“Pasenshi di esposo cu esposa ta ser poni na prueba tur dia. Pa un hende soltero, por parce cu pasenshi no ta asina importante, pero e ta sumamente importante pa exito den bo matrimonio.”—John.

•  Dicon bo mester tin pasenshi?

•  Con bo por demostra pasenshi?

•  “Pasenshi ta esencial”

•   Den un matrimonio ta facil pa bo mira otro su defectonan.

   “Despues di algun tempo casa, ta bira mas facil pa bo cuminsa enfoca riba e cualidadnan menos bon di bo casa. Ora e actitud negativo ey cuminsa desaroya, bo por perde pasenshi masha lihe.”—Jessena.

•   Bo por papia sin pensa si bo no tin pasenshi.

   “Mi ta masha lihe pa bisa loke mi ta pensa, pesey mi ta bisa cos cu mi no mester bisa. Si mi tabatin mas pasenshi, lo mi por a evalua un asunto prome y evita di bisa algo innecesario.”—Carmen.

   Bijbel ta bisa: “Amor tin pasenshi y ta bondadoso.” (1 Corintionan 13:4) Pues, ta logico cu dos hende cu ta stima otro mester por tin pasenshi cu otro. Pero, esey no ta semper e caso. John, menciona anteriormente, a bisa: “Mescos cu por pasa cu cualkier bon cualidad, ta mas facil pa bo perde pasenshi cu pa bo desaroy’e. Bo tin cu haci esfuerso pa cultiva mas pasenshi.”

•   Ora algo inespera pone bo pasenshi na prueba.

   Por ehempel: Bo casa ta bisa bo algo cu ta ofende bo. Bo por tin e tendencia di ofend’e bek.

   Principio di Bijbel: “No sea lihe den bo curason pa rabia [of, pa sinti bo ofendi, NW], pasobra rabia ta biba den pecho di hende bobo.”—Eclesiastes 7:9.

   Con pa demostra pasenshi: Warda un rato. Prome cu bo reacciona, ta bon pa bo bisa bo mes cu loke bo casa a bisa bo no ta pa malo. Segun e buki Fighting for Your Marriage: “Mayoria di nos ta reacciona hopi biaha riba loke nos ta interpreta y no riba loke realmente nos casa a bisa y tabata kiermen.”

   Pero hasta si bo casa bisa algo pa provoca bo, si bo tin pasenshi y dominio propio, bo por mehora e situacion en bes di hacie pio. Principio di Bijbel: “Pa falta di palo, candela ta paga.”—Proverbionan 26:20.

   “Si bo cuminsa mira bo esposa como bo enemigo, para keto un rato y purba di corda kico ta loke a pone bo enamora di dje y mesora purba di haci algo bon p’e.”—Ethan.

   Pensa riba esaki:

  •  Con bo ta reacciona ora bo casa bisa of haci algo cu ta hurt bo?

  •  Con bo por mustra mas pasenshi si e mesun cos bolbe pasa?

•   Ora cu bo casa ta keda haci e mesun fout.

   Por ehempel: Tur ora bo casa ta laat, y bo ta cunsumi pasobra e ta laga bo keda warda.

   Principio di Bijbel: “Sigui soporta otro y pordona otro libremente.”—Colosensenan 3:13.

   Con pa demostra pasenshi: Purba di pone interes di bo casa prome cu di bo mes. Puntra bo mes: Si mi haci e cos aki un problema, lo e mehora nos relacion of dañ’e? Corda tambe cu “nos tur ta trompica hopi biaha.” (Santiago 3:2) Esey ta nifica cu abo tambe tin cos pa traha riba dje.

   “Tin biaha mi tin mas pasenshi cu un amiga cu mi tin cu mi esposo. Mi ta kere cu esey ta debi cu mi ta pasa mas tempo hunto cu mi esposo y mi ta mira su imperfeccionnan. Pero pasenshi ta un muestra di amor y respet, pues, e ta importante den matrimonio.”—Nia.

   Pensa riba esaki:

  •  Cuanto pasenshi bo tin ora cu bo casa haci un fout?

  •  Kico bo por haci pa demostra mas pasenshi den futuro?