M’a nace den un bario di clase medio na Bilbao, den parti noord di Spaña. Di mi cuater rumannan, ami tabata esun di dos. Nos famia tabata catoliconan masha devoto y mi tabata un fiel baido di misa. Cu mi 23 aña m’a bira maestra di scol; un profesion cu m’a stima y eherce pa 40 aña. Aparte di varios materia cu mi tabata duna, mi tabata sinti mi orguyoso di por a duna les di religion catolico. Anochi mi tabata duna mucha muher cu mester a bay ‘ricibi’ les di catisashi.

Despues di tabata 12 aña felizmente casa, m’a bira viuda cu cuater yiu muher pa cria. Mi tabatin apenas 33 aña. M’a busca consuelo den mi fe catolico, pero mi no por a haya contesta pa mi preguntanan: ‘Dicon hende ta sigui muri si Cristo a libra nos? Dicon nos ta pidi den oracion pa e Reino di Dios bin si tur bon hende ta bay cielo?’ Pero esun cu mas tabata molestia mi ta: ‘Si Dios ta husga nos ora nos muri, dicon despues nos mester bandona cielo, purgatorio of fierno pa e huicio final?’

M’a haci algun pastoor cu mi conoce e preguntanan ey. Un di nan a bisa mi: “Mi no sa. Bay puntra obispo. Pakico bo ta preocupa bo cabes? Bo ta kere den Dios, toch? Esey mes ta mas cu basta.” Pero mi no a entrega. Den mi afan pa haya contesta, m’a asisti na conferencianan di hesuita, pentecostal y gnostico. Pero cerca niun mi no a haya contesta satisfactorio.

Tempo mi tabatin 60 y pico aña di edad, un alumno di 7 aña a invita mi pa asisti na un reunion di testigonan di Jehova. M’a gusta loke m’a mira y tende pero, debi na mi bida druk e tempo ey, mi no tabatin mas contacto cu e testigonan di Jehova. Sinembargo, dos aña despues, un pareha testigo di Jehova cu yama Juan cu Maite a bati na mi porta. Tres luna largo, nan a contesta delaster un pregunta cu mi tabatin y finalmente m’a cuminsa studia Bijbel.

Tur siman mi tabata ansioso pa nan bishita. Mi tabata investiga tur cos cuidadosamente, haciendo uzo di tres traduccion  di Bijbel pa haci sigur cu loke nan a siña mi tabata e berdad. No mucho tempo despues m’a bin realisa con robes mi tabata den sentido religioso, y pa hopi aña. E gran diferencia entre loke mi tabata kere aden y loke m’a siña di Bijbel a casi tolondra mi. M’a sinti cu tur mi creencianan, manera un palo bon hancra, a ser ranca cu raiz cu tur.

Poco despues, mi di dos casa a bira hopi malo y muri. Den e mesun temporada ey, m’a baha cu pensioen y a bay for di Bilbao pa un tempo. Juan cu Maite tambe a bay biba otro caminda. Cu dolor na mi curason, m’a stop di studia Bijbel. Pero di paden mi tabata sa cu m’a haya un tesoro. Nunca m’a lubida esey.

Un 20 aña despues, tempo mi tabatin 82 aña, Juan cu Maite a regresa Bilboa y nan a pasa bishita mi. Esta contento mi tabata di mira nan atrobe. M’a realisa cu Jehova no a lubida mi, y m’a bolbe cuminsa studia. Juan cu Maite tabatin hopi pasenshi cu mi, ya cu varios biaha mi tabata haci nan e mesun preguntanan. Pero mi kier a tende bes tras bes e rasonamento biblico pa asina mi por a kibra e cabuyanan cu tabatin mi mara na mi creencianan anterior. Tambe mi tabata kier ta bon prepara pa splica e berdad di Bijbel na mi famia y amigonan.

Porfin, na e edad di 87 aña m’a batisa na un asamblea di testigonan di Jehova. Esey tabata e dia di mas feliz di mi bida. Pa e ocasion ey un anciano cristian a duna un discurso biblico cu tabata specialmente dirigi pa nos cu tabata bay batisa. E discurso a pone mi yora. M’a sinti manera cos cu ta Jehova mes tabata papia cu mi. Despues cu mi a batisa, yen di testigo di Jehova a bin felicita mi, aunke mayoria di nan no tabata conoce mi.

Semper mi tabata sa cu Hesucristo ta “e caminda.” (Juan 14:6) Pero mi estudio di Bijbel a yuda mi siña conoce Jehova, esun cu Hesus ta dirigi nos na dje. Awor mi por resa na Dios como mi Tata y Amigo stima. E buki Hala Serca Yehova * a haci un impresion profundo riba mi. E prome biaha m’a les’e den un solo anochi. M’a keda conmovi di siña con misericordioso Jehova ta.

Ora mi pensa riba mi trayectoria largo di buscamento di e berdad, mi ta corda e palabranan di Hesus: “Sigui pidi, y boso lo ricibi; sigui busca, y boso lo haya; sigui bati na porta, y lo habri pa boso.” (Mateo 7:7) Awor cu m’a haya e contestanan cu m’a anhela asina tanto, mi ta feliz di por comparti nan cu otro hende.

Aunke mi tin 90 aña di edad, mi ta sinti cu den sentido spiritual mi ta pichon pichon. Cada reunion na Salon di Reino ta un ocasion special—tanto pa e valioso conocemento cu mi ta haya como pa e compania di mi rumannan stima. Mi kier bolbe bira un maestra den e Paradijs cu Dios a priminti aki riba tera. (Revelacion 21:3, 4) Mi ta ansioso pa mira mi sernan keri cu a fayece bek na bida pa mi por siña nan e berdad di Bijbel y conta nan di e bunita regalo cu Jehova a duna mi den mi biehes!—Echonan 24:15.