YUDANSA PA FAMIA | MATRIMONIO
Pasa Tempo cu Otro
Hopi pareha casa a ripara cu, maske nan ta hunto den e mesun cas, toch nan no ta combersa dje hopi ey cu otro. Con bin?
Hunto pero toch aparta. Con bin?
Nos ta mucho cansa
“Hopi biaha ora nos haya chens pa pasa tempo cu otro, un di nos ta cansa; ta sea ami ta cansa of ta mi casa ta cansa. Anto ora mi ta cansa, cualkier cos chikito ta traha riba mi nervio. Pesey ta mihor nos djis sinta wak television.”—Anna.
Nos ta pasa hopi tempo riba Internet
“Bo por pasa hopi ora riba internet y red social sin papia cu bo casa. Ta comosifuera cu cada un di nos ta sinta den un camber apart.”—Katherine.
Nos no ta interesa den e mesun cosnan
“Hopi biaha ora mi casa yega cas for di trabou, e ta bay haci su hobbynan pa oranan largo. E ta traha duro. Pues, e mester di tempo pa relaha. Pero mi tin gana pa nos pasa mas tempo hunto.”—Jane.
Trabou
“Tecnologia a pone cu ta mas dificil pa tene trabou separa for di bida di famia. Hopi biaha, mi ta pasa tempo ta contesta e-mail y mensahe di trabou en bes di pasa tempo cu mi casa.”—Mark.
Loke boso por haci
Corda cu ta hopi importante pa pasa tempo hunto cu bo casa.
Principio di Bijbel: “Haci sigur kico ta e cosnan mas importante.”—Filipensenan 1:10.
Pensa riba esaki: E cosnan cu mi ta haci ta demostra cu mi matrimonio ta mas importante cu mi trabou y mi hobbynan? Ta ora mi resta un tiki tempo y energia so mi ta pasa tempo cu mi casa?
Sugerencia: Saca tempo regularmente pa boso dos pasa tempo hunto, y no laga nada distrae boso durante e momentonan ey.
“Mi ta gusta hopi ora mi casa plania algo pa nos dos haci hunto. Esey ta laga mi sinti hopi bon, y mi ta sinti cu di berdad e kier pasa tempo cu mi. Anto esey ta pone cu mi ta stim’e mas ainda.”—Anna.
Pone telefon y otro aparato electronico un banda pa un rato.
Principio di Bijbel: “Tin un tempo stipula pa tur cos.”—Eclesiastes 3:1, Beibel Santu.
Pensa riba esaki: Cuanto biaha mi sa laga mensahe cu ta drenta kita mi atencion y stroba mi di duna mi casa tur mi atencion?
Sugerencia: Purba di come maske ta un biaha pa dia hunto, y laga boso telefon den un otro camber. Ora boso ta come hunto, boso ta haya bon chens pa papia tocante con e dia a bay.
Ora ta posibel, haci diligencia hunto of haci trabou di cas hunto.
Principio di Bijbel: “Dos ta mihor cu un, pasobra nan tin un bon pago pa nan trabou.”—Eclesiastes 4:9, Beibel Santu.
Pensa riba esaki: Cuanto biaha abo of bo casa ta haci un trabou di cas of un diligencia boso so?
Sugerencia: Haci cos hunto y yuda otro, hasta si ta algo cu un di boso por haci boso so.
“Purba mira cosnan manera haci compras, laba co’i kibra, dobla paña y haci cura limpi como un oportunidad pa pasa tempo cu otro.”—Nina.
Sea realistico.
Principio di Bijbel: “Laga tur hende mira ki rasonabel boso ta.”—Filipensenan 4:5.
Pensa riba esaki: Con ta algun manera cu bo por mustra cu bo ta rasonabel y cu bo no ta pidi mucho hopi di bo casa?
Sugerencia: Papia cu otro pa saca afo kico ta necesidad di cada un di boso. Despues, dicidi hunto con boso lo uza boso tempo.
“Mi casa tin hopi energia. Pero como cu mi tin problema cu salud, ami si no tin hopi energia. Hopi biaha, mi ta bisa mi casa pa e bay haci algo cu e ta gusta y ami ta keda cas. Ami ta keda sosega, y e por bay haci ehercicio. Asina, nos tur dos ta sinti bon.”—Daniela.
Tipnan pa combersacion
Prome, purba di contesta e preguntanan aki pa bo mes. Despues, trata e contestanan hunto.
Bo ta haya cu abo cu bo casa ta pasa suficiente tempo hunto?
Kico bo casa sa haci pa boso pasa tempo hunto? Kico bo ta aprecia di esey?
Kico bo kier pa bo casa mehora den dje of haci diferente?
Bo sa laga bo telefon of otro aparato stroba bo di scucha bon ora bo casa ta papia cu bo? Esey sa sosode hopi?
Con ta algun manera cu boso tur dos por mustra cu boso ta rasonabel y cu boso no ta pidi hopi di otro?
Ki cambio cada un di boso por haci e siman aki pa boso por pasa mas tempo hunto, sin laga telefon of otro aparato kita boso atencion pa otro?