TIN hende ta bisa cu no ta bon pa puntra dicon, of pakico, Dios ta permiti of no ta permiti cierto cosnan tuma luga. Podise nan ta pensa cu un pregunta asina ta demostra un falta di respet pa Dios. Abo tambe ta pensa asina?

Si esey ta e caso, bo tabata sa cu hopi fiel sirbidor di Dios a yega di puntr’e pakico e ta haci of permiti cierto cosnan? Ata aki algun di e preguntanan cu nan a yega di hacie:

E homber fiel Job a puntra: “Pakico bo ta sconde bo cara, y ta considera mi bo enemigo?”​—Job 13:24.

E profeta leal Habacuk a puntra: “Pakico bo ta wak cu tolerancia riba esnan cu ta trata cu traicion? Pakico bo ta keda keto ora cu e malbadonan ta traga esnan cu ta mas husto cu nan?”​—Habacuk 1:13.

Hesucristo a puntra: “Mi Dios, mi Dios, pakico bo a bandona mi?”​—Mateo 27:46.

Anto si bo lesa e contexto di e textonan di Bijbel aki, lo bo no haya ningun indicacion cu Jehova * Dios a sintie ofendi ora su sirbidornan a hacie e preguntanan sincero ey. Y esey no ta un sorpresa. Dicon no? Pensa riba esaki: Ora nos pidi Jehova yuda nos cu nos necesidadnan basico pa nos por tin bon salud, e no ta sintie ofendi. Al contrario, cu placer e ta duna nos loke nos tin mester. (Mateo 6:11, 33) Di e mes manera, e ta contento pa duna nos informacion pa yuda nos keda tanto emocionalmente como mentalmente den bon condicion. (Filipensenan 4:6, 7) Hesus mes a bisa su discipelnan: “Sigui pidi, y boso lo ricibi; sigui busca, y boso lo haya.” (Mateo 7:7) Ta bisto cu Hesus no tabata referi solamente na cosnan material sino tambe na contesta pa preguntanan importante.

Si bo por a haci Dios pregunta, cua di e siguiente preguntanan lo bo a hacie?

• Mi bida tin proposito?

• Kico lo pasa cu mi ora mi muri?

• Dicon bo ta laga mi sufri?

Siendo cu “henter e Scritura ta inspira di Dios”, lo bo haya Dios su contesta pa e preguntanan aki den su Palabra. (2 Timoteo 3:16) Laga nos wak awor dicon algun hende sa haci e preguntanan ey y con Bijbel ta contesta esakinan.