E Encyclopædia Britannica ta describi Pasco di Resureccion como “e fiesta di mas importante di iglesia cristian.” Pero Pasco di Resureccion ta un celebracion cristian?

Si bo kier sa si un artefacto ta autentico, bo tin cu analisa su detayenan. Di mes manera, pa nos sa si Pasco di Resureccion ta un celebracion cristian, ta importante pa nos analisa e detayenan cu tin di haber cu e celebracion aki.

Pa cuminsa, Hesus a instrui su siguidornan pa recorda su morto, no su resureccion. Apostel Pablo a yama e ocasion ey “e cena di Señor.”—1 Corintionan 11:20; Lucas 22:19, 20.

Ademas, segun e Encyclopædia Britannica, hopi di e tradicionnan di Pasco di Resureccion “no tin nada di haber” cu e resureccion di Hesus; mas bien, nan “ta bin di custumbernan popular.” Por ehempel, The Encyclopedia of Religion ta bisa lo siguiente tocante e webo y coneu cu nan ta uza pa e celebracion aki: “E webo ta representa un bida nobo cu ta kibra y pasa door di e casca duro di e webo cu ta simbolisa morto.” E ta bisa tambe: “Coneu ta conoci como un bestia hopi fertil, y pesey e ta simbolisa comienso di e temporada di lente.”

Philippe Walter, un profesor di literatura di Edad Medio, ta splica con e tipo di custumbernan ey a bira parti di e celebracion di Pasco di Resureccion. El a skirbi cu Pasco di Resureccion tabata un celebracion di “e cambio di clima for di winter, caminda tur cos ta parce morto, te na e temporada di lente ora tur cos ta bolbe biba.” El a sigui bisa cu “durante di e proceso di comberti hende na religion cristian” tabata facil pa asocia e fiesta pagano aki cu e resureccion di Hesus. Ademas, Walter a bisa cu esaki tabata un paso importante pa inclui “fiestanan cristian” riba e kalender pagano, loke a habri caminda pa hopi hende comberti.

E proceso di “comberti hende na religion cristian” no a sosode tempo cu e apostelnan tabata na bida pasobra nan a fungi como un “frena” contra influencia pagano. (2 Tesalonicensenan 2:7) Apostel Pablo a spierta cu despues cu e “no t’ey mas ... lo lanta hombernan cu lo troce e berdad pa pone e discipelnan bay nan tras.” (Echonan 20:29, 30) Y na final di e prome siglo, apostel Juan a skirbi cu ya caba algun hende tabata gaña e cristiannan. (1 Juan 2:18, 26) Pues tabata facil pa nan cuminsa acepta custumbernan pagano.

Algun hende por a pensa cu no tabatin nada malo den acepta algun di e custumbernan ey, pasobra esey lo a yuda “e paganonan” compronde e nificacion di Hesus su resureccion mas mihor. Pero Pablo lo no tabata di acuerdo cu esey. Aunke el a ser exponi na hopi custumber pagano ora e tabata bay di un luga pa otro den e Imperio Romano, nunca el a adopta un di nan pa yuda hende haya un mihor comprondemento di Hesus. Al contrario, el a spierta e cristiannan: “No uni cu hende cu no ta creyente. Pasobra ki relacion husticia tin cu maldad? Of kico luz tin en comun cu scuridad? ‘Pesey, sali for di meymey di nan, y separa boso’, Jehova ta bisa, ‘y stop di mishi cu loke ta impuro.’”—2 Corintionan 6:14, 17.

Pues, despues di a analisa e detayenan aki, na ki conclusion nos por yega? Nos por mira bon cla cu Pasco di Resureccion no ta un celebracion cristian.