Abo ta pensa cu cos lo bira mihor den futuro? Hopi hende ta purba di keda positivo a pesar di e problemanan serio cu nos ta enfrenta awe. Pero di berdad nos por spera cu cos lo bira mihor? Si! Bijbel ta duna nos berdadero speransa pa un mihor futuro.

•  Ki speransa Bijbel ta duna?

•  Loke Bijbel ta priminti ta zona mucho bon pa ta berdad?

•  Con e promesanan di Bijbel lo cumpli?

•  Na ki tempo e promesanan aki lo cumpli?

•  Con e promesanan di Bijbel por yuda nos awe?

 Bijbel ta bisa cu hende lo enfrenta problema hopi dificil. Sinembargo, Bijbel ta priminti cu e problemanan aki lo no afecta nos pa semper. Laga nos wak algun ehempel.

•   Problema: Hende cu no tin luga di biba

   Loke Bijbel ta bisa: “Y nan lo traha cas y biba den nan.”—Isaias 65:21.

   Loke lo pasa den futuro: Hende lo tin nan mes cas.

•   Problema: Desempleo y pobreza

   Loke Bijbel ta bisa: “Mi scoginan lo disfruta di e obra di nan mannan pa hopi tempo.”—Isaias 65:22.

   Loke lo pasa den futuro: Tur hende lo disfruta di trabou satisfactorio.

•   Problema: Inhusticia

   Loke Bijbel ta bisa: “Prinsnan lo goberna cu [husticia].”—Isaias 32:1.

   Loke lo pasa den futuro: Nunca mas hende lo no ser trata inhustamente pa motibo di nan nacionalidad of posicion social, y ningun hende lo no ta pober. Tur hende lo ser trata na un manera husto.

•   Problema: Mal nutricion y hamber

   Loke Bijbel ta bisa: “Lo tin abundancia di maishi den e Tera, riba cabes di e seronan.”—Salmo 72:16.

   Loke lo pasa den futuro: Tur hende lo tin cuminda saludabel na abundancia. Ningun hende lo no bay drumi cu hamber ni sufri pa motibo di mal nutricion.

•   Problema: Crimen y violencia

   Loke Bijbel ta bisa: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.”—Mikeas 4:4.

   Loke lo pasa den futuro: Tur hende lo sinti nan safe, pasobra lo no tin hende malbado mas riba Tera, y “e hustonan lo hereda e Tera.”—Salmo 37:10, 29.

•   Problema: Guera

   Loke Bijbel ta bisa: “Nacion lo no lanta spada contra nacion, y nunca mas nan lo train pa guera.”—Isaias 2:4.

   Loke lo pasa den futuro: Paz lo reina riba Tera. (Salmo 72:7) Ningun hende lo no ta tristo pasobra un ser keri di nan a muri den guera, ni ningun hende lo no bira refugiado pa motibo di guera.

•   Problema: Maleza

   Loke Bijbel ta bisa: “Ningun habitante lo no bisa: ‘Mi ta malo.’”—Isaias 33:24.

   Loke lo pasa den futuro: Hende lo no sufri mas pa motibo di limitacion fisico of pasobra nan ta malo. (Isaias 35:5, 6) Bijbel ta hasta priminti cu “lo no tin morto mas.”—Revelacion 21:4.

•   Problema: Daño na medioambiente

   Loke Bijbel ta bisa: “Tera seco y desierto lo ta contento, y Araba lo regociha y floria manera rosa.”—Isaias 35:1.

   Loke lo pasa den futuro: Henter Tera lo bira un paradijs pa hende biba ariba, manera tabata Dios su proposito for di principio.—Genesis 2:15; Isaias 45:18.

 Si bo ta sinti asina, ta comprendibel. Sinembargo, nos ta anima bo pa analisa loke Bijbel ta bisa tocante futuro. Dicon? E promesanan di Bijbel ta diferente for di e promesanan cu hende ta haci y for di loke hende ta bisa lo sosode den futuro. E promesanan di Bijbel ta bin di Dios. Laga nos wak dicon esey ta haci un diferencia asina grandi:

•   Nos por confia Dios. Bijbel ta bisa cu Dios “no por gaña.” (Tito 1:2) Ademas, ta Dios so tin e habilidad pa bisa di antemano loke lo pasa den futuro. (Isaias 46:10) Den Bijbel tin varios ehempel cu ta mustra cu loke Dios bisa semper ta tuma luga. Pa mas informacion, wak e video Con Nos Por Tin Sigur Cu Loke Bijbel Ta Bisa Ta Berdad?

•   Dios por soluciona nos problemanan. Bijbel ta bisa cu Dios tin poder pa haci tur loke e ta desea di haci. (Salmo 135:5, 6) Cu otro palabra, nada no por stroba Dios di cumpli cu su promesanan. Ademas, Dios kier yuda nos pasobra e ta stima nos.—Juan 3:16.

 Pero, kisas bo ta puntra bo mes: Si Dios kier yuda nos y e tin e poder pa yuda nos, dicon ainda nos tin asina tanto problema? Pa haya contesta pa e pregunta ey, wak e video Dikon Dios Ta Permití Sufrimentu?

 Dios lo uza su Reino, un gobierno den cielo, pa cumpli cu su promesanan. Dios a nombra Hesucristo como Rey di e Reino ey, y el a duna Hesus autoridad pa cuida Tera y e hendenan riba dje. Ora Hesus tabata riba Tera, el a cura hende malo, alimenta hende cu tabatin hamber, controla e weer y resucita hende cu a muri. (Marco 4:39; 6:41-44; Lucas 4:40; Juan 11:43, 44) Di e manera ey, el a mustra kico lo e haci como Rey di Dios su Reino.

 Pa haya sa mas tocante con Dios su reino lo beneficia bo, wak e video Kiko e Reino di Dios Ta?

 Pronto! Con nos por tin sigur di esey? Bijbel a menciona sucesonan cu lo indica cu Dios su Reino ta cerca di cuminsa goberna Tera. (Lucas 21:10, 11) Nos ta mira e sucesonan ey tumando luga awe.

 Pa haya sa mas, lesa e articulo: “Na Ki Tempo e Reino di Dios Lo Goberna Mundo?”

 Un escritor di Bijbel a compara e speransa cu Bijbel ta duna nos cu un “anker pa nos alma.” (Hebreo 6:19) Mescos cu un anker ta tene un barco stabiel durante un tormenta, Bijbel su speransa pa futuro por yuda nos trata cu e problemanan cu nos ta enfrenta awe. Nos speransa por yuda nos keda calmo y feliz, pensa bon y hasta keda saludabel.—1 Tesalonicensenan 5:8.