Tin diferente motibo pakico miyones di hende rond mundo ta celebra Pasco di Nacemento. Pa algun hende, e ta un tempo pa disfruta di compania di nan famia- y amigonan; pa otronan, e ta un ocasion pa pensa riba Dios of pa yuda esnan den necesidad. Tur e cosnan aki ta hopi bon, pero nan ta ciega hende pa e berdad tocante Pasco.

Na prome luga, hopi hende ta kere cu riba dia di Pasco nan ta celebrando e nacemento di Hesus. Pero mayoria di historiador ta bisa cu niun hende no sa e fecha cu Hesus a nace. E buki The Christian Book of Why ta bisa cu “e prome cristiannan no kier a pone un fecha pa e nacemento di Hesus”, pasobra nan kier a “keda leu for di tur custumber pagano.” Ta interesante cu niun caminda den Bijbel no ta para cu Hesus a celebra su mes cumpleaños ni tampoco di otro hende. E unico cos cu Hesus a manda su siguidornan conmemora tabata su morto.—Lucas 22:19.

Na di dos luga, hopi investigador ta bisa cu mayoria di tradicion y personahe di Pasco tin origen pagano. Esaki ta inclui Santa Claus, kerstboom, dunamento di regalo, cendemento di bela, krans di Pasco na porta y canticanan di Pasco. Relaciona cu algun di e custumbernan aki, un buki tocante religion catolico a bisa: “Cuanto di nos sa cu nos ta siguiendo custumbernan pagano ora nos ta duna regalo di Pasco y ta colga krans den nos cas y na misa?”—The Externals of the Catholic Church.

Pero kisas bo ta pensa: Ki malo tin den sigui e custumbernan aki? Nan no ta haci niun hende daño. Wel, pa contesta esey, considera e di tres punto aki: Dios no ta acepta pa hende mescla adoracion puro cu custumbernan pagano. Na Amos 5:21 y 23, nos ta lesa cu Jehova a bisa e adoradornan infiel di Israel di antiguedad: “Mi ta odia, mi ta rechasa boso fiestanan ... Kita for di mi e boroto di boso canticanan.”

Dicon Jehova a papia asina fuerte cu nan? Wel, wak kico e reino di noord di Israel di antiguedad tabata haci. Jeroboam, e prome Rey di e reino ey, a pone un bishe di oro den e stad di Dan y uno na Betel. El a bisa e pueblo pa uza e bishenan ey pa adora Jehova en bes di bay te na e tempel na Jerusalem manera mester tabata e caso. Tambe e Rey a introduci fiestanan nobo y a nombra sacerdotenan pa yuda e pueblo celebra nan.—1 Reynan 12:26-33.

Loke e Israelitanan ey a haci por a parce bon. Al fin y al cabo, nan intencion tabata pa adora y agrada Jehova, toch? Pero Jehova su palabranan fuerte via Amos y otro profetanan a mustra bon cla con malo el a considera e practicanan ey. Siglonan despues, Jehova a bisa Israel: “Ami, SEÑOR, no ta cambia.” (Malakias 3:6) Pues, kico bo ta kere Dios ta pensa di e custumbernan di Pasco?

Pa e motibonan menciona den e articulo aki, miyones di hende a dicidi di stop di celebra Pasco. Nan ta pasa tempo cu nan famia y yuda esnan den necesidad ki ora cu nan kier durante henter aña. Y esey ta haci nan mas feliz.