KICO Jehova ta spera di su adoradornan? E ta spera perfeccion di nos? Si ta asina, nunca nos lo por agrad’e, pasobra tur hende ta imperfecto. Of nos por cumpli cu loke e ta rekeri di nos? Ta importante pa contesta e preguntanan aki pasobra e contestanan ta yuda nos sirbi Dios cu goso. Profeta Mikeas a resumi brevemente loke Dios ta spera di nos. Pesey, laga nos analisa loke el a bisa.​—Lesa Mikeas 6:8.

‘El a bisa bo loke ta bon.’ Dios no a laga nos den ignorancia. El a splica bon cla den su Palabra, Bijbel, kico e ta spera di nos. Y loke Dios ta spera di nos “ta bon.” No por ta otro tampoco, pasobra “Dios ta amor.” Si, tur loke e ta spera di nos ta pa nos mes bon. (1 Juan 4:8; 5:3) Pues, ora nos ta cumpli cu e rekisitonan di Dios, nos ta hacie contento y nos mes tambe lo beneficia.​—Deuteronomio 10:12, 13.

“Kico SEÑOR ta exigi [of, spera] di bo?” Acaso Dios tin derecho di exigi algo for di nos? Claro cu si! Ta el a crea nos y ta percura pa nos tin tur loke nos mester pa keda na bida. Pues ta na su luga pa nos obedece Dios. (Salmo 36:9) Awor, kico ta loke Jehova ta spera di nos? Mikeas a menciona tres cos. E prome dosnan tin di haber cu e manera cu nos ta trata otro hende y e di tres ta enfoca riba nos relacion cu Dios.

“Haci husticia.” Segun un buki di consulta biblico, e palabra Hebreo cu a ser traduci aki como “husticia” ta encera trata hende segun e normanan di honestidad y husticia di comunidad. Pero Dios kier pa nos trata hende segun su normanan di husticia y honestidad. Pues, nos ta haci husticia ora nos ta trata hende na un manera husto, honesto y imparcial. (Levitico 19:15; Isaias 1:17; Hebreonan 13:18) Ora nos ta trata hende asina, nan lo por sinti nan motiva pa trata nos di igual manera.​—Mateo 7:12.

“Stima misericordia [“bondad”, NW].” Dios no solamente ta pidi nos pa mustra bondad sino pa stima bondad tambe. E palabra Hebreo traduci akinan como “bondad” (chesedh) por ser traduci tambe como “bondad amoroso” of “amor leal.” Un experto riba tereno di Bijbel a bisa cu e palabranan “amor”, “misericordia”, of “bondad” no ta transmiti e nificacion completo di e palabra chesedh. Segun e, e palabra aki ta encera mucho mas; e ta encera tur e cualidadnan ey pareu. Si nos ta stima misericordia, of bondad, nos ta demostr’e di buena gana y nos lo tin placer den yuda hende den necesidad. Y como resultado, nos lo sinti e goso cu ta bin di duna.​—Echonan 20:35.

“Cana humildemente cu bo Dios.” Tin biaha, ora Bijbel uza e palabra “cana”, e ta nifica “sigui un cierto proceder.” Ora nos ta cana cu Dios, nos ta laga su normanan, cu nos ta haya den Bijbel, dirigi nos bida. Pero pa nos por haci esey, nos mester ta ‘humilde.’ Dicon? Pasobra ora nos ta humilde, nos ta reconoce cu nos tin limitacion, cu nos ta haci eror y cu nos tin cu depende riba Jehova. Pues, pa nos por ‘cana humildemente cu Dios’, nos mester tin un punto di bista realistico di loke Dios ta spera di nos y di loke nos por haci.

Nos ta masha contento cu Jehova nunca ta spera mas di loke nos por duna. Y Jehova ta keda contento ora e mira cu nos ta haci esfuerso pa sirbie cu henter nos curason. (Colosensenan 3:23) E ta na altura di nos limitacionnan. (Salmo 103:14) Ora nos tambe ta reconoce nos limitacionnan, nos por sirbi Dios cu goso. Abo kier sa con bo tambe por cana cu Dios? Si bo cana cu Dios, lo bo ricibi hopi bendicion.​—Proverbionan 10:22.