SIGUI VIGILA!
Tiroteo na Scol—Kico Bijbel Ta Bisa?
Dia 24 di mei 2022, un tragedia teribel a tuma luga na Merca, na e pueblo Uvalde na Texas. E corant The New York Times a bisa cu “un homber arma a mata 19 mucha y dos juffrouw di scol ... na Robb Elementary School.”
Ta masha lamentabel cu e tipo di sucesonan ey ta tuma luga asina tanto den nos tempo. E corant USA Today a indica cu na Merca so “tabatin 249 tiroteo na scol aña pasa. For di 1970, nunca tabatin asina tanto tiroteo den un solo aña.”
Dicon e cosnan horibel ey ta tuma luga? Con nos por trata cu e situacionnan horibel ey? Tin speransa cu lo yega un fin na violencia? Bijbel ta contesta e preguntanan ey.
Dicon mundo ta birando mas y mas violento?
Bijbel ta bisa cu nos ta bibando den “e ultimo dianan.” Bijbel ta bisa tambe cu den e tempo aki hopi hende lo no tin “cariño”, y nan lo ta “feroz.” Nan lo haci cos cruel y violento. Y e hendenan cu tin un actitud asina lo “bay di malo pa pio.” (2 Timoteo 3:1-5, 13) Pa haya mas informacion tocante esaki, lesa e articulo: “Bijbel A Bisa Con Hende Lo Pensa y Actua den Nos Tempo?”
Hopi hende ta puntra nan mes: Dicon Dios no ta haci algo pa preveni suceso horibel manera tiroteo na scol? Si bo kier sa loke Bijbel ta bisa tocante esaki, lesa e articulo: “Dicon Cos Malo Ta Pasa cu Bon Hende?”
Con nos por trata cu e situacionnan horibel ey?
“Tur loke a ser skirbi anteriormente a ser skirbi pa nos instruccion, pa asina mediante ... e consuelo for di e Scritura nos por tin speransa.”—Romanonan 15:4.
Principio di Bijbel por yuda nos trata cu e violencia cu tin den mundo awe. Pa haya mas informacion, wak e revista Spierta! cu tin e titulo: “Lo Yega un Fin na Violencia?”
Pa mira con un mayor por yuda un yiu trata cu mal noticia, lesa e articulo: “Con Mal Noticia Ta Afecta Mucha.”
Lo yega un fin na violencia?
“E lo rescata nan bida for di opresion y violencia.”—Salmo 72:14.
“Nan lo bati nan spadanan traha ploeg cu nan, y nan lo bati nan lansanan traha sker pa snoei cu nan; nacion lo no lanta spada contra nacion, y nunca mas nan lo no train pa guera.”—Mikeas 4:3.
Dios si por logra loke niun hende por logra. Su Reino, cu ta den cielo, lo elimina tur arma y caba cu violencia. Pa haya sa loke e Reino di Dios lo logra, lesa e articulo: “Bou di e Reino di Dios Lo ‘Tin Abundancia di Paz.’”
