Na cuminsamento di 1942, net despues cu Merca a drenta Segundo Guera Mundial, mi tabata den e di cinco aña di universidad, y mi tabata falta apenas algun luna pa mi gradua como arkitecto. Mi tabata biba hunto cu dos mucha homber mas. Un di nan a sugeri mi pa bay papia cu un homber cu tabata “bishita e mucha hombernan cu tabata biba na e piso abou di nos.” Ey mi a topa John O. (Johnny) Brehmer, kende ta un Testigo di Jehova. Mi a keda asombra con e tabata uza Bijbel pa contesta casi tur mi preguntanan. Esey a motiva mi pa tuma un estudio di Bijbel regularmente for di Johnny, y cu tempo mi tabata bay predica cu ne ora cu mi tabata por.

Otto, tata di Johnny, a bira Testigo tempo e tabata director di un banco na Walnut, Iowa. Despues, el a tuma su retiro pa drenta den e sirbishi di tempo completo. Cu tempo, su bon ehempel y tambe esun di su famia a anima mi pa tuma un decision hopi importante.

Un dia e decano di e universidad a bisa mi cu mi puntonan tabata bayendo atras y cu lo mi no a slaag a base di mi puntonan anterior. Mi ta corda con mi tabata pidi Jehova den oracion pa e yuda mi. Un poco despues cu mi a gradua, mi profesor a yama mi pa bin cerca dje. El a bisa mi cu nan a pidie pa un arkitecto, anto el a tuma e libertad di contesta e telegram y bisa cu lo mi acepta e trabou. Mi a gradici e profesor, pero mi a splic’e pakico mi tabata determina pa haci sirbishi na Jehova mi carera. Dia 17 di juni 1942 mi a batisa y casi mesora mi a cuminsa traha como pionero (un Testigo di Jehova cu ta dedica gran parti di su tempo na e trabou di predica).

Mas despues na 1942, nan a manda yama mi pa servicio militar y dilanti di un comite mi mester a splica dicon mi consenshi no a permiti mi bay guera. Mi a mustra nan declaracionnan firma di mi profesornan, den cua nan a elogia mi pa mi bon cualidadnan y mi capacidad excepcional como arkitecto. Pero toch, nan a dal mi un boet di 10.000 dollar y a sentencia mi na cinco aña di prizon na Leavenworth, Kansas.

Nan a sentencia mas cu 230 Testigo hoben na un boerderij cu ta cay bou di e prizon di estado na Leavenworth. Eynan nan a pone nos traha bou di supervision di varios wardador di preso. Algun di  nan tabata sa di nos posicion neutral como cristian y tabata respeta nos punto di bista.

Algun di nan a coopera cu nos pa nos por a sigui tene nos reunionnan biblico. Tambe nan a yuda nos haya literatura biblico den prizon. E hefe di prizon a hasta abona riba e revista Consuelo (awor ¡Despertad!).

Despues cu mi a sinta tres di mi cinco añanan di castigo, mi a sali liber dia 16 di februari 1946, algun luna despues cu Segundo Guera Mundial a termina. Mesora, mi a cuminsa traha pionero atrobe. Nan a asigna mi pa bay bek na e stad di Leavenworth, Kansas. E idea ey so a duna mi hopi miedo ya cu eynan tabatin hopi prehuicio contra Testigonan di Jehova. Tabata dificil pa mi haya un trabou, pa no papia mes di un luga di biba.

Mi ta corda dia cu mi a topa un wardador di preso den sirbishi, con el a grita mi pa bay for di su luga. Ora mi a mira e bate di baseball den su man, mi a haya hopi miedo y a bira bay di biaha. Na un otro cas un señora a bisa mi: “Warda mi un rato”, anto el a cera e porta. Mientras mi tabata warda, diripiente un bentana di e piso ariba a habri, anto el a basha awa sushi di laba co’i kibra riba mi. A pesar di esey, mi a haya varios bendicion den sirbishi. Despues mi a haya sa cu algun di e personanan cu a tuma literatura biblico cerca mi a bira Testigo.

Na aña 1943 nan a cuminsa cu un scol pa misionero na New York. Nan a invita mi pa asisti na e di dies klas, y dia 8 di februari 1948 mi a gradua. Nan a yama e scol: Scol Biblico di Galaad di Watchtower. Ora mi a gradua, nan a manda mi bay sirbi na Costa di Oro, conoci awor como Gana.

Ora mi a yega Costa di Oro, mi asignacion tabata pa predica na oficialnan di gobierno y Europeonan. Den weekend mi tabata traha cu un congregacion di Testigonan di Jehova y predica cu nan di cas pa cas. Tambe mi a bishita Testigonan cu tabata biba na luganan isola y a siña nan con pa predica. Ademas, mi a sirbi como superintendente biahero na Costa di Marfil (Côte d’Ivoire), un pais bisiña.

Mientras mi tabata sirbi den e areanan ey, mi a siña biba manera e nativonan Africano: Mi tabata drumi den cas traha di lodo, come cu man y a bay “pafo” pa haci mi necesidadnan, mescos cu e Israelitanan den desierto. (Deuteronomio 23:12-14) Asina ami cu e otro misioneronan a haya un bon reputacion. Esposanan di algun di e oficialnan local a cuminsa tuma estudio di Bijbel cerca nos. Pues, ora opositornan a cuminsa molestia nos y  instiga autoridadnan pa hala nos visa aden, e esposanan di e oficialnan a pone presion riba nan esposo, y nan a anula e decision.

Mescos cu hopi di e misioneronan na Africa, despues di tempo mi a haya malaria. Mi a haya calafriu y keintura cu tabata pone mi eilo. Tabatin biaha cu hasta mi mester a tene mi cachete pa e stop di tembla. A pesar di esey, mi a sigui haya goso y satisfaccion den sirbishi.

Durante e prome cuater añanan na Africa, mi tabata coresponde cu Eva Hallquist, un ruman cu mi a conoce prome cu mi a bay for di Merca. El a bisa mi cu e tabata den e di 21 klas di Galaad y cu e tabata bay gradua dia 19 di juli 1953, na e congreso internacional di Testigonan di Jehova na Yankee Stadium, New York. Mi a cumbini cu un capitan pa traha riba su barco, a cambio di e biahe pa Merca.

Despues di 22 dia, algun biaha pasando den lama basta bruto, mi a yega. Mi a bay di biaha cerca Eva na e oficina principal di Testigonan di Jehova na Brooklyn. Nos a subi riba dak di un edificio cu un bista espectacular di e edificionan halto y e haf di New York, y eynan mi a pidie pa casa cu mi. Despues, Eva a bin Costa di Oro pa traha como misionero hunto cu mi.

Despues cu ami cu Eva a sirbi pa varios aña na Africa, mi mama a manda mi un carta, bisando cu mi tata tabata muriendo di cancer. Asina cu nos a haya permit pa bandona nos asignacion, ami cu Eva a bolbe Merca. Mi tata su salud a bay atras hopi lihe, y el a fayece un poco tempo despues.

Nos a bolbe na nos asignacion na Gana, pero despues di cuater aña, nos a haya sa cu mi mama su salud a bay hopi atras. Algun amigo a conseha nos pa nos bay bek pa percura p’e. Esey tabata e decision di mas dificil cu nos a yega di tuma. Despues di a sirbi 15 aña como misionero, 11 di nan como pareha, nos a bay Merca bek.

E añanan cu a sigui, nos tabata percura pa mi mama, y nos tabata hib’e reunion segun cu su salud tabata permiti. Dia 17 di januari 1976, el a fayece cu 86 aña di edad. Pero mi a haya un sla mas duro ainda nuebe aña despues. A resulta cu Eva tabatin cancer. Nos a busca tur manera pa bringa e maleza, pero finalmente el a perde e bataya. El a fayece dia 4 di juni 1985, cu 70 aña di edad.

Na 1988, nan a invita mi pa asisti na inauguracion di e parti nobo di e sucursal di Gana. Esta un ocasion inolvidabel! Mas o menos 40 aña prome, tempo mi a bin Gana despues di a gradua for di Galaad, tabatin apenas 700 y pico Testigo eynan. Na 1988, ya tabatin mas cu 34.000, y awor nan ta casi 114.000.

Dos aña despues di a bishita Gana, mi a casa cu Eva su bon amiga, Betty Miller, dia 6 di augustus 1990. Hunto nos a sigui haci Jehova su sirbishi nos carera. Nos ta anhela e dia cu nos por mira nos welonan, mayornan y tambe Eva bek riba tera den e resureccion den Paradijs.—Echonan 24:15.

Mi wowo ta yena cu awa ora mi pensa riba e gran privilegio cu mi tabatin di por sirbi Jehova pa mas cu 70 aña. Mi ta gradicie tur ora cu el a yuda mi haci sirbishi na dje mi carera. Awor mi tin mas cu 90 aña, pero Jehova, e arkitecto di mas grandi di universo, ta sigui duna mi forsa y curashi pa mi sigui cu mi carera.