E COLECCION aki, cu nan a descubri na maart 1961, tabata consisti di mas cu 400 obheto, mayoria di nan ta di koper. Nan tabata scondi den un buraco den baranca, lora den un mat di richi. Den nan tabatin un surtido di corona, septer, herment y arma. E descubrimento aki ta di interes special pa lectornan di Bijbel ya cu Genesis 4:22 ta referi na Tubal-cain como un “trahador di tur herment di brons y hero.” *

Ainda tin hopi pregunta relaciona cu e origen y historia di e tesoro aki. Pero e descubrimento aki ta demostra cu for di hopi tempo pasa hende di paisnan biblico tabata sa con pa saca koper for di piedra, smelt e y traha obheto cu ne.

Ora e Israelitanan tabata cla pa drenta e Tera Priminti, Moises a bisa nan: “For di su seronan bo por saca koper.” (Deuteronomio 8:7-9) Arkeologonan a descubri un cantidad di mina y luga di smelt koper na Israel y Jordan, manera Timna, Khirbat en-Nahas y Feinan. Kico e luganan ey ta revela?

E tereno di Feinan y Timna ta yen di buraco, caminda mineronan tabata saca koper durante un periodo di por lo menos 2.000 aña. Te awe, ken cu pasa eybanda por haya pida pida piedra garna cu pikpik berde di koper plama rond. E mineronan di antiguedad tabata coba den e capanan mas ariba di e barancanan cu hermentnan di piedra pa saca koper. Ora nan no por a haya mas koper parti ariba, nan tabata uza herment di metal pa coba tunnel y bay busca koper cu tabata mas hundo. E buki biblico di Job ta describi e trabou di coba den mina. (Job 28:2-11) Esaki tabata trabou duro; en realidad, for di siglo 3 te cu 5, autoridadnan Romano tabata sentencia e criminalnan di mas notorio y otro presonan pa traha den e minanan di koper di Feinan.

Na Khirbat en-Nahas (cu ta nifica “Ruinanan di Koper”), nan a haya restonan di koper procesa, loke ta indica cu un tempo nan tabata smelt koper na gran escala eynan. Arkeologonan ta kere cu nan tabata trece piedra cu ta contene koper for  di e minanan di Feinan y Timna, cu tabata situa eybanda. Pa saca e koper for di e piedra, nan tabata uza un sistema pa supla aire den e forno di carbon pa hisa e temperatura te na 1.200 grado Celsius, durante ocho pa dies ora. Por lo general, pa cada kilo di koper nan tabata smelt cinco kilo di piedra, cu despues nan por a uza pa traha varios obheto.

Na Sero di Sinai, Jehova Dios a duna instruccion specifico pa uza e metal cu ta lombra aki, cu nan a haya den cercania di e sero, pa construi e tabernakel. Tambe nan mester a uza koper mas despues den e tempel cu nan mester a construi na Jerusalem. (Exodo, capitulo 27) Kisas e Israelitanan tabata sa con pa traha cu metal prome cu nan a bay Egipto, of talbes nan a siña esey tempo nan tabata eynan. Despues cu nan a sali for di Egipto, nan por a traha un bishe di oro. Tambe nan por a traha hopi articulo di koper cu nan mester a uza den sirbishi di tempel—manera e punchero grandi, wea, panchi, scop y forki.—Exodo 32:4.

Mas despues durante nan biahe door di desierto, talbes banda di Punon (probablemente loke awe ta Feinan), un area rico na koper, e Israelitanan a keha tocante e mana y falta di awa. Como castigo, Jehova a manda colebra venenoso riba nan, y hopi di nan a muri. Despues cu nan a arepenti, Moises a acudi na Jehova pa nan, y Jehova a mand’e traha un colebra di koper y pon’e na halto riba un staca. E relato ta bisa: “A sosode cu si un colebra a morde un hende, ora cu el a mira na e colebra di brons, el a keda na bida.”—Numbernan 21:4-10; 33:43.

Rey Salomon a uza masha hopi koper den construccion di e tempel na Jerusalem. Gran parti di esey el a haya di su tata, Rey David, kende a bin cu e koper aki como botin for di Siria. (1 Cronicanan 18:6-8) E “lama di metal basha”, esta, e tobo enorme cu e sacerdotenan tabata uza pa laba nan curpa, tabatin un capacidad di 66.000 liter y kisas a pisa den careda di 30 ton. (1 Reynan 7:23-26, 44-46) Tambe tabatin dos pilar di koper enorme na cada banda di e entrada di e tempel. Nan tabata 8 meter halto, y parti ariba nan tabatin un corona di mas o menos 2 meter halto. E pilarnan tabatin un diameter di 1,7 meter. Nan tabata hol di paden, y nan bandanan masivo tabata 7,5 centimeter diki. (1 Reynan 7:15, 16; 2 Cronicanan 4:17) Imagina bo cuanto koper e hendenan mester a uza pa traha djis e obhetonan aki!

Hende comun den tempo di Bijbel tambe tabata uza koper den nan bida di tur dia. Por ehempel, Bijbel ta papia di arma, cadena, instrumento musical y porta traha di koper. (1 Samuel 17:5, 6; 2 Reynan 25:7; 1 Cronicanan 15:19; Salmo 107:16) Hesus a papia di placa di “koper” y apostel Pablo a menciona “Alexander, e artesano di koper.”—Mateo 10:9; 2 Timoteo 4:14.

Ainda arkeologonan y historiadornan tin cu contesta hopi pregunta relaciona cu e origen di obhetonan di koper den tempo di Bijbel, y tambe e misterio di e tesoro di Nahal Mishmar. No obstante, echo ta cu, manera Bijbel ta confirma, e tera cu e Israelitanan a hereda en berdad tabata ‘un bon tera, cu for di su seronan nan por a saca koper.’—Deuteronomio 8:7-9.