TOPICO PRINCIPAL | BO TA DESEA DI HAYA UN CURSO DI BIJBEL?

Un Curso di Bijbel pa Un y Tur

PLAY

Testigonan di Jehova ta bon conoci pa nan trabou di predica. Pero bo tabata sa cu nos ta duna curso di Bijbel na tur parti di mundo tambe?

Na 2014, mas cu 8.000.000 Testigo den 240 pais a dirigi casi 9.500.000 curso di Bijbel tur luna. * Si, e cantidad di hende cu ta siguiendo un curso di Bijbel cu nos ta mas cu e cantidad di habitante cu mas o menos 140 pais tin.

Pa cumpli cu e trabou mundial di siña hende, tur aña testigonan di Jehova ta publica casi 1,5 mil miyon Bijbel, buki, revista y otro publicacionnan pa yuda hende analisa Bijbel. Tur e publicacionnan aki ta disponibel den mas o menos 700 idioma. Tur e esfuerso aki ta pa yuda hende analisa Bijbel den e idioma cu nan ta prefera.

“Nunca mi no tabata gusta siña na scol, pero e curso di Bijbel aki si tabata dushi. Anto e cosnan cu mi a siña a duna mi consuelo.”—Katlego, Sur Africa.

“E curso a contesta tur mi preguntanan y mi a siña hopi cos mas.”—Bertha, Mexico.

“Nos tabata studia na mi cas y na e ora cu tabata mas cumbiniente pa mi. Kico mas mi por pidi.”—Eziquiel, Brazil.

“Algun di e sesionnan di e curso a dura 15 pa 30 minuut. Tin biaha mas largo, pero ami tabata dicidi.”—Viniana, Australia.

“E curso tabata gratis. Esey tabata hopi great!”—Aimé, Benin.

“E Testigo cu a studia Bijbel cu mi tabatin hopi pasenshi y tabata hopi amabel. Nos a cera un bon amistad cu otro.”—Karen, Noord Irlanda.

“Tin hopi hende cu a sigui un curso di Bijbel sin bira Testigo.”—Denton, Inglatera.

CONTESTA RIBA PREGUNTA CU HOPI HENDE SA HACI TOCANTE NOS CURSO DI BIJBEL

Con un curso di Bijbel ta bay?

Nos ta scoge varios topico di Bijbel y analisa textonan di Bijbel cu tin di haber cu e topico. Por ehempel, Bijbel ta duna contesta riba preguntanan manera: Ken Dios ta? Con e ta? Dios tin un nomber? Unda e ta biba? Nos por hala cerca dje? E contestanan ta den Bijbel, pero no ta semper facil pa haya nan.

Pa yuda hende haya contesta riba e preguntanan aki, por lo general nos ta uza e buki di 224 pagina titula Kico Bijbel Ta Siña Realmente? * Meta di e buki aki ta pa yuda hende compronde e siñansanan basico di Bijbel. E ta contene lesnan tocante Dios, Hesucristo, sufrimento di hende, resureccion, oracion y hopi topico mas.

Na unda y ki ora e curso por tuma luga?

E curso por tuma luga na un ora y luga cu ta cumbiniente pa bo.

Cuanto tempo cada sesion di e curso ta dura?

Hopi hende ta dedica mas o menos un ora tur siman pa ricibi un curso di Bijbel. Pero, nos por adapta na bo schedule. Algun hende ta dedica 10 of 15 minuut pa siman na e curso.

Cuanto e curso ta costa?

E curso y e material ta gratis. Esaki ta di acuerdo cu loke Hesus a instrui su discipelnan: “Boso a ricibi pornada, duna pornada.”—Mateo 10:8.

Cuanto tempo e curso ta dura?

Esey ta depende riba loke abo ta desea. E buki Kico Bijbel Ta Siña Realmente? tin 19 les. Nos por trata sea algun of tur e lesnan aki cu bo na e speed cu abo ta desea.

Mi tin cu bira testigo di Jehova?

No. Nos ta respeta cada hende su derecho di scoge loke e kier kere. Sinembargo, e conocemento di Bijbel cu un persona ta haya por yud’e dicidi mihor kico e mes lo scoge.

Unda mi por haya mas informacion?

E website jw.org ta duna informacion exacto tocante e creencia- y actividadnan di testigonan di Jehova.

Con mi por pidi un curso di Bijbel?

Yena e formulario riba www.dan124.com.
Tuma contacto cu testigonan di Jehova den bo area.

^ par. 4 Generalmente, nos ta duna curso di Bijbel sea na un hende of na un grupo chikito.

^ par. 9 Publica pa testigonan di Jehova. Mas cu 230 miyon ehemplar di e buki aki a ser imprimi den mas cu 260 idioma.

YUDANSA PA FAMIA

“Mi a mira cambionan grandi den mi esposa ora cu el a cuminsa studia Bijbel y nos bida di famia a bira mas mihor. Mi tabatin gana di sa kico e tabata siñando y pesey mi tambe a cuminsa studia. Loke mi a siña a haci mi un mihor persona. E curso di Bijbel a uni nos famia.”—Eziquiel.

“Despues cu mi a cuminsa studia Bijbel, mi a stop di uza droga y di bebe hopi alcohol. Tambe mi a siña con pa controla mi rabia. Mi cas ta mas limpi y mas ordena. Mi ta aprecia mi famia mas y mi ta disfruta di haci cos cu ta haci nan feliz. Mi ta hopi mas feliz awor.”—Karen.

“Algun hende a critica mi pasobra mi tabata studia Bijbel. Pero mi esposo a apoya mi decision, y el a bisa: ‘Mi no ta worry kico hende bisa. Loke ta importante pa mi ta cu bo a cambia y bira un mihor persona. Sigui haci loke bo ta haciendo.’ Nos bida di famia ta mas mihor cu nunca.”—Viniana.

Testigonan di Jehova

Un Curso di Bijbel pa Un y Tur