 7:9; Juan 10:16.

14. Dicon ta bon pa nos obedece loke Jehova ta siña nos mediante e esclavo fiel?

¹⁴ Jehova Dios a encarga e esclavo fiel y prudente cu e responsabilidad di percura cuminda spiritual pa Su pueblo. Tanto e rumannan ungi como e miembronan di e multitud grandi ta haci esfuerso pa keda prepara, obedeciendo loke Jehova ta siña nos mediante e esclavo fiel y prudente. Ta comosifuera nan ta yena nan lampi cu e zeta spiritual cu ta bin for di e Palabra di Dios y su spirito. (Lesa Salmo 119:130; Juan 16:13.) Di e manera ey, nan lo tin forsa pa keda fiel hasta bou di prueba severo y ta prepara pa e fin ora Cristo bolbe. Por ehempel, algun ruman cu tabata den un campo di concentracion Nazi tabatin solamente un ehemplar di Bijbel. Pesey nan a haci oracion pa nan haya mas cuminda spiritual. Poco tempo despues, nan a haya sa cu un ruman homber cu a caba di yega e campo a logra drenta cu algun ehemplar nobo di E Toren di Vigilancia den su pia di palo. Un di e sobrevivientenan, Ruman Ernst Wauer, a conta: “Jehova a yuda nos na un manera maraviyoso pa memorisa informacionnan di e articulonan ey cu a fortalece nos masha.” E ruman ungi aki a bisa tambe: “Awendia ta facil pa nos haya cuminda spiritual. Pero nos ta aprecia esey semper? Mi tin confianza cu Jehova lo bendiciona ricamente tur esnan cu ta confia den dje, keda leal na dje y come na su mesa.”

15, 16. (a) Con un pareha casa a ser recompensa ricamente pa nan entusiasmo den sirbishi? (b) Kico nos por siña for di experencianan asina?

¹⁵ E otro carnenan tambe ta masha activo den e trabou di predica. Asina nan ta sostene e rumannan di Cristo. (Mat. 25:40) Nan no ta manera e esclavo malbado y floho den e ilustracion di Hesus; nan si ta dispuesto pa traha duro y haci sacrificio pa  pone interesnan di Reino na prome luga den nan bida. Tuma por ehempel e caso di Jon y Masako, kendenan a haya invitacion pa bay yuda den e teritorio di habla Chines na Kenia. Na prome instante, nan a duda. Pero despues di a analisa nan situacion y haci oracion tocante e asunto, nan a dicidi di muda.

¹⁶ Nan esfuerso no tabata pornada! Nan a ser bendiciona ricamente. Nan a bisa: ‘Ta dushi pa traha den sirbishi akinan.’ Nan a cuminsa shete estudio di Bijbel y tabatin hopi experencia alentador mas. Jon y Masako a conclui, bisando: “Tur dia nos ta gradici Jehova cu el a permiti nos bin akinan.” Ta claro cu tin hopi ruman mas cu ta dicidido pa sigui traha duro den Dios su sirbishi te final, sin importa ki dia e fin lo yega. Pensa riba e miles di rumannan cu a bay Scol di Galaad y cu awor ta sirbi como misionero. Bo kier haya sa mas tocante e trabou di misionero? Lesa e articulo “Nos Ta Haci Nos Best!” cu tin den E Toren di Vigilancia di 15 di october 2001. Segun cu bo ta lesa e relato fascinante aki encuanto un dia den bida di un misionero, pensa riba maneranan cu abo por haci mas den e trabou di predica. Di e manera ey, bo ta duna alabanza na Dios y aumenta bo goso.

17. Dicon e echo cu nos no sa e dia ni e ora ta un bendicion pa nos?

¹⁷ Pues, e echo cu nos no sa e dia ni e ora exacto cu e era aki lo yega na su fin no ta decepcionante ni frustrante pa nos. Al contrario, esey ta un bendicion pa nos. Dicon? Pasobra e echo cu nos no sa ta yuda nos keda ocupa haciendo e boluntad di nos amoroso Tata, Jehova, y asina fortalece nos relacion cu ne. Como cu na moda di papia nos ta keda cu nos man na ploeg y ta evita distraccion, nos tin gran goso sirbiendo Jehova.​—Luc. 9:62.

18. Dicon nos kier keda fiel den nos sirbishi na Dios?

¹⁸ E dia di huicio di Jehova ta acercando rapidamente. Ningun di nos no kier decepciona Jehova ni Hesus. Nan a confia nos cu un trabou importante durante e ultimo dianan aki. Nos ta masha gradicido pa e confianza cu nan ta demostra den nos.​—Lesa 1 Timoteo 1:12.

19. Con nos por demostra cu nos ta prepara?

¹⁹ Sea cu nos tin e speransa di disfruta di bida pa semper den cielo of den Paradijs riba tera, laga nos ta determina pa keda fiel na Dios y pa cumpli cu su mandamento pa predica y haci discipel. Si, manera nos por a compronde, nos no tin nodo di sa e dia ni e ora exacto cu e dia di Jehova lo bin. Nos por y lo prepara pa e dia ey. (Mat. 24:36, 44) Nos tin confianza cu tanten nos keda confia den Jehova y pone su Reino na prome luga den nos bida, nos lo no keda desapunta.​—Rom. 10:11.